Le Pogai e Manaomia ai Ona E Auai i Sauniga Faa-Kerisiano

MO LE tele o masina, sa olioli ai Rosario o lē sa nofo i Amerika i Saute, e suesue le Tusi Paia faatasi ma Elisapeta. Na uunaia ai Rosario e aʻoaʻo e uiga i le Malo o le Atua ma le auala o le a aumaia ai tulaga faa-Parataiso i le lalolagi. Peitai, so o se taimi lava e valaaulia ai o ia e Elisapeta ina ia auai i sauniga i le Maota o le Malo, na te lē taliaina. Sa manatu o ia faapea, e mafai lava ona ia suesueina le Tusi Paia i le aiga ma faatinoina mea o taʻua ai, e aunoa ma lona auai i sauniga a le faapotopotoga. Po o e tau mānatu foi pe e aogā moni sauniga faa-Kerisiano ia te oe? Aisea na fuafuaina ai e le Atua ona tagata ina ia potopoto faatasi?

Talu ai ona sa ese lava Kerisiano o le uluai senituri mai tagata na siomia ai i latou, o lea sa matuā tāua ai aufaatasiga saʻo mo lo latou faasaoina. Na tusi atu le aposetolo o Paulo i se tasi o faapotopotoga o uluai Kerisiano e faapea: ‘Ia avea outou ma ē ua lē matauleagaina, ma ua sao le amio i luma o le tupulaga faapiopio, ma ua pupula ia te i latou faapei o mea e faamalamalama aʻi le lalolagi.’ (Filipi 2:15) Sa iai se taimi patino na mafatia ai Kerisiano i Iutaia, ma o i latou la na sa tusi atu i ai le aposetolo o Paulo e faapea: “Ia tatou manatunatu foi le tasi i le tasi, ina ia taufaatupu ai le alofa ma galuega lelei; aua le lafoaiina le faapotopotoina o i tatou, pei o le masani o isi, a ia fefaamafanafanai; ia atili ai foi ona faapea ina ua outou iloa o le aso o loo tāulata mai.” (Eperu 10:24, 25) E faapefea ona tatou faatupuina le alofa ma galuega lelei o le tasi i le tasi i le potopoto faatasi?

Le Auala e ‘Faamaaiina’ ai e Kerisiano le Tasi i le Isi

O le upu Eleni na faaaogā e Paulo ma na faaliliuina i le “taufaatupu” o lona uiga moni o le ‘faamaaiina.’ Ua faamatala mai e se faataoto i le Tusi Paia le auala e ‘faamaaiina’ ai e Kerisiano le tasi i le isi ina ua faapea mai: “E maamaai le uamea i le uamea, e faapea foi ona faamafanafana o le tagata i lana uo.” (Faataoto 27:17; Failauga 10:10) E pei lava i tatou o ni mea faigaluega e manaomia ona faamaaiina pea i taimi uma. Talu ai ona o le faatinoina o le alofa mo Ieova ma le faia o faaiuga e faavae i lo tatou faatuatua, o lona uiga ia faaesea mai le lalolagi, e manaomia ai la ona matuā ese mamao o tatou ala mai le toatele o tagata.

O taumafaiga faifai pea ina ia faaesea, e mafai ona vaivai ai lo tatou maelega i galuega lelei. Ae afai tatou te faatasi ma isi o ē e alolofa ia Ieova, ua tatou faamaaiina ai la le tasi i le tasi—ua tatou faatupuina ai le alofa ma galuega lelei o le tasi i le isi. I le isi itu, pe a na o i tatou, ua tatou faasili ai o tatou lava manatu mo i tatou. O le a tuuina ai i o tatou mafaufau manatu o amioga lē mamā, le manatu faapito, po o manatu valea. “O le ua vavae ese, ua saili o ia i lona manao; e finau o ia i le poto uma lava.” (Faataoto 18:1) O le pogai lena na tusi atu ai Paulo i le faapotopotoga i le aai o Tesalonia e faapea: “O lea ia outou feapoapoai ai, ma ia fefaamafanafanai, faapei ona outou faia lava.”—1 Tesalonia 5:11.

Ina ua uma ona suesueina e Rosario aʻoaʻoga faavae o le Tusi Paia, sa tumau pea ona musu o ia e aufaatasi atu i le faapotopotoga. O lea, sa lē toe asiasi atu ai loa Elisapeta ia te ia, ona ua ia lē iloa po o le ā se isi fesoasoani e avatu i ai.  I ni nai masina mulimuli ane, na asiasi atu ai se ovasia femalagaai ia Rosario ma fesili atu ia te ia: “E tusa lava pe maua uma e tagata o se aiga mea taumafa lelei pe a ō i se faleaiga, ae o le ā o loo misia e sui uma o le aiga ona o le lē taumamafa faatasi o le aiga?” Na tali atu Rosario: “Ua latou misia le mafutaga a le aiga.” Sa maua e Rosario le manatu autū, ma amata ai loa ona auai i sauniga e lē aunoa. Sa ia iloaina le tele o aogā ua ia mauaina e toetoe lava i sauniga uma na ia auai.

O le faalogo atu i isi tagata a o faaleo mai lo latou faatuatua i mea foi ia e te talitonu i ai, o se faalaeiauga lena, ma iloa ai foi le tele o suiga i o latou olaga ona o le faatuatua. Na iloa lelei e Paulo lenei itu ona o mea na tutupu ia te ia, ma o lea na ia tusi atu ai i le faapotopotoga i Roma e faapea: “Auā ou te naunau tele i le fia feiloai ma outou, ina ia ou avatu ia te outou se mea alofa i la le Agaga, e faatumauina ai outou; o lona uiga lenei, ina ia tatou fefaamafanafanai i lo tatou faatuatua, o outou atoa ma aʻu.” (Roma 1:11, 12) O le mea moni, sa tele ni tausaga na fia asiasi atu ai Paulo i Roma, ma ina ua ia asiasi atu, sa avea o ia o se pagota i Roma. Ae ina ua ia vaaia uso mai Roma o ē na savavali ane mo le silia i le 40 maila (60 kilomita) mai le aai ina ia feiloai ia te ia, “ona faafetai lea [“o Paulo,” NW] i le Atua, ma loto tele ai.”—Galuega 28:15.

Mauaina o Taumafa Faaleagaga i Taimi Faigata

A o faafalepuipuiina Paulo i Roma, na ia tusi atu ai i uso Eperu ina ia aua le lafoaiina le faapotopotoina faatasi. E uigā lea mo i tatou auā na ia faaopoopo atu i ai upu e faapea: “Ia atili ai foi ona faapea ina ua outou iloa o le aso o loo tāulata mai.” (Eperu 10:25) Ua faaalia atu pea e Molimau a Ieova mai le Tusi Paia e faapea, o le tausaga e 1914 na faailogaina ai le amataga o le taimi o le iuga o lenei lalolagi ma ua matuā lata mai “le aso e faamasino ai ma fano ai tagata faalematau.” (2 Peteru 3:7) E tusa ai ma le tusi o le Tusi Paia o Faaaliga, ina ua lafoina ifo le Tiapolo mai le lagi i le amataga o le taimi o le iuga, sa matuā lotoa lava o ia “ona alu atu ai lea o ia e tau le taua ma i latou ua totoe . . . o e ua tausi i poloaiga a le Atua, ma ua taofi le mau ia Iesu Keriso.” (Faaaliga 12:7-17) O le mea lea, ua matuā faigata ai le usiusitai i poloaiga a le Atua i le taimi nei; e manaomia ai ona tatou faatasitasi ma uso talitonu i le tele e mafai ai. O le a fesoasoani sauniga ia i tatou e faamalosia ai lo tatou faatuatua ma lo tatou alofa mo le Atua ina ia mafai ai ona tetee atu i osofaiga a le Tiapolo.

O le alofa i le Atua ma le faatuatua e lē pei o fale e tutū mausalī pea pe a uma ona fausia. Na i lo lena, ua pei na uiga o ni meafaiola e tutupu mālie aʻe pe a fafagaina pea, peitai, e iu ina vaivai ma mamate pe a lē fafagaina. O le mafuaaga lena ua saunia ai e Ieova taumafa faaleagaga e lē aunoa ina ia faamalosia ai ona tagata. Tatou te manaomia uma lava na taumafa,  ae o fea se isi mea e mafai ona tatou maua mai ai na taumafa e ese ai mai le faalapotopotoga a le Atua ma ana sauniga? E leai se isi mea.—Teuteronome 32:2; Mataio 4:4; 5:3.

Na faatū mai e Iesu se fesili e mafai ona fesoasoani ia i tatou ia iloa ai pe faapefea ona ia fafagaina le faapotopotoga Kerisiano. Na ia fesili e faapea: “O ai foi le auauna faamaoni ma le mafaufau, ua tofia e lona alii e pule i ana auauna, ia avatu a latou mea e ʻai i ona itu aso? Amuia lea auauna, pe a sau lona alii e maua o ia o loo faapea ona fai.” (Mataio 24:45, 46) O ai na faauuina e Iesu i le uluai senituri e fafagaina ona soʻo, ma o ai na ia maua o faamaoni i le fafagaina o i latou ina ua afio o ia i le mana o le Malo? O le mea moni, e leai se tagata o soifua pea talu mai na senituri. Ua faaalia i faamaoniga, o lea auauna o loo faatatau i le faapotopotoga o Kerisiano ua faauuina i le agaga, e pei lava ona avea le nuu o Isaraelu ma auauna a le Atua i taimi a o leʻi iai ni Kerisiano. (Isaia 43:10) Ioe, ua saunia e Iesu a tatou taumafa faaleagaga e ala mai i lena vaega i le lalolagi aoao o Kerisiano ua faauuina i le agaga, lea o loo faasolo mai ai taumafa faaleagaga i aso nei, e ala mai i faapotopotoga a Molimau a Ieova i lo outou vaipanoa.

O le sauniuniga a Iesu mo le auala e faasoasoaina mai ai taumafa faaleagaga sa faamatalaina atili lea e le aposetolo o Paulo: “Na afio ae o ia i luga, ma na taʻitaʻi faatagataotaua i le tafeaga; ua na foaiina foi mea alofa i tagata. Na ia tuuina mai foi nisi e fai ma aposetolo, o isi foi e fai ma perofeta, o isi foi e folafola le tala lelei, o isi foi e fai ma leoleo atoa ma aʻoaʻo; ina ia faaatoatoaina ai le au paia, latou te fai ai le galuega a auauna, ia atiina ae ai le tino o Keriso; seia tatou oo atu o i tatou uma lava ma le loto gatasi i le faatuatua ma le iloa lelei o le Alo o le Atua, ina ia fai ma tagata matua ia oo i le fua o le ua matua, e tatau ma le tumu o Keriso.”—Efeso 4:8, 11-13.

E matuā moni lenei mea i totonu o faapotopotoga taitasi—i sauniga—o nei “mea alofa i tagata” latou te atiina aʻe uso. Mo se faaaoaoga, i Anetioka, “o Iuta foi ma Sila, auā o perofeta i laua, ua la faamafanafana atu, ma faamalosi atu i le au uso i upu e tele.” (Galuega 15:32) Ua faapena foi i lauga a tane agavaa faaleagaga i aso nei ona faamalosia ai lo tatou faatuatua ina ia lē vaivai ma mate ai.

Atonu e moni o loo lelei pea lo tatou agaigai i luma ona o le fesoasoani totino a se sui o le faapotopotoga e ui ina atonu tatou te leʻi amata ona auai i sauniga. Ua faapea mai le Tusi Paia e iai le taimi “e ao ina toe aʻoaʻoina outou e se tasi i mataupu muamua o le afioga a le Atua; ua avea foi outou ma e o tusa i ai le suāsusu, a e le o mea aano.” (Eperu 5:12) Peitai e lē mafai e se tasi ona tumau ai pea e faavavau i le suasusu. Ua saunia e sauniga faa-Kerisiano se polokalama faifai pea o faatonuga mai le Tusi Paia ua faatulaga ina ia faatumauina ai pea le malosi o le alofa i le Atua ma le faatuatua, ma ua saunia ai foi fesoasoani aogā i le faatatauina o le “finagalo uma o le Atua.” (Galuega 20:27) E sili atu lena i lo le “suāsusu.” Ua faapea mai atili le Tusi Paia: “A o mea aano, mā e matutua ia, o i latou ua masani ona lagona ina ua aʻoaʻosooina e iloa ai le lelei ma le leaga.” (Eperu 5:14) E tele mataupu e talanoaina i sauniga atonu e lē o iai i le faatulagaga faavae mo le aʻoaʻoga faale-Tusi Paia i aiga, e pei lea o le suesueina o fuaiupu taitasi o valoaga tāua o le Tusi Paia ma talanoaga loloto o le auala e mafai ai ona tatou faataitai i le Atua i o tatou lava olaga.

 Tulafono a Ieova —E Pei o se Faamanatu mo Oe

E ala i na suesuega a le faapotopotoga, ua faamanatu mai ai pea e Ieova ia i tatou po o le ā le ituaiga tagata e ao ona iai i tatou. O na tulafono e tāua. A aunoa ma na tulafono, e faigofie lava ona tatou pauu atu i le manatu faapito, faamaualuga, ma le matapeapea. O le a fesoasoani ia i tatou tulafono mai le Tusi Paia ina ia olioli ai i ni faiā faamanuiaina ma isi tagata, ma le Atua lava ia. Na tautino mai e le tusitala o le Salamo 119:59 e faapea: “Na ou manatunatu i oʻu ala, ona liliu atu lava lea oʻu vae i au tulafono.”

A o tatou auai e lē aunoa i sauniga faa-Kerisiano, ua tatou iloa ai le galueaiina o valoaga a Ieova e auala ia Isaia, o loo faapea mai: “E lē toe lafi lo outou Aʻoaʻo Sili, ae vaai atu o outou mata i lo outou Aʻoaʻo Sili. Ma faalogo foi o outou taliga i le upu i o outou tua e faapea mai: ‘O le ala lava lenei. Ia outou savavali ai.’” O loo silasila mai Ieova i lo tatou agaigai i luma ma faasaʻoina ma le alofa i tatou pe a tatou uia se laasaga sese. (Isaia 30:20, 21, NW; Kalatia 6:1) Ma na te saunia foi isi fesoasoani e sili atu i lo o lena.

Mauaina o le Agaga Paia e Ala i le Faapotopotoga

E ala i le auai pea i sauniga faa-Kerisiano ma Molimau a Ieova, e faamalosia ai i tatou e le agaga paia o le Atua, lea o loo i luga o ona tagata. (1 Peteru 4:14) E lē gata i lena, ua tofia foi e le agaga paia ovasia Kerisiano i le faapotopotoga. (Galuega 20:28) O lenei malosi galue mai le Atua e matuā taaina ai lava se Kerisiano. Ua faapea mai le Tusi Paia: “A o le fua o le Agaga o le alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le le gaoiā.” (Kalatia 5:22, 23) O loo galue foi le agaga paia e ala i le faalapotopotoga a le Atua, ina ia fesoasoani ia i tatou ia maua se malamalamaga manino ofoofogia e uiga i le mea o loo finagalo Ieova e tuuina atu mo i latou o ē alolofa ia te ia. Ina ua uma ona ia faamalamalamaina faapea e lē mafai e tagata lauiloa o lenei faiga o mea ona malamalama i fuafuaga a le Atua, na tusi ai Paulo e faapea: “Ua faaalia mai ia mea e le Atua ia te i matou e lona Agaga.”—1 Korinito 2:8-10.

E faaopoopo atu i taumafa faaleagaga e faamalosia ai le faatuatua, ua saunia e le faapotopotoga se toleniga mo i latou o ē e mananao e auai i le galuega autū a le faapotopotoga. O le ā lena galuega?

Toleniga ua Saunia e le Faapotopotoga

O le faapotopotoga Kerisiano e lē o se fale kalapu faafiafia e tau ina fiafia ai tagata i faafiafiaga ma atonu e faamalosia ai e le tasi le isi ina ia ola i ni olaga lelei. Na faatonuina e Iesu le faapotopotoga ina ia talaʻi atu le tala lelei o le Malo ia i latou o loo pogisa faaleagaga. (Galuega 1:8; 1 Peteru 2:9) Mai le aso na faavaeina ai i le Petenekoso 33 T.A., sa avea lea o se faalapotopotoga o tagata talaʻi. (Galuega 2:4) Po ua ia te oe ea le tomai e taumafai ai e taʻu atu i se isi e uiga i fuafuaga a Ieova, ae e lē taulau ona e faatalitonuina o ia? Ua saunia e sauniga a le faapotopotoga se toleniga totino i le tomai e aʻoaʻo atu ai. E ala i le suesueina o faaaoaoga mai le Tusi Paia, tatou te aʻoaʻoina ai pe faapefea ona faatutu atu ni manatu e ioe faatasi i ai ina ia talanoaina, pe faapefea ona faaaogā le Tusi Paia e fai ma faavae o faamatalaga moni, ma le auala e fesoasoani atu ai i isi ina ia fefulisai e ala i le faaaogāina o fesili ma faataitaiga. O na ituaiga o tomai e mafai ona fesoasoani ai ia te oe ina ia maua le olioli e lē mafaamatalaina o le fesoasoani atu i isi tagata ia malamalama i le upu moni o le Tusi Paia.

I lenei lalolagi fevaevaeai, e tumu i amioga lē mamā, ua avea ai le faapotopotoga Kerisiano o se lafitaga moni faaleagaga. E ui lava o loo faia aʻe i tagata lē lelei atoatoa, ae ua o se nofoaga o le filemu ma le alofa. O le mea lea, ia avea oe o se tasi e auai pea lava pea i ana sauniga uma ma ia e iloa e oe lava le moni o upu a le faisalamo: “Faauta, o le mea e matuā lelei ma le matagofie lava, pe a nonofo faatasi lava o uso. . . . auā na poloai Ieova ia oo i ai lana faamanuia, o le ola lava lea e faavavau.”—Salamo 133:1, 3.