E te Manatua?

Po ua e iloa le tāua ia te oe o lomiga o Le Olomatamata talu ai nei? Ia, aisea la e lē tofotofo ai lou mafaufau i fesili o loo mulimuli mai:

▫ Afai e ofi ni manatu lē mamā i o tatou mafaufau ae leʻi faatalitalia, o le ā e ao ona tatou faia?

E ao loa ona sui le mataupu e mafaufau i ai, alu e savalivali, faitau se tusi, pe fai se galuega i le fale. O le tatalo foi o se tasi lea o fesoasoani malosi i na ituaiga o tulaga. (Salamo 62:8)—4/15, itulau 17.

▫ Aisea e ao ai i le au talavou ona faaeteete i le ituaiga o musika latou te faalogologo i ai?

E iai i musika le malosi e uunaia ai, e faafiafia ai, ma taaina ai. Talu ai ona o le tele o nisi o ituaiga o musika ua taatele i aso nei ua faatumulia i faamatalaga mo feusuaiga lē faatuaoia ma faamatalaga e fai ma ufiufi o amioga lē tatau, e faigofie ai lava ona iloa le tatau ona matuā faaeteete lelei i le filifilia o lipine, ma pese e faalogologo i ai.—4/15, itulau 20-21.

▫ O le ā le uiga o le faaupuga “le [“faatasi,” NW] mai o lo tatou Alii o Iesu Keriso”? (1 Tesalonia 5:23)

O lenei mea e faasino i le faatasi mai lē vaaia o le Alii o Iesu Keriso e avea ma Tupu, mai le 1914, ma sosoo ai ma lona nofo tupu i le lagi. (Salamo 110:1, 2)—5/1, itulau 11.

▫ O le ā le fuafuaga na ala ai ona faamamaina e Ieova lona malumalu faaleagaga? (Malaki 3:1-4)

Sa finagalo Ieova ia mamā le tulaga o lona malumalu auā pe afai e gasolo ane i ai le toatele o tagata tapuai o ē e iai le faamoemoe faalelalolagi, o le a latou iloaina ai o le nofoaga lea e faaaloalogia ai lona tulaga silisiliese aoao, e faapaiaina ai lona suafa tauatua, ma usitaia ai ana tulafono amiotonu.—5/1, itulau 16.

▫ O ā “mea” ua avatu e Keriso Iesu i ana auauna tofia? (Mataio 24:45-47)

O nei “mea” e faasino lea i sauniuniga uma lava faaleagaga i le lalolagi ua avea ma mea totino a Keriso e fesootai ma lana pule o se Tupu faalelagi. E aofia ai i lenei mea le tofiga ia faia tagata o nuu uma lava ma soʻo o Keriso. (Mataio 28:19, 20)—5/1, itulau 17.

▫ E faapefea ona faaalia e toeaina Kerisiano le ‘naunau’ i le leoleoina o le lafu mamoe, e tusa ai ma le uunaiga a Peteru i le 1 Peteru 5:2?

O se toeaina Kerisiano o lē o loo vaaia mamoe o le a ia faia lana galuega faaleoleo mamoe ma le naunautai, i lona loto malie, i le taitaiga a le Leoleo Mamoe Lelei, o Iesu Keriso. O le auauna ma le naunautai e uiga foi faapea o se leoleo mamoe Kerisiano e gauai atu i le pule a Ieova ma faaalia le faaaloalo mo fuafuaga faatiokarate.—5/15, itulau 20.

▫ O le ā na uiga i ai Iesu ina ua ia fetalai atu faapea so o se tasi e mulimuli mai ia te ia e tatau ona lē “usiusitai o ia ia te ia”? (Mataio 16:24)

O le ‘lē usiusitai ia te oe lava’ o lona uiga ua e tuu atu ai oe lava ia Ieova na te puleaina lou tagata atoa. (1 Korinito 6:19, 20) O lona uiga ua e ola, e lē mo le faafiafiaina o oe lava, a o le Atua. (Roma 14:8)—6/1, itulau 9.

▫ O le ā e ao ona faia ina ia faafiafiaina ai se tasi?

O le olioli i se faiā lelei ma Ieova ma ia faaauau pea ona tele mea e fai i lana auaunaga e aumaia ai le fiafiaga moni i le olaga o se tasi.—6/1, itulau 22.

▫ Aisea na faataga ai e Ieova Aperaamo ina ia saoloto e talanoa atu ia te ia e uiga i Ana fuafuaga mo le faaumatiaina o Sotoma? (Kenese 18:22-32)

O se tasi o mafuaaga ona o Aperaamo sa fai ma uo a le Atua. (Iakopo 2:23) E lē gata i lena, na silafia lelei e Ieova le puapuagatia o faalogona o Aperaamo. Na silafia e le Atua sa nofo i Sotoma Lota le atalii o lona uso ma sa manatu tele Aperaamo mo le faasaoina o Lota. Ona o nei mafuaaga na finagalo malie ai Ieova e tali atu i talosaga a Aperaamo e tusa ai ma Lana fuafuaga ina ia faaumatia Sotoma.—6/15, itulau 16.

▫ Pe sa avea ea le Toefuataiga o le lotu Porotesano i lona 16 o senituri o se faailoga o le toe foi i le Faa-Kerisiano moni?

E matuā leai lava! Na i lo le toe aumaia o le Faa-Kerisiano moni, na aumaia e le Toefuataiga lotu a le malo po o atunuu ia sa saili e faamalieina malo faapolotiki ma mataalia e lagolagoina i latou i a latou taua.—7/1, itulau 10-11.

▫ O ā “oa i le lagi” na sa fetalai i ai Iesu i le Mataio 6:20?

O oa nei e lē mafai ona mavae, e aofia ai se igoa lelei ma Ieova, ma se talaaga o le auaunaga faamaoni faa-Kerisiano. O nei mea e aofia ai i mea e lē mafai ona faagaloina e Ieova. (Eperu 6:10)—7/1, itulau 32.

▫ O ā uiga ua taʻua e Peteru o ni vaega e matuā tāua i lo tatou faatuatua? (2 Peteru 1:5-7)

Na faapea mai Peteru o le malosi, o le poto, o le le gaoiā, o le onosai, o le amio Atua, o le alofa i le au uso, ma le alofa e ao ona faaopoopo atu i lo tatou faatuatua.—7/15, itulau 13.

▫ O le ā le lapataiga mo auauna a le Atua ua maua i le tala e uiga i le agasala a Tavita ma Patesepa? (2 Samuelu 11:2-4)

E ui ina saoloto e olioli i le fiafiaga i lana lava faaipoipoga, ae na faatagaina e Tavita faanaunauga o feusuaiga lē mamā e tuputupu aʻe. Ina ua vaai atu i le lalelei mai o le avā a Uria, na ia faatagaina ai lona mafaufau—ma gaoioiga—ina ia sailia ni fiafiaga i amioga lē mamā ma ia. E mafai ona tupu lena lava mea i so o se tasi o auauna a le Atua pe afai na te lē aveesea lenei ituaiga o tuinanauga. (Iakopo 1:14, 15)—8/1, itulau 14.