Auala e Mafai ai ona Fesoasoani Kerisiano i Ē Matutua

“O LE mea lea matou te le faavaivai ai; auā e ui lava ina tauāu ina uma lo matou tagata i fafo, ua faafouina lē i totonu i lea aso ma lea aso. . . . o loo matou le manatunatu i mea ua vaaia, a o mea e le vaaia; auā o mea ua vaaia e gata mai ia, a o mea e le vaaia e faavavau ia.” O upu na a le aposetolo o Paulo i lana tusi lona lua i Korinito.—2 Korinito 4:16-18.

I aso anamua, sa manatunatu ai tane ma fafine faatuatua i mea e lē vaaia, ia sa aofia ai mea uma na folafolaina e lo latou Atua o Ieova, na te faia i lana taimi e tatau ai. I le tusi o Eperu, o loo faaamuia ai Paulo ia i latou na, o ē na tumau i lo latou faatuatua seia oo ina maliliu—ma o nisi o i latou sa soifua mo ni tausaga se tele. O le manatu o Paulo, o i latou na o se faaaoaoga mo i tatou e ala i lona faapea mai: “Na oti i latou nei uma lava o faatuatua, e lei maua mea na folafolaina, a ua iloa ai e i latou a e mamao, na mautinoa foi, ma latou talia ma le fiafia.”—Eperu 11:13.

I aso nei ua tatou lalata atu lava i le faataunuuga o nei folafolaga. Peitai o loo tatou iai faatasi ma ē matutua ma ē mamai o loo lē mautinoa pe latou te soifua pea e vāai i le iuga o lenei faiga amioleaga. Atonu o nisi o i latou nei o le a maliliu a o faatuatua pea ae lē vāai i le faataunuuga o ia folafolaga uma i o latou olaga. O se faalaeiauga sili mo i latou upu a Paulo o loo i le 2 Korinito 4:16-18.

E manatua e Ieova i latou uma o ē faamaoni ia te ia, e aofia ai ē mamai ma ē matutua. (Eperu 6:10) O ē matutua o loo faatuatua, ua taʻu faaaloalogia i le tele o mau i le Tusi Paia, ma i le Tulafono a Mose o loo taʻua faapitoa ai le tatau ona faaalia o le āva ia i latou ua matutua. (Levitiko 19:32; Salamo 92:12-15; Faataoto 16:31) I taimi o uluai Kerisiano, o tagata matutua lava sa avatu i ai le tausiga lelei. (1 Timoteo 5:1-3; 1 Peteru 5:5) I se tasi tusi o le Tusi Paia o loo iai se faamatalaga matagofie o se tausiga agaalofa ma le matuā faataulagaina totino sa faaalia e se fafine talavou i le tinā o lona toalua ua loomatua lava. Ua talafeagai ai ona faaigoaina lea tusi i le igoa o lena fafine talavou, o Ruta.

O se Fesoasoani sa Sili ona Faamaoni

Sa faigata le olaga i le loomatua o Naomi. Ona o se oge na faamalosia ai ona tuua e ia ma lona auaiga toaitiiti, a latou uo ma a latou mea totino i le nuu o Iuta, ae ō atu i le itu i sasae o le Vaitafe o Ioritana i le nuu o Moapi ma nonofo ai. O i inā na maliu ai le tane a Naomi, ma tuua ai na o ia ma lana fanau tama e toalua. Na tutupu aʻe nei tama, ua matutua ma faaipoipo, peitai mulimuli ane na maliliu foi i laua. Ona  tuua toatasi ai lea o Naomi ua aunoa ma ni ona suli e tausia o ia.

Ua loomatua o ia, ua lē toe faiaiga, ma ua itiiti foi se tamaoaiga na totoe ia te ia. Ona o lona agalelei sa manao ai o ia e toe faafoi atu Ruta ma Orepa, o avā a lana fanau tama e toalua, i aiga o o la tinā atonu e maua ai ni tane mo i laua. Sa manatu Naomi e toe foi atu na o ia i lona nuu moni. I aso nei, ua faapena foi ona faanoanoa nisi tagata matutua, ae maise lava pe afai ua maliliu nisi e pele ia i latou. I le pei o Naomi, atonu latou te manaomia se tasi e tausia i latou, ae latou te lē mananao e avea i latou ma avega mamafa.

E ui i lea, sa leʻi tuulafoaiina e Ruta le tinā o lana tane. Sa alofa o ia i lenei loomatua faapea foi Ieova, le Atua sa tapuai i ai Naomi. (Ruta 1:16) O lea na la toe foi faatasi atu ai i Iuta. I lena nuu, sa iai se fuafuaga alofa i le Tulafono a Ieova sa mafai ai e tagata matitiva ona aoina, pe faaputuina so o se mea e totoe mai le seleselega o le fanua. Ona sa talavou Ruta, sa ia ofo atu ai ma le naunautai na te faia lenei mea i lona faapea atu: “Soʻu alu.” Sa leʻi faavaivai o ia i lona galue mo le manuia o i laua uma.—Ruta 2:2, 17, 18.

O le faatuatua ma le alofa o Ruta ia Ieova sa avea ma faalaeiauga malosi ia Naomi, na mafua ai ona manatunatu Naomi i se auala mautinoa ma aogā. O lona poto i le Tulafono ma tu masani a le atunuu sa aogā i lea taimi. Sa ia tuuina atu se fautuaga poto i lana fesoasoani faamaoni ina ia mafai ai e lenei fafine talavou ona toe maua mai le tofi o le aiga, ma maua ai sana tama e faaauau ai le gafa o le aiga, e ala i lona faaipoipo atu i se tagata ua oti lana avā. (Ruta, mataupu 3) O Ruta o se faaaoaoga lelei lea mo i latou o loo faataulagaina i latou i le tausia o tagata mamai ma ē matutua. (Ruta 2:10-12) I totonu o le faapotopotoga i aso nei, e tele ni galuega faapena e ao ona faia e fesoasoani ai i ē mamai ma ē matutua. E faapefea?

E Aogā Le Maopoopo

I le uluai faapotopotoga Kerisiano, sa iai se lisi o fafine ua oti a latou tane o ē sa manaomia se tausiga faaletino. (1 Timoteo 5:9, 10) E faapena foi i aso nei, atonu e ao i toeaina ona faia se lisi o ē mamai ma ē matutua o loo manaomia se tausiga faapitoa. I nisi faapotopotoga ua iai lava se toeaina e tofia e vaaia lea tulaga o sana avega tauave faapitoa. Ona o le tele o ē matutua, e pei o Naomi, latou te lē matuā naunau mo se fesoasoani, e manaomia ai i lea uso le tomai i le fuafuaina o lea tulaga ma—i se auala faautauta ma le magafagafa—ia mautinoa ua faia mea uma e tatau ona fai. Mo se faaaoaoga, e mafai ona ia tagai i le Maota o le Malo po o iai uma mea o loo manaomia mo ē mamai ma ē matutua. Pe afai e talafeagai, e mafai ona ia manatunatu i mea e pei o se nofoaga mo nofoa faataavalevale, o mea uma e talafeagai mo fale lē taʻua, ni meafaalogo mo i latou e lē lelei le faalogo, ma se nofoaga mo ni nofoa faapitoa. E ao foi i lea uso ona faamautinoa i latou e lē o lava mai i sauniga i le Maota o le Malo po ua maua se lipine ua pueina ai sauniga, po o le faalogologo mai i ai e ala i le telefoni.

E iai foi se manaoga mo le fuafuaina o auala i sauniga ma fonotaga. Sa iai se faafitauli i se tasi tuafafine matua ina ua le avanoa lē sa masani ona aveina o ia i sauniga. Na telefoni solo o ia i uso seia oo ina maua sona auala, ma mulimuli ane sa ia lagona ai faapea ua fai o ia ma avega mamafa ia i latou. O le logoina o le toeaina o loo vaaia ia tulaga o le a faaitiitia ai lona masiasi.

E mafai foi e lea toeaina ona fesiligia ni aiga eseese pe mafai ona latou auauai e asiasi atu i ē matutua. I lenei auala e mafai ai e fanau ona aʻoaʻoina faapea o le tausia o ē matutua o se vala o le olaga o se Kerisiano. E lelei mo tamaiti ona aʻoaʻoina ina ia tauaveina lenei avega tauave. (1 Timoteo 5:4) Ua faapea mai se tasi ovasia matagaluega: “O loʻu iloa, e toaitiiti lava ni tamaiti po o ni talavou e mafaufau lava i latou e asiasi atu i ē matutua ma ē mamai.” Atonu latou te lē o mafaufau i ai, pe latou te lē mautinoa se mea e fai i ai, po o ni tala foi e tautatala atu ai; e ao la i mātua ona aʻoaʻoina fanau i ia tulaga.

Peitai, e ao ona manatua, o le toatele o ē  matutua latou te talisapaia le taʻu mamao atu o le taimi e asiasi atu ai se uo. I le faia faapea, o le a faaopoopo atu ai ia i latou le olioli i le faatalitalia o lena mālō. Afai e aumai e mālō ni mea taumafa māmā, e pei o se kofe po o se keke, ma ia vave ona faamamā pe a uma, o le a leai ai la se avega mamafa e faaopoopo atu i lea tagata matua. O se tasi ulugalii ua matutua, ae o loo malolosi lava, e iai lava le aso i vaiaso taitasi e teu ai le la tamai ato faapitoa mo tafaoga ma asiasi faasolosolo atu ai i ē matutua o le latou faapotopotoga. E matuā talisapaia lava a la asiasiga.

E tele faapotopotoga ua faia Suesuega Tau Tusi a Vaega i taimi o le ao ona o tagata matutua. I se tasi nofoaga, na faatalosagaina ai nisi aiga ma ni tagata talaʻi nofofua pe mafai ona latou lagolagoina se vaega faapena, ma o le iuga, sa mafai ai e se vaega o suesuega tau tusi o loo iai ē matutua ma ē laiti ona fetausiai le tasi i le tasi.

E lē tatau ona tuua na o toeaina latou te taimua i lenei tulaga. O i tatou uma lava e tatau ona nofouta i manaoga o ē mamai ma ē matutua. E mafai ona tatou faafeiloaia i latou i le Maota o le Malo ma faaalu se taimi e talatalanoa ai ma i latou. O le valaaulia i se faatasiga faasamasamanoa o le a taliaina. Atonu e mafai ona tatou valaaulia i latou tatou te ō faatasi i se tafaoga po o se faigamalologa. E iai se tasi Molimau e masani ona latou ō faatasi ma tagata talaʻi matutua pe a alu i ni ana malaga faapisinisi i se isi nofoaga e mamao ese ma le taulaga. E tāua tele le fesoasoani i ē matutua ina ia o latou lagona pea o loo amanaia i latou. Aua lava neʻi tuua i latou e solomuli, e pei ona naunau Naomi e faia, auā e vave ai ona oo i le matuā vaivai o le tino ma le mafaufau.

O ē talavou e lē atoatoa le mafaufau pe mamai, e manaomia foi se tausiga. E iai se tasi Molimau sa iai sana fanau tama e toatolu sa maua i maʻi e lē mafai ona togafitia, ma o le toalua o i latou ia na oo ina maliliu ai lava. Na faapea mai o ia: “E faigata tele i se faapotopotoga ona faaauau le tausiga o se tasi pe afai e maua i se maʻi e faataotolia mo se taimi umi. Aisea e lē tofia ai ni tagata talaʻi talavou e maufaatuatuaina e talanoaina le mau o le taeao ma faitau i ai ni mataupu mai le Tusi Paia i taeao taitasi i a latou uo o loo faataotolia ona o maʻi? E mafai e talavou, e aofia ai paeonia, ona auauai i le faia o lea vaega.”

Pe a Foliga mai e Oo Lava ina Oti

E masani lava ona fesagaia ma le lototele e auauna a Ieova le oti ona o ni gasegase po o ni sauaga. Pe a lagona e ē o mamai ua latalata ina maliliu, o se tulaga masani le tutupu o ni faalogona eseese. Pe a maliliu i latou, o le a faapena foi ona faanoanoa o latou auaiga ma taumafai e talia ma faamasani i le tulaga ua oo i ai. O lea o se mea e lelei i le tagata maʻi le faaalia o ona lagona e uiga i le oti, e pei ona sa faia e Iakopo, Tavita, ma Paulo.—Kenese, mataupu 48 ma le 49; 1 Tupu 2:1-10; 2 Timoteo 4:6-8.

Ua tusi mai se Molimau e fomai e faapea: “E tatau lava ona talanoaina lenei mataupu. Talu lava ona ou galue faafomai, ou te iloa e leai se lelei e maua e le maʻi pe afai na te nanaina le mea moni e uiga i se maʻi o loo aafia ai o ia.” E ui i lea, e tatau lava ona tatou malamalama i le mea o loo fia iloa e le tagata maʻi lava ia ma le taimi tonu o loo ia fia iloa ai lea mea. O nisi maʻi latou te faaalia mai lava le taimi ua latou iloa o le a maliliu ai, ma latou te mananao foi e talatalanoa i o latou faalogona ma manatu e uiga i lena mea. O isi e foliga mai e tumau pea ona faamoemoe e leʻi taitai ona feoti ma e lelei foi la i a latou uo ona faamoemoe faapena.—Faatusatusa i le Roma 12:12-15.

Atonu e iai se tasi ua latalata ina oti ma ua matuā vaivai ai po ua faafaigata foi ona ia tatalo. Atonu o le a faamafanafanaina lea tagata maʻi i le manatu o loo taua i le Roma 8:26, 27 e faapea o loo silafia e le Atua “oi e le mafai ona talatalaina.” Ua silafia lelei e Ieova ona o na mafatiaga e ono faigata ai i se tagata ona mafaufau i upu e tatalo atu ai.

Ae afai e fetaui, e tāua le tatalo faatasi ma le tagata maʻi. Ua fai mai se tasi uso: “A o vaivai loʻu tina ma ua lē mafai foi ona toe  tautala, sa ia faailoa mai ia i matou lona manao ina ia matou tatalo faatasi ma ia, e ala i lona piilima. Ina ua uma la matou tatalo ona matou usuina lea o se pese e tasi o pese o le Malo, auā e fiafia tele loʻu tinā i musika. I le taimi muamua, e na ona usuusu lava o le fati o le pese e aunoa ma upu, ma mulimuli ane ona matou usuina lemu lea o upu. Sa matuā mautinoa lona fiafia i ai. E aunoa ma se faaletonu, o nei pese ua matou faafesootaia ma o matou olaga o ni Molimau a Ieova, e taʻu atu ai faalogona ia atonu e faafaigata ona faamatalaina.”

O le talanoa ma se tagata maʻi ua faasolo ina vaivai e manaomia ai le alofa, faautauta ma ni faalogona mafana. E mafai e se tagata asiasi ona ia sauniunia ni mataupu e faamalosia ma atiina aʻe ai le faatuatua e talanoa i ai, ma e tatau foi ona ia mataala e alofia ni talanoaga lē lelei e uiga i isi tagata ma o latou faafitauli. E tatau foi ona fetuutuunai le umi o le asiasiga i ni mafuaaga e tatau ma talafeagai. Afai e lē o matuā malamalama lelei le tagata maʻi, o se mea lelei le manatu faapea atonu o loo mafai lava ona ia lagona mea o loo talanoa atu ai. O lea ia e faaeteete i upu e te fai atu ai.

Le Avega Tauave ua Tatou Faia

O le tausia o ē mamai ma ē matutua o se avega tauave faigata. Mo i latou e vavalalata le fesootaiga ma le maʻi, e manaomia lo latou uai faaletino i ai ma faalogona. Latou te manaomia ma faatalitalia isi o le faapotopotoga ia malamalama ma fesoasoani ia i latou. O i latou o loo tausia isi tagata o le aiga o loo mamai po o nisi foi uso talitonu, o loo latou faia le mea ua tonu e ui lava ina misia ai nisi sauniga pe faaitiitia ai foi lo latou auai i le faiva i le fanua mo nisi taimi. (Faatusatusa i le 1 Timoteo 5:8.) O le a faamalosia i latou i foliga malamalama o le faapotopotoga. Atonu e iai nisi taimi e mafai ai ona suitulaga se uso po o se tuafafine i le tausiga, ina ia mafai ai e lea tagata ona auai i se sauniga ma olioli i ni itula faafouina i le galuega talaʻi.

O le mea moni, afai o oe o le tagata maʻi, e mafai foi ona fai sau gaoioiga. O lou manatu faapea ua leai se faamoemoe ma se fesoasoani e tusa ai ma lou maʻi, o le a atili ai ona e loto ita, ae o le loto ita e faaesea ai se tagata ma iu ai ina lē fiafia i ai isi tagata. Ae na i lo o lena, e mafai lava ona e taumafai e faaali atu lou talisapaia ma le agaga o le galulue faatasi. (1 Tesalonia 5:18) Tatalo mo isi o loo mafatia. (Kolose 4:12) Mafaufau loloto i upu moni matagofie o le Tusi Paia ma talatalanoa i ai ma tagata o loo asiasi atu. (Salamo 71:17, 18) Ia naunau e iloaina le faagasologa o faamalosiauga faaleagaga o loo maua i lea taimi e tagata o le Atua. (Salamo 48:12-14) Ia faafetai atu ia Ieova mo nei faalaeiauga fiafia. O le mafaufau loloto i ia mataupu, o le a mafai ai ona matagofie le olaga i aso o lou tagata matua, e pei o se la goto ua lafoia lona malamalama i le afiafi.

E tatau ia i tatou uma lava ona tauivi ia tumau i le faamoemoe lea, e leoleoina ai o tatou mafaufau e pei o se puloutau ae maise lava i taimi e tofotofoina ai. (1 Tesalonia 5:8) O se mea lelei le mafaufau loloto i le faamoemoe o le toetu ma lona faavae malosi. E mafai ona tatou vaai atu ma le mautinoa i le lumanai ma faatalitali ma le naunautai i le aso e lē toe iai se oti, se maʻi po o ni tiga ona o le soifuaga matua. Mulimuli ane, o le a soifua maloloina lelei tagata uma. E oo foi i ē ua maliliu o le a toe faatutu mai. (Ioane 5:28, 29) O ia “mea e lē vaaia” tatou te vaaia lava ia i lo tatou faatuatua ma o tatou loto. Aua lava neʻi faatuatuanaiina ia mea.—Isaia 25:8; 33:24; Faaaliga 21:3, 4.