Po o Silafia Lelei e le Atua Oe?

“Ieova e, . . . ua e masani lava ma oʻu ala uma.”—SALAMO 139:1, 3.

1. O le ā le tele ua salalau atu ai lagona e faapea ‘e lē o malamalama isi’ i popolega, i faafitauli, ma omiga o loo tatou fesagai?

PO O iai ea se isi o matuā malamalama i popolega, i omiga, ma faafitauli na o loo lua fesagai? I le lalolagi aoao, e faitau miliona tagata, o ē talavou ma ē matutua, ua leai ni o latou aiga e popole atu i mea o loo tutupu ia i latou. E oo lava i le lio o aiga, ua toatele avā—ioe, ma tane foi—ua ia i latou le lagona faapea e lē o malamalama moni a latou paaga faaipoipo i omiga ia o loo faavaivaia ai i latou. O nisi taimi, ona o le loto tiga, latou te tautatala atu ai ma le tetee e faapea: “Ae o lena e te lē o malamalama!” Ma ua toatele foi talavou ua faapea mai e leai se tasi o malamalama ia i latou. Peitai, mai i lena lotolotoi o i latou o ē o loo moomoo ina ia tele se malamalama o isi ia i latou, o loo iai nisi ua matuā faamanuiaina o latou olaga. Ua mafai faapefea lena mea?

2. O le ā ua mafai ai e tagata tapuai o Ieova ona maua ni olaga e matuā faamalieina atoatoa?

² Talu ai, latou te lē popole pe matuā malamalama isi tagata i o latou faalogona pe leai, ae latou te mautinoa o loo malamalama le Atua i mea o loo latou fesagai, ma ona o i latou o ni ana auauna, ua lē amo pitotasi ai lo latou feagai ma o latou faafitauli. (Salamo 46:1) E lē gata i lea, o le Afioga a le Atua ma le fesoasoani a toeaina Kerisiano mataalia, ua mafai ai ona  latou maua se faamoemoe e ui lava i o latou faafitauli totino. Ua fesoasoani ia i latou le Tusi Paia ina ia iloa ai, e tautele i le silafaga a le Atua la latou auaunaga faamaoni, ma ua iai foi se lumanai mautinoa mo i latou o ē faamoemoe atu ia te ia, ma sauniuniga ua ia faaauala mai ia Iesu Keriso.—Faataoto 27:11; 2 Korinito 4:17, 18.

3, 4. (a) Ua mafai faapefea e le talisapaia o le mea moni e faapea o “Ieova o ia lava le Atua” ma “o ia na faia i tatou” ona fesoasoani ia i tatou ina ia olioli i lana auaunaga? (e) Aisea ua tatou matuā talitonu ai i le tausiga alofa a Ieova?

³ Atonu ua e masani i le Salamo 100:2, lea o loo faapea mai: “Ia outou auauna atu ia Ieova ma le fiafia; o mai ia outou i ona luma ma le alaga fiafia.” Pe toafia o loo tapuai moni atu lava faapena ia Ieova? O loo aumaia i le fuaiupu e 3 ni mafuaaga saʻo mo le faia faapea, e pei ona ia faamanatu mai ia i tatou: “Ia outou iloa o Ieova o ia lava le Atua; o ia na faia i tatou, ua fai i tatou mona; o lona nuu i tatou, o le lafu mamoe ua ia fagaina.” I le Tusi Paia Eperu, o loo faasino ai ia te ia faapea o le ʼElo·himʹ, e faaalia ai lona silisiliese i le mamalu, le malualii, ma le silisili ona lelei. O ia o le Atua moni e toatasi. (Teuteronome 4:39; 7:9; Ioane 17:3) Ua iloa e ana auauna lona tulaga o le Atua, ua lē na o se mea moni ua aʻoaʻoina ai i latou, ae o se mea ua latou tofo i ai, ma ua latou faamaonia atu e ala i le usiusitai, le faatuatua, ma le tuutoina atu.—1 Nofoaiga a Tupu 28:9; Roma 1:20.

⁴ Talu ai o Ieova o le Atua soifua, e oo lava i o tatou loto e ati ai lana silafaga, ua leai ai la se mea e lilo mai ona fofoga. O loo ia silafia mea uma o loo tutupu i o tatou olaga. E malamalama o ia i mafuaaga o faafitauli o loo tatou fesagai, atoa ma mafatiaga tau i le mafaufau ma faalogona ootia e ono iu i ai ona o nei faafitauli. Ona o ia o Lē na Foafoaina Mea, ua sili atu ai lona silafia lelei o i tatou na i lo o i tatou lava. Ua ia silafia foi le auala e fesoasoani mai ai ia i tatou i le faafetaiaia o tulaga ua tatou iai ma le auala e saunia ai se mapusaga e faavavau. O le a fesoasoani mai ma le alofa o ia ia i tatou—e pei o se leoleo mamoe o loo ia sapaia se tamai mamoe i lona fatafata—a o tatou faatuatua atu ia te ia ma o tatou loto atoa. (Faataoto 3:5, 6; Isaia 40:10, 11) O le suesueina o le Salamo 139 e tele sona aogā i le faamalosia o lena mautinoa.

O Lē na te Silafia o Tatou Ala Uma

5. O le ā le uiga o le “suesue” mai o Ieova ia i tatou, ma aisea ua manaomia ai ona faia faapea?

⁵ I se loto matuā talisapaia, na tusia ai e le faisalamo o Tavita e faapea: “Ieova e, ua e suesue mai ia te au, ua e silafia lava aʻu.” (Salamo 139:1) Na mautinoa e Tavita sa leʻi faataetaealuga le silafaga a Ieova ia te ia. Sa leʻi tagai le Atua ia Tavita e pei o le vaai atonu e vaai ai tagata, i le mātau na o lona foliga mai faaletino, lona tomai tau failauga, po o lona tomai i le taina o le kitara. (1 Samuelu 16:7, 18) Na “suesue” Ieova i uiga moni o Tavita, ma sa ia faia faapea ma le matuā manatu alofa mo lona lelei faaleagaga. Afai o oe o se tasi o auauna tuutoina a Ieova, na te silafiaina lelei foi la oe, e pei ona ia silafia lelei o Tavita. Po ua lē oo ifo ai la ia te oe ni lagona o le loto faafetai ma le migao?

6. Ua faaalia faapefea e le Salamo 139:2, 3 e silafia e Ieova mea uma tatou te faia, e oo lava i o tatou manatunatuga uma?

⁶ Na silafia uma lava e Ieova gaoioiga a Tavita, ma sa iloa foi e Tavita lea tulaga. Na tusia e le faisalamo e faapea: “O oe lava ua e silafia loʻu nofo i lalo ma loʻu tulai i luga; ua e silafia mamao mai oʻu manatunatu. Ua e suesue i loʻu savali ma loʻu taoto, ua e masani lava ma oʻu ala uma.” (Salamo 139:2, 3) E ui i le mea moni faapea o loo afio Ieova i le lagi, e matuā mamao ese lava mai le lalolagi, ae leʻi punitia ai lona silafia mai o mea sa faia e Tavita, ma ona mafaufauga na iai. Na ia “suesue,” pe matuā iloiloina gaoioiga a Tavita i le ao atoa ma le po, ina ia ona silafia uiga o na gaoioiga.

7. (a) E faavae i mea na tutupu i le olaga o Tavita, ia taʻu mai nisi o mea i o tatou olaga o loo silafia e le Atua. (e) E ao faapefea i lenei iloa ona aafia ai i tatou?

⁷ Ona o le alofa i le Atua ma le faatuatua i Lona mana e faasaoina ai, na faagaeeina ai lenei taulealea o Tavita e ofo atu ina ia tau ma le sauai Filisitia o Koliata, ma sa silafia foi e  Ieova lena mea. (1 Samuelu 17:32-37, 45-47) Mulimuli ane, ina ua tiga tele le loto o Tavita ona o le matauʻa o tagata, ina ua tagi foi o ia i le po ona o le faatetele o omiga, sa faamafanafanaloto ia te ia lona iloa e faapea, sa faafofoga mai Ieova i ana faatoga. (Salamo 6:6, 9; 55:2-5, 22) Na faapena foi ina ua lē mafai ona moe Tavita i nisi po ona o le tumu i le loto faafetai, ma faapogaia ai ona ia manatunatu loloto ia Ieova, na silafia foi e Ieova lea tulaga. (Salamo 63:6; faatusatusa i le Filipi 4:8, 9.) I se tasi afiafi, ina ua mataʻi e Tavita le avā a lona tuaoi o loo taele, na silafia e Ieova lena mea, ma na ia silafia foi le mea na tupu ina ua faataga e Tavita ona faanaunauga agasala e punitia ai le Atua mai ona mafaufauga, mo na o sina taimi puupuu. (2 Samuelu 11:2-4) Mulimuli ane, ina ua auina atu le perofeta o Natano e taʻu ia Tavita le matuia o lana agasala, sa faafofoga Ieova e lē gata i upu na tautala ane ai Tavita, ae na ia silafia foi lona loto salamō lea na mafua mai ai na upu. (2 Samuelu 12:1-14; Salamo 51:1, 17) Pe ua lē ao ea i lena mea ona tatou matuā mafaufau mamafa ai i mea tatou te agaʻi i ai, i mea tatou te faia, ma mea o loo i o tatou loto?

8. (a) I le ā le auala e aafia ai lo tatou tulaga ma le Atua ona o ‘upu a o tatou laulaufaiva’? (e) E mafai faapefea ona foia vaivaiga i le faaaogāina o o tatou laulaufaiva? (Mataio 15:18; Luka 6:45)

⁸ Talu ai e silafia e le Atua mea uma tatou te faia, e lē tatau la ona faateia i tatou i lona silafia o le auala o loo tatou faaaogā ai se vaega o o tatou tino, e oo lava i le vaega e sili ona itiiti e pei o le laulaufaiva. Na iloa e le tupu o Tavita lena mea, ma na ia tusia e faapea: “A o leai lava se upu i loʻu gutu, faauta, Ieova e, ua e silafia uma lava.” (Salamo 139:4) Na iloa lelei e Tavita, o i latou o le a talia e avea ma malo i le fale fetafai o Ieova, o tagata ia latou te lē taufaaleaga i isi, ma o ē e mumusu e faaaogā o latou laulaufaiva e faasalalau ai ni tala e susua ae e ono faalumaina ai se uo mamae. O i latou e finagalo malie i ai Ieova, o tagata ia e tautatala i le upu moni ma faamaoni foi i o latou loto. (Salamo 15:1-3; Faataoto 6:16-19) E leai se tasi o i tatou e mafai ona puleaina atoatoa o tatou laulaufaiva, peitai sa leʻi faavaivai Tavita ma faapea mai ua leai se mea na te mafaia e toe faaleleia ai lona tulaga. Sa tele se taimi na ia faaaluina i le fatuina ma le peseina o salamo o viiga ia Ieova. Na ia faalauiloa faalauaitele mai foi lona manaoga mo se fesoasoani ma tatalo atu i le Atua mo lea fesoasoani. (Salamo 19:12-14) Po o manaomia foi la e lo tatou faaaogāina o le laulaufaiva ona avea o se mataupu i a tatou tatalo?

9. (a) O le ā ua faaalia mai e le faamatalaga i le Salamo 139:5 i le ati o le silafaga atoatoa a le Atua i o tatou tulaga? (e) O le ā ua faamautinoaina e lenei mea ia i tatou?

⁹ E lē silasila mai Ieova ia i tatou po o tatou tulaga i se itu faatapulaaina. Ua ia malamalama atoatoa ia i tatou. I le faaaogāina o se aai na siomia e fai ma faaaoaoga, na tusia ai faapea e Tavita: “Ua e siosio mai i oʻu tua atoa ma oʻu luma.” I le tulaga o Tavita, sa leʻi avea Ieova o se fili e tulituliloaina o ia; ae na avea o sē na leoleomaluina o ia. I le faamaoniaina o le pule ma le puipuiga a le Atua sa ia faia mo le manuia e faavavau o ē alolofa ia te ia, na toe faapea mai ai Tavita: “Ua e faaee mai foi lou aao i luga ia te au.” Na tautino mai e Tavita e faapea: “O le poto lea e sili ona faigata ia te au, ua maualuga, ou te le mafaia.” (Salamo 139:5, 6) E matuā atoatoa, e matuā ati le silafaga a le Atua i ana auauna, ae lē o mafai ona tatou malamalama atoatoa i ai. Ae o le iloa ua ia i tatou, ua lava lea tatou te mautinoa ai, le matuā malamalama o Ieova ia i tatou, ma o le fesoasoani ua ia saunia o le a silisili ona lelei.—Isaia 48:17, 18.

So o se Mea Tatou te Iai, e Mafai ona Fesoasoani le Atua ia i Tatou

10. O le ā le upu moni faalaeiau ua faaoo mai e le faamatalaga manino i le Salamo 139:7-12?

¹⁰ I le tagai atu i le tausiga alofa a Ieova mai i se isi itu, ua faaauau ai ona faapea mai le faisalamo: “Ou te alu ea ifea ai lou Agaga? Ou te sola ifea ai ou luma?” Sa leai sona faanaunauga e fia sola ese mai ia Ieova; na i lo o lea, na ia iloa po o fea lava e iai o ia, o le a silafia e Ieova, ma o le a fesoasoani atu ia te ia e ala i le agaga paia. Na ia faapea mai atili: “Afai ou te alu ae i le lagi, o i ai lava oe; afai ou te fofola  soʻu moega i seoli, faauta, o i ai lava oe. Afai e faia mo aʻu apaau o le taeao, ma ou nofo i le tuluʻiga o le sami; e taʻitaʻi mai ia te au i lea lava mea e lou aao, e taofi mai foi ia te au lou aao taumatau. Afai ou te faapea atu, E ufitia lava aʻu i le pouliuli; ona fai lea o le po ma malamalama e siosiomia ai aʻu. Auā o le pouliuli e le pouliuli lava lea ia te oe; e malamalama le po pei o le ao; e tusa lava ia te oe le pouliuli ma le malamalama.” (Salamo 139:7-12) E leai se mea tatou te ono sosola atu i ai, e leai foi se mea tatou te ono fetaiai, e mafai ona natia mai i le silafaga a Ieova, pe lē oo atu i ai lona agaga ina ia fesoasoani ai ia i tatou.

11, 12. (a) E ui lava ina iai se taimi na galo ai ia Iona e mafai e Ieova ona silafia ma fesoasoani atu, ae ua faapefea ona faataitaia lena i le tulaga o Iona? (e) E ao faapefea ona aogā ia i tatou le mea na tupu ia Iona?

¹¹ I se tasi taimi, na galo ai i le perofeta o Iona lena tulaga. Na tofia o ia e Ieova ina ia talaʻi atu i tagata o Nineva. Na iai se pogai na ia manatu ai na te lē mafaia lea tofiga. Atonu ona o le talaaga sauā o tagata Asuria, na mataʻu ai Iona e auauna i Nineva. O lea na ia taumafai ai e lafi. I le taulaga o vaa i Iopa, na tuuvaa atu ai o ia i se vaa sa malaga atu i Tasesa (o le oganuu lava e tasi ma Sepania, e silia i le 2,200 maila [3,500 kilomita] i sisifo o Nineva). Peitai, sa silasila mai Ieova i le taimi na oso ai o ia i le vaa ma alu atu e moe i le ana. Na silafia foi e le Atua le mea sa iai Iona i le taimi na lafo ese ai mai le vaa, ma na faafofoga mai foi Ieova ina ua tauto Iona mai totonu o le manava o le iʻa e faapea, o le a ia faataunuuina ana tautoga. Ina ua toe faasaoina i le laueleele matutu, ona toe tuu atu lea ia Iona le avanoa e faataunuu ai lona tofiga.—Iona 1:3, 17; 2:1–3:4.

¹² Maeu le sili atu ona lelei pe ana amata mai lava i le amataga ona faalagolago Iona i le agaga o Ieova e fesoasoani ia te ia i le faataunuuina o lona tofiga! E ui i lea, na mulimuli ane tusia ma le loto maulalo e Iona le mea na tupu ia te ia, ma ua fesoasoani lena tala i le toatele talu mai lena taimi, ina ia faaalia le faalagolago ia Ieova, lea sa foliga na matuā faigata ia Iona ona mauaina.—Roma 15:4.

13. (a) O ā tofiga na faataunuuina ma le faamaoni e Elia a o leʻi sola ese mai le Tupu Fafine o Iesepela? (e) Na faapefea ona fesoasoani Ieova ia Elia e oo lava i le taimi sa ia saili atu ai mo se lafitaga i fafo atu o Isaraelu?

¹³ E fai la sina ese o le mea na tupu ia Elia. Sa ia faamaoni i le moliooina atu o le feau a Ieova e faapea, o le a puapuagatia Isaraelu i se lamala e fai ma faasalaga o a latou agasala. (1 Tupu 16:30-33; 17:1) Sa ia matuā faasilisilia ma le lototele le tapuaiga moni i le tauvaga i le va o Ieova ma Paala lea na faia i le Mauga o Karamelu. Ma sa ia mautinoa ua faataunuuina le faatamaiaga o perofeta e 450 a Paala i le alia o Kisona. Ae ina ua tauto le Tupu Fafine o Iesepela ona o lona lotoa, ina ia fasiotia Elia, ona sola ese ai lea o Elia mai le nuu. (1 Tupu 18:18-40; 19:1-4) Pe sa iai i inā Ieova ina ia fesoasoani ia te ia i lea taimi faigata? Ioe, ma le mautinoa lava. Pe ana aʻe Elia i se mauga maualuga e pei o le lagi; pe lafi o ia i se ana loloto i le lalolagi e pei o loo i Seoli; pe sola atu foi o ia i se motu tuufua i se saoasaoa e pei o le ufitia o le lalolagi i le pogisa—e oo atu lava i inā le aao o Ieova ina ia faamalosia ma taitaia o ia. (Faatusatusa i le Roma 8:38, 39.) Ma na faamalosia e Ieova Elia e lē gata i meaai mo lana malaga, ae o gaoioiga ofoofogia foi a Lona malosi galue. Ona sa faamalosia, na toe faataunuu ai e Elia le isi ona tofiga faaperofeta.—1 Tupu 19:5-18.

14. (a) Aisea e sese ai pe a manatu faapea e iai le Atua i mea uma ma i taimi uma? (e) I lalo o ā tulaga ua tausia ai ma le alofa e Ieova ana auauna i aso nei? (i) O le ā le uiga, e tusa lava pe tatou te iai i Seoli, ae o le a iai foi i inā le Atua?

¹⁴ E lē o uiga o upu faavaloaga a le Salamo 139:7-12 e faapea e iai le Atua i mea uma i se uiga faapea o loo iai o ia o se peresona i nofoaga uma i so o se taimi. E lē o le uiga lena o loo faaalia manino mai e le Tusi Paia. (Teuteronome 26:15; Eperu 9:24) Peitai, e lē mafai ona ia tuulafoaia ana auauna. Ua moni lena ia i latou o ē ua ō atu i nofoaga taumamao ona o o latou tofiga faatiokarate. O le tulaga moni lena na oo i Molimau faamaoni ia sa i nofoaga o faasalaga a Nazi i le taimi o le Taua Lona Lua a le Lalolagi, ma na moni foi  i misionare ia na taofiofia i nofoaga o falepuipui i Saina mai le 1958 e oo atu i le 1965. Na moni foi lea i o tatou uso ma tuafāfine pele i se atunuu i Aferika Tutotonu, o ē sa tatau ona sosola ese i le tele o taimi mai o latou nuu, po o lo latou atunuu foi. Pe afai e manaomia, e mafai e Ieova ona paʻi atu e oo lava i Seoli, le tuugamau taatele, ma toe faafoisia mai ai ē faamaoni e ala i le toetu.—Iopu 14:13-15; Luka 20:37, 38.

O Lē e Malamalama Moni ia i Tatou

15. (a) O anafea e amata ai ona silafia e Ieova lo tatou tuputupu aʻe? (e) Ua faapefea i le tele o le silafia e le Atua o i tatou ona faaalia mai e ala i le faamatalaga a le faisalamo e uiga i fatugao?

¹⁵ Ina ua faagaeeina le faisalamo, ona ia tatai lea o manatu i le mea moni faapea, ua leva ona silafia e le Atua i tatou ae tatou te leʻi fananau mai, e faapea: “Auā sa ia te oe oʻu manatunatu [“faia oʻu fatugao,” NW]; na e ufiufi ia te au i le manava o loʻu tinā. Ou te vivii atu ia te oe, auā na faia aʻu e ala ai ona matautia ma ofo tele ai; o mea na e faia, o mea mamana ia; ua ou matuā iloa e aʻu nei mea.” (Salamo 139:13, 14) O le soofaatasia o sela mai lo tatou tamā ma lo tatou tinā i le taimi o le afuafuaina, e maua ai le ata lea e matuā faaalia i o tatou foliga faaletino ma le faalemafaufau. E malamalama foi le Atua i le tulaga lena. O loo faapitoa ona taʻua e lenei salamo fatugao, lea e masani ona faaaogā i le Tusi Paia e fai ma sui o uiga moni totino o le tagata. * (Salamo 7:9; Ieremia 17:10) Ua silafia e Ieova nei auiliiliga uma e uiga ia i tatou e oo lava i le taimi tatou te leʻi fananau mai ai. O lona alofa foi na ia fuafuaina ai le tino o le tagata, ina ia mafai ai e le sela ua afuafua o loo i le manava o le tinā ona fafauina se afuafu ina ia ‘ufiufi’ ma puipuia ai le pepe a o tuputupu aʻe.

16. (a) O le ā le auala ua faamatilatila mai ai e le Salamo 139:15, 16 le ati o le malosi o le silafaga a le Atua? (e) Aisea e ao ai ona faalaeiauina i tatou i lenei mea?

¹⁶ Ina ua faamamafaina mai le ati o le silafaga a le Atua, ua taʻua atili e le faisalamo e faapea: “E lei lilo loʻu tino ia te oe, ina ua faia aʻu i le mea lilo, ina ua saunia aʻu i mea loloto i le lalolagi [e foliga mai sa faatatau atu e le tusi solo i le manava o lona tinā ae sa tau faaataata mai ai le foafoaina o Atamu mai le efuefu]. Na silasila mai ou fofoga i oʻu tino uma ina o afuafua; ua tusia foi uma lava i lau tusi, o ona aso foi na faia ai [vaega o le tino], a o leai [se veaga ua maʻoti mai o le tino] ni oʻu tino.” (Salamo 139:15, 16) E lē tau masalomia lea itu—e tusa lava pe malamalama tagata ia i tatou pe leai, ae ua malamalama lelei Ieova ia i tatou. Pe ao faapefea i lena mea ona aafia ai i tatou?

17. Pe a tatou manatu e ofoofogia galuega a le Atua, o le ā e uunaia ai i tatou e fai?

¹⁷ Na ioe le tusitala o le Salamo 139 e faapea, e ofoofogia galuega a le Atua lea sa ia tusia e uiga i ai. Po o le lagona ea foi lena o loo ia te oe? O se mea e ofoofogia, e matuā manatunatu loloto ai lava se tagata po o le matuā uai atu i ai. Ua ono faapena foi ou lagona i galuega o le foafoaga faitino a Ieova. (Faatusatusa i le Salamo 8:3, 4, 9.) Po o le ituaiga manatu ea lena o loo ia te oe e faatatau i mea ua ia faia i le faavaeina o le Malo faa-Mesia, i mea ua ia faia  i le talaʻiina atu o le tala lelei i le lalolagi atoa, ma i le auala ua suia ai e lana Afioga uiga o tagata?—Faatusatusa i le 1 Peteru 1:10-12.

18. Afai e faagaeeina i tatou ona o galuega a le Atua, o le a faapefea ona aafia ai i tatou?

¹⁸ Po o faapena ea foi i lou manatunatu loloto i galuega a le Atua ona faagaeeina ai oe, o lena e te maua ai se mataʻu tatau, e malolosi ona uunaiga, e loloto foi sona faaaafiaina o ou uiga totino ma i le auala o loo faaaogā i ai lou ola? (Faatusatusa i le Salamo 66:5.) Afai o lea, o le a uunaia la oe e lou loto ina ia faaneenee atu ia Ieova, ia vivii atu ia te ia, ma ia sailia ai ni avanoa e taʻu atu ai i isi lana fuafuaga ma mea ofoofogia ua ia saunia mo ē e alolofa atu ia te ia.—Salamo 145:1-3.

[Faaopoopoga i lalo]

O le ā Sou Manatu?

□ Ua faapefea e lo tatou iloa o “Ieova o ia lava le Atua” ona fesoasoani ia i tatou ina ia auauna ma le olioli ia te ia?

□ E ao faapefea ona aafia o tatou olaga i le silafiaina e le Atua o mea uma tatou te faia?

□ Aisea e faalaeiau ai le mea moni e faapea e lē mafai ona mavae i tatou mai le silafaga a le Atua?

□ Aisea ua mafai ai e le Atua ona malamalama ia i tatou i vala e lē mafai e se tagata ona malamalama i ai?

□ Aisea ua avea ai se suesuega faapenei tatou te mananao ai e faaneenee atu ia Ieova?

[Fesili mo le Suʻesuʻega]