E Faamuamua e le Aiga Kerisiano Mea Faaleagaga

“Ia loto gatasi outou uma, ia fealofani, ia alolofa i le au uso, ia mutimuti vale i le alofa, ia agalelei.”—1 PETERU 3:8.

1. O le ā le filifiliga ua ia i tatou uma, ma e faapefea i la tatou filifiliga ona aafia ai lo tatou lumanai?

UA MATUĀ fetaui lelei le mau o i luga i le faatulagaga faaletagata ua leva ona faavae—le aiga! Ma e maeu le tāua o le taimua o mātua i nei vala! O o la uiga lelei ma lē lelei foi, o le a vaaia pea i a la fanau. Ae o le filifiliga e paʻū lea i tagata taitoatasi o le aiga. Ona o ni Kerisiano, e mafai ona tatou filifili pe tatou te fia tagata faaleagaga po o ni tagata faaletino. E mafai ona tatou filifili e faafiafia i le Atua pe faatiga ia te ia. O lena filifiliga e iu i le faamanuiaga, le ola e faavavau ma le filemu—po o le malaia, le oti e faavavau.—Kenese 4:1, 2; Roma 8:5-8; Kalatia 5:19-23.

2. (a) Na faaalia faapefea e Peteru lona manatu mamafa i le aiga? (e) O le ā le faaleagaga? (Tagai i le faamatalaga i lalo.)

² Sa sosoo atu ai loa ma upu a le aposetolo i le 1 Peteru mataupu e 3, fuaiupu e 8, ina ua uma ni fautuaga lelei na ia avatu i avā ma tane. Sa naunau moni Peteru mo le lelei o aiga Kerisiano. Na ia iloa o le malosi faaleagaga, o le ki lea i se auaiga e autasi ma iai le alofa mafana. O le ala lea na ia taʻua ai i le fuaiupu e 7 e faapea, afai e lē utagiaina e tane lana fautuaga, o le a iu ai i se pa pupuni faaleagaga i le va o le  tane ma Ieova. * O le a lē faafofogaina tatalo a le tane, pe afai na te lafoaia manaoga o lana avā po o le faatiga ia te ia i uiga lē agalelei.

Keriso—Le Faaaoaoga Sili o le Faaleagaga

3. Na faamatilatila mai faapefea e Paulo le faaaoaoga a Keriso mo tane?

³ O le faaleagaga o se aiga e faalagolago i faaaoaoga lelei. Afai o le tane o se Kerisiano, e taimua foi o ia i le faaalia o uiga faaleagaga. Afai e lē talitonu le tane, e masani ona taumafai le tinā e amo lena avega. I so o se tulaga lava, ua saunia e Iesu Keriso le faaaoaoga sili e mulimuli ai. O lana amio, ana upu, ma ona manatu sa o ni faamalosiau pea ma faafouina ai. Ua tatai pea e le aposetolo o Paulo le tagata faitau i le faataitaiga alofa a Keriso. Mo se faaaoaoga ua ia taʻua: “O le tane o le ulu ia o le avā, pei o Keriso foi o le ulu ia o le ekalesia, o ia foi o le faaola o le tino. O outou tane, ia outou alolofa atu i a outou lava avā, faapei o Keriso foi ona alofa mai i le ekalesia, ma foaiina mai e ia ia te ia e fai mona sui.”—Efeso 5:23, 25, 29; Mataio 11:28-30; Kolose 3:19.

4. O le ā le faaaoaoga o le faaleagaga na faataatia e Iesu?

⁴ O Iesu o le faaaoaoga mataina lea o le faaleagaga ma le tulaga ulu e faaalia i le alofa, le agalelei, ma le mutimutivale. Sa ia faataulagaina ia lava, ae leʻi faaloloto mo ona lava lelei. Sa ia faapaia pea lava lona Tamā ma faaaloalo i lona tulaga ulu. Sa ia faataitai i le taitaiga a lona Tamā, o le ala lea na mafai ai ona ia faapea mai: “Ou te le mafaia ona fai o se mea e tasi, na o aʻu; e faatatau laʻu faamasinoga i loʻu faalogo; ua tonu lava laʻu faamasinoga, auā ou te le usiusitai i loʻu lava loto, a o le finagalo o le Tamā, o le na auina mai aʻu.” “Ou te le fai fua foi se mea, a e peitai, faapei ona aʻoaʻo mai e loʻu Tamā ia te au, o mea ia ou te tautala atu ai.”—Ioane 5:30; 8:28; 1 Korinito 11:3.

5. I le faalaeiau atu i ona soʻo, o le ā le faaaoaoga na faataatia e Iesu mo tane?

⁵ O le ā le uiga o lenei mea mo tane? O lona uiga o le faaaoaoga e tatau ona latou mulimuli atu i ai i mea uma lava, o Keriso lea, o lē na gauai atu pea i lona Tamā. Mo se faataitaiga, e pei ona saunia e Ieova meaai mo meafaiola uma i le lalolagi, na faapena foi ona saunia e Iesu meaai mo ona soʻo. Na te leʻi faagaloina o latou manaoga sili faaletino. O ana vavega o le fafagaina o tagata e 5,000 ma le 4,000 o se faamaoniga lea o lona alofa ma lona manatu mamafa i lana avega tauave. (Mareko 6:35-44; 8:1-9) E faapena foi i aso nei, o ulu o aiga e alolofa, e manatu mamafa i manaoga faaletino o o latou auaiga. Ae pe gata ai ea i inā la latou avega tauave?—1 Timoteo 5:8.

6. (a) O ā manaoga tāua o le aiga e tatau ona tausia? (e) E mafai faapefea e tane ma tamā ona faaalia le femalamalamaai?

⁶ E pei ona taʻua e Iesu, e iai foi isi manaoga o aiga e sili atu ona tāua. E iai o latou manaoga faaleagaga ma itu tau i faalogona. (Teuteronome 8:3; Mataio 4:4) Tatou te fetufai ma isi, i le aiga ma i le faapotopotoga. Tatou te manaomia taiala lelei e uunaia ai i tatou ina ia fefaalaeiauai. I lenei itu, ua maua ai e tane ma tamā se matafaioi tele e tauaveina—ae sili atu ona tele pe afai o i latou o ni toeaina po o ni auauna o le faiva. E manaomia foi e mātua nofofua na lava uiga a o latou fesoasoani atu i a latou fanau. E tatau i mātua ona malamalama e lē gata i mea o loo talanoa mai ai tagata o le aiga, ae o mea foi latou te lē o taʻu maia. E manaomia ai i lena mea le faautauta, le taimi, ma le onosai. O se tasi lena o mafuaaga na mafai ai e Peteru ona faapea mai, e ao i tane ona magafagafa ma ia nonofo ma a latou avā e tusa ma le poto.—1 Timoteo 3:4, 5, 12; 1 Peteru 3:7.

O Lamatiaga ia Alofia

7, 8. (a) O le ā e manaomia ina ia alofia ai e se aiga mea e ono afatia ai lo latou vaa faaleagaga? (e) O le ā e manaomia e ese ai mai se amataga lelei i le laasaga faa-Kerisiano? (Mataio 24:13)

⁷ Aisea e matuā tāua ai le uai atu i le tulaga faaleagaga o le aiga? Pe a faataitai, atonu o le a tatou fesili, Aisea e tāua ai ona matuā uai atu le kapeteni o se vaa i ana faafanua, a o ia  faatautaiina se vaa i se ogasami matautia o loo iai ni vaega papau? Ia Aokuso 1992, na lafoia ai le meli o le Queen Elizabeth 2 (QE2) i se vaipanoa o loo mafiafia ai le oneone ma papa, lea e faapea e masani ona faaletonu ai folauga i le vasa. Na taʻua mai e se tasi tagata e nofo ai i lea nuu: “E toatele tagata na faatautaia folauga ua maumau ai a latou galuega ona o le faia o ni mea sese e mafua ai faalavelave i lena vaipanoa.” Na tuʻia le QE2 i se papa tele i le vasa. O lenei mea sese na taugata lona tau i le toe faaleleia. Na faaleagaina le tasi vae tolu o le tino o le vaa, ma sa tatau ai ona avatu le vaa e toe faafou mo le tele o vaiaso.

⁸ E faapena foi pe afai e lē tilofaia ma le faaeteete e le “kapeteni” o le aiga le faafanua, le Afioga a le Atua, e faigofie lava ona mafatia ai lona aiga i le faaleagaina faaleagaga. Afai o se toeaina po o se auauna o le faiva, e ono iu i le aveesea ai o faaeaga i le faapotopotoga pe atonu foi e matuā faaleagaina ai isi tagata o le aiga. O lea la, e ao i Kerisiano uma ona faaeteete ina ia lē faaseseina i le tau ina faamalieina faaleagaga, i le faalagolago lea i lo latou maelega ma a latou suesuega sa faia i taimi ua tea. I lo tatou tulaga faa-Kerisiano, e lē lava le tau ina faia o se amataga lelei; e tatau ona taunuu ma le manuia le faigamalaga.—1 Korinito 9:24-27; 1 Timoteo 1:19.

9. (a) O le ā le tāua o suesuega totino? (e) O ā fesili e fesootai lelei ma lea mataupu atonu tatou te fesiligia ai i tatou lava?

⁹ Ina ia alofia vaega papau, o papa ma faga oneone faaleagaga, e manaomia ona tatou mulimuli pea i a tatou “faafanua” e ala i le suesueina e lē aunoa o le Afioga a le Atua. E lē mafai ona tatou faalagolago i le na o le suesuega o mataupu faavae ia na faaliliu ai i tatou i le upu moni. O lo tatou malosi faaleagaga e faalagolago i se polokalama faifai pea ma le paleni o suesuega ma le auaunaga. Mo se faaaoaoga, a o tatou ō atu ma a tatou kopi nei i le Suesuega o Le Olomatamata a le faapotopotoga, e mafai ona tatou fesili ifo ia i tatou lava, ‘Po ua ou matuā suesueina ea ma lo matou aiga lenei mataupu, i le sueina o mau ma manatunatu loloto i lo latou faatatauga? Po o tau ea ina matou vaseina tali? Po ua matou lafoaia ea le faitauina o le mataupu a o leʻi auai i le sauniga?’ O tali faamaoni i nei fesili e mafai ona uunaia ai i tatou e mafaufau loloto i a tatou suesuega, ma faamaite ai lo tatou naunau ina ia faia se faaleleiga pe a talafeagai.—Eperu 5:12-14.

10. Aisea e tāua ai se iloiloga a le tagata o ia lava?

¹⁰ Aisea e tāua ai lea iloiloga totoʻa e le tagata  o ia lava? Talu ai ona o loo tatou ola i se lalolagi ua pulea e le agaga o Satani, o se lalolagi e tele ana auala faatogafiti ua taumafai ai e lepetia lo tatou faatuatua i le Atua ma ana folafolaga. O se lalolagi o loo taumafai e faateleina ni mea tatou te faia ina ia lē lava ai so tatou taimi mo manaoga faaleagaga. O lea la tatou te ono fesili ifo ai ia i tatou lava, ‘Po o malosi faaleagaga ea loʻu aiga? Po o avea ea aʻu o se matua e malosi e pei ona tatau ai? Po o matou atiina aʻe ea o se aiga, lena malosi faaleagaga o loo uunaia ai le mafaufau, lea e fesoasoani ia i matou ina ia faia filifiliga e faavae aʻe i le amiotonu ma le faamaoni?’—Efeso 4:23, 24.

11. Aisea ua tāua ai sauniga faa-Kerisiano mo le itu faaleagaga? Taʻu mai se faaaoaoga.

¹¹ E ao ona faamalosia lo tatou itu faaleagaga i sauniga uma tatou te auai atu i ai. O na itula tautele i le Maota o le Malo po o le Suesuega Tau Tusi a le Faapotopotoga e fesoasoani e faafouina ai i tatou, i le tele o taimi o loo tatou taumafai ai ia sao mai le lalolagi matautia a Satani. Mo se faaaoaoga, maeu le faafouina, i le suesueina o le tusi o le Greatest Man Who Ever Lived! Ua fesoasoani lenei ia i tatou ina ia maua ai se malamalamaga e sili atu e uiga ia Iesu, i lona soifuaga, ma lana faiva. Ua tatou faitauina maeaea mau o loo sii mai ai, faia a tatou sailiiliga totino, ma aʻoaʻoina ai le tele o mea mai le faaaoaoga na faataatia e Iesu.—Eperu 12:1-3; 1 Peteru 2:21.

12. E faapefea ona tofotofoina lo tatou itu faaleagaga e le faiva i le fanua?

¹² O le tofotofoga e lelei mo lo tatou itu faaleagaga o le faiva faa-Kerisiano. Ina ia tatou finafinau i la tatou molimau atu fuafuaina po o le lē fuafuaina, lea e masani ona fesagai ma se lē fiafia po o le tetee mai o tagata, tatou te manaomia ai se uunaiga saʻo o le loto, le alofa i le Atua ma le alofa i tuaoi. O le mea moni, e leai se isi e fiafia pe a teena, ma e ono tupu lena mea i la tatou faiva i le fanua. Ae ao ona tatou manatua, e lē o i tatou o loo teteeina, ae o le tala lelei. Na fetalai Iesu e faapea: “Afai e ʻinoʻino mai le lalolagi ia te outou, ua outou iloa ua muamua ona ʻinoʻino mai ia te au, i lona ʻinoʻino ia te outou. Afai a ni tagata o le lalolagi outou, po ua alofa mai le lalolagi i ona tagata; a e le ni o le lalolagi outou, a ua ou filifilia outou nai le lalolagi, o le mea lea e ʻinoʻino ai le lalolagi ia te outou. . . . A e faia e i latou ia mea uma ia te outou ona o loʻu igoa, auā e lei iloa e i latou o ia ua auina mai aʻu.”—Ioane 15:18-21.

E Leotele Gaoioiga na i lo o Upu

13. E mafai faapefea e se tagata e toatasi ona faaleagaina le itu faaleagaga o se aiga?

¹³ O le ā e tupu i se aiga pe afai e tumama uma lava le aiga i le tausiga o le fale seʻi vagana ai se isi tagata e toatasi? A oo la i se aso timuga, e na o le pau foi lava lea o le tagata o le a na ia soliina mai le palapala i totonu o le fale. O tulagavae palapalā i so o se mea o le a iloa ai le leai o se mafaufau o lea tagata, ma faaopoopo atu ai isi galuega mo isi. E faapena foi lona faatatauga i le itu faaleagaga. E tusa lava pe na o le toatasi se isi e manatu faapito pe faatalale, ae mafai ona faaleagaina ai le talaaga o le aiga. O le auaiga uma lava la, ae lē na o mātua, e ao ona tauivi ina ia faaatagia atu le tulaga faalemafaufau o Keriso. Maeu se faafouina pe a galulue faatasi tagata uma, ma latou faamoemoe i le ola e faavavau! E taulai atu mafaufauga o lena aiga i le itu faaleagaga (ae lē o le faafia amiotonu). E seāseā lava iai ni tulaga lē lelei faaleagaga i se auaiga faapena.—Failauga 7:16; 1 Peteru 4:1, 2.

14. O ā faaosoosoga i meafaitino ua faatutu mai e Satani i o tatou luma?

¹⁴ Ua ia i tatou uma lava manaoga autū faaletino e tatau ona faamalieina ina ia tausia ai lo tatou ola i aso taitasi. (Mataio 6:11, 30-32) Ae masani lava ona lofituina mea tatou te matuā manaomia ona o mea tatou te mananao i ai. Mo se faaaoaoga, ua ofo mai e le lalolagi a Satani ia i tatou ituaiga uma o mailei. Afai tatou te tagisa pea i le fia mauaina o mea fou uma o loo aʻe mai, o le a lē taitai ona faamalieina o tatou manao, auā o na mea fou o le a lē umi ae uma atu lo latou mananaia, ona aliae mai foi lea o isi suiga fou. Ua faaofi mai e le au fai pisinisi se faiga faataamilo e lē taitai ona muta. E uunaia ai i tatou ina ia saili pea le tele o ni tupe e faamalie ai mea o tatou manaonao  i ai. E mafai ona iu lenei i mea “e tele e valea ai ma leaga ai,” po o “faanaunauga valea ma le matautia.” E mafai ona oo ai i se olaga lē paleni ma faasolo atu lava ina itiiti ai taimi mo galuega faaleagaga.—1 Timoteo 6:9, 10; The Jerusalem Bible.

15. O le ā le itu e tāua ai le faaaoaoga a le ulu o le aiga?

¹⁵ O le itu foi la lenei e tāua tele ai le faaaoaoga e faataatia e le ulu o le aiga Kerisiano. O lona paleni i avega tauave faaletino ma le faaleagaga e ao ona faalaeiau ai isi tagata o le aiga. E mautinoa lava le malaia pe afai e ese le mananaia o faatonuga e fai atu e le tamā, ae lē o taulau ona ia faatatauina ana lava upu. E lē umi lava ae masani foi tamaiti i lea uiga o le manao e fai e le isi tagata le mea na te taʻu atu e fai, ae na te lē o faia e ia lava. I se tulaga talitutusa, pe afai e faalaeiau atu se toeaina po o le auauna o le faiva i isi ina ia auai i le faiva i lea fale ma lea fale, ae seāseā ona ia auai faatasi atu ma lona aiga i lena galuega, e lē umi la ae lē toe faatuatuaina o ia i lona aiga ma i le faapotopotoga foi.—1 Korinito 15:58; faatusatusa i le Mataio 23:3.

16. O ā fesili tatou te ono fesili ifo ai ia i tatou lava?

¹⁶ Ua talafeagai ai la ona tatou iloiloina o tatou olaga. Po ua tumu ea o tatou olaga i le sailia o manuia faaletino ae galo ai ona agaigai i luma faaleagaga? Po o tatou agaʻi ea i luma i le sailia o mea a le lalolagi ae faatalale i mea a le faapotopotoga? Ia manatua le fautuaga a Paulo: “O le upu moni lenei, afai e naunau se tasi i le faiva o le epikopo, e manao o ia i le galuega lelei.” (1 Timoteo 3:1) O le manatu mamafa i avega tauave i le faapotopotoga, e matuā mataulia ai lo tatou tulaga faaleagaga na i lo o se tulaga siitia i le galuega. E tatau ona iai pea le paleni lelei, ina ia lē soona pule ai o tatou pule i galuega faaletino ia i tatou, e peiseai sa tuuina atu i tatou ia i latou ae lē o Ieova.—Mataio 6:24.

O Fesootaiga Aogā e Faamalosia Atili ai le Itu Faaleagaga

17. O le ā ua faaopoopo atili atu i le faatupuina o le alofa moni i se aiga?

¹⁷ E faitau miliona aiga i aso nei ua na ona avea o ni fale e momoe ai. O le ā le uiga o lena faaupuga? Ua na ona ō mai lava o tagata o le aiga i le fale e momoe ma aai, ona toe taufai taape foi lea. E seāseā ona latou nonofo faatasi i lalo i se laulau e olioli faatasi i se taumafataga. Ua lē o iai se lagona autasi mafana i le aiga. O le ā le iuga? Ua lē toe iai ni fesootaiga, e lē toe iai ni talanoaga fesanisaniai. Ma e ono iu foi i le mou atu o le fiafia i isi tagata o le aiga, atonu ua leai se manatu mamafa moni i isi. Pe a tatou alolofa o le tasi i le isi, tatou te faaavanoa ai la taimi e talanoa ai ma faalogo atu ai i isi. Tatou te fefaalaeiauai, ma fesoasoaniai. O lenei vala o le faaleagaga e aofia ai fesootaiga fesanisaniai i le va o paaga faaipoipo ma le va o mātua ma fanau. * E manaomia ai le taimi ma le faautauta a o tatou fetalanoaai, ina ia fetufaai ai mea o tatou olioli ai, mea na tutupu ia i tatou; ma o tatou faafitauli.—1 Korinito 13:4-8; Iakopo 1:19.

18. (a) O le ā le mea ua avea pea ma tulaga sili e tutaia ai fesootaiga? (e) O le ā ua atiina aʻe ai ni faiā e aogā?

¹⁸ O fesootaiga lelei e manaomia ai le taimi ma taumafaiga. O lona uiga, ia faaavanoa ese se taimi e talanoa ai ma faalogo atu ai le tasi i le isi. O se tasi o mea e sili ona tutaia ai lenei mea, o le auupega sili ona faamaumau taimi lea e faasilisilia i le tele o aiga—le televise. Ua faatulai mai ai se lui—po o pulea ea oe e le televise, po o oe o loo puleaina le televise? O le  puleaina o le televise e manaomia ai se faaiuga maumauai—e aofia ai le maumauai e tape. Ae o le faia faapea o le a tatou maua ai le avanoa e faamasani atu ai i isi tagata e pei o tagata o le aiga ma uso ma tuafāfine faaleagaga. O faiā aogā e manaomia ai fesootaiga lelei, ia femalamalamaai, i o tatou manaoga ma mea tatou te olioli ai, ia taʻu atu i isi le tele o lo tatou talisapaia o mea lelei uma ua latou faia mo i tatou. I se isi faaupuga, o fesootaiga fesanisaniai e faaalia ai o loo tatou faafetaia ma faatauaina isi.—Faataoto 31:28, 29.

19, 20. Afai tatou te manatu mamafa mo tagata uma o le aiga, o le ā o le a tatou faia?

¹⁹ O lea la, afai tatou te alolofa i isi i le aiga—lea e aofia ai le tausi atu i tagata o le aiga e lē talitonu—o le a sili atu la ona tele mea tatou te faia i le atiina aʻe ma le faatumauina o lo tatou itu faaleagaga. I totonu o le aiga, o le a tatou mulimuli ai i le fautuaga a Peteru: “O le iuga lenei, ia loto gatasi outou uma, ia fealofani, ia alolofa i le au uso, ia mutimuti vale i le alofa, ia agalelei; aua le taui atu le leaga i le leaga, po o le agatele mai i le agatele atu; a ia outou faamanuia atu, ina ua iloa o le mea lenei na valaauina ai outou, ina ia maua e outou le manuia.”—1 Peteru 3:8, 9.

²⁰ E mafai ona tatou maua faamanuiaga a Ieova i le taimi nei pe a tatou tauivi ina ia tausisia lo tatou itu faaleagaga, e mafai e lenei itu ona tatou agaʻi atu ai i le mauaina o lana faamanuiaga i le lumanai pe a tatou mauaina le meaalofa o le ola e faavavau i le lalolagi parataiso. E iai foi isi mea e mafai ona tatou faia faatasi o se aiga, ina ia fesoasoani atu ai i isi i le itu faaleagaga. O le a talanoaina i le mataupu o sosoo mai aogā o le faifai mea faatasi o se aiga.—Luka 23:43; Faaaliga 21:1-4.

[Faaopoopoga i lalo]

E te Manatua?

□ O le ā le faaleagaga?

□ E mafai faapefea ona faataitai atu le ulu o se aiga i le faaaoaoga a Keriso?

□ E mafai faapefea ona tatou alofia mea o loo faamataʻuina ai lo tatou itu faaleagaga?

□ O le ā e mafai ona faaleagaina ai le itu faaleagaga o se aiga?

□ Aisea e tāua ai fesootaiga e aogā?

[Fesili mo le Suʻesuʻega]

[Ata i le itulau 12]

E faamalosia faaleagaga le aiga pe a auai i Suesuega Tau Tusi a le Faapotopotoga