Lipoti a Ē Faalauiloa le Malo

“Amuia le Tagata na te Maua le Poto”

SA FAAMAONIA le moni o lenei faataoto i Korea, lea ua sili atu nei ma le 71,000 Molimau fiafia a Ieova o loo iai. (Faataoto 3:13) Ma seʻi manatu, o le 42 pasene o nei faifeau o loo i le auaunaga faasauatoa! O tala i mea na tutupu o loo mulimuli mai o le a faaalia ai faapea o le fiafiaga, o le tofi lena o i latou o ē saili mo le poto moni.

Sa iai se fafine i Pusan na auai i se lotu a Kerisinetoma mo le 16 tausaga. Na ia matauina le tele o gaoioiga e lē faale-Tusi Paia, ma na amata ai loa ona ia tau manatunatu faapea ai e leai se Atua. I le isi itu, na te leʻi faafitia atoatoa le iai o le Atua, o lea na ia tatalo atu ai ma le naunautai i le Atua ina ia ona mauaina le lotu moni pe afai o iai se lotu moni. I le taimi lea, sa faafuasei ai lava ona ia manatu i Molimau a Ieova, ma sa ia manatuaina, e manatu faatauvaa tele lana lotu ia i latou, ma sa lapataia foi tagata o lana lotu e uiga ia i latou, talu ai ona e lē talitonu Molimau i le Tolutasi, le afi i hele, ma isi aʻoaʻoga a Kerisinetoma. Atonu o i latou na o le lotu moni? Faatasi ai la ma le fesoasoani ane a se tuaoi, na ia iloaina ai le mea o loo iai le Maota o le Malo. I le aso lava na sosoo ai, na auai atu ai o ia i le sauniga.

Sa matuā maofa o ia i le pulea lelei o le sauniga. Sa leai se soona feei, po o ni pese e faaosofia ai faalogona e pei ona iai i lana lotu. Sa faafeiloai atu o ia i se Molimau o lē sa fiafia e faia lana suesuega faale-Tusi Paia, ma sa umi le uluai suesuega ona o le tele o ana fesili. I le suesuega lona lua, sa ia faailoa atu ai o le a alu e faamavae mai lana lotu ae avea ma Molimau. Na ia taʻu atu i le tuafafine o ia ua lē manao e toe fai lana suesuega, ae na o lona auai lava i sauniga. Peitai, na taʻu atu ia te ia le aogā o le faia o se suesuega totino faale-Tusi Paia e faaopoopo atu i le auai i sauniga. Na ia taliaina le fautuaga, ma faatatau ia te ia mea na ia aʻoaʻoina i lana suesuega, ma mulimuli ane sa papatisoina o ia.

I le taimi nei, ua matuā fiafia lava o ia ona ua ia mauaina le poto e uiga i le Atua moni, o Ieova, ma ua ia te ia le faamoemoe o le ola e faavavau i le lalolagi fou a le Atua.

Aʻoaʻoina le Upu Moni e se Taitaiau ua Litaea

Na papatiso le avā a se tasi o taitaiau faafitafita i le 1962. I le taimi muamua na tetee lana tane ia te ia, ae mulimuli ane na lē toe tetee, ma mo le 28 tausaga, sa fai ai ma tuu lana suesuega na faia e ni uso eseese, i le taumafai e faafiafia o ia i le upu moni. Na auai o ia i nisi o sauniga ma tauaofiaga, ae o ia o se tasi o i latou e faatalatu i le faatauaina o le upu moni. I le 1990, na la malaga atu ai ma lana avā i Iapani, o i inā na la auai atu ai i se tauaofiaga itumalo. I lenei faatasiga, na ia faalogo atu ai ma le naunautai i lauga—o se mea na te leʻi faia lava i le taimi muamua. Sa matuā faateia o ia i lauga aasa sa faaalialia ai lotu sese, ae o nei lauga na ia iloa manino ai le faagutugutulua o Kersisinetoma. Sa matuā faagaeetia o ia ona o le maopoopo ma le fiafia o tagata o le Atua i Iapani, e tutusa lelei lava ma le mea na ia vaaia i Korea. Ina ua toe foi atu i Korea, sa amata loa sana suesuega uigā o le Tusi Paia ma mulimuli ane ai sa papatisoina o ia.

Ina ua mavae lona papatisoga, o le ā le mea sa tatau ona ia faia? Sa faamavae o ia mai lona tulaga o se peresitene i se faletalimalo lauiloa mo tagata tafafao, ae auai ma lana avā i le auaunaga faapaeonia sauatoa. Na ia manatu faapea, o le paeonia sauatoa o le auala aupito sili lea e toe taui atu ai le 28 tausaga na ia lē amanaiaina ai le upu moni.

Ua ia iloaina nei, e faatatauina foi ia te ia le faataoto e faapea, “amuia le tagata na te maua le poto”!