Alofa (Agape)—Le Mea e Lē Uiga i ai, ma le Mea e Uiga i Ai
Alofa (Agape)—Le Mea e Lē Uiga i ai, ma le Mea e Uiga i Ai
“Ia faaopoopoina . . . o le alofa foi i le alofa i le au uso.”—2 PETERU 1:5, 7.
1. (a) O le ā le uiga ua matuā faasilisilia e le Tusi Paia? (e) O ā upu Eleni e fa ua masani ona faaliliuina i ai le “alofa,” ma o lē fea upu o loo faasino i ai le 1 Ioane 4:8?
AFAI e iai se uiga lelei o loo matuā faasilisilia i le Afioga a le Atua, le Tusi Paia, o le uiga lea o le alofa. I le faa-Eleni, le uluai gagana o Tusitusiga Kerisiano, e fa upu sa masani ona faaliliuina i ai le “alofa.” O le alofa lea tatou te talanoa nei i ai, e lē o le eʹros (o se upu e lē o maua i Tusitusiga Kerisiano Eleni), lea e mapuna aʻe i fetosinaaiga faaleituaiga; e lē o le stor·geʹ, o se faalogona e faapogai mai i faiā i le toto; e lē o le phi·liʹa foi, o le alofa mafana faaleuo e faapogai mai i le āva o le tasi i le isi, lea na talanoa i ai le mataupu ua mavae atu. Peitai, o le a·gaʹpe—o le alofa lea ua faavae aʻe i mataupu silisili, lea e ono taʻua faapea e tutusa ma le lē manatu faapito, le alofa lea na faasino i ai le aposetolo o Ioane ina ua ia taʻua e faapea: “O le Atua, o le alofa lava ia.”—1 Ioane 4:8.
2. O le ā ua tonu ona taʻua e uiga i le alofa (a·gaʹpe)?
2 E faatatau i lenei alofa (a·gaʹpe), ua taʻua ai e le polofesa o William Barclay i lana tusi o le New Testament Words e faapea: “O le agapē e faatatau i le mafaufau: ua lē na o se lagona e mapuna faafuasei aʻe i o tatou loto [e pei o le tulaga o le phi·liʹa]; o se mataupu silisili ua tatou filifilia e taitaia ai o tatou olaga. O le agapē e matuā faatatau lava i le loto i ai. O se manumalo, ma o se mea ua ausiaina. E leai lava se tasi e ola mai ma sona alofa i ni ona fili. O lo tatou alolofa i o tatou fili o se manumalo lena i o tatou faanaunauga uma ma faalogona e masani ai. O lenei agapē . . . o le mea moni o se uunaiga malosi lea ina ia alofa atu i ē e lē o alolofa mai, ia alolofa atu i tagata o ē tatou te lē fiafia i ai.”
3. Na faapefea ona faamamafa e Iesu Keriso ma Paulo le alofa?
3 Ioe, e aofia i mea o loo faaesea ai le tapuaiga mamā a Ieova le Atua mai isi tapuaiga uma, o lona faatauaina lea o lenei ituaiga o alofa. O lea na taʻua ai ma le tonu e Iesu Keriso poloaiga silisili e lua: “Ia e alofa foi i le Alii lou Atua ma lou loto atoa, ma lou agaga atoa, ma lou manatu atoa, ma lou malosi atoa. O le poloaiga sili lea. E faapena foi lona lua, o lenei, Ia e alofa atu i lē lua te tuaoi, ia pei o oe lava ia te oe. E leai lava se tasi poloaiga e sili i na poloaiga.” (Mareko 12:29-31) O le faamamafaina foi lena o le alofa na taʻua e le aposetolo o Paulo i le mataupu e 13 o le 1 Korinito. Ina ua uma ona ia faamamafaina faapea o le alofa o se uiga sili lea ona tāua e lē mafai ona lafoaia, ona ia faaiu lea i le faapea mai: “A o lenei, o tumau le faatuatua, ma le faamoemoe, ma le alofa, o na mea e tolu; a o le sili o na mea o le alofa lea.” (1 Korinito 13:13) Sa tonu le faapea mai o Iesu, o le alofa o le faailoga lea e mataulia ai ona soʻo.—Ioane 13:35.
Mea e Lē Uiga i ai le Alofa
4. E fia mea e lē uiga i ai ma mea e uiga i ai le alofa ua taʻua e Paulo i le 1 Korinito 13:4-8?
4 O le manatu ua faamaonia e faapea, e sili atu ona faigofie le taʻu atu o le mea e lē uiga i ai le alofa, na i lo o le taʻua o le mea e uiga i ai. Ua moni lena faaupuga, auā i le mataupu lea na tusia e le aposetolo o Paulo e faatatau i le alofa, i le 1 Korinito 13, i le fuaiupu e 4 e oo i le 8, ua ia taʻua ai mea e iva e lē uiga i ai le alofa, ma mea e fitu e uiga i ai.
5. Ua faamatalaina faapefea le “fuā,” ma ua faapefea ona faaaogāina i se uiga lelei i le Tusi Paia?
5 O le mea muamua ua taʻua e Paulo e lē uiga i ai le alofa o le “e le losilosi [“fuā,” NW].” E manaomia sina faamalamalamaga i lea itu auā e iai vala lelei ma vala lē lelei o le fuā. Ua faamatalaina e se lomifefiloi le “fuā” e faapea o “le lē taliaina o le fia faatavā mai o se tasi” ma le “matuā tuutoina atu aʻiaʻi.” O le ala lea na taʻua ai e Mose i le Esoto 34:14 e faapea: “Auā e te le ifo i se tasi atua; auā o Ieova, o le Fuā, o lona lea suafa, o le Atua fuā lava o ia.” I le Esoto 20:5, ua fetalai ai Ieova e faapea: “O aʻu o Ieova lou Atua, o le Atua fuā.” O le uiga lava foi lena na tusia ai e le aposetolo o Paulo e faapea: “Ua ou fuā ia te outou i le fuā e tatau i le Atua.”—2 Korinito 11:2, NW.
6. O ā faaaoaoga faale-Tusi Paia e faaalia ai le pogai o le lē fuā o le alofa?
6 Ae i se tulaga lautele, e iai se uiga leaga o le “fuā” auā o le mafuaaga lena ua lisiina mai ai i galuega a le tino i le Kalatia 5:20. Ioe, o le ituaiga fuā lena e manatu faapito ma mafua mai ai le inoino, ma o le inoino o le tuufaafeagai lea o le alofa. O le fuā na pogai ai ona inoino Kaino ia Apelu seia oo ai i lona fasiotia o ia, ma na pogai ai foi ona inoino ʻafa uso o Iosefa ia te ia ma oo ina latou mananao e fasiotia o ia. O le alofa e lē matauʻa ai ona o mea faitino ua maua e isi po o ni tulaga lelei ua latou maua, e pei ona matauʻa le Tupu o Aapo ona o le tovine o Napota.—1 Tupu 21:1-19.
7. (a) O le ā le mea na tupu e iloa ai e lē fiafia Ieova i le mitamita vale? (e) Aisea e lē mitamita vale ai ma le lē mafaufau le alofa?
7 Ona sosoo lea ma le faapea mai o Paulo ia i tatou o le alofa “e le mitamita vale.” O le mitamita vale e faaalia mai ai le lē lava o le alofa, auā e faapogaia ai ona faasilisilia e se tasi o ia na i lo o isi. E lē fiafia Ieova i tagata e mitamita vale, e pei ona faamaonia i le auala na ia faamaualaloina ai le Tupu o Nepukanesa ina ua mitamita vale. (Tanielu 4:30-35) E masani lava ona tupu le mitamita vale e aunoa ma ni mafaufauga lelei ona ua soona fiafia naua se tasi i ni mea ua ia ausia po o ni ana mea ua maua. O nisi atonu o le a fia mitai mai ni o latou tulaga manuia o loo iai i le faiva faa-Kerisiano. O isi ua pei o le toeaina lea na telefoni solo i ana uo e taʻu i ai lona faatauina o se taavale fou e tusa ma le $50,000 tālā Amerika le tau. O na mea uma e lē o se alofa auā ua faaalia atu ai e le tagata mitamita vale e sili o ia na i lo o ē o loo faalogologo mai ia te ia.
8. (a) O le ā le silafaga a Ieova ia i latou o ē faafefeteina? (e) Aisea e lē amio ai faapena le alofa?
8 Ona taʻu mai foi lea ia i tatou e faapea o le alofa “e le faafefeteina.” O le tagata e faafefeteina, pe faamaualuga, ua ia faasilisilia ma le lē alofa o ia na i lo o isi. Ua matuā lē atamai lava lena uiga, auā “e tetee atu le Atua i e faamaualuga, a e foai mai le alofa tunoa i e faamaulalo.” (Iakopo 4:6) Ua matuā tuufaafeagai lava ma le tulaga e gaoioi ai le alofa; e manatunatu e sili atu isi. Na tusia e Paulo i le Filipi 2:2, 3 e faapea: “Ina faaatoatoa mai ia e outou loʻu olioli, ina ia gatasitasi o outou manatu, ia ia te outou le alofa faatasi, ma le loto gatasitasi, ma le manatunatu i le mea e tasi. Aua neʻi faia se mea e tasi ma le finau vale, ma le mitamita fua; a ia taitasi outou ma manatu ma le loto maulalo, ua sili nisi uma ia te ia.” O lena uiga o le a oo ai i isi ni faalogona lelei, ae o le tagata faamaualuga o le a faaleagaina ai faalogona o isi ona o lona finau vale.
9. Aisea e lē amio matagā ai le alofa?
9 Ua faapea atili mai Paulo o le alofa “e le amio matagā.” Ua faamatalaina e le lomifefiloi le “matagā” e faapea o “uiga po o amioga e matuā leaga e lē lelei pe faatiga ai.” O se tasi e amio matagā (e lē alofa) e lē faaaloalo i faalogona o isi. E tele faaliliuga o le Tusi Paia ua faaliliuina ai le upu Eleni faapea o le “lē mafaufau.” O lena tagata e manatu māmā i mea e tatau ma e lelei. E mautinoa lava, o le manatunatu alofa i isi o lona uiga o le alofiaina lea o mea uma e lē mafaufau pe matagā, o mea e faatiga pe matuā matuia foi.
Isi Mea e Lē Uiga i ai le Alofa
10. I le ā le itu e lē sailia ai e le alofa ona lava faanaunauga?
10 Na sosoo ai ma le taʻu mai ia i tatou e faapea o le alofa “e le sailia e ia ana lava mea,” pe afai e iai se eseesega i o tatou fiafiaga totino ma fiafiaga totino o isi. Ua faapea mai se isi faaupuga a le aposetolo: “E leai lava se tasi e ita i lona lava tino; a e peitai na te fafaga ma tausi atu i ai.” (Efeso 5:29) E ui i lea, pe afai e lē ogatusa o tatou manaoga ma manaoga o le isi tagata, ma e leai se mataupu silisili o le Tusi Paia o loo aafia ai, ua ao la ona tatou faia e pei ona sa faia e Aperaamo ia Lota, o le tuu atu lea ma le alofa o le filifiliga i le isi tagata.—Kenese 13:8-11.
11. O le ā le uiga o le lē itaitagofie o le alofa?
11 O le alofa foi e lē vave ona ita. O le mea lena ua taʻu mai e Paulo ia i tatou e faapea o le alofa “e le faaitaitagofie.” E lē maaleale. E pulea totino. Ae maise lava, e ao i ulugalii faaipoipo ona manatunatu mamafa i lenei timaiga e ala i le faaeteete ia lē soona leoleoā ma le lē onosai, po o le soona eē o le tasi i le isi. E iai tulaga e faigofie ai lava ona oo mai le ita, ma o le mafuaaga lena na lagona ai e Paulo le manaomia ona fautua atu ia Timoteo e faapea: “E le tatau ona finau o le auauna a le Alii, a ia agamalu i tagata uma, ia mafaia ona aʻoaʻo atu, ma ia onosai”—ioe, ia lē itaitagofie—“ia aʻoaʻo atu ma le agamalu i e o finau mai.”—2 Timoteo 2:24, 25.
12. (a) I le ā le itu e lē manatua ai pea e le alofa se mea leaga? (e) Aisea ua lē atamai ai le manatua pea o se mea leaga?
12 I le faaauau pea i mea e lē uiga i ai le alofa, ua fautua mai Paulo: “O le alofa . . . e lē manatua pea se mea leaga.” (NW) E lē o le uiga o lena mea faapea e lē matauina e le alofa le mea leaga. Na faaalia e Iesu le auala e tatau ona tatou taulimaina ai faafitauli pe a tatou aafia tele ai. (Mataio 18:15-17) Ae o le alofa e lē mafai ai ona tatou ita faaumiumi, e lē ita faamoemoe. O le lē manatua pea o se mea leaga o lona uiga ia faamagalo ma faagalo se mea i le taimi lava e uma ai ona taulimaina i se auala faale-Tusi Paia. Ioe, aua le faapuapuagatiaina oe po o le faatigaina o oe i lou mafaufau pea lava pea i se mea sese, ma manatua ai pea se mea leaga!
13. O le ā le uiga o le lē fiafia i le amioletonu, ma aisea e lē faia ai e le alofa lena mea?
13 E lē gata i lea, ua taʻu mai foi ia i tatou faapea o le alofa “e le fiafia i le amio leaga [“amioletonu,” NW].” E fiafia le lalolagi i le amioletonu, e pei ona matauina i tusi ua lauiloa i faiga sauā ma ata o faiga lē mamā, o ata tifaga, ma polokalama o TV. O na fiafiaga uma e manatu faapito, e leai se manatu i tulaga amiotonu a le Atua po o le lelei o isi. O na fiafiaga uma manatu faapito o loo lūlū i la le tino, ma i le taimi atofaina o le a selesele mai ai le malaia i la le tino.—Kalatia 6:8.
14. Aisea e mafai ai ona fai atu ma le mautinoa faapea e lē uma le alofa?
14 O le mea mulimuli la e lē faia e le alofa: “E le uma le alofa.” O se tasi o mafuaaga, e lē uma pe iu ai le alofa, auā o le Atua o le alofa lava ia, ma o ia foi o “le Tupu o le vavau.” (1 Timoteo 1:17) I le Roma 8:38, 39, ua faamautinoa mai ai ia i tatou e faapea o le a lē taitai uma le alofa o Ieova mo i tatou: “Ua ou mautinoa, e le mafaia e le oti, po o le ola, po o agelu, po o alii, po o e malolosi, po o mea i nei ona po, po o mea atali, po o le maualuga, po o le loloto, po o se tasi mea na faia, e le mafaia e ia mea ona faateaeseina mai i tatou i le alofa o le Atua, o loo ia Keriso Iesu lo tatou Alii.” E lē uma foi le alofa i le uiga faapea o le a lē taitai ona lē lava. E mafaia e le alofa ona faia so o se mea ma faafetaiaia so o se lui.
Mea e Uiga i ai le Alofa
15. Aisea ua taʻua faamuamua ai e Paulo le onosai i isi vala lelei uma o le alofa?
15 I le oo mai i le itu lelei, o mea e uiga i ai le alofa, ua amata mai faapea Paulo: “E faapalepale le alofa.” (NW) Ua faamaonia faapea e lē mafai ona iai se auuso faa-Kerisiano, pe a aunoa ma le onosai, o lona uiga, pe a aunoa ma le onosaia e le tasi o le isi. O le tulaga lena, talu ai o i tatou uma lava e lē lelei atoatoa, ma o o tatou vaivaiga ma masei e avea o ni tofotofoga i isi. E letioa ona muai taʻua lava e le aposetolo o Paulo lenei vala i mea e uiga i ai le alofa!
16. I ā auala e mafai ai e sui o le aiga ona fefaaaliai le agalelei?
16 Ua taʻua e Paulo faapea o le alofa foi e “agalelei.” (NW) O lona uiga, o le alofa e loto fesoasoani, e agaalofa, e magafagafa i isi. Ua faaalia mai le agalelei i mea tetele ma mea laiti. E mautinoa lava sa faaalia e le Samaria loto alofa le agalelei i le tamaloa na fasi ma faataatia i le auala e tagata faomea. (Luka 10:30-37) E fiafia le alofa e faapea atu “faamolemole.” O le faapea atu, “Aumai le falaoa” o se faatonuga. Ae a tamua atu lena faatonuga i se “faamolemole” ona avea ai lea o se faatalosaga. E agalelei tane i a latou avā pe a latou utagia le fautuaga o loo i le 1 Peteru 3:7 e faapea: “Ia faapea outou tane, ia nonofo faatasi ma i latou ma le poto, ia ava i le avā, auā o le ipu ia ua sili ona vaivai ia te oe, mona ua tofia faatasi i le ola e foaifuaina mai, neʻi faalavelaveina a outou tatalo.” E agalelei avā i a latou tane pe a latou faaalia i ai le “faaaloalo loloto.” (Efeso 5:33, NW) E agalelei tamā i a latou fanau pe a latou faatatauina le fautuaga o loo i le Efeso 6:4: “O outou tamā foi, aua neʻi tou faaonoono atu i a outou fanau, a ia tausi atu i ai i aoaiga ma apoapoaiga a le Alii.”
17. O ā auala e lua e mafai ona fiafia ai le alofa i le faamaoni?
17 E lē fiafia le alofa i le amioletonu ae “fiafia i le faamaoni.” E fuifuilua le alofa ma le faamaoni—o le Atua o le alofa lava ia, ma i le taimi e tasi, o ia foi o “le Atua faamaoni.” (Salamo 31:5) E fiafia le alofa pe a vaai atu o manumalo le faamaoni ma faaalialia ai mea sese; o se tasi lenei o mafuaaga mo faatelega sili i le aofai o tagata tapuai o Ieova i aso nei. Peitai, talu ai e feteenai le faamaoni ma le amioletonu, e ono faapea ai foi le manatu, e fiafia le alofa i le amiotonu. E fiafia le alofa pe a manumalo le amiotonu, e pei ona poloaiina ai tagata tapuai o Ieova e fai pe a faatoilaloina Papelonia Tele.—Faaaliga 18:20.
18. O le ā le uiga o le ufiufi e le alofa o mea uma?
18 Ua taʻu mai foi e Paulo ia i tatou e faapea, o le alofa “e ufiufi i mea uma.” E pei ona faaalia e le Kingdom Interlinear, o le uiga o le manatu e faapea, e ufitia e le alofa mea uma. Na te lē “fatu fua ni tala” o se uso, e pei ona faia e le tagata amioleaga. (Salamo 50:20; Faataoto 10:12; 17:9) Ioe, e tutusa le manatu i inei ma lea o loo i le 1 Peteru 4:8: “O le alofa e ufiufi ai agasala e tele.” O le mea moni, o le faamaoni o le a lē ufiufia ai e se tasi ni agasala matuia ia Ieova ma le faapotopotoga Kerisiano.
19. I le ā le auala ua talitonu ai le alofa i mea uma?
19 O le alofa “e talitonu i mea uma.” E iai i le alofa le uiga mautinoa, ae lē masalosalo. E lē o le uiga o lenei mea faapea e faaseegofie le alofa. E lē vave ona talitonu i ni faamatalaga taufaaosooso. Ae o lē ua faatuatua i le Atua, o ia lena ua tatau ona iai le naunau e talitonu. E lē masalosalovale la le alofa, e lē soona faitio. E lē tetee foi e talitonu atu e pei ona faia e se tagata faapaupau, o lē ua faauamaaa i le faapea mai e leai se Atua, e lē pei foi o se tasi e faapea mai e lē mafai ona tatou iloa le Atua, o lē e faauamaaa ma tetee mai faapea e matuā lē mafai ona iloa le mea na tatou ō mai ai, le pogai o lo tatou iai i inei, ma tulaga o le a iai le lumanai. Ua aumaia e le Afioga a le Atua ia i tatou faamaoniga o nei mea uma. E nofo sauni foi le alofa e talitonu auā e iai le lagona o le faatuatua atu, ae lē masalosalovale.
20. Ua faapefea ona fesootai atu le alofa i le faamoemoe?
20 Ua faamautinoa atili mai i tatou e le aposetolo o Paulo e faapea o le alofa “e faamoemoe i mea uma.” Talu ai e iai i le alofa uiga mautinoa, ae lē masalosalo, e iai foi la lona faamoemoe malosi i mea uma ua folafola mai i le Afioga a le Atua. Ua taʻu mai ia i tatou e faapea: “E tatau i le na te suatia le eleele, ia suatia ma le faamoemoe, o lē solisolia foi saito, ia solisolia ma le faamoemoe, ina ia maua le mea ua faamoemoe i ai.” (1 Korinito 9:10) E ui lava e maufaatuatuaina le alofa, ae e faamoemoe atu foi, e faamoemoe lava mo le mea e sili ona lelei.
21. O le ā le faamautinoaga faale-Tusi Paia e iloa ai e onosai le alofa?
21 I le faaiuga, ua faamautinoa mai ia i tatou e faapea o le alofa “e onosai i mea uma.” Ua mafai ona ia faia faapea ona o upu a le aposetolo o Paulo ia i tatou i le 1 Korinito 10:13 e faapea: “Ua le maua outou e se tofotofoga e ese i lo tagata; a ua faamaoni le Atua, o le na te le tuuina atu outou i le tofotofoga e sili i se mea ua outou lavatia, a e sauni foi faatasi ma le tofotofoga se mea e sao ai, ina ia outou lavā oono.” O le alofa o le a faapogaia ai ona tatou faaaoao i le tele o faaaoaoga o loo i le Tusi Paia e faatatau i auauna a le Atua o ē na onosai, ma o le faaaoaoga autū o Iesu Keriso, e pei ona faamanatu mai ia i tatou i le Eperu 12:2, 3.
22. Ona o i tatou o ni fanau a le Atua, o le ā le uiga silisili e ao pea ona tatou manatu mamafa ina ia faaalia atu?
22 O le mea moni, o le alofa (a·gaʹpe) o le uiga silisili lea e manaomia e i tatou o Kerisiano, o Molimau a Ieova ona atiina aʻe, e lē gata i mea e lē uiga i ai, ae i mea foi e uiga i ai. Ona o i tatou o ni fanau a le Atua, seʻi tatou manatu mamafa pea i le faaaliaina atu o lenei fua o le agaga o le Atua. O le faia faapea o le a tatou maua ai uiga o le Atua, auā ia manatua, “o le Atua, o le alofa lava ia.”
Pe E te Manatua?
□ Ua faaalia faapefea e Iesu Keriso ma Paulo le silisili o le alofa?
□ O le ā le uiga e lē fuā ai le alofa?
□ Ua faapefea ona ‘ufiufi le alofa i mea uma’?
□ Aisea e mafai ai ona faapea atu e lē uma le alofa?
□ I ā auala e lua e fiafia ai le alofa i le faamaoni?
[Fesili mo le Suʻesuʻega]
[Pusa i le itulau 21]
ALOFA (AGAPE)
Mea e Lē Uiga i Ai Mea e Uiga i Ai
1. E le fuā 1. E faapalepale
2. E lē mitamita vale 2. E agalelei
3. E lē faafefeteina 3. E fiafia i le faamaoni
4. E lē amio matagā 4. E ufiufi i mea uma
5. E lē saili mo ana lava mea 5. E talitonu i mea uma
6. E lē faaitaitagofie 6. E faamoemoe i mea uma
7. E lē manatua pea mea leaga 7. E onosai i mea uma
8. E lē fiafia i le amioletonu
9. E lē uma
[Ata i le itulau 18]
Na faamaualaloina e Ieova Nepukanesa ona o le mitamita vale