E Faifai Mea Faatasi se Aiga Kerisiano

“Le au uso e, ou te aioi atu ia te outou . . . ia maopoopo lava i le loto e tasi ma le manatu e tasi.”—1 KORINITO 1:10.

1. O le ā le tulaga e tusa ai o le autasi i le tele o aiga?

PO O autasi ea lou aiga? Po o tofu lava le tagata ia ma lona auala e ui ai? Po o outou faifai mea faatasi ea? Po o seāseā lava ona outou iai faatasi i se nofoaga e tasi i se taimi foi e tasi? O le upu “aiga” e faatatau lea i se auaiga o loo autasia. * Peitai, e lē o aiga uma o loo autasi. Na faapea mai se tasi faiaoga Peretania i se iunivesite: “Na i lo le avea o le aiga ma faavae o se sosaiete lelei, o le aiga . . . o le puna o le lē faamalieina o i tatou i mea uma.” Po o le tulaga ea lena o iai lou aiga? Afai o lea, po o lena ea le tulaga e tatau ona iai?

2. O ai tagata iloga o le Tusi Paia ua faamaonia na tutupu aʻe i ni aiga lelei?

² O le autasi ma le lē autasi o se aiga e masani lava ona faalagolago atu i lona taʻitaʻi, po o mātua uma e toalua po o se matua nofofua. I aso anamua, o aiga autasi sa tapuai faatasi, na olioli i latou i faamanuiaga a Ieova. O le tulaga moni lena i Isaraelu anamua, lea sa faaalia ai e le afafine o Iefata, o Samasoni, ma Samuelu, i ni auala eseese ni faamaoniga o lo latou tutupu aʻe i ni aiga faaleatua. (Faamasino 11:30-40; 13:2-25;  1 Samuelu 1:21-23; 2:18-21) I uluai taimi o Kerisiano, o Timoteo, o lē na avea ma uo faamaoni a Paulo i nisi o ana malaga faamisionare, sa aʻoaʻoina o ia i le poto o Tusitusiga Eperu e Loi le tina o lona tina, ma lona tina o Eunike. Maeu le mataina o lona tulai mai o se soʻo ma o se misionare!—Galuega 16:1, 2; 2 Timoteo 1:5; 3:14, 15; tagai foi i le Galuega 21:8, 9.

Aisea e Faifai Mea Faatasi Ai?

3, 4. (a) O ā uiga e ao ona faaalia i totonu o se aiga autasi? (e) E faapefea ona sili atu le tāua o se aiga na i lo le na o se fale?

³ Aisea e aogā ai mo aiga le faifai mea faatasi? Auā e faatupuina ai le matuā femalamalamaai ma le fefaaaloaloai. Na i lo o le vavaeese mai o i tatou mai isi, ia fefaamafanafanaai le tasi i le isi ma felagolagomai. Ua taʻua mai e se mataupu talu ai nei i le nusipepa o le Family Relations e faapea: “Ua amata ona aliai mai se ata manino o loo faamatalaina ai uiga patino o ni ‘aiga malolosi.’ O na uiga e aofia ai le faamaoni o le tasi i le isi ma le talisapaia o le tasi e le isi, le iai o lagona fiafia ma le mafana, o fesootaiga lelei, le tomai e foia ai faafitauli, ma se tulaga faaleagaga e malosi.”

⁴ Pe a iai i se aiga nei uiga, ona lē toe avea ai lea o le aiga e pei o se pamu penisini, o lona uiga e pei o se nofoaga e na ona afe i ai o taavale mo le utuina o le penisini. O le a sili atu ona tāua i le na o se fale. O le a avea o se nofoaga e afe gofie, e fia ō atu uma i ai tagata o le aiga. O le a avea o se maluapapa o le mafana ma faalogona alofa, le mutimutivale, ma le femalamalamaai. (Faataoto 4:3, 4) O se ofaga e autasi i ai le aiga, ae lē o se faamoega o akarava o loo iai misa ma fevaevaeaiga. Ae mafai la faapefea ona ausia lenei itu?

Le Auai Faatasi i le Suesuega a le Aiga

5. O le ā tatou te faia ina ia iloa ai le tapuaiga moni?

⁵ Ua aʻoaʻoina le tapuaiga moni a Ieova e ala i le faaaogāina o o tatou tomai faalemafaufau, po o le ‘malosi e fefuafuatai ai.’ (Roma 12:1) E lē tatau ona puleaina a tatou amio e o tatou faalogona ootia faafuasei, e pei o i latou na sa faagaeeina i lauga ma talitonuga a faalapotopotoga faalelotu o loo faasalalau atu i televise. Peitai ua faamalosia i tatou e a tatou suesuega faifai pea ma le manatunatu loloto i le Tusi Paia ma lomiga mo le faia o suesuega faale-Tusi Paia, ua saunia e le “auauna faamaoni ma le mafaufau.” (Mataio 24:45) Ua tatou gaoioi o ni Kerisiano ona ua ia i tatou le mafaufau o Keriso i so o se tulaga po o so o se faaosoosoga e mapuna aʻe. I lena itu, ua avea ai Ieova o lo tatou Aʻoaʻo Sili.—Salamo 25:9; Isaia 54:13; 1 Korinito 2:16.

6. O le ā le faaaoaoga i le lalolagi aoao ua tatou iloa e faatatau i suesuega a le aiga?

⁶ O suesuega faale-Tusi Paia i aiga ua iai sana matafaioi tāua i le itu faaleagaga o aiga Kerisiano uma. O ā taimi e fai ai le suesuega a le tou aiga? Afai e tuu lava i so o se taimi e avanoa ai, po o le faia faafuasei e aunoa ma se sauniunia, e foliga mai la e lē o faifai pea lena fuafuaga. O le auai faatasi i le suesuega a le aiga e manaomia ai se faasologa mautu ma faifai pea. Ona iloa lea e tagata uma le aso tonu ma le taimi patino ua faatalitalia i latou ina ia auai e olioli faatasi o se aiga faaleagaga. Ua iloa e le silia i le 12,000 sui o le aiga Peteli i le lalolagi aoao, o le latou suesuega faaleaiga e faia i le afiafi o le Aso Gafua. Maeu le tāua ona manatuaina e nei tagata Peteli e faapea, o loo latou tofusia uma i le suesuega e tasi a o faaiuiu le aso, i atu motu o le Pasefika ma Niu Sila, ona faasolo atu ai lea i Ausetalia, Iapani, Taiwan, Hong Kong, ona oo atu lea i Asia, Aferika, ma Europa, ma faaiu atu ai i atunuu i Amerika. E ui ina vava mamao i le faitau afe o maila ma le tele o gagana, ae ua avea lenei suesuega faaleaiga ua faagaeeina ai sui o le aiga Peteli i se lagona o le mafana faatasi. Pe a tuu i se tulaga lata mai, e mafai foi e oe lava ia ona atiina aʻe lea lava lagona e ala i le suesuega a lou aiga.—1 Peteru 2:17; 5:9.

7. E tusa ai ma upu a Peteru, o le ā la tatou vaaiga e tatau ona iai e faatatau i le upu moni?

⁷ Ua fautua mai le aposetolo o Peteru ia i tatou e faapea: “Faapei o tama meamea faatoa fanau mai ia naunau outou i le suāsusu e le suia  o le upu, ina ia outou tutupu ai, pe afai ua outou iloa e agalelei lava le Alii.” (1 Peteru 2:2, 3) Maeu se faatusa matagofie ua fafagu mai e Peteru i na upu! Sa ia faaaogā le veape Eleni o le e·pi·po·theʹsa·te, lea ua taʻua i le Linguistic Key to the Greek New Testament e faapea, e sau mai le upu o lona uiga “ia manaonao atu, ia faanaunau atu, ia losilosi.” E faaalia ai se faanaunauga malosi. Po o e matauina le naunautai o se tamai manu e saili i susu o lona tina, ma le faamalieina o se tamaitiiti pepe pe a faasusuina e lona tina? E ao foi la ona ia i tatou lena lava faanaunauga mo le upu moni. Na taʻua e le tagata aʻoga Eleni o William Barclay e faapea: “Mo se Kerisiano faamaoni, e ao ona manatu i lona suesueina o le afioga a le Atua, e lē o se galuega mamafa ae o se galuega e faafiafiaina ai, ona ua ia iloa i totonu o lona loto, o le a ia maua ai le faamalieina mo mea o loo ia faanaunau i ai.”

8. O le ā le matafaioi ua fesagai ma le ulu o le aiga i le taulimaina o le suesuega a le aiga?

⁸ O le ulu o le aiga e paʻū i ai le avega tauave tele o le suesuega a le aiga. E ao ona ia faamautinoaina o loo fiafia tagata uma i le suesuega ma o loo mafai ona auai tagata uma. E lē tatau i le fanau ona manatu faapea ua na o tagata matutua e aogā i ai le suesuega. E sili atu ona tāua le uigā o le suesuega na i lo le tele o se mataupu e talanoaina. Ia olaola le faaaogāina o le Tusi Paia. Pe afai e talafeagai, ia fesoasoani atu i lau fanau ina ia latou faaataina i o latou mafaufau nofoaga ma vala uma o le fanua i Palesitina lea na tutupu ai mea o loo talanoaina. E ao ona faalaeiauina tagata uma ina ia faia a latou sailiiliga totino ma ia fetufaai ai ma le aiga. O le auala faapea e mafai ai foi e le fanau ona ‘ola aʻe i ala o Ieova.’—1 Samuelu 2:20, 21.

Le Auai Faatasi i le Galuega Faaevagelia

9. E mafai faapefea ona avea le galuega talaʻi o se mea fiafia i le aiga?

⁹ Na fetalai Iesu: “Ia muai talaʻiina foi le tala lelei i nuu uma lava e ao ai.” (Mareko 13:10) O na upu ua tuuina atu ai i Kerisiano faamaoni uma se tofiga—ia avea ma faievagelia, ia tufa atu i isi le tala lelei e uiga i le pulega a le Malo o le Atua. O le faia faatasi o lenei mea e se aiga, e ono avea o se mea e faalaeiauina ma olioli ai.  E fiafia tinā ma tamā pe a taulimaina e a latou fanau le tala lelei. O se tasi ulugalii e iai sa la fanau tama e toatolu e i le va o le 15 ma le 21 o latou tausaga, na faapea mai o le la masani lava o le ō atu faatasi ma le la fanau i le galuega talaʻi i le lautele i Aso Lulu uma pe a tuua le aʻoga, ma taeao uma o Aso Toonai. Na faapea mai le tamā: “Ma te aʻoaʻoina ia i latou se mea fou i taimi uma lava. Ma te faamautinoa foi o lenei mea o loo fiafia ma faalaeiauina ai i latou.”

10. E mafai faapefea ona aogā mātua i a latou fanau i le faiva?

¹⁰ O le galulue faatasi o se aiga i le talaʻiga ma le aʻoaʻo atu, e mafai ona matuā aogā. O nisi taimi e sili atu ona talileleia e tagata se taulimaga faigofie ae uigā e fai atu e se tamaitiiti. Ona fesoasoani atu lea i ai o le tinā po o le tamā pe a manaomia. E mafai ona faamautinoa e mātua o loo agaigai i luma le aʻoaʻoina o le la fanau, ma ia avea ai o ni faifeau “e leai se mea e mā ai, na te vavaetonuina le upu moni.” O le talaʻi faatasi i lenei auala e mafai ai e mātua ona matauina uiga o le la tama, lona maelega, ma ana amio lelei i le faiva. O le iai o se faatulagaga faifai pea, la te iloa ai le agaigai i luma o le tamaitiiti ma faaauau ai pea le aʻoaʻoina ma le faalaeiauina ina ia faamalosia ai le faatuatua o le tamaitiiti. E iloa ai foi e le fanau i lea lava taimi le avea o o latou mātua ma faaaoaoga lelei i le faiva. I nei taimi faigata ma le sauā, o le galulue o se aiga autasi ma le fetausiai, e mafai ai ona avea o se puipuiga a o faateteleina soligatulafono i so o se mea.—2 Timoteo 2:15; Filipi 3:16.

11. O le ā e ono faigofie ai ona faaitiitia le maelega o se tamaitiiti mo le upu moni?

¹¹ E faigofie lava ona mātau e tamaiti le lē tausisi o tagata matutua i a latou upu. Afai e lē o faaalia e mātua le alofa moni mo le upu moni ma le faiva i lea fale ma lea fale, e faigata foi la ona faatalitalia se maelega mai le fanau. O lea, afai o se matua o loo lava lona malosi, ae na o le pau lana auaunaga i le fanua o loo fai, o le suesuega faale-Tusi Paia lea i le vaiaso ma le fanau, atonu la o le a ia seleseleina āuga faanoanoa pe a oo ina matutua nei fanau.—Faataoto 22:6; Efeso 6:4.

12. Ua mafai faapefea e nisi aiga ona latou maua se faamanuiaga faapitoa mai ia Ieova?

¹² O le aogā o le “loto gatasitasi” atonu e mafai ai e se aiga ona felagolagomai ina ia mafai  ai e se tagata e toatasi ona auauna faapaeonia sauatoa i le faapotopotoga. E tele aiga i le lalolagi aoao ua latou faia faapea, ma ua faamanuiaina uma foi i latou mai mea e tutupu ma le faateleina o le maelega o lo latou sui o loo avea ma paeonia.—2 Korinito 13:11; Filipi 2:1-4.

Le Auai Faatasi i le Taulimaina o Faafitauli

13, 14. (a) O ā tulaga e mafai ona aafia ai le nofo filemu o se aiga? (e) E mafai faapefea ona taofia le ono iai o le tele o ni faafitauli o se aiga?

¹³ I nei taimi faigata o “popolega” ma “lamatiaga,” ua omia uma ai i tatou. (2 Timoteo 3:1, Revised Standard Version; Phillips) O loo iai faafitauli i galuega, i aʻoga, ma so o se vaipanoa lava, e oo foi i le aiga lava ia. O nisi ua mafatia i maʻi o le tino, po o ni faafitauli faaumiumi tau i faalogona, i nisi taimi e oo atu ai i lagona tiga ma fenuminumiaiga i le aiga. E mafai faapefea ona taulimaina na tulaga? Pe ala ea i le gūgū lava o le tagata ia e lē fetautalatalaai? Pe ala ea i le faaesea e le tagata o ia lava mai isi, e ui o loo nonofo faatasi i le aiga? E leai. Na i lo o lea, tatou te manaomia ona fesootai i o tatou popolega, ma ia talosaga atu i isi mo se fesoasoani. Ma o fea se isi nofoaga e sili atu ona lelei mo lenei mea na i lo o le lio o se aiga o loo iai le alofa?—1 Korinito 16:14; 1 Peteru 4:8.

¹⁴ E pei ona iloa e so o se fomai, e sili le puipuia na i lo o le togafitia. Ua moni foi lena i faafitauli o le aiga. O talanoaga e saoloto ma tautala saʻo e masani ona taofia ai faafitauli mai le oo ina matuia. E tusa lava pe tutupu mai ni faafitauli matuia, e mafai lava ona taulimaina ma foia pe afai e iloiloina faatasi e le aiga mataupu silisili o le Tusi Paia o loo aofia ai. E masani ona liua femisaaiga e avea ma faiā toafilemu pe a faatatauina upu a Paulo o loo i le Kolose 3:12-14: “Ia oofu outou i le alofa mutimuti vale, ma le agalelei, ma le loto maulalo, ma le agamalu, ma le onosai, . . . ia fefaapalepaleai, ma ia fefaamagaloai outou, pe afai ua agaleagaina se tasi e se tasi; . . . A o le alofa, e lautua lea i nei mea uma, o le fusi lea e atoatoa ona lelei ai.”

Le Auai Faatasi i Faafouga o le Tino

15, 16. (a) O le ā le uiga e ao ona matuā mataulia ai aiga Kerisiano? (e) O ā ituaiga o tagata o loo maua i nisi lotu, ma aisea?

¹⁵ O Ieova o le Atua fiafia, ma o le upu moni o se feau fiafia—o le feau e aumai ai le faamoemoe mo tagata. E lē gata i lea, o le olioli o se tasi lea o fua o le agaga. O lenei olioli e matuā ese lava mai se fiafia e oso faafuasei aʻe i se tagata tamoe o lē ua manumalo i se taaloga sa tauva ai. O se faalogona loloto lea o le faamalieina, e matuā tumu ai le loto ona ua atiina aʻe se faiā vavalalata ma Ieova. O se olioli e faavae aʻe i oa faaleagaga ma ni faiā e faalaeiauina ai.—Kalatia 5:22; 1 Timoteo 1:11.

¹⁶ O lea la, ona o ni Molimau Kerisiano a Ieova, ua leai ai se pogai tatou te faanoanoa ai pe lē fiafia. Ua iai i nisi lotu ni tagata faapena ona ua faamamafaina e lo latou faatuatua mea e lē moni. Ua faapogaia e a latou aʻoaʻoga se faanoanoaga, o se ituaiga o tapuaiga e lē o iai se olioli, lea e lē faale-Tusi Paia ma e lē paleni foi. Latou te lē o atiina aʻe ni aiga e fiafia i le auaunaga i le Atua. Na silafia e Iesu le manaomia o ni faafouga o le tino ma ni malologa. Mo se faaaoaoga, i se tasi taimi, na ia valaaulia ai ona soʻo ina ia latou ō atu ‘i se nofoaga paganoa ma seʻi mapu teisi ai.’—Mareko 6:30-32; Salamo 126:1-3; Ieremia 30:18, 19.

17, 18. I ā auala talafeagai e ono maua ai e aiga Kerisiano ni faafouga o le tino?

¹⁷ E faapena foi ona manaomia e aiga se taimi e fiafia ai i ni faafouga o le tino. Na faapea mai se tasi matua e uiga i lana fanau: “E tele ni mea matou te fiafia faatasi ai—le ō e taeele i le sami, le taaalo i se malae, se tafaoga i atu mauga. Mai lea taimi i lea taimi, matou te galulue faatasi ai i le aso atoa i le faiva e pei ‘o ni paeonia’; ona matou samiina lea i se ʻaiga faapitoa, e oo foi ina femolitai ai a matou meaalofa.”

¹⁸ O isi foi mea e ono manatunatu i ai mātua, o ni faigamalaga pupuu a le aiga i nofoaga e tausi ai manu, ni nofoaga o vaaiga mataina, i fale mataaga, ma isi nofoaga mananaia. O le fetaufetuliai solo i le togavao, le matamata atu i manu felelei, ma le faia o ni togalaau, o  galuega na e mafai ona maua ai le olioli pe a auai atu i ai. E mafai foi e mātua ona faalaeiauina a latou fanau ina ia aʻoaʻo i le faaaogāina o mea faimusika po o le aʻoaʻoina o se taleni e aogā. O le mea moni, o matuā e lava le faautauta, o le a la faaavanoaina se taimi e taaalo faatasi ai ma le la fanau. Afai e taaalo faatasi aiga, e mautinoa foi la o loo nonofo autasi!

19. O le ā le uiga faaonaponei e mafai ona faaleagaina ai se aiga?

¹⁹ O le uiga faaonaponei, o le mananao lea o talavou e faaesea i latou mai le aiga ma ia faia a latou lava mea e mananao ai pe a oo i tulaga o le faafouina o le tino. E ui e lē afaina le iai lava o se taleni a se talavou ia po o se mea e naunau e faaalu ai lona taimi, peitai o le a lē atamai le faatagaina o na fiafiaga e vavaeese mai ai e faavavau o ia mai isi tagata uma o le aiga. Petai tatou te mananao ina ia faatatauina le mataupu silisili na taʻua e Paulo: “Aua neʻi taitasi ma vaavaai i ana lava mea, a ia taitasi ma vaavaai i mea a isi.”—Filipi 2:4.

20. E mafai faapefea ona avea fonotaga ma tauaofiaga o ni taimi e olioli ai?

²⁰ Maeu lo tatou olioli uma i le vaavaai atu i aiga o loo nonofo faatasi mai i tauaofiaga ma fonotaga! I lena tulaga o le a mafai ai e tamaiti matutua ona fesoasoani atu i o latou tei laiti. O lena foi faatulagaga o le a taofia ai le faanaunau o nisi tamaiti matutua e fia ō atu e nonofo na o latou i ni nofoa e mamao ese, ma lē uai lelei atu ai i le polokalama o le tauaofiaga. E mafai foi ona maua le olioli i le faimalaga atu ma toe foi mai i le fonotaga, pe afai e muai talanoa le aiga po o lē fea auala e ui ai, po o ā ni nofoaga o le a latou afea e matamata ai a o alu atu le malaga, ma le nofoaga foi o le a faamautu i ai. Seʻi vaai faalemafaufau i le fiafiaga atonu sa iai i aso o Iesu a o faimalaga faatasi atu aiga i Ierusalema!—Luka 2:41, 42.

Faamanuiaga o le Faifai Mea Faatasi

21. (a) E mafai faapefea ona tatou tauivi ina ia maua le fiafia i le faaipoipoga? (e) O ā manatu lelei e fa na faatutu mai ina ia faatumauina ai se faaipoipoga?

²¹ E lē taitai faigofie le mauaina o ni faaipoipoga manuia ma ni aiga autasi, ma e lē faafuasei foi ona maua. O nisi e faigofie atu ia i latou le ‘vave faamaamulu,’ po o le faataape o le faaipoipoga e ala i le tatalaina, ma taumafai ai e toe faia se amataga fou. Peitai, o faafitauli lava na o le a toe oo ane foi i se isi faaipoipoga e toe faia ma faia pea. E sili ai la ona lelei le tali faa-Kerisiano lea: Ia tauivi mo le manuia e ala i le faatatauina o mataupu silisili a le Tusi Paia i le alofa ma le faaaloalo. O aiga e autasi e faalagolago i se agaga o le foai atu ma le taliaina, le lē manatu faapito. Na faatū mai e se isi tagata faufautua o faaipoipoga se manatu faigofie e ono tumau ai se faaipoipoga. Na ia tusi mai e faapea: “O mea e fa e sili ona tāua ua maua i le toetoe lava o faaipoipoga lelei uma, o le naunau e faalogo, le tomai e faatoese atu ai, le tomai e saunia ai le lagolagosua faifai pea i itu tau i faalogona, ma le faanaunauga ina ia paʻi atu ma le alofa.” O na vala e matuā fesoasoani lava i le faatumauina o se faaipoipoga, auā o loo faavae aʻe foi i mataupu silisili aogā a le Tusi Paia.—1 Korinito 13:1-8; Efeso 5:33; Iakopo 1:19.

22. O ā nisi o aogā e maua ona o le iai o se aiga autasi?

²² Afai tatou te mulimuli atu i le fautuaga a le Tusi Paia, o le a tatou maua ai se faavae mausali mo se aiga autasi, ma o aiga ua autasi o le faavae lea o se faapotopotoga e autasi ma malosi faaleagaga. Ma o le a anonaoai ai faamanuiaga tatou te maua mai ia Ieova, a o tatou autasi i le faateleina atu o viiga ia te ia.

[Faaopoopoga i lalo]

E te Manatua?

□ Aisea e aogā ai ona faifai mea faatasi aiga?

□ Aisea e manaomia tele ai le faifai pea o le suesuega faale-Tusi Paia a le aiga?

□ Aisea e lelei ai mo mātua ona auai faatasi ma a latou fanau i le faiva i le fanua?

□ Aisea e aogā ai le talanoaina faatasi e le aiga atoa o ni o latou faafitauli?

□ Aisea e lē tatau ai i aiga Kerisiano ona faanoanoa ma lē fiafia?

[Fesili mo le Suʻesuʻega]

[Ata i le itulau 17]

Po o olioli ea lou aiga e faiʻaiga faatasi i aso taitasi?

[Ata i le itulau 18]

E ao i tafaoga a le aiga ona faafouina ma olioli ai