Fesili Mai le Au Faitau

Po o Ioane lea na papatisoina Iesu e faasino ia “Ioane le Papatiso” (“John the Baptist”) po o “Ioane o lē na papatisoina tagata” (“John the Baptizer”)?

E saʻo uma igoa na e lua ma e lagolagoina foi e faamatalaga a le Tusi Paia.

O Ioane sa “ia saunia le nuu e faatatauina mo le Alii,” lea na ia faia e ala i le “talaʻi atu le papatisoga o le salamo ina ia faamagaloina agasala.” (Luka 1:17; 3:3) Na tusia e le aposetolo o Mataio e faapea: “Na sau ai Ioane le papatiso, ua talaʻi atu i le vao o Iutaia, ua faapea atu, Ina salamo ia outou; auā ua latalata mai le malo o le lagi. . . . Ona o atu ai lea ia te ia o Ierusalema, ma Iutaia uma, atoa ma le itu uma o Ioritana; ua papatisoina foi i latou i Ioritana e ia, ua faaali atu e i latou a latou agasala.”—Mataio 3:1-6.

Ia mātau, na iloa e Mataio o Ioane o “le Papatiso.” E foliga mai sa manatu Mataio, o lē sa faatatau lana tala i tagata Iutaia e faapea, e tatau ona iloa e tagata Iutaia po o ai “le Papatiso.” Na ia faaaogā “le Papatiso” e fai ma faaiu. Na faaaogā e Iesu ma ona soʻo le faaupuga “Ioane le Papatiso,” e pei ona sa faia e auauna a Herota. *—Mataio 11:11, 12; 14:2; 16:14.

Na faaaogāina foi e le soʻo o Mareko le faaupuga lava lea o “le Papatiso.” (Mareko 6:25; 8:28) Ae i le faailoaina atu o Ioane, na taʻua ai e Mareko o ia o “Ioane o lē na papatisoina tagata.” (Mareko 1:4) E eseese le upu Eleni o loo faaaogā i le Mareko 1:4 mai isi fuaiupu. Atonu o loo faasino foi le Mareko 1:4 i “le tagata papatiso.” Na faamatilatila mai e Mareko le galuega sa faia e Ioane; o ia lea sa faia le papatisoga, o lē na papatisoina tagata.

Ae ui i lea, e lē o aliali mai ai e faapea, e tatau ona tatou faia se faaeseesega i nei auala e lua e faasino atu ia Ioane. I le Mareko 6:24, 25, ua tatou faitau ai e uiga ia Salome e faapea: “Ona ulufafo lea o ia, ma fai atu i lona tinā, Se a se mea ou te fai atu i ai? Ua fai mai o ia, O le ulu o Ioane [“le na papatisoina tagata,” NW]. Ona ulufale loa lea o ia i le tupu, ua tele lise, ua fai atu ia te ia, ua faapea atu, Ou te manao ina ia e aumai nei lava le ulu o Ioane le Papatiso. Sa feauauai le faaaogāina o nei faaupuga e lua.

Atonu e malamalama nisi tagata i le faaupuga “le Papatiso” e tusa ai ma lona uiga lona lua i se lomifefiloi e faapea: “O se sui po o se taʻitaʻi o se ituaiga lotu faaevagelia Porotesano sa faailogaina e ala i se ituaiga o pulega faalefaapotopotoga ma papatisoina e ala i le faatofuina na o tagata talitonu.” E mautinoa sa lē faapena Ioane.

O le mea lea, e saʻo uma ai ma talafeagai taʻu o “Ioane le Papatiso” ma “Ioane lē na papatisoina tagata.”

[Faaopoopoga i lalo]