Fesili Mai le Au Faitau

I le Roma 9:3, na tusia ai e le aposetolo o Paulo e faapea: “Ou te mafaia ona fia anatema o aʻu ia teʻa ma Keriso e sui aʻi oʻu uso, o loʻu aiga i la le tino.” Pe sa faauiga ea e Paulo faapea o le a ia faataulagaina lona ola ina ia laveaiina ai ona uso Iutaia?

Sa faataatia e Iesu le faaaoaoga maoae o le alofa. Sa lotomalie o ia e foaiina atu lona solu, po o lona ola mo tagata agasala. I lana faiva i le lautele, sa ia tautua faapitoa ai mo tagata o lona atunuu—Iutaia—ina ia toatele i latou e mafai ona maua aogā mai lana taulaga togiola. (Mareko 6:30-34) O lo latou lē utagiaina ma le teena o le feau o le faaolataga sa leʻi faaitiitia ai le manatu alofa o Iesu mo tagata Iutaia. (Mataio 23:37) Ma sa ia tuuina mai ai ‘se faaaoaoga mo i tatou, ina ia tatou mulimuli atu i ona tulaga aao.’—1 Peteru 2:21.

Pe e ono mafai e tagata lē lelei atoatoa ona mulimuli i le faaaoaoga a Iesu o le alofa? Ioe, ma e mafai ona tatou matauina se faaaoaoga o lena alofa i le aposetolo o Paulo. Sa matuā manatu mamafa o ia i ona uso Iutaia, o lea ona o lona alofa ia i latou, na ia faapea ai maimau pe ana mafai ona ia “teʻa ese mai ia Keriso” e sui aʻi i latou.

Sa faaaogā e Paulo i inā se faaupuga maoae e taʻu atu ai lona manatu. Sa faaaogā foi e Iesu se faaupuga maoae tali faapena i le Mataio 5:18, ina ua ia fetalai: “E mavae atu le lagi ma le lalolagi, a e le mavae atu lava se iota po o sina fāsi mataitusi o le tulafono, seia taunuu mea uma.” Sa silafia lelei e Iesu e lē mavae atu le lagi ma le lalolagi. E leʻi faamalaiaina foi Paulo, pe na talia uma foi e tagata Iutaia le Faa-Kerisiano. Peitai, o le manatu o Paulo o lona faia lea ma le vilivilitai o so o se taumafaiga e fesoasoani ai i tagata Iutaia ina ia faaavanoaina i latou lava mo le faaolataga e ala ia Iesu Keriso. E letioa la ona faamalosiau atu le aposetolo i ona uso Kerisiano e faapea: “Ia outou faaaoao mai ia te au, pei o aʻu ia Keriso”!—1 Korinito 11:1.

I aso nei, e ao i Kerisiano ona iai le naunau lea sa faaalia e Iesu ma Paulo mo ē e lē talitonu. Ia aua lava neʻi faatagaina le leai o se naunau ma teteega tuusao mai i tagata i le oganuu o loo tatou talaʻi atu i ai, e faaitiitia ai lo tatou alofa mo o tatou tuaoi ma lo tatou maelega e fesoasoani atu ia i latou ia aʻoaʻoina le ala o le faaolataga.—Mataio 22:39.