Latou te Vaavaaia ma le Alofa Mutimutivale Mamoe Iti

MAI meaola uma lava ua tausia e tagata, e leai lava ni meaola e faatusalia i ai mamoe. O le tele lava o meaola e iai le malosi ma le natura masani e sailia ai meaai ma sosola ese mai isi meaola e taumafai e osofaia i latou, peitai e ese ai lava le mamoe ia. E faigofie ona faatamaiaina e ona fili, ona o le itiiti o le malosi e puipuia ai ia lava. A leai se leoleo mamoe, o le a matuā fefe lava le mamoe ma lē mafesoasoania. Pe afai e sē ese mai le lafu, e faigofie lava ona leiloa. O lea la, o mamoe e usiusitai, ua iai ni mafuaaga malolosi e lagona ai le matuā lalata atu i lo latou leoleo mamoe. A aunoa ma le leoleo mamoe, o le a itiiti la le avanoa e faasaoina ai. Ona o nei uiga moni, ua faaaogā faafaatusa ai e le Tusi Paia mamoe e faaata mai ai tagata o ē lē sala, a ua faileagaina ma ua aunoa ma se puipuiga.

Ma le mautinoa, ua tatau le taui o se leoleo mamoe lelei. E lē faigofie lona olaga. E ogotia o ia i le vevela ma le malulu, ma ua masani foi ona lē moe o ia i le po. E tatau ona ia puipuia le lafu mai manu feai, e masani lava i ia tulaga ona lamatia ai lona ola. Talu ai ona e tatau i se leoleo mamoe ona tausia faatasi mamoe, o le tele lava la o lona taimi, e faaaluina lea i le sailia o se mamoe ua leiloa, po ua sē ese foi mai le lafu. E tatau ona ia tausia lelei se mamoe ua maʻi po ua lavea. Na te sapaia mamoe ua vaivai pe faaivaivā. E manatu mamafa tele o ia i le vaai po o lava meaai ma vai. E masani ona moe le leoleo mamoe i le po atoa i le fanua, talu ai ona e tatau ona ia mautinoa o loo malu puipuia uma le lafu. O lea la, o le leoleoina o le lafu, o se olaga filigā e manaomia ai le auaunaga a se tagata toa, e tinou ma tomai. Ae o le mea e sili i na mea uma, e tatau ona ia te ia le agavaa e faaalia ai le manatu mamafa moni mo le lafu mamoe ua i lalo o lana vaavaaiga.

Leoleoina o le Lafu Mamoe a le Atua

Ua faatusaina e le Tusi Paia tagata o le Atua i ni mamoe usiusitai ma i latou ua tofia e vaaia i latou o ni leoleo mamoe. O Ieova lava ia ‘o le leoleo mamoe ma o le ovasia mo o tatou ola.’ (1 Peteru 2:25) Na faaalia e le “leoleo mamoe lelei,” o Iesu Keriso ona moomooga e faapea, e ao ona tausia ma le alofa mamoe, ina ua ia fetalai atu i le aposetolo o Peteru e faapea: ‘Fafaga i aʻu tamai mamoe, leoleo i aʻu mamoe, fafaga i aʻu mamoe.’ (Ioane 10:11; 21:15-17) Ua faatonuina atoatoa ovasia Kerisiano ina ia ‘leoleoina le faapotopotoga a le Atua.’ (Galuega 20:28) Ma e manaomia i la latou galuega o ni leoleo mamoe faaleagaga uiga o se leoleo mamoe lelei—e toa, e tinou, e tomai, ae maise lava le manatu mamafa mai le loto mo le lelei o le lafu mamoe.

I aso o le perofeta a le Atua o Esekielu, na lē taulau ai i le toatele o leoleo mamoe na tofia e tausia manaoga o tagata o Ieova i Isaraelu ona faataunuuina o latou tiute. Sa matuā tigaina le lafu mamoe a le Atua, ma o le toatele o le lafu mamoe na lafoaia le tapuaiga moni. (Esekielu 34:1-10) I aso nei, ua faapea mai ai taʻitaʻi lotu o Kerisinetoma o i latou o leoleo mamoe o le faapotopotoga ua taʻua o Kerisiano, ae o lo latou tulaga mamai faaleagaga ua faamaonia ai ua pei lava taʻitaʻi lotu o taʻitaʻi amio leaga o ē na lē amanaia ma soona faia tagata a o iai Iesu i le lalolagi. O taʻitaʻi lotu o Kerisinetoma, ua pei o le “auauna totogi,” (NW) o lē “e lē manatu o ia i mamoe.” (Ioane 10:12, 13) E matuā leai lava so latou naunau, se iloa, po o se agavaa e leoleoina ai le lafu mamoe a le Atua.

O Leoleo Mamoe e Tausi ma le Faamaoni

Na faataatia e Iesu le faaaoaoga lelei atoatoa mo i latou uma lava o ē e leoleoina le lafu mamoe  a Ieova. I so o se mea lava, na ia faaalia ai le alofa, le agalelei, le alofa mutimutivale, ma fesoasoani i ona soʻo. Sa ia muai sailia ma le naunautai i latou sa manaomia le fesoasoani. E ui lava sa tele galuega a Iesu ma sa vaivai foi i nisi taimi, ae sa ia faaavanoa pea le taimi e faalogologo atu ai i o latou faafitauli ma avatu faalaeiauga ia i latou. O le faaaliga autū o lona alofa, o lona tuuina atu lea ma le loto i ai o lona soifua e sui aʻi i latou.—Ioane 15:13.

I aso nei, ua tofu sao uma ai toeaina tofia o faapotopotoga, faapena foi ma auauna o le faiva, i lenei avega tauave i le lafu. O le mea lea, e tusa lava pe ono maua ni o latou lelei faaletino i nisi atunuu, ae e lē faatosinaina le toatele o nei tane agavaa e malaga ese atu ma tuua ai le faapotopotoga e aunoa ma le fesoasoani talafeagai ma le vaavaaiga. O le ola i “aso faigata,” ua manaomia ai e le lafu mamoe ni faalaeiauga ma taitaiga. (2 Timoteo 3:1-5) O loo iai pea le matautia i taimi uma faapea e ono pauu ese nisi i le mailei a Satani, o lē ua “pei o se leona tagi, ua saili se tasi na te ʻaina.” (1 Peteru 5:8) Ua tāua tele ai mo leoleo mamoe Kerisiano i le taimi nei na i lo o se isi lava taimi ona “apoapoai atu i e amio faapiopio, ia faamafanafana i e loto iti, ia fesoasoani i e o vaivai.” (1 Tesalonia 5:14) E tāua tele le mataala pea e lē aunoa ina ia puipuia ai i latou o ē e lē o mauaa, mai le taase ese mai le lafu.—1 Timoteo 4:1.

E mafai faapefea ona iloa e le leoleo mamoe pe o manaomia e se mamoe le fesoasoani? O nisi o faailoga ua sili atu ona manino lelei, o le lē taulau lea ona toe auai i sauniga faa-Kerisiano, ua lē toe auai pea i le faiva i le fanua, ma ua lē toe fiafia e auaufaatasi vavalalata atu i isi uso. E mafai foi ona iloa vaivaiga e ala i le mataia lelei o uiga o mamoe ma le autū o a latou talanoaga. Atonu latou te lolo atu i le faitioina o isi, po o le faaalia o le lē fiafia i isi. O a latou talanoaga atonu e matele lava i le faamamafaina o le sailia o mea faitino na i lo o sini faaleagaga. O le leai o se maelega, le lē mautinoa, ma le leai o se olioli atonu e ono faauigaina faapea ua vaivai lo latou faatuatua. O se foliga faanoanoa atonu o se faailoga lea e iloa ai, o loo aafia i ni omiga mai aiga tetee po o uo faalelalolagi. O le matauina o nei faailoga, e mafai ai e le leoleo mamoe ona galue i le iloiloina po o le ā le ituaiga o fesoasoani e manaomia.

Pe a asiasi atu e fesoasoani i se uso talitonu, e manaomia ona teu i mafaufau o leoleo mamoe Kerisiano lo latou sini autū. E lē na o se asiasiga faasamasamanoa e talatalanoa i ni mea e lē tāua. O le sini o le aposetolo o Paulo i le asiasi atu i ona uso o le ‘ofoina atu lea ia te i latou o meaalofa faaleagaga ina ia latou tumau mausali ai ma atonu o ni feofoaiga o faalaeiauga.’ (Roma 1:11, 12) Ina ia faataunuuina lenei mea, e manaomia ai ona sauniuni mamao.

Muamua lava, ia iloiloina tagata taitoatasi, ma taumafai e iloa po o le ā lona tulaga faaleagaga. A uma lena, ona manatunatu lea i le ituaiga o taiala, faalaeiauga, po o le fautuaga o le a sili atu ona aogā. Ia avea le Tusi Paia, le Afioga a le Atua, ma puna autū o faamatalaga auā “o loo matuā galue foi.” (Eperu 4:12) E mafai ona siaki i mekasini o Le Olomatamata ma le Awake! mo ni mataupu e fetaui tonu ma manaoga patino o le mamoe o loo fesagai ma ni faafitauli faapitoa. E mafai ona maua tala i mea na tutupu e faafiafia ma faafouina ai i le Yearbook of Jehovah’s Witnesses. O le sini o le taʻu atu lea o se mea faaleagaga atonu o le a ‘lelei mo le atiina aʻe o le tagata.’—Roma 15:2.

Leoleoga e Atiina aʻe Ai

O le leoleo mamoe o se lafu mamoe faaletino na te iloaina, e faalagolago mamoe ia te ia mo le puipuiga ma le tausiga. O faigata masani e aofia ai le taase, maʻi, vaivai, lavea, po o fili. I se tulaga faapena, e tatau foi i leoleo mamoe faaleagaga ona iloa ma malamalama i popolega e faamataʻuina ai le tulaga sololelei o le lafu mamoe. O manatu o loo sosoo mai, o nisi ia o  ituaiga o faafitauli ma ni nai fautuaga e mafai ona faaaogā e faaoo atu ai faamatalaga e atiina aʻe ai faaleagaga.

(1) I le pei o mamoe lē mataala, ua pauu ese ai nisi Kerisiano mai le lafu mamoe a le Atua ona ua faatosinaina i latou e ala i faatosinaga e peiseai e mamā ma faafiafiaina ai. Atonu e faalavelavea i latou ma iu ai lava ina tafetafea mālie ese, ona ua latou tuliloaina sini e fesootai ma le manao tele i meafaitino, tafaoga ma faafiafiaga. (Eperu 2:1) E mafai ona toe faamanatu atu ia i latou na le faanatinati o le taimi, le manaoga ina ia pipiimau i le faalapotopotoga a Ieova, ma le tāua o le faamuamuaina o manaoga o le Malo i le olaga. (Mataio 6:25-33; Luka 21:34-36; 1 Timoteo 6:8-10) O loo maua fautuaga aogā i le mataupu “Ia Faatumauina Lou Paleni—E Faapefea?” i le Watchtower o Me 15, 1984, itulau e 8-11.

(2) E manaomia e se leoleo mamoe ona saunia togafitiga mo mamoe ua mamai. E faapena foi i leoleo mamoe faaleagaga, e tatau ona fesoasoani atu i Kerisiano o ē ua mamai faaleagaga ona o vala lē manuia i o latou olaga. (Iakopo 5:14, 15) Atonu ua lē maua se galuega, atonu o se faafitauli matuia i le soifua maloloina, ia pe atonu o ni tulaga faigata ua tutupu i o latou aiga. O ituaiga tagata faapena atonu ua itiiti le fia ʻaai i meaai faaleagaga, po o le tau lē auaufaatasi ma tagata o le Atua. Ua iu lena mea i le vavaeesea o i latou ma ua faavaivai ai. E manaomia ona faamautinoa ia i latou e faapea o loo manatu mai Ieova ia i latou ma o le a faatumauina i latou i taimi faigata. (Salamo 55:22; Mataio 18:12-14; 2 Korinito 4:16-18; 1 Peteru 1:6, 7; 5:6, 7) Atonu o le a aogā foi le autaluina o le mataupu “Tepa Taulai Pea i Luma o se Kerisiano,” o loo maua i le Watchtower o Iuni 1, 1980, itulau e 12-15.

(3) E tatau foi i le leoleo mamoe ona mātau lelei mamoe ua vaivai. O nisi sa tumau pea i le faamaoni i le auaunaga ia Ieova mo le tele o tausaga. Sa latou tauivi ma le tele o tofotofoga ma sauaga. Ae i le taimi nei, ua latou faaalia ni faailoga o le faavaivai i le faia o le mea lelei, ma atonu ua oo ai lava ina faailoa mai le masalosalo i le manaoga mo le faateleina o le galuega talaʻi. Ua manaomia la ona toe faaolaolaina lo latou agaga, ma faafouina lo latou talisapaia mo le olioli ma faamanuiaga e maua mai i le auauna ma le loto atoa i le Atua i le faataitai ia Iesu Keriso. (Kalatia 6:9, 10; Eperu 12:1-3) Atonu e mafai ona fesoasoani ia i latou ia iloa, o loo talisapaia e Ieova la latou auaunaga faamaoni, ma e mafai ona faamalosia ai i latou mo galuega i le lumanai mo lona viiga. (Isaia 40:29, 30; Eperu 6:10-12) Atonu e aogā ona talanoa faatasi ma ia manatu mai le mataupu “Aua le Faavaivai i le Faia o le Mea Lelei” o loo i le Watchtower o Iulai 15, 1988, itulau e 9-14.

(4) E pei o mamoe ua lavevea, o nisi Kerisiano ua afaina i amioga ua latou faavasegaina e sese. Ae afai tatou te faamagaloina isi, o le a faaoo mai foi e lo tatou Tamā o i le lagi le faamagaloga tatou te manaomia. (Kolose 3:12-14; 1 Peteru 4:8) Atonu sa faia i nisi o uso ma tuafāfine ni fautuaga po o ni aoaiga latou te lagona e lē fetaui. E ui i lea, o i tatou uma lava e mafai ona tatou maua aogā mai fautuaga faaleagaga ma aoaiga, ma o se faamafanafanaga le iloa faapea e aoaia e Ieova i latou ua ia alofagia. (Eperu 12:4-11) Talu ai ona o le lē tuuina atu ia i latou o ni faaeaga o le auaunaga ua latou manatu ua agavaa ai, ua faatagaina ai e nisi le agaga o le lē fiafia e faatupu aʻe ai se va o i latou ma le faapotopotoga. Ae afai tatou te faamamao ese i tatou lava mai le faalapotopotoga a Ieova, o le a leai la se isi nofoaga e ō i ai mo le faaolataga ma le olioli moni. (Faatusatusa i le Ioane 6:66-69.) E mafai ona maua faamatalaga aogā pei o ia ua talanoaina i le mataupu “Faatumauina lo Tatou Autasi Faa-Kerisiano,” o loo maua i le Watchtower o Aokuso 15, 1988, itulau e 28-30.

(5) E tatau ona puipuia mamoe mai manu feai. I se tulaga tutusa, atonu e teena nisi ma faamataʻuina e aiga lē talitonu po o aumea i galuega. Atonu o le a osofaia lo latou faamaoni pe a omia i latou e taofia la latou auaunaga i le Atua po o le taofia foi o le faia o se sao i le faiva faa-Kerisiano. E ui i lea, o le a faamalosia i latou pe afai o le a fesoasoani atu ia i latou ina ia iloa faapea e ao ona faatalitalia teteega, ma  o se tasi lea o faamaoniga moni e iloa ai o i tatou o soʻo moni lava o Iesu Keriso. (Mataio 5:11, 12; 10:32-39; 24:9; 2 Timoteo 3:12) Atonu e aogā foi le faasino atu ia i latou e faapea afai latou te faamaoni, o le a lē tuulafoaia i latou e Ieova ma o le a tauia lo latou tutumau. (2 Korinito 4:7-9; Iakopo 1:2-4, 12; 1 Peteru 5:8-10) Ua saunia e le mataupu ua faaulutalaina “Tumau ma le Olioli e Ui i Sauaga” i le Watchtower o Aperila 15, 1982, itulau e 21-27, ni faalaeiauga faaopoopo.

Leoleo Mamoe —Ia Faataunuu a Outou Avega Tauave

E tele manaoga o le lafu mamoe a le Atua, ma o le tausiga talafeagai o se galuega fitā tele. O le mea lea e tatau ai i leoleo mamoe Kerisiano ona alolofa mutimutivale, manatu mamafa moni, ma naunau e tuuina atu le fesoasoani. E tāua tele le onosai ma le faautauta. A o manaomia e nisi tagata le fautuaga ma le aoaiga, ua sili atu ona aogā i isi faalaeiauga. Ua lava ma totoe ni nai asiasiga totino i nisi tulaga, ae o isi, atonu e manaomia se suesuega faale-Tusi Paia faifai pea. I na tulaga uma, o le sini autū lava, o le tuuina atu lea o le taiala faaleagaga e atiina aʻe ai po o fautuaga alofa e uunaia ai le tagata ina ia tausolomua i le masani o le suesue lelei, ia faaauau ona auai e lē aunoa i sauniga a le faapotopotoga, ma olioli i le auai ma le mataalia i le faiva faa-Kerisiano. O auala autū na e fesoasoani atu ai i uso talitonu, ma fesoasoani ai ia i latou ina ia tatala le avanoa mo le fetafeai saoloto o le agaga paia o Ieova.

O leoleo mamoe o ē o loo saunia lena ituaiga o lagolagosua ua latou faia se auaunaga e sili ona tautele i le avea o i latou ma sui o le lafu mamoe a le Atua. (Tagai i le Watchtower o Novema 15, 1985, itulau 23-27.) O le galuega o loo faia e leoleo mamoe faaleagaga e matuā talisapaia lava e le lafu mamoe. Ina ua uma ona taliaina na fesoasoani, ona faapea mai lea o le tamā o se tasi aiga: ‘Na matou see atu i le lalolagi e ala i le manao tele i mea faitino ina ua mavae tausaga e 22 o matou iai i le upu moni. Sa masani ona matou mananao e auai i sauniga, ae sa faafaigata ona matou auai. Sa lē fetaui lelei foi i matou ma le faiga o mea a Satani, o lea na matuā vavaeesea ai i matou, ua tuua na o i matou. Na avea lenei ma mea ua matou matuā lē mautonu ai lava ma faanoanoa. Sa matou manaomia ni faalaeiauga. Ina ua asiasi mai se toeaina ia i matou, sa matou taliaina ma le fiafia tele le sauniuniga o le faia o se suesuega faale-Tusi Paia i lo matou fale. I le taimi nei, ua matou toe foi uma lava i le faalapotopotoga saogalemu a Ieova. E lē mafai ona ou faaleoina atu le fiafia ua ia te aʻu!’

Ua iai se pogai mo le tele o le olioli pe a toe foi mai o tatou uso ma tuafāfine o ē sa taase pe na faavaivai ae ua toe faafoisia mai faaleagaga ma ua toe faia se sao i le galuega. (Luka 15:4-7) Ua taunuu ai le fuafuaga a Ieova i ona tagata pe a latou auaufaatasi “e pei o le lafu manu i totonu o le mea e fafaga ai.” (Mika 2:12) I lenei nofoaga malupuipuia, ua latou ‘maua ai le faafouga mo o latou ola’ faatasi ai ma le fesoasoani a le Leoleo Mamoe Lelei, o Iesu Keriso. (Mataio 11:28-30) O loo maua e le lafu mamoe autasi i le lalolagi aoao le taitaiga, faamafanafanaga, ma le puipuiga faatasi ai ma le anoanoai o mea taumafa faaleagaga.

I aso nei, e ala i lenei galuega faaleoleo mamoe, ua faia ai e Ieova se galuega alofa e ogatasi ma lana folafolaga anamua e faapea: “Ou te sueina laʻu lafu, ou te matuā suesue lava i ai. . . . Ou te laveaiina i latou ai mea uma ua salalau ai i latou . . . Ou te fafaga ia te i latou i le taaga lelei . . . Ou te sailia foi le ua se, . . . ou te fusia le ua gau, ou te faamalosia le ua vaivai.” (Esekielu 34:11-16) Maeu se faamafanafanaga i le iloa faapea o Ieova o lo tatou Leoleo Mamoe!—Salamo 23:1-4.

Ona o sauniuniga mai le Atua mo le leoleoina o lana lafu mamoe, ua mafai ai e i tatou o auauna a Ieova ona saosaolaumea i manatu o Tavita, o lē na faapea mai: “Ou te taoto, ma ou moe filemu; auā o oe Ieova e, na o oe lava, ua ou nofo ai ma le filemu.” (Salamo 4:8) Ioe, e maua e tagata o Ieova le saogalemu i lana tausiga alofa ma latou loto faafetai ona o le leoleoina ma le alofa mutimutivale e toeaina Kerisiano o mamoe iti.

[Ē Ana le Ata i le itulau 20, 21]

Potter’s Complete Bible Encyclopedia