Fesootaiga—E Sili atu i le Tau ina Talanoa

SEʻI vaai faalemafaufau i le anoanoai o ni tagata tafafao maimoa o loo matamata i se laufanua matagofie. E ui lava o loo vaaia e le au tafafao maimoa le vaaiga lava e tasi, ae e eseese vaaiga a tagata taitoatasi. Aisea? Auā e tofu lava le tagata ma lona manatu i le mea o ia vaai i ai. E lē mafai ona tutū faatasi ni tagata se toalua i se tulaga e tasi. E lē gata i lea, e lē o tagata uma foi o taulai atu la latou vaai i se mea e tasi. E tofu lava le tagata ia ma le vala e fiafia faapitoa i ai.

O le tulaga moni foi lena i le faaipoipoga. E tusa lava po o le ā le tele o lo la auaufaatasi, ae leai lava ni tagata se toalua e malilie atoatoa i se mea e tasi. E eseese tane ma avā i vala e pei o faalogona ootia, o mea na tutupu ai a o laiti, ma taaʻiga faaleaiga. O le lē tutusa o uiga ona o na tulaga, e mafai ona avea ma puna o finauga ogoogo. Na taʻua tuusao e le aposetolo o Paulo e faapea: “O i latou ua faaipoipo, o le a oo i ai tiga ma le loto momomo.”—1 Korinito 7:28, The New English Bible.

O fesootaiga, e aofia ai se taumafaiga ina ia tuufaatasia nei eseesega i se faiā faaletino e tasi. E manaomia ai e lenei mea ona faataatia ese se taimi e talanoa ai. (Tagai i le pusa i le itulau e 7.) Ae e tele lava mea e aafia ai.

Faaalia o le Malamalama

Ua taʻua i se faataoto i le Tusi Paia e faapea: “O le loto o lē ua atamai, ua mafua ai ona faaalia e lona gutu le malamalama, e faaopoopoina foi i ona laugutu le mautinoa.” (Faataoto 16:23, NW) O le upu Eperu lea ua faaliliuina faapea, ‘ua mafua ai ona faaalia le malamalama’ o lona uiga faavae, ia faautauta, ia fuafua ma le faaeteete mea i le mafaufau. O lea la, o le taulaiga autū o fesootaiga uigā, o le loto, ae lē o le gutu. O se tagata fai fesootaiga lelei, e tatau ona sili atu na i lo o le tau ina tautala; e tatau foi ona avea o ia ma sē e faalogologo lelei. (Iakopo 1:19) E tatau ona ia iloa faalogona ma mafuaaga o amioga faaalia a se paaga.—Faataoto 20:5.

E faapefea? I nisi taimi, e mafai ona faataunuuina lenei mea e ala i le matauina o tulaga ua mafua ai se feteenaiga. Po o aafia lau paaga i ni mafatiaga i ona faalogona ootia po o lona tino? Pe lē o se maʻi ea ua mafua ai ona faalelelei le mafaufau o lau paaga? Ua faapea mai le Tusi Paia: “Maeu se olioli i le iloa ona avatu o le upu saʻo i le taimi saʻo!” (Faataoto 15:23, Today’s English Version) O lea, o le talanoaina o tulaga  o le a fesoasoani ia te oe e tali atu ai ma le tusa.—Faataoto 25:11.

Peitai, o le pogai o se feteenaiga e masani lava ona o ni mea na tutupu a o leʻi faaipoipo.

Ia Malamalama i le Taimi ua Tuanai

O mea na tutupu a o laiti, ua tele ai se aafiaga i o tatou mafaufauga ina ua tagata matutua. Ona e eseese aiga e ō mai ai paaga faaipoipo, e lē maalofia ai foi la manatu e mafua ai ona feteenai.

Ua faataitaia lenei mea e se mea na tupu o loo faamauina i le Tusi Paia. Ina ua toe faafoi mai le atolaau o le feagaiga i Ierusalema, sa faaalia i lumamea e Tavita lona matuā fiafia. Ae faapefea lana avā o Mekala? Ua faamatala mai e le Tusi Paia e faapea: “Ona vaai mai lea o Mekala le afafine o Saulo i le faamalama, ua na iloa Tavita le tupu, o loo osooso ma sivasiva i luma o Ieova, ona ʻinoʻino lea o ia ia te ia i lona loto.”—2 Samuelu 6:14-16.

Sa faaalia e Mekala le tulaga lē faatuatua o lona tamā amioleaga o Saulo. Ua faapea mai ni tagata fai manatu i le Tusi Paia o C. F. Keil ma F. Delitzsch, o le pogai lenei na faasino atu ai ia Mekala i le fuaiupu e 16 faapea o le “afafine o Saulo” na i lo o le taʻua faapea o le avā a Tavita. Po o le ā lava le tulaga, ae o le iai pea o finauga i lo la va, ua manino mai ai sa lē tutusa le ma-natu o Tavita ma Mekala e uiga i lenei fuafuaga olioli.—2 Samuelu 6:20-23.

Ua faaalia i lenei faaaoaoga e faapea, o taaʻiga faaʻoleʻole mai le taimi na tausia aʻe ai a o laiti, ua mafua ai ona matuā eseese le vaaiga a le tane ma le avā i mataupu. E moni lenei mea e tusa lava po o la auauna autasi uma ia Ieova. Mo se faaaoaoga, o se avā sa leʻi lava se lagolagosua tau faalogona na tuuina atu i ai a o laitiiti, atonu na te ono faaalia se manaoga e sili atu mo se faamaoniga ma se faamautinoaga faapea e alofa lana tane ia te ia. E ono lē mautonu ai lana tane i lenei mea. Atonu o le a faapea atu le tane: “Ua faaselau ona ou taʻu atu ou te alofa ia te ia, ae e tumau pea ona foliga mai e lē lava lena!”

E tusa ai la ma lenei tulaga, ua aofia ai i fesootaiga le “aua neʻi taitasi ma vaavaai i ana lava mea, a ia taitasi ma vaavaai i mea a isi.” (Filipi 2:4) Ina ia fetalanoaai, e tatau i se tane ona vaai i mea na tutupu i le olaga o lana avā i aso ua mavae na i lo o le vaavaai i na o mea na tutupu ia te ia lava. Ma o le mea moni, e ao foi ona uunaia se avā e faia faapena i lana tane.—1 Korinito 10:24.

Pe Afai sa Faaleagaina i Aso ua Mavae

E sili ona faigata faanaunauga totino, pe afai na toso faamalosia pe na faaleagaina i feusuaiga se paaga a o laitiiti—ma e faanoanoa, ona ua tupu tele lenei faafitauli i aso nei. Mo se faaaoaoga, atonu o le a iloa e se avā i le taimi o le mafana o feusuaiga, e lē mafai ona ia iloa se eseesega o aso ua mavae ma le taimi nei, le eseesega o lana paaga ma lē na faia le solitulafono, po o le eseesega i le feusuaiga mafana ma le faamalosia e faia feusuaiga. E mafai e lenei mea ona faatupu ai le lē fiafia ae maise lava pe afai e lē manatunatu le tane i lenei faalavelave maaleale mai le tulaga o lana avā.—1 Peteru 3:8.

 Ona e lē mafai ona e suia le taimi ua mavae pe foia atoatoa ona āuga, e tele mea e mafai ona e faia e faamafanafanaina ai se paaga ua loto mafatia. (Faataoto 20:5) E faapefea? Na tusia e Peteru: “O outou tane, e ao ona outou taumafai e malamalama i a outou avā o loo outou nonofo faatasi.” (1 Peteru 3:7, Phillips) O le malamalama i le olaga o lau paaga i aso ua mavae, o se vaega matuā tāua lea o fesootaiga. A aunoa ma le alofa mutimutivale, o le a leai se aogā o au upu.

Sa ‘mutimutivale le alofa’ o Iesu ina ua fesagai ma i latou na maua i maʻi tiga, e ui ina e leʻi oo totino ia te ia o latou mafatiaga. (Mataio 14:14) E faapena foi la, atonu e te leʻi oo totino i le tuulafoaiina po o le faaleagaina e pei ona oo i lau avā, ae na i lo o le manatu māmā i ona lagona tiga, e ao ona e amanaia lona olaga i aso ua mavae, ma avatu lau lagolagosua ia te ia. (Faataoto 18:13) Na tusia faapea e Paulo: “O i tatou o e malolosi ia tatou fesoasoani i le vaivai o e ua le lavā e tatau ai; a e aua neʻi faafiafia i o tatou lava loto.”—Roma 15:1.

Maileia i le Ita

O le faaipoipoga, e pei o se ipu taugata. Pe a faaleagaina i le faia o le mulilua, o le a tutupu mai ai le lē mafaitaulia o toatuga. (Faataoto 6:32) E moni, pe afai e filifili le paaga o loo mamā e faamagalo, e mafai ona toe faaleleia ni mea na faaletonu e ala i se faaleleiga. Ae o le a manatua pea na faaletonu, ma i se taimi o taugaupu, atonu o le a iai pea se faanaunauga e toe tepa i tua i na faaletonu ma faaaogā ai mea ua mavae e fai ma auupega.

O le ita, o se tali masani lena pe a lē faamaoni se paaga. Ae afai ua e faamagaloina lau paaga, ia faaeteete e aua neʻi avea ni mafaufauga leaga ma itu e suia ai le lelei na e faia i le faaalia o le loto faamagalo. E tusa lava pe punapuna mālie aʻe i totonu o lou loto pe faasasao atu ma le lē alofa, ae o le ita pea, e afaina ai paaga uma. Aisea? Ua fautuaina e se tasi fomai e faapea: “Afai e tiga ou faalogona ona o lau paaga, ia ona o loo tumau pea ona e alofa ia te ia. O lea, o lou musu ia te ia, po o le sailia o se tauimasui, o le a lē gata ina e faamanuaina ai lau paaga, ae e faaleagaina ai foi oe. Ua atili ai ona e motusia le faiā lena sa e moomoo ina ia atoatoa.”

Ioe, e lē mafai ona e faaleleia feeseeseaiga i lau faaipoipoga e aunoa ma le faatoafilemuina o lou ita. O lea la, i se taimi e lē o aasa ai faalogona, ia talanoa ai loa ou faalogona ma lau paaga. Ia faamatala atu le mafuaaga ua e tiga ai, se mea o e manaomia e maua ai se lagona mautinoa, ma se mea o le a e faia e faatumauina ai la oulua faiā. Aua lava neʻi faaaogāina mea na tutupu i le taimi ua mavae e fai ma auupega e faamalosia ai lau itu o le finauga.

O le Pulea e Fualaau Faasāina e Faamanuaina ai Fesootaiga

E matuā mafatia lava se faaipoipoga pe afai e faaaogā sese e se paaga le ʻava malosi ma fualaau  faasāina. O le paaga e lē o tagofia na mea, e ono oo i se tulaga e tutusa ma le tulaga o Apikaila, e pei ona taʻua mai e le Tusi Paia. A o “onā tele” lana tane o Napalu, sa taumafai malosi Apikaila ina ia taui atu le tuufaafeagai o iuga o lana amio faavalea. (1 Samuelu 25:18-31, 36) O faaipoipoga ua matuā faaleagaina ai le isi paaga ona ua pulea e le ʻava malosi ma fualaau faasāina, ae o loo pagatia ai le tasi i le taumafai ina ia suia le amio a lea paaga, ua faaatagia mai ai pea le aiga o Napalu ma Apikaila. *

O le mea moni, o se matuā mapusaga pe a amata ona suia lē sa pulea e ʻava malosi ma fualaau faasāina. Ae ua na o se amataga lena. Seʻi manatu i se afā matautia ua matuā faaleagaina ai sina aai laitiiti. Ua malepelepe i lalo fale, ua liaiina laau, ua motusi uaea telefoni. E matuā fiafia tele lea aai pe a mavae atu le afā. Ae ua manaomia nei se galuega telē o le toe fausia o mea na faaleagaina. E faapena foi ona moni pe a amata ona suia se paaga. E tatau ona toe fausia faiā sa malepelepe. E tatau ona toe faamautuina le fefaatuatuai ma le faamaoni. E manaomia ona toe faaleleia laina o fesootaiga. Mo le toe fuataiina o lē na pulea e ia mea, o lenei toe fausia mālie aʻe, o se vaega lea o le “tagata fou” e manaomia e le Tusi Paia ona atiina aʻe e Kerisiano. O lenei uiga fou faaletagata e tatau ona aofia ai “le malosi e toe fuataiina ai o outou mafaufau.”—Efeso 4:22-24, NW.

O se suesuega faale-Tusi Paia, na mafai ai e Leonard ma Elaine ona taofia le faaaogaseseina o fualaau faasāina, ae sa leʻi atoatoa ona faia le vaega a le malosi e toe fuataiina ai le mafaufau. * E leʻi pine ae aliai mai foi isi masaniga leaga. Ua faapea mai Elaine: “Mo le 20 tausaga sa ma taumafai ai e faatatauina mataupu silisili o le Tusi Paia ma ia maua se faaipoipoga faamalie loto, ae sa lē mafai lava ona ma maua. Sa matuā mauaa a ma masaniga leaga. Sa lē mafai e a ma suesuega ma tatalo ona aveesea ai nei masaniga leaga.”

Sa saili e Leonard ma Elaine se fautuaga ina ia malamalama ai i pogai o a la masaniga leaga. O mataupu fetaui lelei na aumaia e le “auauna faamaoni ma le mafaufau” e uiga i tamaiti na faaleagaina i feusuaiga, le ʻava malosi, ma le faaaloalo mo fafine, sa o se fesoasoani faapitoa lava. * (Mataio 24:45-47) Ua faapea mai Elaine: “Na ma maua le fesoasoani ina ia toe faaleleia mea na faaleagaina ma toe faafoisia ai la ma faiā mafana.”

Foiaina o Faafitauli

Sa lē mafai e Repeka ona taofi lona ita ona o avā a lana tama o Esau. Ona o le fefe ina neʻi mulimuli atu ai le isi ana tama o Iakopo i le faaaoaoga a Esau, na faailoa ai e Repeka lona ita i lona faapea atu i lana tane o Isaako: “Ou te fiu i loʻu ola ona o fafine o sa Hetī, afai e fai avā Iakopo i se fafine o sa Hetī, pei o ia fafine o le nuu, pe se a le toe aoga o loʻu ola ia te aʻu?”—Kenese 27:46.

Ia mātau, a o tautala maumauai atu Repeka e uiga i ona faalogona, na te leʻi osofaia ai Isaako. Sa leʻi fai atu o ia, “O oe lava ua tupu ai le leaga!” pe faapea atu foi, Sa tatau ona e pulea  lelei lenei tulaga!” Na i lo o le faia faapena, sa faaaogā e Repeka le suinauna “Ou te” e faamatala atu ai le auala na aafia ai o ia i le faafitauli. O lenei faalatalata atu na faaosofia ai le alofa mutimutivale o Isaako, ae leʻi manao e faafiti atu ina ia tauleleia ai pea o ia. I le leai o se lagona faapea ua osofaia o ia, na foliga mai ai na vave lava ona tali atu Isaako i le olega a Repeka.—Kenese 28:1, 2.

E mafai e tane ma avā ona aʻoaʻo mai le faaaoaoga a Repeka. Pe a mapuna aʻe se feeteenaiga, ia tagofia loa le faafitauli na i lo o le osofai atu o le tasi i le isi. I le pei o Repeka, ia faaali atu lou tiga mai le itu o aafia ai oe. E sili atu ona uigā lou faapea atu: “Ua ou lē fiafia lava ona . . .” pe faapea atu foi, “Ua ou lagona le lē mautonu ona . . .” na i lo o le faapea atu, “Se ua e faaita mai foi aʻu!” pe faapea atu, “E te lē taitai ona e malamalama ia te aʻu!”

E Sili atu i lo o le Tumau

O le faaipoipoga a le uluai ulugalii o Atamu ma Eva, sa tumau mo le tele o senituri, i le aumaia o se aiga o atalii ma afafine. (Kenese 5:3-5) Ae o le a lē faapea ai e aogā ona faataitai i le la faaipoipoga. Mai lava i le amataga, na motusia ai e le agaga o le fiatutoatasi ma le lē faaaloalo i tulafono amiotonu a Lē na Foafoaina Mea le fusi na avea ai i laua ma “tino e tasi.”

E faapena foi i faaipoipoga i aso nei, atonu o loo tumau, peitai e leai ni mea tāua o faia aʻe ai fesootaiga. Atonu o iai ni mafaufauga malolosi ma ni uiga totino lē talafeagai e manaomia ona liaiina. (Faatusatusa i le 2 Korinito 10:4, 5.) O se faasologa faifai pea lenei tau aʻoaʻoga. Ae e aogā ai taumafaiga. E matuā naunau Ieova le Atua i le faatulagaga faalefaaipoipoga, talu ai, o ia Lē na Foafoaina le faaipoipoga. (Malaki 2:14-16; Eperu 13:4) O lea la, afai e faia la tatou vaega, ona tatou mautinoa lea o le a ia silafia a tatou taumafaiga ma foaiina mai pea ia i tatou le atamai ma le malosi e manaomia ina ia foia ai so o se toatuga i fesootaiga faalefaaipoipoga.—Faatusatusa i le Salamo 25:4, 5; 119:34.

[Faaopoopoga i lalo]

[Pusa i le itulau 6]

“E tele atu le taimi e faaalu i le tiaiina o le lapisi!”

O SE tane ma se avā o ē na oo i ni faigata faalefaaipoipoga, sa fesiligia ina ia faia se faatatauga po o le ā le tele o le taimi la te faaaluina e lafoai ai le lapisi i vaiaso taitasi. Na la tali mai e tusa ma le 35 minute i le vaiaso, pe 5 minute i le aso. Ona toe fesiligia lea o i laua po o le ā le tele o le taimi la te faaaluina e talanoa faatasi ai. Sa faateia le tane. Na ia faapea mai: “E tele le taimi e faaalu i le lapisi!” ona toe faaopoopo mai lea: “Ua ma vālea pe afai ma te manatu faapea, ua lava le lima minute i le aso e faatumauina ai se faaipoipoga. Ma e mautinoa e lē lava lena taimi e faaleleia ai le faaipoipoga.”

[Pusa i le itulau 7]

Faataatia ni Aiaiga Mausali

□ Ia talanoa taitasi mataupu (1 Korinito 14:33, 40)

□ Ia faaali faalogona; ae aua le tautuuai (Kenese 27:46)

□ Aua le fasia (Efeso 5:28, 29)

□ Aua le faia ni taugaupu (Faataoto 26:20)

□ Ia fuafua e faia se faaleleiga, ae lē ina ia manumalo (Kenese 13:8, 9)

[Ata i le itulau 4]

Pe a mapuna aʻe se feteenaiga, ia tagofia loa le faafitauli na i lo o le osofai atu o le tasi i le isi

[Ata i le itulau 8]

Ia faamatala atu faalogona; ae aua le tautuuai