Na Valoia Oge

I TAUSAGA lata mai nei lava, na lipotia mai ai e tala mai ī ma ō o le lalolagi le matuā faateteleina o oge. I Aitiope ma isi nofoaga ua avea pea ma nofoaga autū o puapuaga. I le 1992, na taulai atu ai taumafaiga a le lalolagi i le atunuu o Somalia ona o oge tetele na aafia ai talu ai mugala ma taua. Na lipotia mai e le nusipepa o le International Herald Tribune ia Setema 1992 e faapea: “E leai se tasi na te iloa le aofai o tagata Somalia ua maliliu, ae e sili atu i le 100,000 tagata na faamauina e le Koluse Mūmū. A lē faitau afe, e faitau selau i latou ua maliliu i aso taitasi.”

E lē o matuā taʻua mai e lena numera le oi ma le pagatia o tagata taitoatasi ua aafia ai. Na tusia e Yvette Pierpaoli, o se sui o Tagata Sulufai Faavaomalo, i le mekasini a le UN e taʻua o le Refugees e faapea: “I Niu Ioka po o Sineva e foliga mai e mautinoa lava le tulaga o ē sulufai; o le toatele naua o tagata o loo aofia ai, ua matuā faigata ai ona faitauina. Peitai, i le faitau afe o maila le mamao ese, i tuaoi o atunuu ua lē o toe mafai ona pulea, e matuā lagona ai lava le faanoanoa ona o tulaga matautia, ma o le mano o mafatiaga o loo feagai ma tagata e oso ai lou fia eē ona o le mataʻu.”

E ui ina faapea mai le Koluse Mūmū o a latou taumafaiga e fesoasoani ai i tagata Somalia, o se gaoioiga tau fesoasoani e aupito sili ona tele, ae na faitio mai le toatele o ē na matauina e faapea, i le tulaga lautele e itiiti lava le fesoasoani ma sa tuai foi la latou galuega laveai. Na faapea mai Pierpaoli: “O Atunuu sa fesoasoani ua faamaamulu, ua fiu foi e tausi Aferika ae ua faasolosolo ina leaga. . . . Ua latou tuuaia tagata Aferika i le leaga o a latou pulega, le matapeapea o o latou taitai, ma fevaevaeaiga faifaipea.”

Na valoia mai e le Tusi Paia le taimi e oo mai ai oge “i lea mea ma lea mea.” O nei oge, faatasi ma isi mala e pei o taua, mafuie, ma faamaʻi, e faailoa mai ai ua latalata mai le Malo o le Atua. (Luka 21:11, 31) Ua faaalia atili mai foi e le Tusi Paia faapea i pulega a lenei Malo o le Atua, o le a fau ma soloi taumafa mo tagata. Na tusia faapea e le faisalamo: “E taumafa o saito i le nuu i tumutumu lava o mauga.”—Salamo 72:16.