Ia Iai se Manatu Saʻo i le Alofa Mutimutivale o Le Atua

SA AGALELEI ma manatu mamafa le fomai. E tusa ai ma lana faaiuga sili, e matuā manaomia lava e lana maʻi se taotoga ina ia faasaoina ai lona ola. Na teʻi le fomai ina ua lē taliaina e le maʻi ma na ia lāgā ai se mataupu e uiga i le tuiga toto. Ina ua faamatala atu e le maʻi faapea ona o mafuaaga faalelotu, e lē mafai ai ona ia taliaina se taotoga e aafia ai se tuiga toto, sa matuā ofo lava le fomai. Sa taumafai le fomai e mafaufau loloto i se auala e fesoasoani ai i le teine. Mulimuli ane, sa ia manatu ua ia iloaina le auala. Na faapea atu le fomai: “E te iloa, afai e te lē taliaina se tuiga toto, o le a e oti. E te lē fia oti, a ea?”

Na fai atu le maʻi: “O le mea moni e leai.”

“Ae, e foliga mai, afai e te taliaina se tuiga toto, o le a e solia ai la talitonuga a lau lotu, lena e tāua foi ia te oe. Ae, o laʻu fautuaga lenei. Aisea e te lē taliaina ai se tuiga toto, ma faasaoina ai lou ola. Ia ona e tautino atu lea i le Atua ua e agasala, ma ua e salamō. I lena auala, o le a toe faafoisia ai oe i lau lotu.”

Sa manatu lenei fomai fia fesoasoani ua ia mauaina le tali saʻo atoatoa. Na ia iloa e talitonu lana maʻi i se Atua e alofa mutimutivale. Ma le mautinoa, o se avanoa lelei lea e tafili saunoa ai i le alofa mutimutivale o le Atua! Ae pe sa talafeagai ea lana fautuaga e pei ona sa ia faaleoina atu ai?

Pe Tatou te Manatunatu ea Faapena?

I nisi taimi tatou te manatu ai e pei o le auala sa faia e le fomai. Atonu tatou te fefefe ona o le mapuna aʻe o ni teteega e leʻi faatalitalia i le aʻoga po o le galuega. Ia po o le mauaina foi o i tatou i se tulaga e maasiasi ai pe a tatou fesagai ma omiga ina ia faia se mea e feteenai ma o tatou loto fuatiaifo. Ona o le faateia tele, atonu e taaina ai i tatou ina ia filifilia le auala faigofie ma faia le mea tatou te iloa e sese, ae manatu e talosaga atu mo le faamagaloga mulimuli ane ai.

Pe atonu foi e tofotofoina tagata taitoatasi e ala i o latou lava tuinanauga sese. Mo se faaaoaoga, atonu e oo se taulealea i se tulaga ua tofotofoina malosi ai e faia amioga lē tatau. Na i lo le tau faasaga i tuinanauga sese, atonu o le a lolo atu o ia, ma le manatu e toe faasaʻo i se taimi mulimuli le mataupu ma le Atua. O nisi ua iu lava ina oo atu i le tulaga ua faia ai se agasala matuia e ui lava ina ua latou iloa atonu e faateaina ai mai le faapotopotoga Kerisiano. E foliga mai ua latou manatu faapea, ‘Seʻi oʻu  faatali mo sina taimi puupuu. Ia ona ou toe salamō foi lea ma faaeaina i le faapotopotoga.’

O nei tulaga uma, e lua lava mea ua masani ai. Muamua, o le lolo atu o tagata taitoatasi na i lo le tauivi e faia le mea tonu. Lona lua, latou te manatu faapea afai e uma ona latou faia le mea sese, o le a faafuasei lava ona faamagalo e le Atua pe afai e na ona latou ole atu i ai.

O le ā le Manatu Saʻo?

Pe e faaalia ai ea i lenei mea se talisapaia saʻo mo le alofa mutimutivale o le Atua? Ia, seʻi manatu e uiga i lena alofa mutimutivale mo sina minute. Na fetalai Iesu: “Auā ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau.” (Ioane 3:16) Na faamatala mai e le aposetolo o Ioane le auala e galue ai lena alofa mutimutivale ina ua ia faapea mai: “Ou te tusi atu nei mea ia te outou, ina neʻi agasala outou; pe afai foi e agasala se tasi, o ia te i tatou le fautua i luma o le Tamā, o Iesu Keriso lea, o lē amiotonu.” (1 Ioane 2:1) O le mea lea, afai ona o le lē lelei atoatoa e mafua ai ona tatou pauu atu i le agasala, e mafai ona tatou tatalo atu i le Atua ma ole atu mo le faamagaloga e faavae i le taulaga togiola a Iesu.

O lea la, pe o le uiga ea o lenei mea, e faapea e tusa lava pe tatou te agasala pe leai, ae tau lava ina tatou ole atu mo le faamagaloga mulimuli ane? E leai. Manatua uluai upu na sa sii mai e faapea: “Ou te tusi atu nei mea ia te outou, ina neʻi agasala outou.” O isi upu a Ioane i le fuaiupu lena e faaalia ai le fuafuaga alofa a Ieova i le feagai ai ma o tatou lē lelei atoatoa. Peitai, e tatau ona tatou taumafai i le malosi tatou te mafaia, ina ia alofia le faia o le agasala. A lē faia faapea, ua tatou faaalia la le lē faaaloalo mo le alofa o le Atua, o le a pei ai o i latou na sa faasino atu i ai e Iuta o ē na latou faaaogā le alofa tunoa o le Atua e fai ma faamolemolega mo le faia o amioga lē pulea.—Iuta 4.

O le manatu i le alofa mutimutivale o le Atua e pei o se upega e laveaiina ai i tatou, e tusa lava po o le ā tatou te faia, e mafai ona faaleaogaina ai le alofa mutimutivale o le Atua ma faafoliga mai ai e lē leaga le faia o le agasala. E matuā le saʻo lena manatu. Na taʻu atu e le aposetolo o Paulo ia Tito e faapea: “Auā o le alofa tunoa o le Atua ua au mai ai le olataga, ua faaalia mai lea i tagata uma lava, o loo aʻoaʻo mai ai ia te i tatou, ia tatou teteʻa ese ma le faalematau atoa ma tuʻinanau faalelalolagi, a ia tatou nonofo ma le faautauta ma le amiotonu atoa ma le amio Atua i lenei olaga.”—Tito 2:11, 12.

Na faaalia e Paulo lona talisapaia mo le alofa mutimutivale o le Atua i le auala na ia tauivi ai ma ona lava lē lelei atoatoa. Na ia faapea mai: “Ou te faatoilaloina loʻu nei tino, ma aʻu fai ai ma pologa, ina neʻi iu ina le faamaoni aʻu, o aʻu sa talaʻi atu i isi tagata.” (1 Korinito 9:27) Sa leʻi fai ma masani a Paulo le fai faamolemolega faapea o loo aafia o ia i le agasala i taimi uma. Pe e lē tatau ea ona tatou faapena?

Le Finagalo o Iesu

I se tasi o mea na tupu, na faaalia ai e Iesu lona finagalo e uiga i le faalotolotolua mo le mea ua tonu, ae faia le mea faigofie ina ia alofia ai puapuaga. Ina ua amata ona ia fetalai atu i ona soʻo i le fotuai mai o lona maliu faataulagaina, sa taumafai Peteru e fautuaeseina o ia i lona faapea atu: “Le Alii e, ia mamao [“faapelepele,” NW] ia te oe lea mea.” O le ā le tali atu a Iesu? “Satani e, ina alu ia oe i oʻu tua, ua fai oe ma mea e tausuai ai; auā e le o mea a le Atua ua e loto i ai, a o mea a tagata.”—Mataio 16:22, 23.

O le aoaia malosi e Iesu o Peteru na matuā faaalia ai le teena e Iesu o le uia o se ala faigofie e aofia ai lona faasagatau i le finagalo o le Atua. Ua faaalia i faamaumauga e faapea sa lē faaletonu o ia i le mulimuli atu i le ala saʻo, a o fesagai ma tofotofoga faifai pea mai ia Satani. I le iuga, sa tauemua o ia, sasaina faamoamoa, ma faapuapuagatia i se maliu tiga. E ui i lea, sa leʻi faalotolotolua ai o ia, ma ona o lenei mea sa mafai ai ona ia ofoina atu lona ola o se togiola mo i tatou. Ma le mautinoa lava, sa leʻi tumau o ia i lalo o nei faigata uma ona e faapea ina ia mafai ai ona tatou ‘faapelepele ia i tatou lava’ pe a mapuna aʻe ni faigata po o ni tofotofoga!

 Ua fetalaia faapea ia Iesu: “Ua e fiafia i le amiotonu, a ua e ʻinoʻino i le amio leaga.” (Eperu 1:9) O le uia o le auala faigofie e masani lava ona aafia ai solitulafono. O le mea lea, afai tatou te ʻinoʻino moni lava i lenei mea—e pei ona sa faia e Iesu—o le a tatou teena ai la i taimi uma le faalotolotolua. Ua fetalai mai Ieova i le tusi o Faataoto e faapea: “Loʻu atalii e, ia poto oe, ma e faafiafia loʻu loto; ona ou mau tali ai lea i lē faifai mai.” (Faataoto 27:11) O le amiotonu e paleni e aunoa ma le faalotolotolua o Iesu na matuā faafiafiaina ai le finagalo o Ieova. E mafai foi ona tatou faafiafiaina faapena Ieova pe afai tatou te mulimuli i le auala faamaoni na uia e Iesu.—1 Peteru 2:23.

Aʻoaʻoina e Ala i le Onosai

Na tusia faapea e le aposetolo o Peteru: “O lea ua outou olioli ai, e ui lava ona faanoanoa o outou i nai aso nei, (pe afai e tatau ai,) i tofotofoga eseese. O le tofotofo foi o lo outou faatuatua, e silisili ona aoga i le auro e faaumatia, e ui lava ina tofotofoina i le afi, e avea ma mea e iu i le viiga, ma le mamalu, ma le manuia pe a faaalia mai Iesu Keriso.” (1 Peteru 1:6, 7) Talu ai ona tatou te lē lelei atoatoa ma o loo i le lotolotoi o le lalolagi a Satani, e mautinoa lava la lo tatou fesagai pea ma tofotofoga ma faaosoosoga. E pei ona faaalia e Peteru, e mafai ona iu lena mea i se fuafuaga lelei. E tofotofoina ai lo tatou faatuatua, ma faaalia ai pe o vaivai po o malosi.

E faapena foi ona aogā e toleniina ai i tatou. Na ‘aʻoaʻoina e Iesu le usiusitai mai mea na ia  tiga ai’ (Eperu 5:8) E mafai foi ona tatou aʻoaʻoina le usiusitai, atoa ma le faalagolago ia Ieova, pe afai tatou te tumau i lalo o tofotofoga. Ma o lenei ituaiga o aʻoaʻoga o le a faaauau pea seia oo ina faaatoatoaina, e pei ona fai mai Peteru: “O le Atua . . . e faaatoatoaina outou e ia lava, ia faatumauina ia faamalosia.”—1 Peteru 5:10.

O lea la, afai tatou te faalotolotolua pe a i lalo o tofotofoga, ua tatou faaalia ai lo tatou palaaai po o le vaivai, ma le leai o se alofa malosi mo Ieova ma le amiotonu, po o le leai foi o se pulea totino. So o se vaivaiga faapena e mafai ona matuā faaleagaina ai la tatou faiā ma le Atua. O le mea moni, atonu o le a moni ia i tatou le lapataiga a Paulo e faapea: “Auā afai tatou te agasala ma le loto i ai pe a uma ona talia o le malamalama o le upu moni, ua le toe lava se taulaga mo agasala.” (Eperu 10:26) Maeu la le sili atu ona lelei o le lē faia o le agasala i le amataga na i lo o le lolo atu i vaivaiga ma ono aveesea ai lo tatou avanoa mo le ola!

Se Faamaoni e Lē Maluelue

I aso o le perofeta o Tanielu, na faamataʻuina ai ni Eperu se toatolu i le lafoina i se ogaumu aasa pe afai latou te lē ifo i se tupua. O le ā la latou tali? “Afai o lea, ua mafai lo matou Atua, matou te auauna i ai, ona laveai mai ia te i matou ai le ogaumu e mu ai le afi, na te laveaiina mai lava i matou ai lau pule le tupu. Ae peitai, a le o lea, ia e silafia e oe le tupu e, matou te le auauna i ou atua; o le tupua auro foi ua e faatuina, matou te le ifo i ai.”—Tanielu 3:17, 18.

Na latou tutū mausali ona sa latou mananao e faia le mea ua tonu. Afai lava e iu ai i latou i le oti, ia feoti ai pea. Sa latou talitonu aʻiaʻi i le toetu. Peitai, afai e laveaiina i latou e le Atua, o le a sili atu ona lelei. Ae o lo latou tutū mausali sa lē maluelue. O lea e ao ona iai pea lena uiga i auauna uma a le Atua.

Ua iai foi i o tatou aso nisi ua tuuina i le falepuipui ona o lo latou mumusu e faalotolotolua, ua faataugaina, ua oo lava ina fasiotia. O isi ua faataulagaina a latou mea faitino, ua sili ia i latou ona ola matitiva na i lo le fia mauoa ae solia ai mataupu silisili amiotonu. O le ā le mea sa tupu i le fafine Kerisiano na taʻua i le amataga o lenei mataupu? Sa ia talisapaia uiga agalelei e lē faavaea o le fomai, peitai sa leʻi faalotolotolua ai o ia i lona faatuatua. Na i lo lena, o lona faaaloalo i le tulafono a Ieova na iu ai i lona teena o le taotoga. Ma le fiafia lava, na toe malosi o ia ma faaauau ai ma le aasa i le auaunaga ia Ieova. E ui i lea, ina ua ia taʻu atu ma le mausali lona tulaga, na te leʻi iloaina po o le ā le iuga o le a oo i ai, peitai sa ia sauniuni e tuuina atu le mataupu atoa i aao o Ieova.

O le ā na fesoasoani ia te ia e tumau mausali ai i lalo o omiga? Sa leʻi faalagolago o ia i lona lava malosi, ma e lē tatau foi ona faia faapena e so o se auauna a le Atua. Manatua, “o le Atua, o lo tatou malu ia ma lo tatou malosi; e fai o ia ma fesoasoani silisili i puapuaga.” (Salamo 46:1) Maeu la le sili atu ona lelei o le liliu atu i le Atua mo se fesoasoani pe a feagai ma tofotofoga, na i lo le faia muamua o le agasala ona faatoʻā liliu mulimuli atu lea ia te ia mo lona alofa mutimutivale!

Ioe, seʻi aua lava neʻi o tatou manatu māmā i le alofa mutimutivale sili o le Atua. Na i lo o lea, seʻi o tatou atiina aʻe se faanaunauga moni ina ia faia le mea ua tonu, e tusa lava pe fesagai ma tulaga faigata. O le a avea lena ma mea e faalolotoina ai la tatou faiā ma Ieova, tatou te maua ai le toleniga o loo tatou manaomia mo le ola e faavavau, ma faaalia ai le faaaloalo tatau mo le alofa mutimutivale o le Atua. O na amioga poto o le a fiafia ai le finagalo o lo tatou Tamā faalelagi.

[Ata i le itulau 24]

O le faalagolago aʻiaʻi i le toetu na fesoasoani i Eperu e toatolu e tumau ai ma le mausali