Lipoti a Ē Faalauiloa le Malo

Ua Maua le Upu Moni e se Talavou e Fiafia e Tietie Nofoaafi

AFAI e faanaunau le loto o se tagata i le amiotonu, o le a faamautinoa e Ieova le oo atu o le tala lelei o le Malo i lena tagata pei se mamoe, e ala i lona faaaogāina o Iesu Keriso ma agelu faalelagi. I le taimi atofaina, o le a tu ai lena tagata i le itu taumatau o le finagalo malie o Iesu. (Mataio 25:31-33) Sa moni lena manatu i se talavou Oseteria e fiafia tele e tietie nofoaafi ma na ia maua ai le upu moni i se auala uigaese.

O le mea e sili ona fiafia i ai lenei tama talavou, o le tietie lea i nofoaafi i se faatagaga a ē pulea femalagaiga a nofoaafi. E na te puea uma malaga taitasi a le nofoaafi i lana vitio ina ia toe matamata i ai pe a foi i le fale. I sana malaga mai Viena i Salzburg, o le avetaavale o lea nofoaafi o se Molimau a Ieova. Sa maua le avanoa o le uso e talanoa atu ai i le talavou tietie nofoaafi lenei e uiga i le Malo. I le taimi muamua, na ofo le tama talavou i le talanoa mai a le avenofoaafi e uiga i le Atua ma le Tusi Paia, ae a o alu pea le malaga, sa uai totoʻa atu o ia i le pueina o ana ata na i lo o mea ia na talanoa atu ai le avenofoaafi ia te ia.

Ina ua foi i lona aiga, ona toe matamata lea o le talavou i lana vitio lea na pue, pe faasefulu taimi o matamata ai pea, ona o lona fiafia tele i lana malaga. Talu ai sa ia pueina foi ma leo, o lea na ia faalogologo ai pea lava pea i mea na talanoa atu ai le Molimau ia te ia. O le tele lava la o taimi e matamata ai o ia i le vitio, o le tele foi lena o lona masani i mea ia sa taʻu atu ia te ia. Sa amata loa ona mafaufau o ia i ia mea, ma iu ai ina faaosofia lona fiafia i faamatalaga ofoofogia ia na tuuina mai i le Tusi Paia. Na manao o ia e fia iloa atili.

Sa ia manatua le igoa o le avenofoaafi, ma le nofoaga e nofo ai i Viena. O lea, na alu ai i le falemeli ma tuu vili solo numera o loo iai le igoa lea i le tusi telefoni. Afai e tali mai e se tasi le telefoni, ona fesili lea i ai faapea: “O oe ea o se avenofoaafi?” Afai e leai mai le tagata, ona vili lea o le isi numera. Na iu lava ina ia mauaina le avenofoaafi. Sa ia faamatala i ai lana tala, ma lona fiafia tele i le feau o le Tusi Paia lea na ia faalogo i ai i lana vitio.

Na faafesootai e le Molimau le ofisa o le lālā mo se tasi e nofo latalata i lena vaipanoa ina ia asiasi atu i le tama talavou. O le mea la na tupu, sa iai se uso i le faapotopotoga lea e latalata i le tama talavou, o ia foi o se avenofoaafi. Na asiasi atu le avenofoaafi lona lua lenei i le tama talavou ma amata ai loa le suesuega faale-Tusi Paia. I le tau mafanafana o le 1991, na papatiso ai loa lenei tama talavou.

Atonu sa silafia e Ieova, o lē silasila i loto uma, le alofa loloto o lenei tagata i le amiotonu. O lea, na ia taitaia mai ai o ia ina ia maua le upu moni o le Tusi Paia—e ui lava na ia maua i se auala uigaese.—1 Nofoaiga a Tupu 28:9; Ioane 10:27.

[Ē Ana le Ata i le itulau 9]

Courtesy of the Austrian Railways