Se Lalolagi e Aunoa ma ni Tagata Gāoi

SA VAVE tele ona tupu. Na tuu atu e se tagata e lavalava lelei se fana i le ulu o Antônio * i luma o lona fale i São Paulo, i Pasili, ma tapa atu i ki ma pepa faamaonia o lona umia o lana taavale, ma alu ese vave atu ai loa.

I Rio de Janeiro, na ave faamalosi ai e ni tagata faaauupegaina se toafā se tamaloa e igoa ia Paulo a o vaavaai atu lona afafine e sefulu tausaga le matua. Ona latou ō atu loa lea i lona fale, ma gaoia mea uma na latou mananao i ai, ma faatutumu ai taavale e lua a Paulo. Na faamatauina le avā a Paulo i le oti, na ave faapagota o ia faatasi ma se tagata faigaluega i le faleoloa o Paulo e faatau ai maataua o loo i le aai, ma gaoia ai mea tāua uma. Peitai, e ui ina e leʻi faatalitalia, ae na mulimuli ane telefoni atu tagata gāoi, ma taʻu atu le mea na latou tuua ai taavale.

Pagā se mea e mataʻu ai pe a gaoia tupe ma mea sa e galue mamafa ai! E ui lava sa leʻi taui ma sui atu Antônio po o Paulo, ae e iai nisi sa latou faia faapea e ala i le faia o a latou lava auala e taui atu ai. Atonu latou te fasi faamoamoa le tagata le gaoi, pe maliliu ai foi i latou lava. Mo se faaaoaoga, ina ua fao e se talavou le uati a se fafine Pasili, na seʻi aʻe ai ma le ita e le fafine se  tamai fana mai lana ato ma fana ai le gaoi, ma oti ai o ia. O le ā le iuga? Na lipotia mai e le nusipepa o le O Estado de S. Paulo e faapea: “Sa viiviia e tagata na vāai i le mea na tupu le uiga o lea fafine e leʻi iloa po o ai, ma e leai se tasi na manao e fesoasoani i leoleo e taʻu i ai o ia.” E ui lava o loo latou moomoo mo se lalolagi e aunoa ma ni tagata gāoi, ae e lē taui ma sui atu Kerisiano e pei ona faia e lena fafine. Ona o le taui ma sui e ā le Atua, ua latou utagia ai upu i le Faataoto 24:19, 20: “Aua e te faameo i e ua fai mea leaga; aua foi e te losilosi i e amio leaga. Auā e le iu i se lelei le ua amio leaga.”

Ae afai e osofaia oe, o le ā e mafai ona e faia? O se mea na tupu i Rio de Janeiro ua faaalia ai le tāua o le tumau pea ona toafilemu. O se Kerisiano, o Heloísa, sa alu atu i se pasi e faia se suesuega faale-Tusi Paia. Sa amata ona gaoia e ni tamaloloa se toalua mea a le pasese. Ina ua taunuu i le nofoaga e tu ai le pasi o le a oso i fafo, na taʻu atu ai e Heloísa ia i laua e faapea o ia o se Molimau a Ieova ma e alu o ia e fai se suesuega faale-Tusi Paia. Sa ia faaali atu lana Tusi Paia ma le tusi e fai ai le suesuega. E aunoa ma le faoa o ana mea, na faataga ai o ia e le au gāoi e alu. Ae ui lea, sa iai se isi o le pasese sa lē faatagaina e alu. Na taʻua e le ave pasi mulimuli ane faapea, e leʻi vaai muamua lava o ia i se mea faapea.

Sa toafilemu pea foi Regina ina ua faatonuina o ia e ni tamaloloa faaauupegaina se toalua e oso i totonu o lana taavale. I le faaalia o lana kopi o le mekasini o le Awake!, sa tuuina atu ai e Regina se molimau. Ona sa lē mautonu le au faomea, sa ia fai atu ai ia i laua e tatala le tamai pusa i le pito i luma o le taavale o i inā na ia tuu ai ni lole. Ae ina ua vaaia ni lipine o Kingdom Melodies, sa amata loa ona la faalogolgo i na musika. Sa amata ona mafana le siomaga, o lea sa filifili ai loa le au faomea e tuu Regina i le auala e aunoa ma se afaina, ma fai atu ia te ia o le a ia maua se tagata agalelei e fesoasoani ia te ia. Ina ua uma se savaliga e tusa ma le sefulu minute, ae tau atu loa i se fale, peitai sa lē talitonu le tamaloa e ona le fale i lana tala, i le faapea atu: “E te lē o foliga mai na osofaia oe; e ese lou toafilemu.”

E ui lava atonu e leʻi afaina le tino o sē na tupu ai se faalavelave, ae o se mea e matautia faapena, e mafai ona faatupu ai ni āuga matuia mulimuli ane. Ua lipotia mai e le nusipepa o le O Estado de S. Paulo e faapea: ‘Atonu o le a iai se lagona lē saogalemu i lē na tupu ai le faalavelave, o le a ita i tagata o le aiga po o i latou o ē e taumafai e fesoasoani ia te ia, ua lē mafai ona toe faatuatuaina nisi, ua soona popole i nai mea iti, ma ua lagona faapea ua lē faamasino tonu le lalolagi.’ I  se faaeseesega, afai e faatuatua ia Ieova le Atua le tagata na tupu ai le falavelave, o le a faapena foi ona faasaoina o ia mai le faalavelave e aunoa ma le afaina ai o le tino ma faalogona. Ae peitai, pe e te lē ioe ea o le a avea o se faamanuiaga pe a lē toe iai ni solitulafono po o so o se mea e tupu ai le mataʻu?

“O Lē Gaoi Aua Neʻi Toe Gaoi”

E ui lava ua filifilia e le toatele auala matapeapea o o latou olaga, a ua fesoasoani le Afioga a le Atua i tagata gāoi e suia o latou tuinanau ma o latou uiga. (Efeso 4:23) O le iai o se fuafuaga moni o le olaga e faavae i le Tusi Paia, ua latou utagia ai upu ia: “E sili ona lelei o se mea itiiti, a o i ai le amiotonu, i mea e tele pe a le o i ai le tonu.” (Faataoto 16:8) Ua faamatala mai e Cláudio e faapea: “Toetoe lava o tagata uma i loʻu aiga o ni Molimau, ae e lē taitai lava ona ou faalogo atu i mea latou te fai mai ai e uiga ia Ieova ma ana fuafuaga. Ina ua ou foi mai i se malaga umi e toetoe lava 1,200 maila le mamao i se pikiapu na ou gaoia, sa ou uia ai le tele o ni nofoaga e siaki ai e leoleo. I le faagasologa, sa ou iloa ai e tatau ona suia loʻu olaga. Sa ou taumafai e faia faapena muamua ae sa lē taulau. O le taimi lea na amata ai ona ou mafaufau e uiga i oʻu aiga Molimau a Ieova, ma maeu lava le ese o i latou, e olioli, e fiafia ma filemu.” O le iuga, sa amata ona suesue e Cláudio le Afioga a le Atua, lafoai fualaau faasaina ma ana uo muamua, ma avea o se faifeau Kerisiano.

Ua utagia foi e isi upu ia: “Aua tou te faatuatua i le faasaua, aua foi neʻi outou mitamita vale i mea ua faoa.” (Salamo 62:10) Ina ua uma ona tuli se faasalaga i le falepuipui ona o le taumafai e fasioti se tagata i le taimi o se gaoiga, na maua ai e José, o lē na fai ma ana masani le tagofia o fualaau faasaina ma sa na faatauina atu foi fualaau faasaina, ni aogā mai se suesuega faale-Tusi Paia na faia ma le tane a lona tuafafine. Sa ia faamutaina le faaaogāina ma le faatauina atu o fualaau faasaina, ma ua avea nei ma Molimau maelega.

Ae peitai, e lē faafuasei pe faavavega ona avea ma tagata fou. O Oscar, sa matuā aafia foi i le tagofia o fualaau faasaina ma le gaoi, ua ia faamatala mai e faapea: “Sa ou matuā tatalo faatauanau ia Ieova ma sa masani ai ona pei le fola o le fale o sina vaituloto itiiti i le tele o oʻu loimata maligi.” Ioe, e lē gata i suesuega filigā o le Afioga a le Atua, ae e manaomia tatalo faatauanau mai le loto. Mātau le atamai o lenei manatu i le tatalo: “Aua e te tuu mai ia te au le mativa po o le mauoa; ia e fafaga mai ia te au i ni mea e ʻai e tatau ma aʻu; ina neʻi ou matuā maʻona, ona ou faafiti lea, ma ou faapea, O ai ea Ieova? ina neʻi ou mativa foi, ma ou gaoi, ma ou taʻufuaina le suafa o loʻu Atua.”—Faataoto 30:8, 9.

O le manatu faapito e tatau ona suia i le alofa moni: “O lē gaoi aua neʻi toe gaoi, a e lelei ina faamalosi o ia i galuega a ona lima i mea aoga, ia maua e ia se mea e avatu i le ua mativa.” (Efeso 4:28) E pei o le tulaga o nisi o Kerisiano i le uluai senituri o ē na avea muamua ma ‘tagata gāoi ma ē matapeapea,’ ua faamagaloina ma le alofa mutimutivale e Ieova e ala i le togiola a Iesu Keriso, i latou o ē salamō. (1 Korinito 6:9-11) Maeu le faamafanafanaina ai ona po o ā lava mea na tatou faia i aso ua mavae, ae e mafai lava ona suia auala o o tatou olaga ma maua le finagalo malie o le Atua!—Ioane 3:16.

 Saogalemu i le Lalolagi Fou a le Atua

Seʻi manatu i se lalolagi e aunoa ma ni tagata gāoi. E te lē tau manaomia se faiga taugata e faamautinoa ai ua faatinoina le tulafono, e pei o faamasino, loia, leoleo, ma falepuipui! O le a avea o se lalolagi tamaoaiga lea o le a faaaloalo ai le tasi i le tasi ma a latou mea totino! Pe e foliga mai ea e faigata ona talitonu i lena mea? Po o le a faamutaina ea e le Atua mataupu a tagata ma faaiuina le solitulafono? Matou te valaaulia oe ina ia e suesueina faamaoniga e iloa ai o le Tusi Paia o le Afioga a le Atua ma e maufaatuatuaina ona valoaga. O le a e maua ai se faavae mautu e mautinoa ai faapea o loo taatia mai i luma se suiga. E leai se tasi e mafai ona ia taofia le Atua mai le aumaia o le mapusaga na folafolaina mai ia i latou uma o ē alolofa i le amiotonu: “Aua e te faameo ona o e amio leaga; aua foi e te losilosi ona o e fai mea leaga. Auā e le pine ona seleeseina i latou e pei o le mutia; e mamae i latou e pei o le vao muʻa lauolaola.” (Salamo 37:1, 2) Ua lē pine ae faataunuuina atoatoa na upu na tusia i aso ua mavae.

O le a faaiuina e le Malo o le Atua mea leaga ma le amioletonu, ia o loo faapogaia ai le tele o le loto vaivai ma le lē mautonu. O le a leai se tasi e mativa, pe mafatia i omiga ina ia gaoi. Ua faamautinoa mai i tatou i le valoaga e faapea: “O le a tele le saito i le laueleele; o le a fau ma soloi i tumutumu o mauga. O ona fua o le a pei ona i ai i Lepanona [anamua], o i latou foi mai le aai o le a fuga mai e pei o vao i le laueleele.” (Salamo 72:16, NW) O le mea moni, i le Parataiso toe faafoisia, o le a leai se mea e faaleagaina ai le filemu o tagata o ē ua iloa ma tapuai i le Atua moni.—Isaia 32:18.

Maeu se taui o le a maua ona o le teena o ala o lenei lalolagi matapeapea! Ua faapea mai le Faataoto 11:19: “E pei ona iu o le amiotonu i le ola, e faapea foi le ua tausisi i le leaga, e iu lea i lona lava oti.” Ioe, pe a uma ona tafiesea ē amio leaga, o le a leai se tasi e toe mataʻu mo lona ola po o ana mea totino. Ua tuuina mai e le Salamo 37:11 ia i tatou lenei folafolaga: “A o e agamalu, e fai mo latou le nuu; e faafiafia foi i latou ia te i latou ona o le manuia e tele.”

[Faaopoopoga i lalo]

[Pusa i le itulau 5]

Faafetaiaia o Mea e Faia e le Gaoi

I LE FALE—Talu ai e osofaia e tagata gāoi lou fale e tusa lava pe e te i le fale pe leai, ia tapunipuni faitotoa ma taloka. Ua fautuaina e tagata popoto le faia o ni faailoilo po o ni taifau e leoleoina. Ia faailoa atu i se tuaoi maufaatuatuaina pe a e alu i sau malologa. Ia toafilemu—e vavave tele gaoioiga a le au faomea, e te lē faatalitalia, ma e mafai ona suia faafuasei a latou fuafuaga pe afai e lē o toʻa. Afai o oe o se Molimau a Ieova, ia faailoa atu oe o se Molimau a Ieova ma taumafai e molimau atu i ai. Atonu e mafai ona e talanoa atu i ai i se uiga faaleuo pe faanoanoa foi. Aua e te tetee seʻi vaganā ua osofaia oe.

I NOFOAGA FAITELE—Ia mataala e vaai po o iai se tasi o mulimuli mai ia te oe. Savali i le ogatotonu o le auala e savavali ai tagata. Aloese mai auala e ui i mea pogisa ma auala i mea tuufua. Ia teu lau atotupe ma isi mea tāua i se nofoaga malu puipuia. Ia savali televave e pei o loo e alu i se mea. Aua le ofuina ofu taugata pe asoa pe taulima ni maataua feilafi. Ia ō ma sau paga e fai faatauga pe a faamaonia le lē saogalemu o tulaga o iai. Ave na o le tupe e te manaomia, aua le tuufaatasia i se taga e tasi, ae ia tuu i ni taga po o ni vaega eseese.

I TOTONU O LE TAAVALE—Afai ua taatele le “ave faamalosia o taavale, a o e iai i totonu” i lou vaipanoa, aua e te nofo i totonu o lau taavale a o tu. Ia fesuisuiai lou auala e te alu ai i le galuega ma lou toe foi atu i le fale. Ui i se auala e sili ona saogalemu, e tusa lava pe umi. A o leʻi faatuina lau taavale, vaavaai solo pe iai se mea e foliga mai e te masalomia. Aua neʻi tatalaina le keli o lau taavale i se nofoaga tuufua. Aua le tuua mea taugata po o mea tāua i totonu o le taavale i se mea e mafai ona iloa atu ai. O le iloa atu o se filifili e loka ai ma isi faiga e taofia ai le gaoi e mafai ona faamataʻu ai le au gaoi masani.

[Pusa i le itulau 6]

“Aua tou te toloʻaʻi oa mo outou i le lalolagi, o i ai le mogamoga ma le ele e faaumatia ai; o i ai foi tagata gaoi e eli atu, ma gaoi ai. A ia outou toloʻaʻi oa mo outou i le lagi, e le o i ai se mogamoga, po o se ele e faaumatia ai; e le o i ai foi tagata gaoi e eli atu, ma gaoi ai.”—Mataio 6:19, 20