Fesili Mai le Au Faitau

Po o le uiga o le faaupuga “ua i ai le Agaga,” i le 1 Korinito 14:37, e faapea ua maua e le tagata le agaga paia i le uiga faapea ua faauuina, pe uiga faapea ua ia te ia se meaalofa faavavega mai le agaga?

I le New World Translation of the Holy Scriptures, ua faitauina faapenei le fuaiupu: “Ai se tasi ua manatu ifo o ia o se perofeta po ua foaiina i ai le agaga, ia iloa lelei e ia mea o loo oʻu tusi atu ai nei ia te outou, talu ai o poloaiga ia a le Alii.”—1 Korinito 14:37.

Atonu e manatu se tagata e faitau i lenei faaupuga “ua foaiina i ai le agaga” e faapea o se faamaoniga lea o le mea moni faapea o Kerisiano i le uluai senituri sa fanauina i le agaga ma avea ai o ni atalii faaleagaga o le Atua. Pe atonu ua ia malamalama e ono faatatau le faaupuga i se tasi ua iai se meaalofa faapitoa mai le agaga paia. O le uiga mulimuli lenei e foliga mai e faatatau i ai, e pei ona faaalia mai i lona faamatalaga ia i tatou.

Sa faaaogā i inei e le aposetolo o Paulo le upu Eleni pneu·ma·ti·kosʹ, o lona uiga autū o le “fitoi tonu i le agaga, faaleagaga.” O vaega o lena upu ua faaaogāina i faamatalaga e pei o le “tino faaleagaga,” “faamanuiaga faaleagaga,” “mafaufau faaleagaga,” ma le “fale faaleagaga.”—1 Korinito 15:44; Efeso 1:3; Kolose 1:9; 1 Peteru 2:5.

I na tulaga, ua faafesootai ai e le Tusi Paia le mataupu i le (tino, faamanuiaga, mafaufau, fale,) e faapea e “faaleagaga.” Ae i nisi tulaga, o le uiga ma le faaaogāina saʻo o le “faaleagaga” e tatau ona faamautinoaina i le mataupu atoa. Mo se faataitaiga, i le 1 Korinito 2:14, 15 o loo faatusatusa ai le uiga o le tagata faaletino ma le ho pneu·ma·ti·kosʹ, lea e faauiga faapea o le “tagata faaleagaga.”

O loo faaautu le 1 Korinito mataupu e 12 e oo i le 14 i meaalofa faavavega a le agaga paia. Sa tuuina e le Atua nei meaalofa i nisi o uluai Kerisiano e faaalia ai lona lē toe faaaogāina o Isaraelu faaletino, ae ua ia faamanuiaina Kerisiano, le “Isaraelu a le Atua.” (Kalatia 6:16) Na tusia e Paulo se faamatalaga e uiga i nei meaalofa e faapea: “E matalasi mea alofa, a e tasi lava le Agaga ia.” (1 Korinito 12:4) I na meaalofa o le agaga, sa iai le atamai faapitoa, le malamalama, ma le faatuatua e pei ona iai perofetaga, tautatala i gagana eseese, ma le faamatalaina o gagana eseese.—1 Korinito 12:8-11.

O Kerisiano i Korinito sa tusi atu i ai Paulo sa faauuina i le agaga paia o le Atua. Na faapea atu Paulo: “A ua taeele outou, a ua faapaiaina outou, a ua taʻuamiotonuina outou i le suafa o le Alii o Iesu, i le Agaga foi o lo tatou Atua.” (1 Korinito 6:11; 12:13) Ioe, na mauaina e i latou uma ia le mea “na foai mai le faamaoni o le Agaga.” (2 Korinito 5:5) Ae peitai, e leʻi mauaina uma e i latou se meaalofa faapitoa e ala mai i le agaga paia. Ma e foliga mai o le toatele sa maofa i le tautatala i gagana eseese, ma latou soona faatauaina ai lea meaalofa. Sa tusi atu Paulo ia i latou ina ia faasaʻoina o latou manatu ma faasino atu i ai faapea o le tautatala i gagana eseese, e lē mauaina ai e le toatele ni aogā e pei o le meaalofa o perofetaga. I le faaiuga o le mataupu e 12, na fautua atu ai Paulo i tagata Korinito e faapea: “Ia outou naunau i mea alofa e sili.”—1 Korinito 12:28-31.

Mulimuli ane, i le amataga o le mataupu e 14, sa ia timai atu: “Ia outou tausisi i le alofa; ia naunau [ta pneu·ma·ti·kaʹ], ae sili lea ina ia outou perofeta ane.” Naunau foi i le ā? Sa leʻi naunau na Kerisiano i se faauuga e ala i le agaga, auā ua uma ona faia faapea ia i latou. Ma le talafeagai la, sa faauiga e Paulo i “meaalofa” a le agaga lea na ia timai atu ai ia i latou i le faaiuga o le mataupu e 12 ina ia latou sailia. O lea, i le faaliliuga a le New World Translation of the Holy Scriptures ua tusia ai faapea le 1 Korinito 14:1: “Ia outou saili ma le maelega i meaalofa faaleagaga.” Ua faaupuina e isi faaliliuga o le Tusi Paia le ta pneu·ma·ti·kaʹ o “meaalofa faaleagaga” po o “meaalofa a le Agaga.”

Ma i lena faamatalaga, ua tatou matauina ai le taʻua e Paulo i le faaiuga o le mataupu e 14, le fesootai atu o le perofetaga i le pneu·ma·ti·kosʹ. E pei ona iai i le fuaiupu 1, ua faaalia i le aotelega, sa ia faauigaina i le maua o se meaalofa mai i le agaga. Ua faapea mai le New Testament in Modern Speech, a Richard F. Weymouth: “Afai e manatu se tagata o ia o se perofeta po o se tagata ua iai ni meaalofa faaleagaga, ia iloa lelei e ia o mea ua ou tusia o faatonuga ia a le Alii.”

Ioe, o Kerisiano uma o iai le meaalofa o le perofetaga po o se isi lava mealofa mai le agaga, e manaomia ona talia ma mulimuli i le fautuaga na tusia e Paulo e faatatau i le auala e faia ai mea i le faapotopotoga.