Ia Manumalo i le Alofiaina o le Mailei o le Matapeapea
Ia Manumalo i le Alofiaina o le Mailei o le Matapeapea
“O e manao i le fia mauoa, e maua i latou i le faaosoosoga, ma le mailei.”—1 TIMOTEO 6:9.
1. Aisea e ao ai ona tatou manatunatu mamafa i mailei?
O LE upu “mailei” atonu tatou te manatua ai se tagata tulimanu o loo ia tataoina se matasele e pue ai se manu e oso faalava ane. Peitai ua faamanino mai e le Atua ia i tatou mailei e sili ona matautia, e lē na o ni mailei faitino, ae o mea e ono maileia ai i tatou i le itu faaleagaga ma i amioga. Ua matuā poto faapitoa lava le Tiapolo i le tataoina o na mailei.—2 Korinito 2:11; 2 Timoteo 2:24-26.
2. (a) Ua fesoasoani faapefea Ieova ia i tatou ina ia alofia mailei e lamatia ai? (e) O le ā le ituaiga patino o mailei o loo taulai atu nei i ai manatu?
2 Ua fesoasoani Ieova ia i tatou e ala i le faamanino mai o nisi o mailei e tele ma le anoanoai a Satani. Mo se faaaoaoga, ua lapatai mai le Atua e faapea, e ono avea o tatou fofoga (gutu) ma mailei pe a tatou tautatala lē mafaufau, soona tautatala ma le lē fuafua, po o mea foi e lē tatau ona tatou tautatala ai. (Faataoto 18:7; 20:25) E ono avea le faamaualuga ma mailei, i le auaumea pea lea ma tagata lotoa. (Faataoto 22:24, 25; 29:25) Ae seʻi o tatou taulai atu i se isi mailei: “O e manao i le fia mauoa, e maua i latou i le faaosoosoga, ma le mailei, ma tuʻinanau e tele e valea ai ma leaga ai, o mea ia e goto ai tagata i le fanoga ma le malaia.” (1 Timoteo 6:9) O le mafuaaga tonu o lena mailei po o lona pogai e mafai ona taaofai i le upu “matapeapea.” E ui lava e masani ona iloatino mai le matapeapea i se faanaunauga e fia mauoa, ae o le mea moni lava, o le matapeapea o se mailei e tele ni ona vala.
Ua Lapataia i Tatou e Ieova e Uiga i le Lamatiaga
3, 4. O le ā le lesona ua aumaia e talafaasolopito anamua o le tagata e tusa ai ma le matapeapea?
3 O le mea moni lava, o le matapeapea o se faanaunauga e oso tetele aʻe ma malosi ina ia maua atili ni mea, po o tupe, ni meafaitino, le pule, faiga faaleituaiga, po o isi lava mea. E mautinoa e lē o tatou ni tagata muamua ua lamatia i le mailei o le matapeapea. I tuā i le faatoaga i Etena, na maileia ai Eva ma Atamu i le matapeapea. Sa tele atu le tomai i le olaga o le paaga a Eva na i lo o ia, ma sa aʻoaʻoina totino lava e Ieova. Na saunia e le Atua se aiga faaleparataiso mo i laua. Sa la ono maua le olioli i le anoanoai o mea lelei ma le matalasi o mea taumafa, ma le soifua i se laueleele e aunoa ma le faaleagaina. Sa la ono mauaina ni fanau lelei atoatoa, o ē e mafai ona latou ola faatasi ma auauna e faavavau i le Atua. (Kenese 1:27-31; 2:15) Pe sa lē lava ea na mea e faamalieina ai so o se tagata?
4 Peitai, e lē avea le lava o ni mea ua maua e se tasi, e taofia ai le avea o le matapeapea ma mailei ia te ia. Sa maileia Eva ona o le faatalitali e fia pei o le Atua, le faateleina o lona saolotoga ma faia ana lava faaiuga. E foliga mai sa manao Atamu ina ia la mafuta pea ma lana paaga aulelei, e tusa lava po o le ā e ono iu i ai. Talu ai la sa oo lava i nei tagata lelei atoatoa na maileia i le matapeapea, e mafai ai la ona e talisapaia le mafuaaga e ono avea ai foi ma lamatiaga ia i tatou.
5. E faapeī le tāua ia i tatou o le alofiaina o le mailei o le matapeapea?
5 E tatau ona tatou leoleo mai le maileia e le matapeapea, auā ua lapataia i tatou e le aposetolo o Paulo e faapea: “Tou te le iloa ea, o e amio leaga e le fai mo latou tofi le malo o le Atua? Aua neʻi faaseseina outou; o e faitaaga, ma e ifo i tupua, ma e mulilulua, ma e tauātane, ma e faasotoma, ma e gaoi, ma e matapeapea, . . . e le fai mo latou tofi le malo o le Atua.” (1 Korinito 6:9, 10) Na taʻu mai foi e Paulo ia i tatou: “O le faitaaga, ma mea leaga uma, ma le manumanu, aua neʻi taʻua lava ia te outou.” (Efeso 5:3) E lē tatau la ona avea le matapeapea ma mataupu o a tatou talanoaga, ona o se faanaunauga e faamalieina ai o tatou tino lē lelei atoatoa.
6, 7. (a) O ā faaaoaoga faale-Tusi Paia ua faaalia mai ai le matuā malosi e mafai ona iai le matapeapea? (e) Aisea e ao ai ona avea na faaaoaoga ma lapataiga ia i tatou?
6 Ua taʻua e Ieova le tele o faaaoaoga ina ia o tatou nofouta ai i le matautia o le matapeapea. Seʻi manatu i le matapeapea o Akana. Na fetalai atu le Atua ina ia faaumatia Ieriko, ae o ona auro, o ario, o omea, ma uamea e tatau ona tuu i le fale na teu ai Ana oloa. Atonu i le taimi muamua, sa loto Akana e mulimuli i lena faatonuga, peitai na maileia o ia e le matapeapea. Ina ua oo i Ieriko, sa pei o loo faimalaga atu o ia e fai sana faatauga, i le mea na ia vaaia ai le matuā taugofie o oloa, e pei o se ofu talaloa matagofie sa foliga e fetaui lelei mo ia. Ina ua tago atu i auro ma ario e faitau afe tālā ni o latou tau, atonu na ia manatu ifo ai, ‘Maeu se tamaoaiga! O se matuā mea maua fua lava.’ Ma o le mea moni lena! O le manaonao i mea sa tatau ona faaumatia po o mea sa tatau ona toe faafoi, na ia gaoia ai mea mai le Atua, ma na tauia Akana i le faaumatia ai o lona ola. (Iosua 6:17-19; 7:20-26) Seʻi manatu foi i faaaoaoga a Kiasi ma Iuta le Sekara.—2 Tupu 5:8-27; Ioane 6:64; 12:2-6.
7 Aua neʻi o tatou faagaloina le mea moni e faapea, o i latou e toatolu ia na muai taʻua, sa lē o ni tagata faapaupau latou te leʻi iloa tapulaa a Ieova. Sa tuuina atu i latou uma ia Ieova. Sa latou molimauina uma lava vavega na ao ona latou maofa ai i le mana o le Atua ma le tāua o le mauaina o lona finagalo malie. Peitai na lapelapea i latou i le mailei o le matapeapea. E mafai foi ona faaleagaina la tatou faiā ma le Atua, pe a tatou faatagaina le maileia o i tatou i so o se ituaiga o matapeapea. O ā ituaiga o matapeapea e sili ona tatou lamatia ai?
Maileia e le Matapeapea i le Tamaoaiga ma Meafaitino
8. O le ā le lapataiga a le Tusi Paia ia i tatou e faatatau i le tamaoaiga?
8 O le toatele o Kerisiano ua manino lelei ia i latou lapataiga mai le Tusi Paia e teena ai le faatupuina o le naunau i oa, o se losilosi i le tamaoaiga. Aisea e lē toe autalu ai nisi o nei mea, e pei ona faamauina i le Mataio 6:24-33; Luka 12:13-21; ma le 1 Timoteo 6:9, 10? Atonu e te manatu o loo e taliaina ma mulimuli i na fautuaga, ae pe sa leʻi fai mai ea foi Akana, Kiasi ma Iuta e faapea sa latou malilie foi i na fautuaga? Ua manino la, e tatau ona sili atu mea tatou te faia na i lo o na o se maliega faalemafaufau. E ao ona tatou faaeteete ina neʻi aafia o tatou olaga i aso taitasi i le mailei o le matapeapea i le tamaoaiga po o meafaitino.
9. Aisea e ao ai ona tatou iloiloina o tatou uiga i le faia o faatauga?
9 I le olaga i aso taitasi, e masani ona tatou faia faatauga—o meaai, lavalava, ma isi mea mo le aiga. (Kenese 42:1-3; 2 Tupu 12:11, 12; Faataoto 31:14, 16; Luka 9:13; 17:28; 22:36) Ae ua faagaee e le lalolagi o faiga pisinisi se faanaunauga mo nisi mea se tele ma nisi mea fou. O le tele o faasalalauga faatosina mo mea faatau ua tumu ai nusipepa, o mekasini, ma polokalama o TV, o ni faatosinaga taufaasese i le matapeapea. O na faatosinaga atonu e faaalia foi i faleoloa o loo iai le anoano o ofu, peleue, ma ofumafanafana, o fata o loo iai ituaiga fou o seevae, o mea e faaaogā ai le eletise, ma meapueata. Ua atamai ai mo Kerisiano ona fesili ifo ia i latou lava, ‘Po o avea ea le faia o faatauga ma faatumutumuga po o se fiafiaga autū i loʻu olaga?’ ‘Po o oʻu manaomia moni lava nei mea fou o loo oʻu vaaia, pe ua na ona fofoaina e le lalolagi o faiga pisinisi, manaoga o le matapeapea ia te aʻu?’—1 Ioane 2:16.
10. O le ā le mailei o le matapeapea ua sili ona lamatia mo tane?
10 Afai o le faia o faatauga o se mailei masani i tamaitai, o le fia mauaina la o le tele o tupe o le mailei lea i le toatele o alii. Na faataitai e Iesu lenei mailei, i se tagata mauoa o lē sa tele ana tupe maua, ma manao ai e ‘tala i lalo ona fale teuoloa ae fausia ni fale e tetelē atu ina ia faaputu uma ai ana saito ma isi oloa uma.’ Na matuā faamautinoa mai ai e Iesu le lamatiaga: “Ia leoleo outou ia te outou aua le matapeapea” po o le manao tele. (Luka 12:15-21) Pe tatou te mauoa pe leai, e ao lava ona tatou utagia lea fautuaga.
11. E ono maileia faapefea se Kerisiano i le matapeapea mo le fia maua o ni tupe se tele?
11 O le matapeapea mo le faateleina o tupe, po o mea e mafai ona faatau i tupe, e masani ona faatuputupu aʻe e faiga taufaavalea. Atonu e faatū mai se fuafuaga ina ia vave mauoa ai—atonu o se avanoa e lē lau maua e maua ai ni tupe e ala i se faiga lē faamaoni. Pe faaosoosoina foi se tasi e mauaina ni tupe e ala i ni faiga pisinisi e lē faamaonia pe lē faaletulafono. O lenei faanaunauga losilosi e oo ina faatetele, ma maileia ai. (Salamo 62:10; Faataoto 11:1; 20:10) Ua amataina e nisi i le faapotopotoga Kerisiano ni pisinisi ma le faamoemoe e lagolago malosi mai i ai o latou uso faaleagaga o ē faatuatuaina. Afai o lo latou sini e lē o le saunia o mea manaomia po o ni auaunaga e ala i ‘galuega mamafa, e faia ai e o latou lima ni galuega lelei,’ ae ina ia vave maua ai tupe e ala i le lagolago a uso Kerisiano, o lona uiga la o loo gaoioi i latou ona o le matapeapea. (Efeso 4:28; Faataoto 20:21; 31:17-19, 24; 2 Tesalonia 3:8-12) O le matapeapea i tupe ua oo ai ina pelē tupe nisi po o le auai i seiga pepa, po o lūlū. O isi, i le aunoa ma se loto alofa po o le magafagafa, ua latou faavave atu ai e faia ni tagi i le tulafono i le faamoemoe ina ia maua ni taui tetele po o nisi mea aogā.
12. Aisea tatou te iloa ai e mafai ona foia le matapeapea mo le tamaoaiga?
12 O mea ua muai taʻua, o vala na ua talafeagai i ai se iloiloga totino, ina ia tatou vaavaai totoʻa pe tatou te lē o matapeapea. Ae tusa po o lena le tulaga, e mafai lava ona tatou suia. Ia manatua, na suia Sakaio. (Luka 19:1-10) Afai o loo fai ma faafitauli i se tasi le matapeapea i le tamaoaiga po o meafaitino, e ao la ona ia filifili maumaututu e pei ona sa faia e Sakaio, ina ia sola ese mai le mailei.—Ieremia 17:9.
Matapeapea i Isi Vala o le Olaga
13. O le ā le isi mailei o le matapeapea, ua faatepa i ai i tatou e le Salamo 10:18?
13 E faigofie atu i isi ona latou iloa le matautia o le matapeapea e tusa ai o tupe po o meafaitino, na i lo o isi vala o loo aliae mai ai. Ua taʻua e se tasi lomifefiloi o le gagana Eleni e faapea, o upu uma ia e faasino atu i le “matapeapea” po o le “losilosi” o loo iai se uiga o le “‘manao atili,’ e tusa ai i le pule, ma isi mea faapea foi i mea totino.” Ioe, e ono maileia i tatou i le manao ma le matapeapea i le fia pule atu i isi, atonu ina ia faapologaina i latou i a tatou pulega.—Salamo 10:18.
14. O ā vala ua leaga ai le faanaunau i le fia pule?
14 Talu mai lava aso anamua, ua fiafia ai pea tagata lē lelei atoatoa e pulea isi. Na muai valoia mai e le Atua e faapea o le iuga faanoanoa ona o le agasala a le tagata, o le toatele lea o tane o le a “pule” sauā i a latou avā. (Kenese 3:16) Peitai, o lenei uiga lē lelei ua sosolo i tua atu o le faiā o le faaipoipoga. I le faitauafe o tausaga mulimuli ane, na matauina ai e se tusitala o le Tusi Paia e faapea “e pule ai le tasi tagata i le tasi, e leaga ai o ia lava.” (Failauga 8:9) Atonu e te iloa le moni o lena tulaga i mataupu faapolotiki ma faavaegaau, ae i o tatou lava siosiomaga, pe tatou te lē o ono tauivi ea mo le faateleina o la tatou lava pule?
15, 16. O ā vala e ono maileia ai se Kerisiano i le faanaunau mo le fia pule naua? (Filipi 2:3)
15 Tatou te fesootai uma lava i isi tagata—i o tatou aiga o le tamā, tina, uso ma tuafāfine, po o le aiga potopoto, i a tatou galuega faalelalolagi po o le aʻoga, i uo, ma i le faapotopotoga. E masani mai i lea taimi i lea taimi, ona tatou fai manatu i le faiga o se mea, i le auala po o le taimi foi e faia ai. E lē sese pe leaga lena tulaga. Peitai, po o tatou matuā olioli ea i le soona faaaogāina o so o se aiā tatou te ono maua? Po o tatou mananao ea tatou te faia le faaiuga mulimuli ma faaauau ai lava lena manao? E masani ai pule faalelalolagi i lenei uiga, i lo latou faafaigaluegaina o tagata e usitai atu ia i latou i taimi uma, e aunoa ma so latou manatu e tetee atu, ma latou te lē faalavelave foi i taumafaiga matapeapea a nei tagata mo le fia faateleina o la latou pule.
16 O se mailei lenei e ao ona alofia i le feagai ai ma uso Kerisiano. Na fetalai Iesu: “Ua outou iloa o alii o nuu ese ua aliitai i latou, o e ua sili foi ua pule ia te i latou; a e le faapea outou; a o sē fia sili ia te outou, ia fai o ia ma a outou auauna.” (Mataio 20:25, 26) E ao ona faaalia lena loto maulalo i feutagaiga a toeaina Kerisiano, i a latou feutagaiga ma auauna o le faiva, ma le lafu mamoe. Mo se faataitaiga, po o atagia atu ea se faanaunauga o le fia pule, pe afai e faafesootaia e le ovasia taitai isi toeaina i na o ni mataupu laiti, ae a oo i faaiuga tetele, ona manao lea e faia e ia lava? Po o ia manao moni ea e tufa atu i isi nisi matafaioi? E ono iu i faafitauli pe a soona faifaatonuga ma le lē talafeagai se auauna o le faiva o loo taitaia se faatasiga mo le auaunaga i le fanua, i ana faatulagaga, po o le oo foi ina ia faia ai ni tulafono.—1 Korinito 4:21; 9:18; 2 Korinito 10:8; 13:10; 1 Tesalonia 2:6, 7.
17. Aisea ua talafeagai ai ona manatunatu i mea taumafa pe a talanoaina le mailei o le matapeapea?
17 O mea taumafa o le isi lea vala ua maileia ai le toatele i le matapeapea. E moni o se uiga faalenatura le olioli pe a tausami ma inu; o loo faamaonia foi e le Tusi Paia lea mea. (Failauga 5:18) Peitai, ua masani ona tuputupu pea mo se taimi umi se faanaunauga i lenei itu, ua oo ina sopo tapulaa atu ai i le olioli ma le faamalieina e talafeagai. Ana faapea e lē manaomia ona manatu mamafa auauna a le Atua i lenei itu, aisea la o le a taʻua ai fua i le Afioga a Ieova i le Faataoto 23:20: “Aua neʻi fai oe ma so latou o e inu tele i uaina; ma e ua aai tetele i manu”? Ae faapefea la ona tatou aloese i lenei mailei?
18. O le ā le iloiloga e tatau ona faia e i tatou lava e tusa ai o mea taumafa ma meainu?
18 E lē o faapea mai le Atua e mafai lava e ona tagata ona tau ina ola i ni nai meaai ua faapitoa mo le mauaina o le soifua maloloina. (Failauga 2:24, 25) Ae na te lē o taliaina foi le avea o meaai ma meainu o se vaega autū i a tatou talanoaga ma fuafuaga. Tatou te ono fesili ifo ia i tatou lava, ‘Po o masani ea ona ou soona matuā naunau pe a ou faamatalaina ni aʻu meaai na ʻai po o loo fuafua e ʻai?’ ‘Po o meaai ea ma meainu, o loo masani pea ona ou talanoa i ai?’ O le isi mea e mataulia ai, o o tatou uiga ia e faaalia pe a tatou aai i ni meaai tatou te leʻi saunia pe leʻi alu ai sa tatou tupe, atonu i le avea o i tatou ma mālō i le fale o se isi po o le taimi foi e maua ai mea taumafa i fonotaga faa-Kerisiano. Pe ono oo ai ea ina tatou faanaunau e matuā aai ae leʻi masani ai? Tatou te manatua na faatauaina ma le lē tatau e Esau meaai, ma malaia ai o ia e faavavau.—Eperu 12:16.
19. E mafai faapefea ona avea le matapeapea ma faafitauli, e tusa ai o faafiafiaga i faiga faaleituaiga?
19 Ua faamalamalama mai e Paulo ia i tatou se isi mailei: “A o le faitaaga, ma mea leaga uma, ma le manumanu, [“matapeapea,” NW] aua neʻi taʻua lava ia te outou, e pei ona tatau i e ua paia.” (Efeso 4:17-19; 5:3) Ioe, e mafai ona tuputupu aʻe se matapeapea mo fiafiaga faaleituaiga. O le mea moni, o lenei fiafiaga ua talafeagai ona faaalia i lio o le faaipoipoga. O le alofa mafana e sootaga ma lenei fiafiaga ua fesoasoani i le tane ma le avā e nonofo faatasi ai ma tuutoina atu le tasi i le isi mo le tele o tausaga o le faaipoipoga. Peitai, ua faafiti mai nisi tagata e faapea, ua matuā faamamafa e le lalolagi i aso nei faiga faaleituaiga, ina ia manatu ai o se faiga masani, le mea ua atagia moni ai le matapeapea lea na taʻua e Paulo. Ua sili ona faigofie le apoina o lena manatu sese i fiafiaga faaleituaiga, e i latou o ē ua tuuina atu i latou lava i amioga lē mamā ma le matagā ua taatele i aso nei i le tele o ata tifaga, o vitio, ma mekasini, faapea ma nofoaga o loo faia ai faafiafiaga.
20. E mafai faapefea ona nofouta Kerisiano i le lamatiaga o le matapeapea i mataupu faaleituaiga?
20 O le tala i le agasala a Tavita ma Patesepa ua faaalia ai e mafai ona lavea se auauna a le Atua i le mailei o le matapeapea i faiga faaleituaiga. E ui lava sa ia Tavita le saolotoga e olioli ai i fiafiaga i lana lava faaipoipoga, ae na ia faataga le faanaunauga i faiga faaleituaiga lē mamā e tuputupu aʻe. I lona vaai atu i le lalelei o le avā a Uria, na lē mafai ai ona ia pulea ona mafaufauga—ma gaoioiga—i le fia faafiafiaina o ia i faiga lē mamā ma le fafine. (2 Samuelu 11:2-4; Iakopo 1:14, 15) E mautinoa la, e tatau ona tatou matuā teena lenei ituaiga o matapeapea. E oo lava i le lio o le faaipoipoga ua talafeagai ai ona matuā teena le matapeapea. E aofia ai le tetee atu i faiga faaleituaiga e soonafai. O se tane e filifili ina ia alofia le matapeapea i lenei itu, o le a naunau fiafia moni o ia i lana paaga, ma so o se la fuafuaga lava e faia mo se aiga fuafuaina, o le a lē faasilia e ia ona fiafiaga, ae sili ona ia faatauaina le soifua maloloina o si ana avā i le taimi nei po o le lumanai.—Filipi 2:4.
Ia Maumaututu Pea e Alofia le Matapeapea
21. Aisea e lē tatau ai ona tatou lotovaivai i lo tatou talanoaina o le matapeapea?
21 E lē ona o se masalosalo o Ieova, ua ia saunia ai faaeteetega po o lapataiga. Ua ia silafia e mananao ana auauna tuutoina ina ia auauna faamaoni ia te ia, ma ua ia mautinoa foi o le a faaauau ona faia faapea e le vaega e sili ona toatele o i latou. Pe a fetalai o ia e faatatau i ona tagata uma, e mafai ona ia faia se faamatalaga e pei o lea na ia fetalai atu ai ia Satani e faatatau ia Iopu e faapea: “Ua e mafaufau ea i laʻu auauna o Iopu, auā ua leai se tasi e tusa ma ia i le lalolagi, o le tagata ua sao lana amio ma le amiotonu, o le ua mataʻu i le Atua, ma ʻaloʻalo ese i mea leaga?” (Iopu 1:8) Ua lapataia i tatou e lo tatou Tamā faalelagi e faatuatuaina ma alofa, ina ia tatou nofouta i mailei matautia, e pei o na o loo fesootai atu i ituaiga uma o le matapeapea, auā e finagalo o ia ina ia tumau pea ona tatou lē matauleagaina ma faamaoni ia te ia.
22. O le ā e ao ona tatou faia pe afai ua faaalia mai i la tatou suesuega, se vala o loo tatou lamatia pe vaivai totino ai?
22 Ua tuufaasolo mai ia i tatou uma lava se faanaunauga i le matapeapea, ma atonu tatou te aafia atili i lenei aafiaga i le lalolagi amio leaga. Ae faapefea pe a e suesueina le matapeapea—e tusa ai o le tamaoaiga, o meafaitino, o le pule, o mea taumafa, po o faafiafiaga faaleituaiga—ae ua e iloa ai ni vala o loo e lape ai? Ia teu la i lou loto le fautuaga a Iesu: “A faatausuaiina foi oe e lou lima, ina tutū ese ia; e lelei ona e sao i le ola a ua e lima mutu, a e leaga ona lima lua, a e alu i Kēna.” (Mareko 9:43) Ia faia so o se suiga e manaomia, i amioga po o mea e naunau fiafia i ai. Ia alofia le mailei matautia o le matapeapea. Faatasi ai la ma le fesoasaoni a le Atua, o le a mafai ai ona e “sao i le ola.”
O le ā ua Ou Aʻoaʻoina?
□ Aisea e ao ai ona tatou manatu mamafa i le mailei o le matapeapea?
□ I ā auala e ono maileia ai i tatou e le matapeapea i le tamaoaiga po o mea totino?
□ E faapefea ona aumaia lamatiaga e le matapeapea i isi vala o le olaga?
□ O le ā lo tatou uiga e ao ona iai i so o so tatou vaivaiga i le matapeapea?
[Fesili mo le Suʻesuʻega]