Matagataga le Noataga o le Faaipoipoga

SA OPOOPO e se tina talavou lana pepe e na o le lua masina le matua. Ona faafuasei lava lea ona ia faapaʻū lana tama i lalo. I ni nai itula mulimuli ane ona oti ai lea o le pepe. Na faapea mai le tina: “Sa iai se mafuaaga na ou faapaʻūina ai o ia, ona ua lē tausia e laʻu tane lona aiga.” Na i lo o le talanoaina o le mataupu ma lana tane, sa ia faasasao atu lona ita i lana pepe e leai se agasala.

E toaitiiti ni tina ua iu i le faia o se mea matuia faapena, ae o le toatele lava ua iai faalogona e pei o lea tina. Ua oo ina sili atu ona faigata mo ulugalii faaipoipo ona faataulauina a latou faaipoipoga. Fai mai le mekasini o le Journal of Marriage and the Family: “Pe a paʻū maulalo le tulaga taulau manuia o faaipoipoga e pei ona iai i le Iunaite Setete i aso nei, e matuā faigata lava la ona faia se tautinoga malosi aʻiaʻi o se faaipoipoga . . . e oo lava i se tagata e sili ona poto, na te lē mafaia ona fai o sea tautinoga.”

I nei aso fesouaiina, o amioga lē mamā, o le tetee, o aitalafu, o femisaaiga i va o ē nofotane ma faiavā i se aiga, ma le manatu faapito, o nei mea uma ua faatuputeleina ai feteenaiga i totonu o aiga, na e masani lava ona iu ai i le tatalaina o faaipoipoga. Ona o le matuā matuia o lea tulaga i Iapani, ua oo lava i le Lotu Katoliko sa tautaua i lona teena malosi o talagā faaipoipoga, ua ia faatuina nei se komiti faapitoa ina ia faaitiitia ai faafitauli mo talagā faaipoipoga ma le toe faaipoipo o sui o le lotu. Ua faateleina le fuainumera o ē ō i le lotu ua aafia i faafitauli e fesootai ma talagā faaipoipoga.

Ae peitai, ua faaalia i le aofai o talagā faaipoipoga, e na o sina vaega itiiti lea o le faafitauli e sili ona telē. Ua faaalia i se sailiiliga na faia i le Iunaite Setete e faapea o le itiiti o le faatauaina o le uigā o le olaga faalefaaipoipoga, ua mafua ai ona faateleina talagā faaipoipoga, ae lē ona o ni gaoioiga masani ia e faigofie ai ona tatalaina faaipoipoga. Ona o le itiiti o taumafaiga ma le manatu faatauvaa i le tautinoga faalefaaipoipoga, ua faaitiitia ai le matagofie o le faaipoipoga. E toatele o loo faafoliga mai lava o se ulugalii faaipoipo i le vaai a tagata, ae lē o toe momoe faatasi, ma ua seāseā lava ona toe fetautalaai. Ua lagona e nisi e pei ona faia e se  fafine mai se atunuu i Sasae o lē na ia faatauina lona lava tuugamau ma faapea mai, ‘Ou te lē manao e tanu faatasi aʻu ma laʻu tane i le tuugamau e tasi.’ Ona o le lē mafai ona tatala o le la faaipoipoga ma lana tane i le taimi nei, ua ia fuafuaina ai e faia sa la talagā faaipoipoga pe a oti o ia. E faanoanoa lava ona e ui ina e lē o tatalaina faaipoipoga a na tagata i le taimi nei, a ua lē avea ai le olaga faaipoipo o se puna o le fiafia mo i latou.

O le tulaga lena sa iai Isao. Sa faaipoipo atu i lana avā ona o se faanaunauga na tupu faafuasei, o lea, sa leai sona faanaunauga ina ia suia le auala manatu faapito o lona olaga. E ui lava sa lelei lona totogi ona o ia o se ave loli, ae sa ia faamaumauina uma ana tupe na maua e ʻai ma inu ai ae lē tausia lona aiga. O le iuga, sa lē muta a la misa ma lana avā. O loo manatua e Isao e faapea: “So o se taimi lava e tupu ai se mea lē lelei ia te aʻu, e na ona ou alu atu lava i le fale ma faasasao atu loʻu ita i loʻu aiga.” E pei o se mauga mu e lē mafai ona mate, le oso aʻe pea o lenei mataupu o talagā faaipoipoga.

E toatele tane ma fafine o loo onosaia se faaipoipoga lē manuia. Pe tatala a latou faaipoipoga pe leai, ae latou te lē o maua le fiafia. Po o iai ea se auala e mafai ai ona latou taulau manuia i a latou faaipoipoga? O le ā e mafai ona faia e faamalosia ai noataga o a latou faaipoipoga?