Mataupu Silisili po o le Fia Lauiloa—O Lē Fea Lou Taiala?

A O IAI i le vasega ono i le aʻoga, na auai Norihito i taaloga. Na faafuasei lava ona fesagai o ia ma se filifiliga. Sa manaomia tamaiti aʻoga uma ina ia auai i se faamanatuga e faailoa ai le lotonuu. Po o le a ia auai ma ana aumea faaleaoaoga i lenei sauniga e masani ai?

Sa aʻoaʻoina e Norihito mai le Tusi Paia e faapea, o se mea sese le auai i so o se gaoioiga faaletapuaiga i se isi atua e ese mai ia Ieova. (Esoto 20:4, 5; Mataio 4:10) Sa ia iloa foi e ao i Kerisiano ona tumau lo latou solitu mai faiga faapolotiki uma a le lalolagi. (Tanielu 3:1-30; Ioane 17:16) O lea, e ui lava sa uunaia o ia e ana aumea faaleaoaoga ina ia auai, ae sa solitu pea o ia ma le loto tele, ma i le taimi lava e tasi sa faaalia foi lona faaaloalo. O le ā e te faia i se tulaga faapena?

Le Faanaunauga ina ia Talia e Isi Tagata

Ua faaalia i le Tusi Paia e faapea, na faia e le Atua tagata ina ia faatasitasi, ia feoeoeai le tasi ma le isi, ma ia olioli e faifaimea faatasi. O se uiga masani le manao ina ia faatasitasi ma e tatou te tupulaga, ina ia talia i tatou, ma ia avea o se tasi o la latou vaega. O na faalogona, ua sili ai ona fiafia le olaga ma saosaolaumea i le filemu ma ogatasi ai i a tatou feutagaiga ma isi.—Kenese 2:18; Salamo 133:1; 1 Peteru 3:8.

O le faanaunauga masani o le fia avea ma sui o se vaega o tagata, ua atagia mai i le matuā faatauaina o le ogatasi e pei ona vaaia i nisi o tu ma aganuu i aso nei. Mo se faaaoaoga, o tamaiti Iapani, e aʻoaʻoina mai lava i o latou uluai tausaga, ina ia iloa ma ia ogatasi ma faatonuga mai le toatele o tagata. Ua aʻoaʻoina i latou e la latou aganuu faapea, o se tasi o o latou tiute sili o le ogatasi lea ma faiga faalenuu. Na faapea mai Edwin Reischauer, o lē sa avea muamua ma amepasa o Amerika i Iapani ma o sē e naunau e matauina amioga a tagata Iapani: “E sili atu ona faigofie le galulue o tagata Iapani i vaega, na i lo o tagata o atunuu i Sisifo.” Na ia faaopoopo mai foi: “Atonu e faaalialia e tagata o atunuu i Sisifo lo latou fia tutoatasi, ae o le toatele o tagata Iapani, e matuā loto malilie ina ia ogatasi o latou laei, amioga, uiga o le olaga,  ma o latou mafaufauga ma tulaga masani o a latou lava vaega.” Peitai, o le naunau ina ia ogatasi, e lē gata mai lea i na o tagata Iapani. O se faanunauga lea i le lalolagi aoao.

Omiga ina ia Ogatasi

E ui lava o le faanaunauga o se tasi e fia faia le mea sili ina ia ogatasi ai ma isi, ae o loo i ai le matautia i le ogatasi tauaso ma le mea ua lauiloa. Aisea? Auā o le mea ua lauiloa e le toatele o tagata, e feteenai ma le mea e talia e le Atua. Ua taʻu mai e le Tusi Paia ia i tatou e faapea: “A o le lalolagi uma o loo nofo toilalo i loo leaga.” (1 Ioane 5:19) Ua faaaogā ma le faaʻoleʻole e Satani auala uma o ia pulea e iai le—manao tele i mea faitino, amioga paʻū maulalo, faailoga lanu, faafiatonu o lotu, lotonuu, ma isi mea faapena—e faatosina ese ai le anoanoai o tagata ma liliuese ai i latou mai le Atua. O lo tatou ogatasi ma na faiga, o le iuga, o le a tatou tetee atu ai ia Ieova le Atua ma ana fuafuaga. O le pogai lena ua fautuaina ai Kerisiano: “Aua foi tou te amio faatasi ma lenei lalolagi, a e peitai ia liliuina i le toe fuataiina o outou loto, ina ia outou suesue pe se a le finagalo o le Atua, o mea ua lelei, ma le mālie, ma le atoatoa.”—Roma 12:2.

O le ola aʻe i lenei faiga o mea, ua matuā omia ai Kerisiano ina ia ogatasi ma le mea ua lauiloa. Ua patino lava ona maileia ai talavou i lenei mea. O le faanaunauga ina ia foliga ma gaoioi e pei o a latou aumea i le aʻoga, e matuā malosi tele. E manaomia ai ona latou matuā loto tetele e faamatala atu i a latou tupulaga le mafuaaga e lē faia ai so latou sao i nisi o gaoioiga. Ae peitai, afai e lē mafai ona latou faamatalaina atu, e ono iu ai la i se mala faaleagaga mo i latou.—Faataoto 24:1, 19, 20.

Ua fesagai foi tagata matutua ma na omiga i nofoaga e faigaluega ai. Atonu e faatalitalia i latou e faia se vaega i nisi o gaoioiga lautele pe a mānava galuega po o nisi o aso malōlō. O le mumusu e gauai atu i na mea e foliga mai ai ua tūtū mamao ese i latou ma lē felagolagomai, ma faigata ai le siomaga i le fale faigaluega. Ua uunaia foi nisi e galulue mo ni itula uumi pe galulue ovataimi ona o loo faia faapena e isi ma ua faatalitalia foi i latou e faia faapea. O le lolo atu i mea faapena, o le a faaleagaina ai faaleagaga i latou ma taofia ai i latou mai le faataunuuina o isi a latou matafaioi.—1 Korinito 15:33; 1 Timoteo 6:6-8.

Ua lē na o nofoaga o galuega po o le aʻoga e maua ai omiga ina ia gauai atu. Na faamatala mai e se tinā Kerisiano faapea, i se tasi taimi na ia taofia ai le tuuina atu o se aoaiga i lana tama, e ui lava sa matuā manaomia tele, ona sa ia lagona faapea, o le a lē fiafia i ai isi fafine ia sa iai.—Faataoto 29:15, 17.

E Ono Sese le Toatele

E tele fautuaga tuusao ua aumaia e le Tusi Paia mo i tatou e uiga i le mulimuli atu i le toatele. Mo se faaaoaoga, na taʻu atu i le nuu o Isaraelu: “Aua e te mulimuli atu i le toatele e fai le amio leaga; aua foi e te tali atu i se finauga, e ʻau ma le toatele e faapiopio ai le faamasinoga.” (Esoto 23:2; faatusatusa i le Roma 6:16.) Ae latou te leʻi mulimuli ai pea i lenei fautuaga. I se tasi taimi, ina ua faatoʻā tuua lava Aikupito, ina ua lē o iai Mose, sa taaina ai e nisi Arona ma tagata ina ia fai se tamai povi auro e tapuai i ai i se “tausamiga ia Ieova.” Sa aai ma feinu le nuu ma fiafia, ua pepese ma sisiva a o fai taulaga i le tamai povi auro. Ona o lenei gaoioiga lē pulea, ma le ifo i tupua, na faasalaina ai i le oti le 3,000 o ē na taimua. Ae na faaoo atu ai foi e Ieova le mala i le toatele o isi, ona o lo latou mulimuli atu ma le lē mafaufau i le toatele.—Esoto 32:1-35.

O le isi faataitaiga o le mulimuli atu i le toatele e faia amioga leaga, na tupu lea i le uluai senituri e fesootai ma le maliu o Iesu Keriso. I le faaoleoleina e taʻitaʻi lotu loto leaga, na ʻau atu ai le toatele o tagata e alalaga mo le faasatauroina o Iesu. (Mareko 15:11) Ina ua faasino atu e Peteru la latou agasala mamafa i le aso Penetekoso ina ua mavae le toetu ma le afio aʻe o Iesu i le lagi, e toatele na “tuia o latou loto” ma ua latou iloa le mea na latou faia ona o le mulimuli atu i le toatele.—Galuega 2:36, 37.

 E Sili ona Lelei Mataupu Silisili a le Tusi Paia

E pei ona faataitaia manino mai e nei faamatalaga, o le mulimuli tauaso atu i le mea ua lauiloa e iu ai i ni iuga matuiā. Maeu le sili ona lelei o le mulimuli atu i le Tusi Paia ma ia avea ana mataupu silisili e fai ma tapasa i o tatou olaga! Ua fetalai mai Ieova: “E pei ona sili ona maualuga o le lagi i le lalolagi, ua faapea ona sili ona maualuga o oʻu ala i o outou ala, ma oʻu manatu i o outou manatu.” (Isaia 55:9) I amioga ma faiā uma faaletagata—o le mea moni, i filifiliga uma tau i le olaga—ua atulasi ona faaalia ai faapea, e sili mamao atu le mulimuli i ala o Ieova na i lo o mea ua lauiloa. O le ki lena i se auala e sili ona fiafia ma maloloina o le olaga.

Fai ma faaaoaoga le mea na tupu ia Kazuya. E ui lava ua fai sina leva o ia suesueina le Tusi Paia, ae sa faaauau pea ona ia mulimuli atu i le auala o le fia lauiloa—i le tauivi ina ia mauoa ma maua ni mea se tele. O ana taumafaiga e faafiafiaina ē sili ia te ia ma ia tauleleia e ana uo i le galuega, sa masani lava ona iu ai i le ō ma ē masani i le inu ʻava seia oo i le tulua o po ma ao. Sa oo ia te ia le manao tele, le lē onosai, ma itaitagofie. O lona olaga soonafai na iu ai ina maua i le maʻi e pē le tino, ma na pē atoa ai le isi vaega o lona tino. A o ia taotooto i se moega i le falemai ua faasolosolo ina malosi, sa maua ai se taimi e toe manatunatu ai i mea na ia aʻoaʻoina mai le Tusi Paia ma le auala na ia faaaogā ai lona olaga. Sa filifili loa o ia faapea o le taimi loa lea ua tatau ai ona amata faatatauina mea na ia aʻoaʻoina. Na faamavae o ia mai lona tulaga pule ma suia ana aumea. Sa ia faia foi ni taumafaiga filigā e ofu i le tagata fou faa-Kerisiano ma suia lona manatu i mea faitino. O le iuga, na suia ona uiga, ma na amata ona faaleleia ai lona soifua maloloina. Mulimuli ane, na tuuina atu lona ola ia Ieova ma papatisoina ai o ia.

Ina ia taulau i le tuliloaina o se ala e lē lauiloa, e tatau i se tasi ona iloa mataupu silisili ua aafia ai ma ia talitonu atoatoa e saʻo. O le mea na oo ia Masaru ua faaalia ai o lea le tulaga. Ina o iai o ia i le vasega ono o le aʻoga maulalo, na fautuaina o ia e ana aumea i le vasega ina ia fai o ia ma sui e tauva mo le tulaga peresitene i le komiti a tamaiti aʻoga. Sa ia taʻua ma le matamuli e faapea, ona o le lē malamalama atoatoa i mataupu silisili o le Tusi Paia o aafia ai, sa lē mafai ai ona ia faamatala atu i ana aumea i le vasega le pogai e lē mafai ai ona ia tauva mo le tulaga faapolotiki. O lona fefe i tagata na taofia ai o ia mai le faaali atu o ia o se Kerisiano. Na pau lava le mea na ia faia, sa na o le punou ma tagi ma fai atu ma loimata, “E lē mafai ona ou faia o lena mea.”

O lenei mea tiga na faapogaia ai o ia e sailiili i le mafuaaga e lē aafia ai se Kerisiano i gaoioiga faapolotiki. (Faatusatusa i le Ioane 6:15.) Mulimuli ane, ina ua oo o ia i le aʻoga maualuga, na tulai mai ai foi se tulaga faapena. Ae peitai, o le taimi lea, ua nofo sauni ai o ia e faamatala atu ma le mautinoa lona tulaga i lona faiaoga. Sa talia e le faiaoga lana faamalamalamaga, ma sa faapena foi ona fesili atu nisi o ana uo i le vasega ia te ia e uiga i ona talitonuga faavae mai le Tusi Paia.

Pe a Faia e Tagata Uma le Mea Saʻo

I le lalolagi fou o loo sau, i le pulega a Keriso, o le mea taatele e faia, o le mea saʻo lena. Ae seia oo atu i lena taimi, e tatau ona leoleoina i tatou faasaga i le uunaiga e ogatasi ma le mea ua lauiloa. E mafai ona tatou maua faalaeiauga mai apoapoaiga a Paulo: “O i tatou foi, o loo ua vagavagaia e le faapotopotoga o e matamata mai e faapea ona toatele, ina tatou tuu ese ia o mea mamafa uma, atoa ma le agasala e faalavelavegofie ai i tatou, ia tatou taufetuli ma le onosai i le ala tanu [“tausinioga,” NW] o i o tatou luma.”—Eperu 12:1.

Pe a lua fetaiai ma finauga ma luʻi, o le ā o le a e faia? Po o le a e lolo atu ea i le mataʻu i tagata ma faia le mea ua lauiloa? Po o le a e liliu atu ea i le Afioga a le Atua, le Tusi Paia, ma mulimuli i ana mataupu silisili? O le faia o le auala mulimuli, o le a lē gata ina aogā mo oe nei, ae ua avatua ai foi ia te oe le faamoemoe o le i ai faatasi ma i latou o ē “ua maua i le faatuatua ma le onosai mea na folafolaina.”—Eperu 6:12.