Le Ki i se Olaga Faaleaiga Manuia

SA MATAUINA e se sui na tauva mo le tofi peresitene o Amerika i le tausaga ua mavae e faapea: “Ua ia i tatou se lio faaleaiga ua faateleina le leaga.” E moni, o le tele o le leaga o le lio faaleaiga, ua matuā faateia ai lava. Na lipotia mai e le mekasini o le Fortune e faapea: “O suiga tetele faapena i le tamaoaiga po o mea moni e uiga i falegaosi mea tetele i se vaitaimi faapena, o le a avea o se mea e matuā ofo tele ai.”

E oo lava i aiga o ē o taumafai e mulimuli i mataupu silisili o le Tusi Paia e masani lava ona matuā aafia leaga ai. I ni nai tausaga ua mavae, na taʻu atu ai e se uso Kerisiano i se tamā o se fanau e toaono faapea: “E mafai ona e faatalitalia le toafā o lau fanau e tuua le upu moni ae ō atu i le lalolagi.” Peitai, sa leʻi talitonu lenei tamā o le a tupu se mea faapena e oo lava i se isi e toatasi o lana fanau. Sa ia faamatalaina mai le pogai.

Na faapea mai o ia: “O la ma fanau, e lē o sa ma fanau moni. Na tuuina mai i latou ia i maʻua ma laʻu avā e Ieova le Atua, o se ‘tofi,’ po o se meaalofa mai ia te ia. Ma na faapea mai o ia, afai ma te tausia i latou i le auala saʻo, ‘o le a lē liliu ese ai i latou.’ O lea, sa ma taumafai ai pea e tausia i latou e pei lava o se fanau a Ieova.”—Salamo 127:3; Faataoto 22:6.

Ua faailoa mai ai e lenei tamā le ki mo se olaga faaleaiga e manuia—e ao i mātua ona tausia a latou fanau e pei o latou tausia ni mea totino a le Atua. E ui e lē o le uiga o lenei mea faapea o le a utagia e tamaiti i taimi uma lau taitaiga lelei, ae ua ia te oe se avega tauave ina ia vaaia le fanau ua tuuina atu e le Atua i lau tausiga.

O se Avega Tauave Tāua

E ao ona e tuuina atu lenei tausiga ma le faaeteete, le migao ma le manatu mamafa, ae aua le faatalale pe faapalapala i ai. O loo e faia ma le iloa lelei o le a e tali atu i le Atua e tusa ma le tofi po o le meaalofa ua ia tuuina mai ia te oe. E lē manaomia ona e faataitaia ni auala eseese e tausia aʻe ai tamaiti. E manaomia e mātua na o faatonuga lava mai le Atua e pei ona saunia mai i lana Afioga, le Tusi Paia, ma e ao ona mulimuli ai ma le faaeteete i nei faatonuga.

O le faatonuga lenei a Ieova le Atua: “Ia e matuā aʻoaʻo soo ai [aʻu upu] i lau fanau, ma ia e tautalatala aʻi, pe a ē nofo i lou fale, pe a ē savali foi i le ala, pe a ē taoto, pe a ē tulai foi. Ia e fusi ai e fai ma faailoga i lou lima, e avea foi ma pale i le va o ou mata. Ia e tusi ai foi i pou o lou fale, atoa ma ou puipui.” Ua uunai mai foi le Tusi Paia e faapea: “O outou tamā foi, . . . ia tausi atu i ai [i a outou fanau] i aoaiga ma apoapoaiga a le Alii.”—Teuteronome 6:7-9; Efeso 6:4.

O lea, o le tausia o fanau e manaomia ona uai atu i ai e lē aunoa; ioe, o lona uiga o le tuuina atu ma le lē faatapulaaina o lo oulua taimi, ae maise lava lo oulua alofa ma le manatu mamafa ia i latou. O mātua e avatua i a latou fanau mea sili latou te manaomia, ua latou faia le mea ua fetalai mai ai le Atua e tatau ona avatua ina ia olioli ai i se olaga faaleaiga manuia.

Pe e te manatu ua soona tagisa i lenei mea? O le toatele o mātua ua faaalia o lo latou lagona lena e ala i a latou gaoioiga. Ae, o nei meaalofa mai le Atua—lau fanau—e manaomia moni lava le matuā uai faapitoa atu i ai.

Le Auala e Tausia ai i Latou

O se faiga atamai le talanoaina o le faaaoaoga a i latou o ē ua faamanuiaina i le tausia aʻe o a latou fanau. I le tala autū o le “Amazing Families,” i se tasi o  mekasini, na taʻua ai ni mea tāua se fa e manuia ai i le tausia aʻe o ni fanau laiti: “[1] o talanoaga i le taimi o taumafataga na e mafai ona faagaoioi ai le mafaufau, [2] faitauina o tusi lelei, [3] le faagaeetia i faaaoaoga a tagata ati aʻe e faia ai mea e aogā ona faaaoao i ai, [4] le iloa e iai se tu faaleaiga e ao ona tausisia ma ia tausia i se tulaga maualuga.”—U.S.News & World Report, Tesema 12, 1988.

E tusa ai ma “talanoaga i taimi o taumafataga,” ia manatua, ua faatonuina e le Atua mātua ina ia aʻoaʻo a latou fanau pe a nonofo i o latou fale. Pe masani ona nonofo faatasi lou aiga i taimi o taumafataga, ma maua ai avanoa i aso taitasi mo talanoaga mafana ma faagaeetia ai? E matuā tāua tele na taimi ma manatua ai pea e le fanau, e ofoina atu ai ia i latou se lagona mautu ma le saogalemu. Na faapea mai se tamaitiiti e ono tausaga le matua, e fiafia o ia i taimi o taumafataga “ona e lē toe popole ai le tasi i le isi,” ona ua faatasi uma tagata.

Ae faapefea le uigā o talanoaga i taimi o a outou taumafataga? Pe masani ona faaautu i mataupu o “tusi lelei,” e aofia ai le Tusi Paia ma lomiga faavae mai le Tusi Paia na o loo talanoaina ai la tatou auaunaga i le Atua po o mataupu e fesootai ma foafoaga a le Atua? E faaopoopo i nei ituaiga o talanoaga i taimi o taumafataga, e manaomia ona atiina aʻe e mātua i a latou fanau le alofa mo Ieova ma ana tulafono amiotonu i le faia lea o se polokalama mo suesuega e lē aunoa.

“E leai lava se faigata o le taumamafa faatasi e lē aunoa,” na faamatala mai ai e le tamā o le fanau e toaono e pei ona muai taʻua. “Sa fai lea ma masani, ma sa avea o se mea na autasia ai i matou. Ae o le faia o se polokalama e lē aunoa mo suesuega, sa faigata.” Ona o le vaivai i galuega mamafa pe a iu le aso, i nisi taimi e tautulemoe ai o ia a o faia le suesuega. Peitai, e leʻi faavaivai ai o ia i le faia e lē aunoa o le suesuega faale-Tusi Paia ma lana fanau, ma sa masani foi ona ia talanoa ma i latou taitoatasi ma faalogologo atu ia i latou mo ni taimi uumi.

E lē gata i le fai o ia ma taimua i talanoaga uigā i taimi o taumafataga ma saunia faamatalaga e faamasani ai lana fanau i tusi lelei, po o e vaai ua maua e lau fanau “le agaga faagaeetia ona o ni faaaoaoga a tagata ati aʻe”? O le upu moni, o le faia o se fuafuaga mo lau fanau ina ia auaufaatasi e lē aunoa ma i latou o ē o faataitai i le tagata silisili o ē uma na soifua, o Iesu Keriso, e matuā tāua pe afai e mananao ina ia avea i latou ma tagata matutua e manuia.

I le faaiuga, ae faapefea “le iloa e iai se tu faaleaiga e ao ona tausisia”? E manaomia ona malamalama lau fanau faapea e iai tapulaa faaleaiga e ao ona latou tausia i se tulaga maualuga—o nisi o amioga, tautala, laei, uiga faaalia ma isi mea faapena, e lē fiafia i ai ma e solia ai tu faaleaiga. E manaomia ona latou iloa lelei o le solia o tu faaleaiga o se mataupu matuia—o le a e matuā tiga ai, e pei ona iai i le tamā matua anamua o Iakopo, o amioga matagā a lana fanau tama na “inosia ai [o ia] e i latou o e mau i le nuu.”—Kenese 34:30.

O le tamā o le fanau e toaono o lē sa manatu i lana fanau o mea totino a le Atua, sa ia faamamafa “le tu faaleaiga.” Sa talanoa pea o ia ma lana fanau i le talafeagai o tapulaa faaleaiga e uiga i laei, o teuga atoa ma le faaesea mai auala a le lalolagi, ina ia ogatasi ma le agaga ma le taitaiga a Lē na Foafoaina Mea o Ieova le Atua. O le iuga la o le faaaluina o le tele o le taimi, alofa, ma le manatu mamafa ia i latou—ia aʻoaʻoina i le auala e ao ona latou savavali ai—na tali uma mai lenei fanau e toaono e ala ‘i lo latou lē liliuese mai le auala na aʻoaʻoina ai i latou.’—Faataoto 22:6.

I le lalolagi aoao, e faitau afe lio faaleaiga malolosi faapena. Maeu se viiga o Lē na Foafoaina Mea ona o i latou, ma maeu se taui mo o latou mātua lē manatu faapito, ma alolofa! A o mavae atu tausaga, o le a atili ai ma sili atu ona talisapaia na mātua e fanau o ē na maua aogā mai a latou taumafaiga. Faamolemole ia manatunatu i le tala lea o loo sosoo mai e uiga i se fafine na tausia e mātua amioatua, ma mātau lesona tāua e mafai ona aʻoaʻoina mai ai.