Auala e Faamalosia ai Noataga o le Faaipoipoga

“PE SA ea i se tasi ona faatea o lana avā ona o mea uma?” O le fesili lena a le au Faresaio o ē na taumafai e maileia le Faiaoga Sili, o Iesu Keriso. Na ia tali atu ia i latou e ala i lona faasino atu i le uluai faaipoipoga faaletagata, ma faataatia ai se tapulaa e uiga i lenei mataupu e faapea: “O e ua faatasia e le Atua, aua neʻi faateaeseina e se tagata.”

Sa finau atu le au Faresaio e faapea, ua uma ona faia e Mose sauniuniga mo le tatalaina o se faaipoipoga e ala i le poloai atu e avatu se “tusi alei e faatea ai.” Ona tali atu lea o Iesu ia te ia latou: “Ona o outou loto ina maaa na tuu mai ai e Mose ia te outou e faatea i a outou avā; a e lei faapea talu mai le amataga. Ou te fai atu foi ia te outou, Ai se faatea i lana avā, a o lei mulilua ia, ma fai avā i se tasi, ua mulilua ia.”—Mataio 19:3-9.

I le amataga, sa fuafuaina ai le faaipoipoga o se noataga mau. E oo lava i le oti sa lē mafai ona faateteaina ai le uluai ulugalii faaipoipo, ona sa faia i laua o ni tagata lelei atoatoa faatasi ma lo la faamoemoe o le ola e faavavau. Ae peitai, na agasala i laua. O la la agasala ua faaleagaina ai le faaipoipoga faaletagata. Sa amata ai e le fili o le oti ona faateteaeseina ulugalii faaipoipo. Sa finagalo le Atua e avea le oti ma iuga o se faaipoipoga, e pei ona tatou faitau ai i le Tusi Paia: “Ua noatia le fafine i le tulafono i aso uma e ola ai lana tane; a e afai ua oti lana tane, ua saʻoloto o ia e nofotane i le ua loto i ai, tau lava i le ua i le Alii.” (1 Korinito 7:39) E matuā ese lava lenei manatu mai faiga faalelotu e pei o le tu faa-Hinitu, lea e faatauanauina ai se avā ina ia susunu o ia ia oti i le taimi e oti ai lana tane ona o le talitonuga faapea, e faaauau pea noataga o le faaipoipoga e oo atu i se isi olaga pe a mavae le oti.

Le Sauniuniga o le Tulafono Faa-Mose

E oo ane i le taimi na tuuina atu ai le Tulafono Faa-Mose, a ua faateleina le leaga o faiā faalefaaipoipoga, na oo ai ina faia e Ieova se  sauniuniga mo le tatalaina o faaipoipoga ona o le maaa o loto o tagata Isaraelu. (Teuteronome 24:1) Sa lē o se fuafuaga a le Atua mo tagata Isaraelu le faaaogaseseina o lenei tulafono e faateaina ai a latou avā ona o ni nai masei laiti, e pei ona faaalia mai i lana poloaiga e faapea, ia latou alolofa atu i o latou uso a tagata e pei o i latou lava. (Levitiko 19:18) Sa avea foi le tuuina atu o se tusi alei e fai ma taofiofiga, ona o se vaega o le faagasologa o le tusia o se tusi alei, e ao i se tane o lē o manao i se talagā faaipoipoga ona faafesootai atu tane o iai le pule, o ē o le a taumafai ina ia faia se leleiga. E leai, sa leʻi tuuina atu e le Atua lenei tulafono e faavae ai ni aiā e alei ai se avā a se tasi “i mea uma lava.”—Mataio 19:3.

Ae peitai, sa iu ina lē amanaia e tagata Isaraelu le faanaunauga masani ma le uiga moni o le tulafono ma faaaogasese ai lenei fuaiupu e tatala ai se faaipoipoga i so o se faavae e fetaui ma o latou manatu. E oo atu i le senituri lona lima T.L.M., ae ua latou feutagai ma le faaʻoleʻole ma a latou avā na fai a o taulelea, i le faateaina o i latou i so o se mafuaaga. Sa taʻu maumauai atu e Ieova ia i latou lona inoino i le alei. (Malaki 2:14-16) Na tausalaina ai e Iesu le alei ona o le tetee i lena talaaga auā sa faia e tagata Isaraelu i ona aso.

Na o Faavae Moni e Alei Ai

E ui i lea, na taʻua e Iesu se faavae moni e tasi mo le tatalaina ai o se faaipoipoga: o le faitaaga. (Mataio 5:31, 32; 19:8, 9) O le upu o loo faalililuina i inei o le “faitaaga” e aofia ai ituaiga uma o feusuaiga e lē faatagaina, e i fafo atu o le faaipoipoga faale-Tusi Paia, e tusa lava po o se tasi o le isi ituaiga, po o le ituaiga lava e tasi, po o se manu foi.

E oo foi ia Iesu, na te leʻi fautuaina se talagā faaipoipoga mai paaga lē faamaoni. E tuu atu lava i le paaga o loo mamā na te fuafuaina iuga o loo aafia ai, ma filifili ai pe manao o ia e faia se talagā faaipoipoga pe a uma ona fuafua lelei iuga o loo aafia ai. O avā o loo fuafua mo se talagā faaipoipoga e faavae i lenei mataupu silisili faale-Tusi Paia, atonu latou te mananao foi e manatunatu i le fetalaiga a le Atua ina ua ia tuuina atu le faasalaga i le uluai fafine mo lana agasala. E faaopoopo atu i le faasalaga oti, ae na taʻu patino atu lava e le Atua ia Eva: “E uai atu lou manao i lau tane, e pule foi o ia ia te oe.” (Kenese 3:16) Ua faamatalaina e le tusi o le Commentary on the Old Testament, a C. F. Keil ma Franz, Delitzsch lenei ‘uai atu o le manao’ e faapea “o se faanaunauga e pei lava o se faamaʻi.” Ioe, o lenei faanaunauga, e lē malosi i avā uma, ae afai o loo manatunatu se avā taumamāina e faia se talagā faaipoipoga, o le a atamai ona ia manatunatu i manaoga tau faalogona ootia na tuufaasolo mai e Eva i fafine. Ae peitai, afai e aafia le paaga mamā i se faamaʻi pipisi e aofia ai le AIDS ona o nisi feusuaiga a le paaga agasala, ua faia e nisi se faaiuga faapea e tatau ona tatalaina le faaipoipoga e pei ona faamatalaina e Iesu.

Amataga o Faalavelave i le Aiga

Ua mafua le loto maaa o tagata, ona o agasala na faia e le uluai ulugalii faasaga i le Atua. (Roma 5:12) Na amataina faalavelave i aiga ona ua agasala le uluai ulugalii faasaga i lo la Tamā faalelagi. E faapefea? Ina ua tofotofoina e le gata le uluai fafine o Eva ina ia ʻai i le laau faasāina, sa alu loa ma ʻai le fua. Ina ua uma ona ia faia lena filifiliga iloga, ona faatoʻā alu ai loa lea ma taʻu i lana tane le mea na fai atu ai le gata ia te ia. (Kenese 3:6) Ioe, sa gaoioi o ia e aunoa ma le faailoa atu i lana tane. O se ata lenei o faafitauli o loo fesagai ma le toatele o aiga i aso nei—o le leai o ni fesootaiga alofa mafana.

Mulimuli ane ina ua fesagai ma iuga o la la agasala, na faia uma ai e Atamu ma Eva uiga ia ua faia e le toatele o ulugalii i aso nei pe a oo i ni faalavelave, o le tuuaia o isi. Sa tuuaia e le uluai tamaloa o Atamu le mea na ia faia i lana avā ma Ieova i le faapea atu: “O le fafine na e au mai ia te au, ua na au mai ia te au le fua o le laau, ona ou ʻai ai lea.” Ona tali mai lea o le fafine: “Na faasese mai le gata ia te au, ona ou ʻai ai lea.”—Kenese 3:12, 13.

O le tuuina atu e Ieova o le faasalaga ia  Atamu ma Eva, ua faalauiloa mai ai foi se isi mea moni i faafitauli o le a tutupu: E faatatau i la la faiā ma lana tane, na taʻu atu ai e Ieova ia Eva: “E pule foi o ia ia te oe.” E toatele tane i aso nei e pei o Isao lea na taʻua i la tatou uluai mataupu, e pule sauā i a latou avā e aunoa ma le manatu mo faalogona o a latou avā. O loo faaauau foi e le toatele o avā ona uai atu o latou manao ina ia manatu mai a latou tane. Pe a lē faamalieina lena faanaunauga, e ono tapā la e avā lena uai mai a tane ma gaoioi ai loa ma le manatu faapito. Ona o le toatele o tane e pulepule tutū i a latou avā, ma avā e faanaunau mo le uai mai o a latou tane, ua taatele ai le manatu faapito, ma ua mou atu ai le filemu. I se lipoti a se nusipepa na faaulutalaina o “Le Auala e Faaiu ai Talagā Faaipoipoga i Aso Nei,” na faapea mai ai Shunsuke Serizawa: “Afai tatou te faaleamanaiaina le faafitauli autū o lenei mataupu ‘o le faamuamua o manaoga o le tagata lava ia, o le a oo loa ina lē mafai ona faaiuina talagā faaipoipoga i aso nei.”

Ae peitai, ua saunia e Ieova taiala i lana Afioga ina ia mafai ai e ulugalii faaipoipo e usiusitai, ona maua le fiafiaga faalefaaipoipoga e ui lava i o latou tulaga lē lelei atoatoa. Sa mulimuli Isao i le taiala a le Atua ma ua olioli nei i se olaga faaleaiga fiafia. Seʻi o tatou vaai la pe faapefea ona fesoasaoni mataupu silisili faale-Tusi Paia i tagata e faamalosia ai le noataga o le faaipoipoga.

Ia Talanoaina Faafitauli

I le tele o faaipoipoga, o le leai o ni fesootaiga, le faanaunauga e tuuaia isi, ma uiga manatu faapito ua faigata ai mo tane ma avā ona malamalama le tasi i faalogona ootia o le isi. Fai mai se tagata suesue o Caryl S. Avery e faapea: “O le muai talanoaina o faalogona totino, e manaomia ai le fefaatuatuaai atoatoa. Ma o aso nei ua seāseā maua se fefaatuatuaai.” O le fetufaai o faalogona loloto, e fausia aʻe ai lena maufaatuatuaina. O lenei mea e manaomia ai se fesootaiga mafana i le va o le tane ma le avā.

Ua faaaogā e le Faataoto se faataitaiga e faalaeiauina ai le fetufai o manatu totino, i le faapea mai: “O le atamai i le loto o le tagata, o le vai loloto lea; a o le tagata faautauta, na te utufia mai ai.” (Faataoto 20:5) E tatau i paaga faaipoipo ona faautauta ma ia utufia mai mafaufauga loloto mai loto o a latou paaga. Seʻi faapea ua le fiafia lau paaga. Na i lo o le tali atu: “Sa le lelei foi le aso mo aʻu ia,” aisea e lē fesili atu ai ma le agalelei: “Na ā mai lou aso? O le ā le mea na tupu?” E ono alu ai se taimi ma se taumafaiga e faalogologo atu ai i lau paaga, ae e masani lava ona sili atu le lelei, faamalie loto, ma faasao ai le taimi, i le faaalu o le taimi i se auala faapena na i lo o le faaleamanaia o lau paaga, ma oo ai ina e fesagai ma ni faalogona malolosi e tulai mai i se taimi mulimuli.

Ina ia maufaatuatuaina, e tatau i paaga taitoatasi ona faamaoni ma taumafai e faaali atu faalogona i se auala e mafai ai ona malamalama le tasi paaga. Ua timai mai le Afioga a le Atua, “Ia tautalatala faamaoni, . . . auā o itu tino lava i tatou o le tasi i le tasi.” (Efeso 4:25) O le tautala i le upu moni, e manaomia ai le faautauta. Seʻi faapea ua lagona e le avā e lē o faalogo atu lana tane ia te ia. A o leʻi tautala o ia, e ao ona ia manatunatu i le faataoto e faapea: “O le ua i ai le poto e taofia e ia ana upu; o le ua agamalu foi, o le tagata faautauta lea.” (Faataoto 17:27) Na i lo o le faitioina o lana tane faapea, “E te lē faalogo mai lava ia te aʻu!” e matuā sili atu lava ona lelei i le avā ona faaali atu ona faalogona i se auala agamalu a o leʻi oso lona ita po o se lē fiafia. Atonu e mafai ona ia faailoa atu ona lagona e ala i le fai atu o se tala faapenei, “Ou te iloa o loo tele au galuega, ae o le faaaluina atili o sina taimi ma oe, o le a avea o se mea e sili ona ou fiafia ai.”

O le mea moni, “e faaleaogaina mafaufauga pe a leai se filifiliga, [“talanoaga totino,” NW].” (Faataoto 15:22) E alofa lau paaga ia te oe, ae e lē faapea ai ua ia iloa atu mea na o loo i lou mafaufau. E tatau ona e faailoa atu i se auala tomai i lau paaga ou lagona. O le a fesoasoani lenei mea ia te oulua, o se ulugalii faaipoipo faa-Kerisiano, e faia ai ni fetuutuunaiga alofa ina ia oulua “taofi o le loto gatasi i la le Agaga i le noataga o le filemu.”—Efeso 4:2, 3.

 Seʻi fai ma faaaoaoga Kazuo, o se tane sa pulea e lana avā ma sa matuā tuinanau i le pelē tupe. Sa ia iloa le matuā omia o ia i le anoanoai o ana aitalafu, na oo atu i le faitau selauafe tālā. O le nonoina o tupe e totogi ai ana aitalafu, sa atili ai ona tele ana aitalafu. Ae ina ua amata ona ia suesueina le Tusi Paia, na ia maua ai le loto tele e taʻu atu ai i lana avā ona faafitauli. Sa nofo sauni o ia e fesagai ma ni faitioga mai lana avā. Ae peitai, sa matuā maofa lava o ia ina ua tali mai ma le toafilemu lana avā, o le ua fai sina umi o ia suesueina le Tusi Paia e faapea: “Seʻi ta taumafai e fai se fuafauga i se auala e mafai ai ona ta totogia aitalafu.”

Na amata i le aso na sosoo ai ona la o atu i ē na la aitalafu ai, ma amata ona totogi a la aitalafu, sa oo ai lava ina faatau atu lo la fale. E toetoe lava atoa le tausaga o taumafai e totogi a la aitalafu. O le ā na suia ai lana avā o Kimie? Na faapea mai o ia: “E matuā moni lava upu o loo maua i le Filipi mataupu e 4, fuaiupu e 6 ma le 7. ‘Aua le popole i se mea e tasi, a ia faailoa atu o outou manao i le Atua i le tatalo, ma le faatoga, atoa ma le faafetai; o le manuia foi mai le Atua o loo silisili i mea uma e manatu i ai, e leoleoina ai o outou loto ma o outou malosi faalemafaufau e ala ia Keriso Iesu.’” Na ia faaopoopo mai e faapea: “Sa ofo saʻu uo teine i le vaai mai maeu loʻu fiafia e ui lava i le tele o faigata, ma na amata ai loa ona ma suesue i le Tusi Paia.” Talu mai lava ona papatisoina Kazuo ma lana avā, ua olioli nei i se olaga faaleaiga fiafia.

I le faaopoopo atu i le fefaatuatuaai e ala i le tautalatala i le upu moni, na faia e tane ma avā o ē na tutupu ai mea e pei ona taʻua i luga, se mea e fesoasoani ai i isi ulugalii e foia o latou faafitauli. Sa latou faia ni fesootaiga ma Lē na Amataina le fuafuaga faalefaaipoipoga, o Ieova le Atua. E ui i omiga ma faigata o loo fesagai ma ulugalii, ae o le a ia faamanuiaina i latou i le filemu o le Atua o loo silisili i mea uma lava e manatu i ai, pe a latou faia le mea aupito sili ona lelei i le faatatauina o ana mataupu silisili ae lafo atu ia te ia mea uma. E aogā faapitoa lava le tatalo faatasi. E ao i le tane ona taimua ma ‘sasaa atu lona loto’ i luma o le Atua, i le sailia o lana taitaiga ma lana faasinoga i so o se faafitauli o loo fesagai ma ia ma lana avā. (Salamo 62:8) O le a faafofogaina moni lava e Ieova le Atua na tatalo.

Ioe, e mafai ona faamalosia le noataga o le faaipoipoga. E oo foi i le taimi nei, i le ola faatasi ma o tatou tulaga lē lelei atoatoa uma i se sosaiete fesouaiina, e mafai lava e ulugalii faaipoipo ona maua le olioli tele i a latou faiā. E mafai ona e maua ni fautuaga faaopoopo e aogā ma se fautuaga mai le Atua i le tusi o le Faia Lou Olaga Faaleaiga ia Fiafia, na lomia ma faasalalauina e le Watchtower Bible and Tract Society of New York, Inc. E lē gata i lea, o ulugalii o ē galulue ma le filigā e faatatau mataupu silisili o le Tusi Paia, o loo faamoemoe e fusia faatasi i le alofa i le lalolagi fou a le Atua ua lē pine ae oo mai.