Pe Mafai e Tapui ona Puipuia Oe?

E TAUAVE e se tamaloa Pasili i le taga o lona ofu se polo tioata. E ave e se tagata taalo i Amerika se tupe o le pene mo le mauaina ai o se laki. Ae e tautau i luga o se moega i le fale o se aiga Aialani se koluse o Sagato Brigid. E faitau miliona tagata latou te faaaogā na mea faapea o ni tapui e maua ai ni laki. * Latou te talitonu, o le iai o ni tapui faapena e ono teena ai mea leaga ma latou maua ai se laki po o se manuia.

Seʻi manatu i Pasili mo se faaaoaoga. E tusa ai ma le tala a le mekasini o le Veja, e tele tagata Pasili latou te tauaveina “nutiga maa ma maa tāua lapotopoto o loo iai le mana e faatosina mai ai le laki, e maua ai le malosi e matuā tāua i lē o umia na mea.” I le fefe e faalemigao i le mamana o faiga faataulaitu, ua tuu ai e nisi tagata o lena atunuu se faatusa faalelotu pe tusia ai se mau i puipui o o latou fale. Ua faaaogā foi e nisi le Tusi Paia e fai ma tapui paia; latou te tuu i luga o se laulau, ma tatala ai pea le Tusi Paia i le Salamo e 91.

I atunuu o Aferika i Saute, ua faapena foi ona faaaogā ai le muti, po o se vailaau faaleaganuu, e lē na o lona mana e faamalolo ai, ae o se puipuiga foi mai mea leaga po o mala. O maʻi, le oti, le lē lelei o le tulaga tautupe, ma e oo foi i uo a tama ma teine ua lē taulau, e masani ona manatu i ai o iuga ia o ni vai faalauatau na faia e ni fili, pe ona o le lē faamalieina o tuaa ua feoti. E masani ona maua le muti mai se tagata faivai faataulaitu i nuu i tua, o lē na te paluina vai mai ni paʻu, aa, ma lau o vaomua, laau tetele, po o ni vaega o tino o manu. Peitai, ua matauina, o le muti e lē gata ina faaaogā i nuu i tua; ae ua salalau atu foi lea faiga i aai o Aferika i Saute. E faalagolago tagata fai pisinisi ma tagata ua iu mai i iunivesite, i le muti.

E taatele foi tagata e saili mo se laki i atunuu o Europa. Ua faailoa mai ia i tatou e le tusi o le Studies in Folklife Presented to Emyr Estyn Evans e faapea: “E seāseā lava ona iai se aai po o se nofoaga o lotu i Aialani e lē vaaia ai ni seevae solofanua o faamauina i luga aʻe o faitotoa o nisi o fale e nonofo ai po o fale i tuāfale.” E taatele foi i lena atunuu koluse e lalagaina i laufala e tautau i luga o moega ma faitotoa ina ia aumaia ai le laki. Ua faapea mai ni tagata matamata, i le vaaiga i fafo, e toatele lava tagata Aialani e manatu māmā i na faiga faataulaitu. Ae, e toaitiiti latou te matuā lē amanaia lava na mea.

Le Sailiga mo se Puipuiga

O le ā le pogai e tosina ai i faiga faataulaitu? E foliga mai ua faia e faamalie ai le manaoga autū o tagata mo se puipuiga o i latou lava. O le mea moni, pe toafia o iai se lagona saogalemu i o latou aiga, ae maise pe a savavali i auala i le po? E faaopoopo atu i lena mea, le tiga o le faia o se galuega e ola ai ma le tausia o se fanau. Ioe, ua tatou ola i taimi ua taʻua e le Tusi Paia “o taimi o faalavelave.” (2 Timoteo 3:1, The New English Bible) O le mea lea ua masani ai ona faanaunau tele tagata mo se puipuiga.

O lenei faiga atonu e faapitoa lava i aganuu e taatele ai faiga eseese faataulaitu ma faiga faaagaga leaga. O le fefe i agaga e faafoliga mai i ē ua oti po o le faamalaiaina e se fili, ua foliga mai ai ua matuā talafeagai ona faia se tapui. I  se isi itu, ua matauina e le World Book Encyclopedia e faapea: “E toatele tagata e iai mea e fefefe ai, ma ua lē mafai ai ona iai se lagona saogalemu. Ua fesoasoani faiga faataulaitu i le foiaina o mea e fefe ai e ala i le aumaia o se saogalemu. Ua faamautinoa atu e faiga faataulaitu i tagata e faapea, o le a latou maua le mea o loo latou manaomia ma alofia ai faalavelave.”

Le Mana Lē Mautinoa o Tapui

I lea, e tele ituaiga o tapui ua ʻulaina, tauaveina, ma faaalialia e tagata i le lalolagi aoao. Ae pe tatau ea ona talitonu e mafai e se tapui ua faia e tagata ona maua ai se puipuiga moni? O le tele o mea ua faaaogā e tagata e avea o ni tapui, sa gaosia i falegaosimea, ma o le tele lava e faatau mai i faleoloa. Pe lē o faamaonia ai ea o se mea poto ma le saʻo ona talitonu faapea, so o se mea e faia i se falegaosimea e mafai ona maua ai se malosi faamaneta? Ma o se vaega ua saunia faapitoa e se tagata faivai i nuu maotua e leai se mea e sili ai na i lo na o se paluga o mea masani—o aa o laau, ma lau o laau ʻaina, ma isi mea faapena. Aisea o le a maua ai e sea paluga se malosi faamaneta? E lē gata i lea, po o iai ea se faamaoniga moni e iloa ai e ola umi tagata latou te faaaogā tapui—po o sili atu foi ona fiafia—na i lo o i latou e lē o umia ni tapui? Pe lē o afaina ai ea i latou o ē o faia na tapui faataulaitu i maʻi ma le oti?

Na i lo o le maua e tagata o le puipuiga moni ma se lagona e pulea ai o latou olaga, o le faaaogāina faataulaitu o tapui ua faavaivaia moni ai tagata mai le fesagaia ma le atamai o o latou faafitauli ma faalaeiau ai i latou e vaavaai atu i se laki e fai ma vaifofo mo na mea uma. O le faatuatua i le malosi o tapui e mafai foi ona oo ai i lē o faaaogāina se lagona o le faatagā saogalemu. E ono fai mai se tamaloa o onā i le ʻava malosi o lea e lelei lana vaai ma o loo matuā lelei atoatoa lona mafaufau, ae a taumafai e ave le taavale, o le a afaina ai o ia faapea ma isi. O sē e talitonu atoatoa i le mana o le tapui, o le a afaina ai foi o ia lava. O le iai o se talitonuga sese faapea o loo malupuipuia, e ono lamatia ai o ia po o le faia ai foi o ni faaiuga valea.

O le talitonu i le mana o tapui ua aafia ai isi i lamatiaga ogoogo na o loo natia mai le faitau miliona o i latou o loo faaaogāina. O ā na lamatiaga, ma po o iai ea se auala saʻo e mafai ona puipuia ai mai le afaina ai? O le a taliina e le mataupu o sosoo mai nei fesili.

[Faaopoopoga i lalo]