“Le Atua e, Ia e Suesue Mai ia te Au”
“Le Atua e, Ia e Suesue Mai ia te Au”
“Le Atua e, ia e suesue mai ia te au, ma ia e silafia loʻu loto; . . . ma e taʻitaʻiina mai aʻu i le ala o le faavavau.”—SALAMO 139:23, 24.
1. E faapefea ona faafeagai Ieova ma ana auauna?
TATOU te mananao uma lava e faafeagai ma se tagata e malamalama, o se tasi na te amanaiaina o tatou tulaga, se tasi e fesoasoani mai pe a tatou masei, se tasi e lē soona tagisa mai ia i tatou i ni mea tatou te lē mafaia. O le auala lena o loo faafeagai ai Ieova le Atua ma ana auauna. Ua faapea mai le Salamo 103:14: “Ua silafia lava e ia le mea na fai aʻi i tatou; ua manatu ia o le efuefu lava i tatou.” Ma o Iesu Keriso foi, o lē ua ia faaatagia atoatoa maia lona Tamā, ua ia faasalafa maia le valaaulia mafana e faapea: “Ia outou o mai ia te au, o outou uma o e tigaina ma mafatia i avega, o aʻu foi e malolo ai outou. Ia outou amoina laʻu amo, [pe, “O mai i lalo o laʻu amo faatasi ma aʻu,” faamatalaga i lalo] ma ia outou faaaʻoaʻo ia te au, auā o aʻu lē agamalu ma le loto maulalo; ona maua lea e outou o le malologa mo outou agaga. Auā e avegofie laʻu amo, o laʻu avega foi e māmā ia.”—Mataio 11:28-30.
2. Ia faaeseese le silafaga a Ieova mai le vaaiga a tagata e faatatau ia (a) Iesu Keriso, ma (e) soʻo o Keriso.
2 E masani lava o le silafaga a Ieova i ana auauna, e eseese ma le vaaiga a tagata. E ese le mafuaaga na te tilofaia ai mea, ma e silasila foi o ia i vala atonu e matuā lē iloa e isi. A o feafioai Iesu Keriso i le lalolagi, sa “inosia ma tuulafoaiina o ia e tagata.” O i latou sa lē faatuatua ia te ia o le Mesia, sa latou “le manatua lava o ia.” (Isaia 53:3; Luka 23:18-21) Peitai, i fofoga o le Atua, o ia o le “Atalii pele [o le Atua],” o lē na fetalai mai i ai le Tamā e faapea: “Ua ou fiafia lava ia te oe.” (Luka 3:22; 1 Peteru 2:4) O loo iai i soʻo o Iesu Keriso ni tagata ua manatu faatauvaa i ai isi, ona o lo latou matitiva faaletino ma le onosai i le tele o puapuaga. Ae i le silafaga a Ieova ma lona Alo, o na tagata atonu e tamaoaiga. (Roma 8:35-39; Faaaliga 2:9) Aisea ua eseese ai le vaaiga?
3. (a) Aisea e masani ai ona ese le silafaga a Ieova i tagata, na i lo o manatu o tagata? (e) Aisea e matuā tāua ai mo i tatou ona iloiloina le ituaiga o loto o ia i tatou?
3 Ua tali mai le Ieremia 11:20 e faapea: “O oe, Ieova . . . o le tofotofo i le manatu [“fatugao,” NW] ma le loto.” E silasila o ia i o tatou loto, e oo lava i vala o o tatou uiga totino na e lilofia mai le vaaiga a isi. I lana iloiloga, e uai muamua atu o ia i uiga ma tulaga na e matuā tāua mo se faiā lelei ma ia, na e sili atu ona aogā e faavavau ia i tatou. O lo tatou iloaina o lena mea e atili faamafanafanaina ai i tatou; ma faamalosia ai foi lo tatou mafaufau loloto i ai. Talu ai e silasila Ieova i o tatou loto, ua tāua ai la mo i tatou ona iloiloina po o ā mea o i o tatou loto, pe afai tatou te fia avea ma ituaiga o tagata e finagalo i ai o ia mo lana lalolagi fou. Ua fesoasoani mai lana Afioga ia i tatou ina ia faia ai lena iloiloga.—Eperu 4:12, 13.
Maeu le Tautele o Manatunatuga o le Atua!
4. (a) O le ā na uunaia le faisalamo ina ia faalauiloa atu e faapea sa tautele ia te ia manatunatuga o le Atua? (e) Aisea e ao ai ona tautele ia i tatou?
4 Ina ua uma ona manatunatu loloto i le lautele ma le loloto ua silafia ai e le Atua ana auauna, ae maise foi le tomai silisili o le Atua i le saunia o so o se fesoasoani atonu latou te manaomia, ona tusia ai lea e le faisalamo o Tavita e faapea: “Ua matuā sili ou manatunatu ona aoga ia te au.” (Salamo 139:17a) O na manatunatuga, ua faaalia mai i lana Afioga tusitusia, ua sili atu ona tāua na i lo so o se mafaufauga o tagata, e tusa lava pe foliga mai e matuā maoae ni o latou manatu. (Isaia 55:8, 9) O manatunatuga o le Atua ua fesoasoani ia i tatou ina ia taulai atu ai pea i mea e sili ona tāua i le olaga ma ia maelega ai i lana auaunaga. (Filipi 1:9-11) E faasino mai ai ia i tatou le auala tatou te manatu ai i mataupu e pei ona silasila i ai le Atua. E fesoasoani ia i tatou ina ia tatou faamaoni ai ia i tatou lava, e faafetaiaia ai le ituaiga o uiga o iai moni i o tatou loto. Po o e nofo sauni ea e faia faapena?
5. (a) O le ā ua uunaia e le Afioga a le Atua i tatou ina “ia sili ona leoleoina” na i lo o se isi lava mea? (e) Ua mafai faapefea ona aogā ia i tatou le tala a le Tusi Paia e uiga ia Kaino? (i) E ui lava ina tatou te lē o tausisia le Tulafono faa-Mose, ae ua faapefea ona fesoasoani ia i tatou ina ia malamalama i mea e finagalo malie i ai Ieova?
5 E faanaunau atu tagata e faamamafa le foliga atu i fafo, ae ua fautua mai le Tusi Paia ia i tatou e faapea: “Ia sili ona leoleoina o lou loto i le leoleoina o mea uma.” (Faataoto 4:23) Ua fesoasoani le Tusi Paia ia i tatou ina ia faia faapea e lē gata i faatonuga ae i faaaoaoga foi. Ua taʻu mai ai ia i tatou e faapea, sa na ona ofo atu e Kaino o ana taulaga i le Atua ae i lona loto sa pupuna aʻe ai le tiga, ona oo ai lea ina inoino i lona uso o Apelu. Ma ua lapataia i tatou ina ia aua neʻi pei o ia. (Kenese 4:3-5; 1 Ioane 3:11, 12) Ua taʻua ai le manaomia e le Tulafono faa-Mose o le usiusitai. Ae ua faamamafaina ai foi le manaoga sili o le Tulafono e faapea, o i latou e tapuai atu ia Ieova e ao ona alolofa ia te ia ma o latou loto atoa, manatu atoa, agaga atoa, ma le malosi atoa; ma ua taʻua ai foi le mea tāua e sosoo atu i ai, o le poloaiga lea ina ia alolofa i o latou tuaoi e pei ona latou alolofa ia i latou lava.—Teuteronome 5:32, 33; Mareko 12:28-31.
6. I le faatatauina o le Faataoto 3:1, o ā fesili e ao ona tatou fesiligia ai i tatou lava?
6 I le Faataoto 3:1, ua fautuaina ai i tatou ina ia lē tau ina tausia poloaiga a le Atua, ae ia mautinoa o lena usiusitai o se faailoaina atu lea o le lagona moni o o tatou loto. E manaomia ona tatou fesili ifo taitoatasi ia i tatou lava, ‘Pe o moni faapena loʻu usiusitai i mea o finagalo i ai le Atua?’ Afai tatou te iloa e iai ni mea e lē o matuā mautu ai o tatou lagona po o mafaufauga—ma e lē mafai e se isi o i tatou ona faapea mai e lē sese—e manaomia la ona tatou fesili ifo, ‘O le ā o loo oʻu faia ina ia faaleleia ai lea tulaga?’—Faataoto 20:9; 1 Ioane 1:8.
7. (a) Ua faapefea i le tausalaina e Iesu o le au Faresaio i le Mataio 15:3-9, ona fesoasoani ia i tatou e leoleomaluina ai o tatou loto? (e) O ā tulaga e ono manaomia ai ona tatou matuā malolosi i le aoaiina o o tatou mafaufau ma loto?
7 Ina ua faafoliga atu le au Faresaio Iutaia e faapea o loo latou āva i le Atua ae o loo latou faatogafitia ni faiga e uunaia e o latou faanaunauga manatu faapito, sa tausalaina i latou e Iesu o ni tagata pepelo ma faaali atu le lē aogā o la latou tapuaiga. (Mataio 15:3-9) Na lapatai foi Iesu e faapea, ina ia faafiafiaina le Atua o lē silasila i le loto, e lē lava le na ona ola i se olaga mamā mai le vaaiga i fafo, ae i le taimi e tasi, o loo faatumu ai pea o tatou mafaufauga i manatunatuga lē mamā ina ia faatino ai fiafiaga o faanaunauga o le alofa. Atonu tatou te manaomia ni taumafaiga malolosi e aoaia o tatou mafaufau ma loto. (Faataoto 23:12; Mataio 5:27-29) E manaomia foi na aoaiga pe a avea a tatou galuega faalelalolagi, o tatou sini i aʻoaʻoga, po o le filifiliaina o a tatou faafiafiaga, e iu ai ina tatou faataitai atu i le lalolagi, ma faatagaina ona ala e faafoliga ai i tatou e tusa ma ona tulaga. Aua lava neʻi galo ia i tatou, ua faaigoa e le soʻo o Iakopo o tagata “mulilulua,” i latou o ē faapea mai o auauna a le Atua ae mananao e avea ma uo a le lalolagi. Aisea? Auā “o le lalolagi uma o loo nofo toilalo i loo leaga.”—Iakopo 4:4; 1 Ioane 2:15-17; 5:19.
8. Ina ia maua aogā atoatoa mai manatunatuga tautele o le Atua, o le ā e manaomia ona tatou faia?
8 Ina ia matuā maua aogā mai manatunatuga o le Atua i nei mataupu po o isi foi, e manaomia ona tatou faataatia ese se taimi e faitau ai po o le faalogologo atu i ai. E lē gata i lea, e manaomia ona tatou suesue i ai, talatalanoa i ai, ma manatunatu loloto i ai. E toatele tagata faitau o Le Olomatamata o loo faatasi atu e lē aunoa i sauniga a le faapotopotoga o Molimau a Ieova, lea o loo talanoaina ai le Tusi Paia. Ua latou faasaoina mai le taimi mai isi mea, ina ia faataunuu ai lea fuafuaga. (Efeso 5:15-17) Ma o le taui ua latou maua e matuā sili mamao atu ona aogā i lo o le tamaoaiga faaletino. Po ua lē o le lagona ea lena o loo ia te oe?
9. Aisea e vave atu ai le agaigai i luma o isi o loo faatasi i sauniga faa-Kerisiano na i lo o isi?
9 Peitai, o nisi o loo faatasi atu i nei sauniga ua sili atu ona vave lo latou agaigai i luma faaleagaga na i lo o isi. Latou te faatatauina atoatoa le upu moni i o latou olaga. Aisea ua mafua ai? E masani lava, o le vala autū o lo latou maelega lea i suesuega totino. Ua latou ioe e lē na o meaai faaletino tatou te ola ai; ae o meaai faaleagaga i aso uma ua tutusa lelei lona tāua ma le taumafaina e lē aunoa o meaai faaletino. (Mataio 4:4; Eperu 5:14) Ua latou taumafai ai la ina ia faaaluina sina taimi i aso taitasi i le faitauina o le Tusi Paia po o isi lomiga o loo faamatala mai ai le Tusi Paia. Latou te sauniuni mo sauniga a le faapotopotoga, i le muai suesueina lea o mataupu ma tilofaia mau. Latou te faia nisi mea e sili atu na i lo o le tau ina faitau o le mataupu; latou te mafaufau loloto i ai. O le faasologa o la latou suesuega e aofia ai le manatunatu mamafa i aafiaga e ao ona aafia ai o latou olaga mai mea o loo latou aʻoaʻoina. A o tuputupu aʻe lo latou tulaga faaleagaga, ona ia i latou lea o le lagona e pei ona sa iai i le faisalamo o lē na tusia e faapea: “Ua tele lava loʻu naunau i lau tulafono; . . . O mea e ofo ai au tulafono.”—Salamo 1:1-3; 119:97, 129.
10. (a) O le ā le umi e tatau ona faaauau ai le suesueina o le Afioga a le Atua? (e) Ua faaalia faapefea e le Tusi Paia lenei mea?
10 E tusa lava pe ua atoa le tausaga o tatou suesueina le Afioga a le Atua, pe ua lima tausaga, po o ua limasefulu tausaga, ae e lē avea lava o se mea e faapea ua fiu ai—e lē mafai ona faapena pe afai e tautele ia i tatou manatunatuga o le Atua. E tusa lava po o le ā le tele o mea ua aʻoaʻoina e so o se tasi o i tatou mai le Tusi Paia, ae o loo tele pea mea tatou te lē o iloa. Na faapea mai Tavita: “Le Atua e, . . . ua sili lava ona tele lo latou faitau aofai. Afai ou te faitaulia, ua sili ia ona tele i le oneone.” E leai so tatou tomai e mafai ona faitauina ai manatunatuga o le Atua. Afai tatou te mafaufauina manatunatuga o le Atua i se aso atoa seia oo ina tatou momoe ai, pe a tatou feala aʻe i le taeao, o le a tele pea isi mea e tatau ona tatou mafaufau i ai. O lea na tusi mai ai Tavita e faapea: “A aʻu ala, tā te i ai pea ma aʻu.” (Salamo 139:17, 18) E oo mai lava le faavavau o loo tele pea mea e ao ona tatou aʻoaʻoina e uiga ia Ieova ma ona ala. E lē taitai ona tatou oo i se tulaga e mafai ai ona tatou faapea ua tatou iloa ona manatunatuga uma.—Roma 11:33.
Inoino i Mea e Inoino i ai Ieova
11. Aisea ua tāua ai le iloa e lē gata i manatunatuga o le Atua, ae ia auai foi i ona lagona?
11 O lo tatou suesueina o le Afioga a le Atua e lē tau ina fai e faatumu ai o tatou ulu i faamatalaga moni. A o tatou faatagaina e goto ifo i o tatou loto, ua amata ai foi ona ia i tatou faalogona o le Atua. Maeu le tāua o lena tulaga! Afai tatou te lē faatupuina na faalogona, o le ā e ono tupu? E ui atonu e mafai ona tatou toe taʻua mea o loo tusia i le Tusi Paia, peitai atonu tatou te ono moomoo ai i mea ua faasaina, po o le lagona faapea ua avea mea o loo manaomia mai ia i tatou o se avega mamafa. E moni e ui lava ina tatou inoino i mea leaga, ae atonu o loo tatou tauivi pea ona o le lē lelei atoatoa faaletagata. (Roma 7:15) Ae afai tatou te lē taumafai ma le filigā ina ia ogatasi o tatou loto ma le mea ua tonu, pe mafai la faapefea ona tatou faafiafiaina le finagalo o Ieova, o lē “na te tofotofoina loto”?—Faataoto 17:3.
12. O le ā le tāua o le alofa faaleatua ma le inoino faaleatua?
12 O le inoino faaleatua o se puipuiga malosi e tetee ai i amioga sese, e pei foi ona faapogaia e le alofa faaleatua le fiafia e faia le mea ua tonu. (1 Ioane 5:3) Ua fautuaina pea i tatou e le Tusi Paia ina ia atiina aʻe faatasi le alofa ma le inoino. “Outou e ua alolofa atu ia Ieova, ia outou ʻinoʻino i mea leaga.” (Salamo 97:10) “Ia ʻinoʻino i le leaga, ia pipii i le lelei.” (Roma 12:9) Po o tatou faia ea lena mea?
13. (a) O le ā le tatalo a Tavita e faatatau i le faaumatiaga o ē amio leaga, tatou te ioe uma i ai? (e) E pei ona faaalia i le tatalo a Tavita, o ai ē amio leaga ia sa ia tatalo ina ia faaumatia e le Atua?
13 Ua faamanino mai e Ieova lana fuafuaga o le liaieseina o ē amioleaga mai le lalolagi ma faaofi mai ai se lalolagi fou o le a mau ai ē amiotonu. (Salamo 37:10, 11; 2 Peteru 3:13) Ua leva ona moomoo ē alolofa i le amiotonu mo le oo mai o lena taimi. Ua matuā ioe faatasi i latou ma le faisalamo o Tavita o lē na tatalo e faapea: “E moni, le Atua e, e te fasioti i e amio leaga; o lea, ia o ese atu ai ia te au outou tagata ua totolima, o e fai upu ia te oe e faatupu ai le leaga; e taʻutaʻu fua i lou suafa o e ita ia te oe.” (Salamo 139:19, 20) E leʻi faanaunau Tavita na te fasiotia totino na tagata amioleaga. Sa ia tatalo ina ia faaoo mai e Ieova le tauimasui. (Teuteronome 32:35; Eperu 10:30) O nei tagata latou te leʻi faatiga moni ia Tavita lava ia. Sa latou faia mea e tauvalea ai le Atua, ma faaaogāina ma le lē mafaufau lona suafa. (Esoto 20:7) Sa latou lē faamaoni i le faapea atu o loo auauna ia te ia, ae sa latou faaaogāina lona suafa e faataulau ai a latou lava fuafuaga. Sa leai se alofa o Tavita mo i latou o ē na filifili e avea ma fili o le Atua.
14. Po o iai ea ni tagata leaga e mafai ona fesoasoani atu i ai? Afai e iai, e faapefea ona faia?
14 E faitau piliona tagata latou te lē o iloa Ieova. O le toatele o i latou ua latou faia mea o loo taʻua i le Afioga a le Atua e leaga ona o le valelea. Afai latou te tumau pea i lenei tulaga, o le a avea ai i latou ma ē o le a faaumatia i le puapuaga tele. Peitai, e lē fiafia Ieova i le oti o lē amioleaga, ma o lo tatou lagona foi lena e tatau ona iai. (Esekielu 33:11) Ia tatou taumafai pea e fesoasoani atu i na tagata ina ia iloa ma faatatauina ala o Ieova a o loo iai pea le avanoa. Ae faapefea pe afai e matuā faaalia e nisi tagata le inoino ia Ieova?
15. (a) O ai ē na vaai i ai le faisalamo o ni “fili” moni? (e) E mafai faapefea ona tatou faaalia i aso nei tatou te “ʻinoʻino” ia i latou o ē fouvale ia Ieova?
15 E tusa ai ma i latou na, sa faapea mai le faisalamo: “Ieova e, ou te le ʻinoʻino ea ia te i latou o e ʻinoʻino ia te oe? ma e o laga atu ia te oe, ou te le matuā ʻinoʻino ea i ai? Ou te ʻinoʻino lava ia te i latou ma le matuā ʻinoʻino tele; ua fai i latou moʻu fili.” (Salamo 139:21, 22) Talu ai lo latou matuā inoino ia Ieova, na mafua ai foi ona inoino Tavita ia i latou. E aofia ai aposetate ia i latou o ē inoino ia Ieova e ala i le tetee atu ia te ia. O le mea moni, o le faaaposetasi, o le fouvale lea ia Ieova. Ua faapea mai nisi aposetate ua latou iloa ma auauna i le Atua, ae latou te tetee i aʻoaʻoga ma mea manaomia ua faataatitia mai i lana Afioga. Ua faapea mai isi e talitonu i le Tusi Paia, ae latou te teena le faalapotopotoga a Ieova ma matuā taumafai e taofia lana galuega. Pe a latou filifili ma le loto i ai e faia na mea leaga ina ua uma ona latou iloa le mea saʻo, pe a oo ina mauaa le leaga ma avea o se vaega tumau o i latou, ua tatau la i se Kerisiano ona inoino (i le uiga faale-Tusi Paia o le upu) ia i latou o ē ua matuā lē mafai ona toe ō ese mai le leaga. O Kerisiano moni e ia i latou faalogona o Ieova agaʻi i na aposetate; latou te lē fia iloaina fua manatu o aposetate. Ae latou te “ʻinoʻino” ia i latou o ē ua fai ma fili o le Atua, peitai latou te tuu atu ia Ieova e faia le tauimasui.—Iopu 13:16; Roma 12:19; 2 Ioane 9, 10.
Pe a Suesueina i Tatou e le Atua
16. (a) Aisea na manao ai Tavita ina ia suesueina o ia e Ieova? (e) O le ā le mea e uiga i o tatou loto e ao ai ona tatou ole atu i le Atua ina ia fesoasoani mai ai ia i tatou e iloaina?
16 Sa leʻi fia pei Tavita o ē amioleaga i so o se itu. E toatele tagata latou te taumafai e natia o latou uiga moni, ae na tatalo ma le loto maulalo Tavita e faapea: “Le Atua e, ia e suesue mai ia te au, ma ia e silafia loʻu loto; tofotofo mai ia ia te au, ma ia e silafia oʻu manatunatu; ma ia e silafia po o ia te au se ala e tiga ai; ma e taʻitaʻiina mai aʻu i le ala o le faavavau.” (Salamo 139:23, 24) Ina ua faasino atu Tavita i lona loto, sa leʻi uiga o ia i le totoga o lona tino. Ina ia tusa ai ma le uiga faafaatusa o lena faaupuga, sa faasino o ia i uiga moni o lona loto. E tatau foi ona tatou mananao ina ia suesue e le Atua o tatou loto ma silasila mai po o iai ni o tatou faanaunauga, ni lagona, ni fuafuaga, ni manatunatuga, po o ni uunaiga o le loto, e lē fetaui. (Salamo 26:2) Ua valaaulia mai e Ieova i tatou e faapea: “Loʻu atalii e, au mai ia lou loto ia te au; ma ia fiafia ou mata i oʻu ala.”—Faataoto 23:26.
17. (a) Na i lo o le natia o ni manatunatuga e lē o toafilemu ai, o le ā e ao ona tatou fai? (e) Pe e ao ea ona tatou maofa i le iloaina o loo iai ni faanaunauga sese i o tatou loto, ma o le ā e ao ona tatou faia i ai?
17 Afai o iai ni manatunatuga tiga ma le lē toafilemu o loo tatou natia talu ai ni faanaunauga sese po o ni uunaiga sese o le loto, po o ni amioga sese sa tatou faia, e mautinoa lava la, tatou te mananao ina ia fesoasoani mai Ieova ia i tatou e faasaʻo le mataupu. Na i lo o le faaupuina faapea “se ala e tiga ai,” ua faaaogā e le faaliliuga a Moffatt le faaupuga “se auala sese”; Ua faapea mai le New English Bible: “So o se auala e faavauvau ai [o lona uiga, o le Atua].” Atonu tatou te lē o matuā manino lelei i o tatou manatunatuga ia ua lē toafilemu ma ua lē iloa ai foi ona faaleo atu lo tatou faafitauli i le Atua, peitai e malamalama o ia i le tulaga o loo tatou iai. (Roma 8:26, 27) E lē tatau ona tatou maofa pe afai e iai ni faanaunauga leaga i o tatou loto; peitai, e lē tatau pea ona tatou faatagaina i latou. (Kenese 8:21) E ao ona tatou sailia le fesoasoani a le Atua ina ia liaieseina ai. Afai tatou te alolofa moni ia Ieova ma ona ala, e mafai la ona tatou faalatalata atu ia te ia mo lea fesoasoani, ma le mautinoa “ua sili lava le Atua i o tatou loto, ua silafia foi e ia mea uma.”—1 Ioane 3:19-21.
18. (a) Ua taitaiina faapefea e Ieova i tatou i le ala e faavavau? (e) Afai tatou te faaauau ona mulimuli i le taitaiga a Ieova, o le ā le faamālō mafana e mafai ona tatou faatalitalia?
18 Ina ia ogatusa ma le tatalo a le faisalamo e faapea o le a taitaiina o ia e Ieova i le ala e faavavau, o le mea moni lava ua taitaia e Ieova ana auauna o ē loto maulalo ma usiusitai. Na te taitaiina i latou i le ala e lē gata o le ola umi, lea e faauiga i le lē vave aveesea o i latou ona o ni amioga leaga, ae i le ala foi lea e taitaiina atu ai i le ola e faavavau. Ua ia faatauaina mai ia i tatou lo tatou manaomia o aogā o le taulaga togiola a Iesu. Ua ia saunia mo i tatou faatonuga matuā tāua e ala mai i lana Afioga ma lana faalapotopotoga, ina ia mafai ai ona tatou faia lona finagalo. Ua ia faamamafaina mai ia i tatou le tāua o le talisapaia o lana fesoasoani, ina ia pei ai o tatou loto o le ituaiga o tagata o loo tatou faaalia atu i fafo. (Salamo 86:11) Ma ua ia faalaeiauina foi i tatou e ala i le faamoemoe o se soifua maloloina atoatoa i se lalolagi fou amiotonu, ma se olaga e faavavau ina ia auauna ai ia te ia, o le Atua moni e toatasi. Afai tatou te faaauau ona tali atu ma le faamaoni i lana taitaiga, o lona uiga, o le a ia fetalai mai ia i tatou, e pei ona ia fetalai ai i lona Alo e faapea: “Ua ou fiafia lava ia te oe.”—Luka 3:22; Ioane 6:27; Iakopo 1:12.
O le ā Sou Manatu?
□ Aisea ua masani ai ona ese le silafaga a Ieova i ana auauna, mai le vaaiga a tagata?
□ O le ā e mafai ona fesoasoani ia i tatou ina ia iloaina mea o loo silasila i ai le Atua a o ia suesueina o tatou loto?
□ O le ā le ituaiga o suesuega ua fesoasoani ia i tatou ina ia iloa ai mea moni ma leoleomaluina ai o tatou loto?
□ Aisea ua tāua ai e lē gata ia iloa fetalaiga a le Atua, ae ia auai atu foi i ona faalogona?
□ Aisea e ao ai ona tatou tatalo totino faapea: “Le Atua e, ia e suesue mai ia te au, ma ia e silafia loʻu loto”?
[Fesili mo le Suʻesuʻega]
[Ata i le itulau 16]
A o suesue, taumafai ina ia fai mo oe manatunatuga ma faalogona o le Atua
[Ata i le itulau 18]
O manatunatuga o Ieova “ua sili ia ona tele i le oneone”
[Ē Ana le Ata]
Pictorial Archive (Near Eastern History) Est.