Fesili Mai le Au Faitau

Pe talafeagai i se Kerisiano ona faia se pisinisi ma se tagata lē talitonu a o lea e taʻu mai e le Tusi Paia ia i tatou: “Aua tou te amo faalegatasi ma e le talitonu”?

Tatou te maua lena fautuaga i le 2 Korinito 6:14-16 e faapea: “Aua tou te amo faalegatasi ma e le talitonu; auā pe faapefea ona faatasi o le amiotonu ma le amio leaga? Pe faapefea foi ona mafuta o le malamalama ma le pouliuli? Pe faapefea foi ona loto gatasi o Keriso ma Pelialo? Pe faapefea foi ona tofusia faatasi o lē talitonu ma le ua le talitonu? Pe faapefea foi ona loto faatasi o le malumalu o le Atua ma tupua?”

E leai se mafuaaga tatou te talitonu ai faapea na tuuina atu e le aposetolo o Paulo lena fautuaga faatasi ma se faanaunauga e faavaeina ai ni faasasaaga patino, e pei o le faasa ona faia e se Kerisiano o se pisinisi ma se tagata lē talitonu. Ae peitai, e mautinoa lava e fesootai atu lana fautuaga i lena tulaga ma isi vala o le olaga.

Na tusia e Paulo lena fautuaga i ona uso Kerisiano i le faapotopotoga i Korinito anamua. I le ola aʻe ai i se aai sa sili atu ona leaga, sa latou fetaiai ai i aso uma ma lamatiaga tau amio ma le faaleagaga. Sa manaomia ona latou matuā faaeteete, auā o le ola faatasi aʻe i aafiaga lē mamā e ono faavaivaia ai la latou filifiliga e avea o ni tagata tuese, “o le tupulaga ua filifilia outou, o tupu ma ositaulaga, o le nuu paia, ma le nuu na faatauina mai.”—1 Peteru 2:9.

A o leʻi tusia le fautuaga i le 2 Korinito 6:14-16, sa feagai muamua Paulo ma se faafitauli matuia i le lotolotoi o ona uso i Korinito. Na latou faatagaina se amioga leaga e lē mamā i totonu o le faapotopotoga, o lea na faatonuina ai e Paulo i latou ina ia tuliesea, pe faateaina le tagata agasala e lē salamō. (1 Korinito 5:1) O le mea sese sa faia e lena tagata, na faaalia ai faapea o aumea leaga po o le auai ma le lē mataofiofia i amioga a lenei lalolagi, e ono mafai ona aafia ai se Kerisiano.

Sa tatau ona taofia le auaumea faatasi o Kerisiano i Korinito ma lena tagata ua faateaina, ae po o le uiga ea o lena faamatalaga faapea sa manaomia ona latou vavae ese atoatoa mai ē lē talitonu? Pe sa matuā taofiofia atoatoa ai ea i latou mai a latou fesootaiga uma ma tagata e lē o ni Kerisiano, ae avea e pei o ni monike po o le au Iutaia o ē na sosola atu i Qumran e latalata i le Sami Mate? Ua tali mai Paulo e faapea: “Ua ou tusi atu ia te outou i laʻu tusi, aua tou te feoai ma e faitaaga. A e le matuā faapea foi i e faitaaga i lenei lalolagi, . . . ana faapea, e ao ina outou o ese atu i le lalolagi.”—1 Korinito 5:9, 10.

O loo manino lava le faatatauga o na upu. Sa iloa lelei e Paulo o loo iai pea Kerisiano i lenei lalolagi, o loo ola faatasi ma fesootai i aso uma ma ē lē talitonu, o ē e paʻū maualalo a latou amio ma e eseese foi o latou tulaga. Talu ai ona e lē maalofia lena tulaga, e ao la i Kerisiano ona mataala i lamatiaga e ono tulai mai i ia fesootaiga.

Seʻi o tatou toe iloiloina nei la le tusi e lua a Paulo i tagata Korinito. Sa ia faapea atu, ua agavaa Kerisiano faauuina e avea ma faifeau a le Atua, o ni amepasa e suitulaga ia Keriso. Sa ia faatonuina i latou ina ia leoleo faasaga i so o se auala e tautevateva ai nisi ma ono tauleagaina ai la latou faiva. (2 Korinito 4:1–6:3) Sa uunaia tuusao e Paulo ona uso i Korinito, o ē sa avea e pei o ni ana fanau faaleagaga ina ia faateleina atu lo latou alofa. (2 Korinito 6:13) E lē gata i lea, ae na ia timai atu foi e faapea: “Aua tou te amo faalegatasi ma e lē talitonu.” Sa ia faaaogāina se faasologa o faatusatusaga uigā e faamamafa atu ai lea manatu.

Ua faaalia i le aotelega o le mataupu e lē o faasino tonu atu manatu o Paulo i ni vala faapitoa o le olaga, e pei o pisinisi po o ni galuega, ma faia ai se tulafono aloaia e faamalosia ai lea tulaga. Na i lo o lena, na ia avatuina se fautuaga lautele, e uigā ma aogā mo uso sa ia faapelepele i ai.

Faamata e faatatau lenei fautuaga, mo se faaaoaoga i se Kerisiano o loo naunau e faaipoipo? O le tulaga moni lena. I lana tusi muamua, sa fautua atu ai le aposetolo i tagata Korinito o ē sa fia faaipoipo ina ia faaipoipo atu “tau lava i le ua i le Alii.” (1 Korinito 7:39) Sa ia faamamafa atu le tāua o na upu ina ua ia toe tusi mulimuli atu i le 2 Korinito 6:14-18. Pe afai ua faamoemoe se Kerisiano e faaipoipo atu i se tasi e lē o se auauna a Ieova ma e lē o se soʻo foi o Keriso, o lona uiga ua ia filifili e  amo faatasi ma ē lē talitonu. (Faatusatusa i le Levitiko 19:19; Teuteronome 22:10.) Ma le mautinoa lava, o le lē tutusa o uiga masani, o le a tulai mai ai faafitauli, e aofia ai foi ma le faaleagaga. Mo se faaaoaoga, e mafai e le tagata lē talitonu i le taimi nei, pe i le lumanai ona liliu atu i tapuaiga i atua sese. Ae sa faapea mai Paulo: “Pe faapefea foi ona loto gatasi o Keriso ma Pelialo?”

Ae faapefea la se isi vala o le olaga—le faia o se pisinisi faatasi ma sē e lē talitonu? I nisi tulaga, atonu e manatu ai se Kerisiano faapea o le mauaina o se galuega ma le tausia o lona aiga e manaomia ai se pisinisi e faia faatasi ma sē e lē o se Kerisiano. (1 Timoteo 5:8) Manatunatu i nisi nei o faaaoaoga:

Atonu e manao se Kerisiano e amata se pisinisi i le faatauina atu o ni oloa, ae na pau lava le auala e faatino ai o le suʻe lea o se tagata la te toalua, o lē e maua mai ai oloa manaomia po o tupe. O se isi Kerisiano e manao e fai sana lafumanu po o se faatoaga; peitai e leai sona fanua, o lea ina ia faia faapea, atonu e ao ona ia faia faatasi ma se tasi e loto malie e lisi atu ia te ia se fanua ma maua ai ni ana tupe mai tupe mamā. Atonu foi o se isi Kerisiano ua lē mafai ona fai sana pisisini faipaipa ona e faatapulaa laisene e faatagaina e le Malo, ma ua uma foi ona ave na laisene e isi tagata; e na o le pau la le auala e mafai ai o le soo faatasi lea ma se tagata o lona aiga e lē talitonu e iai sona laisene.—Mareko 12:17.

O nei manatu e na o ni faataitaiga. Matou te lē o taumafai e tolaulau atu mea uma, pe matou te faia foi se faamatalaga e faamaonia ai, pe lē faamaonia ai foi. Peitai, i le teuina o nei faaaoaoga i le mafaufau, pe e te lē o vaaia ai ea la le lē tatau ona tatou faaleamanaia o le faautuaga o loo i le 2 Korinito 6:14-18?

O se Kerisiano e faia sana pisinisi ma se tagata lē talitonu pe aiga pe leai, e ono fetaiai o ia ma ni faafitauli po o ni faaosoosoga e leʻi faatalitalia. Atonu e ono faaiua e le tagata o loo la toalua i le pisinisi faapea ina ia maua sina tupe mamā, e lelei pe a aua le taʻuina atu tupe uma e maua pe aua foi neʻi faamauina ni faamaumauga o tagata faigaluega ma o latou totogi, e tusa lava pe solia ai tulafono a le Malo. Atonu o le a fiafia lea tagata e totogi atu tupe i se tagata e felauaia oloa o lana pisinisi, mo isi oloa e lē o tusia i ana ota i le lisiti aloaia. Pe ao ea i se Kerisiano ona faia sona sao i na faiga po o so o se isi lava faiga lē faamaoni? Ma o le ā o le a faia e se Kerisiano pe a oo i le taimi e saini ai e i laua uma se pepa mo lafoga po o nisi lava pepa faaletulafono i le auala o loo faia ai le la pisinisi?—Esoto 23:1; Roma 13:1, 7.

Atonu foi e manao le tagata fai pisinisi e faatau atu oloa e fesootai ma aso malōlō faapaupau, auina atu ni pepa faamanuia mo aso malōlō i le igoa o le kamupani, ma teuteuina foi le fale faigaluega mo aso malōlō faalelotu. Na fesili Paulo: “Pe faapefea foi ona loto faatasi o le malumalu o le Atua ma tupua? auā o outou le malumalu o le Atua soifua.” Maeu le talafeagai o ana upu e faapea: “O lea ia o mai ai outou nai totonu ia te i latou, ma ia outou vavae mai, ua fetalai mai ai le Alii [“Ieova,” NW], aua foi tou te papai atu i se mea leaga; ona ou talia ai lea o outou”! (2 Korinito 6:16, 17) I le faatatauina o lena fautuaga poto, ua filifilia ai e le toatele o Kerisiano ituaiga o galuega totogi e ono itiiti faafitauli e tulai mai ai pe afai e mafai.—Eperu 13:5, 6, 18.

E lē o faatonuina le faapotopotoga ina ia vaavaai pe suesue mea uma o loo faia e Kerisiano i a latou galuega totogi, po o ni tagata faigaluega po o ni ē pule i pisinisi. O le mea moni, afai e iloa se Kerisiano o loo faia sana vaega i mea sese, e pei o le lagolagoina o se tapuaiga sese, le faia o se pepelo pe gaoi, o le a gaoioi loa le faapotopotoga ina ia faatumauina ai pea tapulaa a Ieova.

E ui i lea, o le manatu autū o fautuaga faagaeeina a Paulo ia, “Aua tou te amo faalegatasi ma e le talitonu,” e mafai ona fesoasoani i Kerisiano ina ia alofia ai faafitauli ma ni gaoioiga faafaamasinoga e manaomia. O Kerisiano atamamai latou te teuina i loto lena fautuaga ma latou te lē fia oo atu i ni tulaga e omia ai i latou ma faalotolotolua ai i mataupu silisili o le Tusi Paia. Afai e manatu se tasi e tatau ona faia sana pisinisi ma sē e lē talitonu, e tatau la i isi tagata ona aua neʻi vave faamasino atu pe faitioina lea tagata, ma ia iloa lelei o loo tauaveina pea e ia lana avega tauave e tusa ai ma lana filifiliga. O le manatu autū lava, e leʻi faatuina aloaia e Paulo se tulafono malosi e uiga i le faia o se pisinisi ma sē e lē talitonu. Peitai e lē tatau lava ona tatou faaleamanaiaina lana fautuaga. Sa faagaeeina e le Atua lena fautuaga ma faamauina ai i le Tusi Paia mo lo tatou lelei. Tatou te atamamai pe a utagiaina lea fautuaga.