Manumalo mai le Puleaina e le ʻAva Malosi

“I le taimi o le galuega pe tusa o le sefulu i le taeao, a ua amata ona ou mafaufau i se meainu. E ta ane le sefulu ma le lua, ua ou alu e inu saʻu fagu se tasi pe lua. E ta ane le tolu ua amata ona tete loʻu tino. Ou te talotalo ia manava ia ae seʻi toe inu se isi aʻu fagupia. E masani lava ona inu atu ni aʻu fagu se lua a o ou alu i le fale. Pe tusa o le ta o le fitu ua ou toe fiainu foi. Ona ou toe inu foi lea, ou te paʻū ese ai mai le nofoa ua lē iloa se mea, e susū loʻu ofuvae, ma ou te taoto ai lava i aʻu feau vai seʻi oo i le taeao. Mafaufau i ai ma faatele i le 7 aso o le vaiaso; faatele lena i le 52 vaiaso i le tausaga; faatele lena i le 29 tausaga.”

O LENEI tagata o sē ua pulea e le ʻava malosi. E lē na o ia o aafia ai. E faitau miliona tagata i le lalolagi aoao o loo tauivi ma lenei tulaga e oti ai, e tusa ai ma le tala a Dr. Vernon E. Johnson, “ua aafia ai le tagata atoa: le faaletino, faalemafaufau, ma le faaleagaga.” *

E toatele tagata popoto ua faapea mai, e lē mafai ona foia le puleaina e le ʻava malosi, peitai e mafai ona taofia e ala i le lē toe inu ʻava malosi i le olaga atoa. E lē o se faatonuga mamafa lenei, auā e lē manaomia le ʻava malosi mo le ola. O le mea moni, o le faaaogaseseina o le ʻava malosi e lē fiafia i ai le finagalo o le Atua. (1 Korinito 6:9, 10) E sili ona lelei le ulu atu i le lalolagi fou a le Atua a ua tuuesea le ʻava malosi na i lo o le naunau i ai ma lē maua ai le ola e faavavau.—Mataio 5:29, 30.

O le vavae ese mai—ma le saoloto pea—i le  faaaogaseseina o le ʻava malosi ua masani ona avea o se luʻi e lē mautonu. (Faatusatusa i le Roma 7:21-24.) O le ā e mafai ona fesoasoani? Seʻi o tatou saunia la ni nai fautuaga tuusao. E tusa lava foi pe e te lē taumafa i le ʻava malosi, ae o le a aogā lenei fautuaga ia te oe ma atonu e mafai ona e fesoasoani atu ai i nisi o uo po o aiga o ē o loo tauivi ina ia manumalo mai le ʻava malosi.

Se Iloiloga ma le Faamaoni o Oe Lava

O le tasi o toatuga tele e tatau ona manumalo mai ai, o le faafitia lea o le mea moni e faapea, o oe o se tagata o loo pulea e le ʻava malosi. O le faafiti, o se tasi lea o vala o le lē faamaoni. O se faamatalaga e fai ma le faamoemoe: e puipuia ai lou saolotoga e inu. Atonu e te faapea mai, ‘E lē leaga tele loʻu faafitauli.’ O lea lava e iai loʻu aiga. O lea foi ou te tumau i laʻu galuega.’ O le mea sili ona tāua, o loo e inu pea i le ʻava malosi.

O le faafiti atonu e taofia ai oe mai le faalogo atu i uo o ē e mananao e fesoasoani atu ia te oe. Na matauina e Robert, le malosi tele o le inu ʻava a le tamāfai o lana avā ma ua leaga ai lana amio: “Sa ou talanoa ia te ia ina ua mavae ni nai aso, ma fesili atu ia te ia pe o ia manatu o loo saosaolaumea lana inu i lana amio.” O le iuga? “Sa ou feagai ma se faafitiga aʻiaʻi, ma tali e pei o nei, ‘E leai ni faamaoniga’ ma, ‘E te lē iloa po o ā oʻu faalogona.’”

Afai e faalatalata atu ia te oe se sui o le aiga po o se uo o lē e manatu tele ia te oe e uiga i lou inu tele i le ʻava malosi, ia suesue totoʻa ifo ma le faamaoni ia te oe lava. (Faataoto 8:33) Pe mafai ona e ola e aunoa ma se ʻava malosi mo se vaiaso atoa, se masina atoa, pe mo ni nai masina? Afai e leai, aisea? Aua neʻi pei oe o le tagata o lē na faaʻoleʻoleina ia lava i manatu sese. Na faapea mai Iakopo: “E tusa ia ma le tagata ua vaavaai i le faaata i ona lava mata na fanau ma ia; auā ua vaavaai o ia ia te ia, ona alu ese lea, ua galo loa le uiga o ona mata.”—Iakopo 1:22-25.

E tusa lava pe ua amata ona faaleleia, e ao pea ona e faaeteete i le faafitia. Ua faamatala mai e le tusi o le Willpower’s Not Enough e faapea: “O le tagata faatoʻā amata ona tuuesea le ʻava malosi e mafai ona faaseseina o ia e talitonu faapea, talu ai ona ua mafai ona taofia lana inu mo sina taimi—atonu mo le uluai taimi—ua foia nei.” E malolosi tele na mafaufauga o tagata ua pulea e le ʻava malosi, ma o le laasaga muamua lea e toe vaivai ai. Ina ia e teena na faafitiga, e lē tatau la ona e tutoatasi na o oe.

Saili le Fesoasoani

Na sailia e se tagata tatou te ono faaigoaina ia Leo se fesoasoani atamai, i lona iloa e lē mafai ona ia manumalo mai le pulea e le ʻava malosi na o ia lava. Ina ua uma se taimi o togafitiga e tele, sa faagasolo ina toe malosi o ia. Na manatu Leo faapea e tāua tele le fesoasoani a tagata popoto. * Afai o maua na fesoasoani i lou vaipanoa, atonu o le a e filifili e faaaogāina loa.

 Peitai, e tatau ona e iloa, e sili atu mea e manaomia na i lo o le lē toe inu. E iai foi nisi faafitauli e tatau ona e faafesagaia na i lo o le pulea e le ʻava malosi. O le lē amanaiaina o nei mea e mafai ona lamatia ai. Na tusia e le fomai o Charlotte Davis Kasl e faapea: “Sa ou faatalanoaina nisi na togafitia mo le faaaogaseseina o vailaau mo le faasefulufa taimi, talu ai ona sa leʻi foiaina le autū o le faafitauli o le faaleagaina, faalagolago malosi i se mea, ma le lē tausia faalelei.”

Na iloa e Dennis le moni o lenei mea. Na tusi mai o ia: “E ui lava sa ou lē onā i le inuina o le ʻava malosi, ae sa tele pea oʻu faafitauli. E lē lava le na ona faapea e taofi le inu. E tatau ona ou toe tepa i le taimi ua teʻa, iloilo le tulaga sa ou iai a o oʻu tamaitiiti, malamalama i le auala na latou faaafia ai aʻu, ma faia ni suiga i laʻu amio.”

I se tulaga tutusa, sa tatau ai foi ia Leo ona toe tagai totoʻa ifo ia te ia lava ina ia agaigai ai i luma i le faaleleia atili. Na fai mai o ia: “O aʻu o se tagata e sili ona fuā, ma sauā. Na fesouaiina aʻu i le matuā faanoanoa ma le faaseseina o le mafaufau i le matalasi.” Na faatatauina e Leo le fautuaga a le Tusi Paia i le Efeso 4:22: “Ina ia outou to ese le tagata tuai o loo ua leaga.” Ioe, “o le tagata tuai o loo ua leaga” na te faamalosia le taaʻiga i lou tagata totino. E pei lava ona iai o se faailoga i se vali, ua faapena foi ona iai se vaega o lou tagata totino o loo faailoaina mai ai lou tagata tuai. Pe afai e aveesea se amioga sese, o le ā e totoe ai? O le tagata totino lea sa leaga atonu mo le tele o tausaga. O lea, o le faaleleia, e tatau ona aofia ai le suia o le tagata tuai lea e pipii atu i au amioga tuai.

Faavae se Faiā ma le Atua

O le toe faaleleia o Leo na aofia ai le toe atiina aʻe o se faiā totino ma le Atua. Na fai mai o ia: “O le aʻoaʻo ia faalagolago ia Ieova, na matuā suia atoatoa ai oʻu uiga, aʻu amio, ma laʻu vaaiga.

Ae peitai, e tatau ona faaeteete. So o se faiā lava—ma tagata po o le Atua—e manaomia ona saoloto, faamaoni, ma ia faatuatuaina. O uiga moni ua lē toe iai i se tagata ua pulea e le ʻava malosi. Ae e mafai ona atiae, peitai e manaomia ai se taimi umi.

I le avea ma tagata ua pulea e le ʻava malosi, atonu e te leiloa pe faapeī lea mea o le faiā vavalalata. Atonu e te leʻi masani ai i se faiā faapena. O lea ia onosai. Aua le soona faatopelau i lenei laasaga, e faapea e faafuasei ona maua se faiā ma le Atua e iloa ai ua e matuā ʻaloese mai le ava malosi. Ia fai ni taumafaiga malolosi ina ia e malamalama ai i le Atua ma ona uiga. Mafaufau loloto i ai e lē aunoa, atonu i le faitauina ma le faaeteete o salamo o loo i le Tusi Paia na o loo faaalia loloto ai lagona o le talisapaia e uiga ia Ieova ma ona ala. *

‘Le Mana e Matuā Tele’

O se faiā e faatuatuaina ma mautinoa ma le Atua, e mafai ona matuā taaina ai oe. O le a lagolagoina e Ieova au taumafaiga ina ia faaleleia ai. (Faatusatusa i le Salamo 51:10-12; 145:14.) Atonu e mafai ona e faalatalata atu ia te ia i le tatalo ma le naunautai i so o se taimi, ma mautinoa o le a faaauau pea ona ia foaiina mai ia te oe le ‘mana e matuā tele.’—2 Korinito 4:7; Filipi 4:6, 7.

 E sili atu ona silafia e Lē na Foafoaina Mea ou uiga na i lo o tagata. (Salamo 103:14) E mafai ona fesoasoani le au faufautua a tagata, o ē e faalagolago i le poto o tagata; peitai, maeu le sili atu ona tele o le fesoasoani mai o Lē na Foafoaina Mea ia te oe i lenei tauiviga! (Isaia 41:10; 48:17, 18) Ua ia saunia ma le alofa fesoasoani i totonu o le faapotopotoga Kerisiano.

Se Fesoasoani Malosi

E mafai ona avea toeaina taumatuaina faaleagaga i le faapotopotoga Kerisiano o se puna o fesoasoani sili. O le toaitiiti o i latou o le a faapea mai e tomai i mea faafomai po o mea tau i le soifua maloloina o le mafaufau, peitai latou te iloa ma faalagolago i le Afioga a le Atua ma mataupu silisili. Ua mafai ona avea i latou “e pei o se lafitaga i le matagi, ma se mea e malu ai i le afā; e pei o vaitafe i le nuu naumati, e pei o le paolo foi o le papa tele i le nuu ua le o i ai se vai.” (Isaia 32:2) Ia ave i fale la latou fesoasoani. *

O le mea moni, o na toeaina Kerisiano, faatasi ma isi sui o le aiga ma uo, latou te lē puipuia oe mai iuga o au lava gaoioiga. Ua faamatala mai e le tusi o le Coming Off Drink (Ia Saoloto mai le Faaaogaseseina o le ʻAva Malosi) e faapea: “O le togafitiga tāua mo le faaleleia o le pulea e le ʻava malosi, o le iloa lea o iuga matautia o le pulea e le ʻava malosi, ma le faamalosia o i latou ina ia fesagai ma iuga o a latou lava amio.” O le a agalelei i latou peitai e tuusao, ma faalaeiauina oe e fesagai ma le mea moni ma pipii i le ituaiga o togafitiga ma amioga e manaomia ina ia manumalo ai i lau taua faasaga i le ʻava malosi.

O Lau Avega Tauave le Toe Faaleleia

A o e maua aogā mai le lagolagosua a isi, e manaomia ona e iloa, e leai se tagata po o se agaga e mafai ona faamalosia oe e toe faaleleia. Ua ia te oe le saolotoga e filifili ai i tulaga tau amio. O le toe faaleleia o oe o lau lava lea avega tauave. (Faatusatusa i le Kenese 4:7; Teuteronome 30:19, 20; Filipi 2:12.) Ia talia lena avega tauave, ma o le a faamanuia oe e Ieova. Ua faamautinoaina i tatou e le 1 Korinito 10:13 e faapea: “Ua le maua outou e se tofotofoga e ese i lo tagata; a ua faamaoni le Atua, o le na te le tuuina atu outou i le tofotofoga e sili i se mea ua outou lavatia, a e sauni foi faatasi ma le tofotofoga se mea e sao ai, ina ia outou lavā oono.” O lea la, ia lototele—e mafai ona e manumalo mai le puleaina e le ʻava malosi.

[Faaopoopoga i lalo]

[Ata i le itulau 24]

Atonu e te mafatia i le lagona faapea ua e lē toe aogā ona o le pulea e le ʻava malosi. Afai o lea, aua le faavaivai i le faamoemoe. O loo maua le fesoasoani.

[Pusa i le itulau 26]

PE AFAI UA E FAAVAIVAI

Fai mai le tusi o le Willpower’s Not Enough e faapea: “O le sauniunia neʻi faavaivai e pei lava o le mumū aʻe o se afi. E lē o le uiga faapea o loo e faatalitalia se afi, peitai, o loo e sauni e fai se gaoioiga fetaui i lena taimi.” Afai la ua e faavaivai:

□ Tatalo ia Ieova. Ia mautinoa o loo ia silafia lelei lou faafitauli ma e finagalo e fesoasoani mai.—Salamo 103:14; Isaia 41:10.

□ Ia faailoa atu i se toeaina Kerisiano, pe a uma ona e filifilia lē e te faafesootaia pe a manaomia se fesoasoani. Ia taʻu le mea moni na tupu, ma ia faalogo ma le faaeteete i lana fautuaga faale-Tusi Paia.

□ Ia leoleo faasaga i le faavaivai. O lou faatalale ia te oe lava o le a uunaia ai oe ia matuā faavaivai ai, o le mea lea ia faatulaga saʻo ai lau mea sese. O lou toilalo i se tauiviga e tasi e lē faapea ai ua e faiaina i le taua. Pe afai e paʻū se tagata tamoe i le marafoni, e lē faapea e toe foi o ia i le laina na amata mai ai le taufetuliga; ae e tu aʻe o ia ma toe faaauau i le tausinioga. Ia faapena ona toe faaleleia oe. O loo e iai pea i le ala. O loo tumau pea ona iai au taumafaiga i le tele o vaiaso, o masina ma tausaga sa e lē toe inu ai i le ʻava malosi.

[Ata i le itulau 25]

Ia teena le faafitia e ala i le tagai totoʻa ifo ma le faamaoni ia te oe lava