Le Faafitauli o le Aʻoaʻoina ina ia Faatali

O LE aʻoaʻoina ina ia faatali mo ni mea tatou te mananao ai, atonu o se tasi lea o lesona e sili atu ona faigata e manaomia ona tatou taliaina. I le tulaga faalenatura, o fanau laiti, e lē mafai ona onosai. E vaai atu loa i se mea e fiafia i ai, manao loa lava i ai i le taimi lava lena! Ae e pei ona e silafiaina mai mea ua tutupu, o se mea moni faaleolaga nei, e lē o mea uma tatou te mananao i ai o le a mafai ona mauaina mai. E oo lava i le tulaga o faanaunauga saʻo, e tatau lava ona tatou aʻoaʻoina ina ia faatali mo se taimi talafeagai e faamalieina ai na faanaunauga. Ua mafai ona aʻoaʻoina e le toatele lenei lesona, peitai o isi ua lē mafai ona latou faia faapea.

O tagata e mananao e mauaina le faamaoniga mai le Atua, e iai mafuaaga faapitoa mo le aʻoaʻoina ina ia faatali. Na faailoa mai e Ieremia, o se auauna a Ieova a o lumanai le faa-Kerisiano lenei mea e faapea: “E lelei ona faamoemoe ma le faalologo i le olataga mai ia Ieova.” Mulimuli ane, na faapea mai le soʻo Kerisiano o Iakopo: “O lenei, le au uso e, onosai ia seia oo i le afio mai o le Alii.”—Auega 3:26; Iakopo 5:7.

Ua iai lava le taimi faatulagaina a Ieova mo le faataunuuina o ana fuafuaga. Afai e lē mafai ona tatou faatali seʻi oo i lana taimi atofaina mo le faia o nisi mea, o le a tatou lē maua la le fiafia ma le loto malie, ma o le a aveesea ai le olioli. O le a vaivai faaleagaga se auauna a le Atua pe a leai se olioli, e pei lava ona taʻu atu e Neemia i ona tagata e faapea: “O le olioli i le ALII o lou malosi lea.”—Neemia 8:10, The New English Bible.

Le Atamai o le Aʻoaʻoina ina ia Faatali

O se faanaunauga masani mo tagata nofofua le mananao e faaipoipo, po o ulugalii foi e mananao ina ia faia ni fanau. E lē gata i lea, e lē sese foi le faanaunau ina ia faamalieina i meafaitino tatau po o manaoga. E ui i lea, talu ai ona ua tatou iloa e lē o toe umi ae faaiuina lenei faiga o mea, ma i le faiga fou o mea a le Atua o loo fotuai mai, o le a ‘faamafola ai lona aao ma faamalie manaoga o meafaiola uma,’ ua filifili ai le toatele o Kerisiano e faatali ina ia faataunuuina nisi o nei faanaunauga i le taimi ua sili atu ona talafeagai.—Salamo 145:16.

E ui i lea, o tagata e aunoa ma lenei faamoemoe faa-Kerisiano ua faavae mausali, e lē tāua ia i latou le faatuai mai. O le leai o se faatuatua ia Ieova, o lē o loo “foaifuaina mai ai mealofa uma e atoatoa ona lelei,” ua latou fesiligia ai le atamai o le tolopoina o mea i le lumanai ia latou te lē o mautinoa pe oo mai. Ua latou ola faalagolago i le manatu faapea: “Ina tatou aai ma inu, auā o a taeao tatou te oti ai.”—Iakopo 1:17; 1 Korinito 15:32; Isaia 22:13.

I atunuu tau atiae, ua faaaogāina ai ma le poto e faiga faapisinisi faasalalauga faatosina ona o le fia mauaina vave o ni mea. Ua faamalosia tagata ina ia ola e pei o tagata mau oloa. Ua taumafai fefaatauaiga e faatalitonuina i tatou e faapea, o oloa faaonaponei mo se olaga faafifilemu  ma le manuia, o ni mea e tatau lava ona maua. Ua latou finau mai faapea, e iai ea se mafuaaga o le lē mauaina o nei mea, ae maise lava pe afai o iai ni pepa e faataga ai le faia o aitalafu, le totogi auauai atu o se vaegā tupe, ma faiga “ia faatau muamua—ae totogi mulimuli,” ina ia mafai ai ona e mauaina nei mea uma ma ave i le taimi nei? E lē gata i lea, ‘O mea e aupito sili ona lelei o mea na e tatau mo oe; ia e faafifilemu oe lava! Ia manatua, afai e te lē mauaina nei ma olioli ai, e te lē toe mauaina lava!’ O ni faasalalauga taatele na ua masani ai.

Peitai ane, e faitau sefulu miliona tagata i atunuu tau atiae e lē o lava mea mo le tausiga, po o le tau leai foi. Po o iai ea se isi faamautinoaga e faailoaina mai ai le lē lelei atoatoa ma le lē faamasinotonu o faiga faapolotiki ma faiga tau tamaoaiga?

O le atamai o le aʻoaʻoina ina ia faatali ua vaaia lea i le faitau miliona o tagata ua leai se loto malie e faatali—po o le leai foi o se mafuaaga e faia ai faapea—ua puapuagatia i le tele o aitalafu ona o le faamalieina o tuinanauga. O tulaga eseese e lē mailoa e pei o maʻi po o le leai o ni galuega, atonu o se mala. Na faamatala mai e se nusipepa Siamani e taʻua o le Frankfurter Allgemeine Zeitung le mafuaaga na lipotia mai ai se faitau miliona o tagata i Siamani ua leai ni fale e faapea: “E masani lava, o le mafuaaga o le leai o ni fale e nonofo ai ona ua lē toe faigaluega, po o le tetele foi o aitalafu.”

Ona o le lē mafai ona totogi o a latou pili, ua puapuagatia ai nei tagata i le faanoanoa ona ua leai ni o latou fale ma ni mea totino. Ona o na tulaga, ua faaopoopo atu ai omiga faigata i le aiga. O faaipoipoga e lē o mausali ua amata ona malepelepe. O taimi o faanoanoaga ma isi faafitauli tau le soifua maloloina ua avea ma faafitauli i aso fai soo. I le tulaga o Kerisiano, atonu o le a faaletonu ai le itu faaleagaga, ma iu ai i ni mafaufauga sese po o le faia o amioga lē tatau. O tagata na amata lava i le manaonao ma le lē atamai ina ia maua mea uma, ua iu ina toetoe lava a leai se mea.

Se Luʻi Fou mo le Toatele

Na faamanino mai e Iesu e faapea, e ao ona tatou faaeteete i le “popole i mea a lenei lalolagi, ma le pepelo o le oa, ma le tuʻinanau i nisi mea, ua oo atu i totonu o le loto, ua fetinaiina ai le upu.” (Mareko 4:19) E ao ona teu i o tatou mafaufau faapea, e leai lava se faiga faapolotiki ua mafai ona aveeseina ma le manuia popolega, e aofia ai le popole i le tamaoaiga, e pei o lea na fetalai i ai Iesu.

O le faiga faa-Komunisi lea ua teena nei e atunuu o Europa i Sasae sa taumafai e faapaleniina mea e ala i le puleaina e le Setete o le tamaoaiga. I le faaeseesega ma le saolotoga e faia ai pisinisi, o le faiga faa-Komunisi sa iai muamua, sa latou tuuina atu i tagata taitoatasi o na atunuu se puipuiga tau tamaoaiga lea ua masani ona lē taulau i faiga tau tamaoaiga ona faia. Ae o popolega ia na fetalai i ai Iesu e ala mai lea i le lē lava o mea e faamalieina ai manaoga o tagata, atoa ma le faaitiitia o le saolotoga totino mo le tagata lava ia.

I le taimi nei, o le tele o na atunuu ua latou faaulufaleina mai ni maketi tau tamaoaiga, ma ua tuuina atu ai i o latou tagatanuu se luʻi fou. I se lipoti talu ai nei na faapea mai: “O le fia faamasani ua fuifuilua ma le tuinanau i le fia vave ausia o tulaga o loo faaaogāina i itu i sisifo.” Ina ia ausia lenei mea, “ua faatuputeleina ai tagata i le vaega fou faatoʻā faatuina o le malo o Siamani e taʻua o Länder ua faasolo atu i le tele o aitalafu.” Ua faaopoopo mai le lipoti e faapea: “Ina ua mavae sina faalogona manuia na maua mai i le saolotoga fou tau tamaoaiga, ua salalau atu nei le lagona o le fefe ma le atuatuvale.” O loo tumau pea popolega, ae o lea ua suia nei le faiga faa-Komunisi i le faiga tau fefaatauaiga.

Ua tatalaina nei e saolotoga tetele faapolotiki ma faiga tau tamaoaiga ni avanoa fou mo le faaleleia atili o le tamaoaiga. O le mea lea, o le toatele o tagata taitoatasi atonu ua tofotofoina ina ia manatu mamafa e amataina ni a latou lava pisinisi po o le siitia atu foi i se isi atunuu o loo maua ai avanoa e sili atu ona lelei mo galuega.

O filifiliga faapena, o ni mataupu totino a le tagata lava ia. E lē sese mo se Kerisiano le manao e faaleleia ona tulaga tau tamaoaiga.  Atonu e uunaia o ia e se faanaunauga ina ia tausia lona aiga, ona ua ia iloa lelei faapea “afai e le tausi e se tasi i lona aiga, afai foi e le sili ona tausi i e mau ma ia, ua faafitia e ia le faatuatua, e sili foi lona leaga i le ua le faalogo.”—1 Timoteo 5:8.

O le mea lea, e lē o se mea talafeagai le faitioina o le faaiuga ua faia e isi. I le taimi lava e tasi, e ao i Kerisiano ona manatua, ua lē atamai ona sailia se saolotoga tau tamaoaiga e ala i le faia o ni aitalafu tetele atonu e maileia ai i latou. E faapena foi ona sese le sailia o se mapusaga tau tamaoaiga i se auala o le a aafia ai le lafoaia o avega tauave ma manaoga faaleagaga.

Aʻoaʻoina Mai Isi

I tausaga na sosoo ai ina ua uma le Taua Lona Lua a le Lalolagi, e faitau afe tagata Siamani na malaga ese mai Europa sa fevaevaeai i faigā taua ae ō atu i isi atunuu, ae maise lava Ausetalia ma Kanata. O le toatele sa mafai ona faaleleia lo latou tulaga tau tamaoaiga, ae e leai lava se isi o i latou na mafai ona sola ese atoatoa mai popolega ia na fetalai i ai Iesu. I nisi taimi, o le foiaina o faafitali tau tamaoaiga, e tutupu aʻe ai nisi faafitauli fou—le maʻi manatu i le aiga, o se gagana ese, o le tau faamasani i meaai fou, le eseese o aganuu, le taumafai e faamasani i uo fou, po o le feagai ai foi ma uiga eseese.

O nisi o nei tagata na faimalaga atu o ni Molimau a Ieova. I se tulaga lelei, o le toatele o i latou sa lē faatagaina faafitauli e ese mai i femalagaaiga e aveesea ai lo latou tulaga faaleagaga. Ae peitai, sa iai ni mea na tutupu. Sa iai nisi na pauu ona o le malosi taufaaʻoleʻole o le oa. Na lē taulau ona latou agaigai i luma faatiokarate ona o lo latou faamuamuaina o le lelei tau tamaoaiga.

O le mea moni, ua faataitaia ai e lenei mea le atamai o le iloiloina ma le faaeteete o o tatou tulaga a o leʻi faia se faaiuga lē atamai. O le a faavaivaia i tatou e le manao tele i meafaitino mai le faia o se vaega i le galuega e lē toe faia lava, o le faia o soʻo lea ua tofiaina Kerisiano uma e fai. Ua moni lenei mea e tusa lava po o fea tatou te nonofo ai, talu ai ona ua leai lava se atunuu o toe saoloto ona tagatanuu mai popolega tau tamaoaiga.

Tau le Taua Lelei

Na apoapoai atu Paulo ia Timoteo e faapea: “Ia e tausisi atu i le amiotonu, ma le amio Atua, ma le faatuatua, ma le alofa, ma le onosai, ma le agamalu. Ia e tau le taua lelei i la le faatuatua, tago atu ia i le ola e faavavau na valaauina ai foi oe.” Na ia fai atu foi i Kerisiano i Korinito: “Ia  outou tumau, ma le le faagaeetia, ia alualu lo outou faamalosi i le galuega a le Alii.”—1 Timoteo 6:11, 12; 1 Korinito 15:58.

O le mulimuli i lenei fautuaga atamai, o le auala sili lea e faafetaiaia ai ma le manuia le manao tele i meafaitino, ma e mautinoa o loo tele pea galuega e tatau ona faia e se Kerisiano! I nisi atunuu e lē o toatele ai ni tagata talaʻi o le Malo, o le toatele o tagata e laitiiti lava avanoa latou te fesootai ai ma le upu moni. Na valoia mai ma le saʻo e Iesu e faapea: “E tele le saito e seleseleina, a o le au fai galuega e toaitiiti ia.”—Mataio 9:37.

Na i lo o le faatagaina o le popole i le tulaga tau tamaoaiga i nei atunuu e taofia ai i latou mai le galuega faaleagaga o loo faia nei, ua faaaogāina tatau e Molimau a Ieova avanoa uma latou te maua. O le toatele o i latou pe a lē toe faigaluega mo se vaitaimi, ua faateleina lo latou sao i le galuega talaʻi. O la latou auaunaga, e lē gata ua faateleina ai le alagaina o le viiga o Ieova, ae ua avatu ai foi ia i latou le olioli o loo manaomia ina ia faafetaiaia ai o latou lava faafitauli tau tamaoaiga.

Ua faamuamua e nei Molimau le galuega talaʻi ae faatulaga lua o latou faafitauli tau tamaoaiga, lea e faailoa atu ai i le auuso i le lalolagi aoao faapea latou te faalagolago atoatoa ia Ieova na te tausia i latou. O Lana folafolaga e faapea: “A ia outou muai saili le malo o le Atua ma lana amiotonu; ona faaopoopoina atu lea o ia mea uma ia te outou.”—Mataio 6:33.

Talu mai le taimi na toe faafoisia ai le tapuaiga moni i le 1919, ua lē faatagaina ai e Ieova ona tagata ina ia toe faalotolotolua. Ua ia puipuia i latou mai le tele o sauaga matuitui, ma i nisi nofoaga sa ia puipuia ai i latou mai le faitau sefulu o tausaga o faasasaina le galuega. O loo tumau mausali pea Molimau a Ieova faapea, o le mea ua lē taulau ona faataunuuina e le Tiapolo e ala i sauaga, o le a lē mafai lava ona ia faataunuuina e ala i le mailei taufaaʻoleʻole o le manao tele i meafaitino!

Aʻoaʻoina ina ia Faatali i so o se Vala

O Maota tetele o le Malo, o mea faaleotele leo taugata, o Maota Fono, ma fale Peteli matagofie, o loo avatu ai le viiga i le Atua ma ofoina atu ai se molimau vaaia faapea, o loo ia faamanuiaina ona tagata. I lenei auala, ua manatu ai Molimau a Ieova o loo i atunuu ua leva ona faasasaina ai le galuega e faapea, o loo tele pea galuega e ao ona faia ina ia tutusa ai ma isi atunuu. Peitai, o le mea e sili ona tāua, o le faaauau pea lea o lo latou agaigai i luma faaleagaga. O fua aliali o faamanuiaga a le Atua i se auala faaletino, o le a oo mulimuli mai i le taimi atofaina.

E manaomia pea i auauna a Ieova ona faaeteete i le tulituliloaina o manaoga totino, ma ua amata ona latou lagona faapea ua lava le taimi sa latou onosai ai i le lē mauaina o nisi o mea faitino na latou moomia. Ua matuā manino ma malamalama le faanaunauga o le fia maua o se mapusaga mai faiga tau tamaoaiga ma faalapotopotoga lē autasi, peitai e lē o faagaloina e tagata o Ieova faapea o auauna uma lava a le Atua o loo faanaunau mo le mapusaga. O ē tauaso o loo faanaunau ina ia toe pupula, o maʻi tiga ua faigata ona maua se togafitiga o loo faanaunau mo le toe faafoisia o le soifua maloloina, o ē mafatia o loo faanaunau mo se lumanai pupula, ma ē faanoanoa ona o ē pele ua maliliu o loo faanaunau e toe faafeiloaia i latou.

Ona o tulaga eseese, ua faamalosia ai Kerisiano uma i so o se vala ina ia faatali mo le lalolagi fou a Ieova e foia ai ona faafitauli. E ao ai i lenei mea ona tatou fesili ifo ia i tatou lava, ‘Afai ua ou maua mea ou te ʻai ai ma ofu ai, pe lē tatau ea ona faamalieina ai aʻu i nei mea ma loto malie ai e faatali mo le saolotoga mai faafitauli tau le tamaoaiga?’—1 Timoteo 6:8.

O Kerisiano o loo faalagolago atoatoa ia Ieova e mafai ona mautinoa faapea, afai latou te loto malilie e faatali, o o latou faanaunauga ma manaoga tonu uma o le a lē pine ae faamalieina. O le a leai se tasi e faivavale lona faatalitali. E mafai ona tatou toe taʻua upu a Paulo e faapea: “Ia outou tumau ma le le faagaeetia, ia alualu lo outou faamalosi i le galuega a le Alii ma le le aunoa ina ua outou iloa e le o se mea faaleaoga lo outou tautiga i le Alii.”—1 Korinito 15:58.

O lea la, pe o se faafitauli moni ea le aʻoaʻoina ina ia faatali?

[Ata i le itulau 10]

O le aʻoaʻoina ina ia faatali e mafai ona laveaiina ai lou ola