Faaleagaina e se Tupu le Malumalu o Ieova

“A o le nuu o e ua iloa lo latou Atua latou te faamalosi.”—TANIELU 11:32.

1, 2. O le ā le feteenaiga mataina ua faailogaina ai le talafaasolopito o le tagata mo le sili atu i le 2,000 tausaga?

E TOALUA tupu ua matuā uai atu i le tauiviga mo le pule. A uma ona tulai mai le isi, ona soloai ane foi lea o le isi i le pule, ma ua silia i le lua afe tausaga o faia pea le feteenaiga. I o tatou aso, o lenei tauiviga ua aafia ai le toatele o tagata i le lalolagi, ma ua luia ai foi le faamaoni o tagata o le Atua. E faaiuina i se mea e tupu e leʻi vaaia e nei malosiaga uma e lua. O lenei tala mataina o talafaasolopito a o leʻi tutupu, sa faailoa atu i le perofeta anamua o Tanielu.—Tanielu, mataupu e 10 e oo i le 12.

² O le valoaga o loo fesootai atu i le feitagai faifai pea i le va o le tupu i mātū ma le tupu i toga, ma sa talanoaina auiliili i le tusi “Your Will Be Done on Earth” * [“Ia Faia Lou Finagalo i le Lalolagi”]. I le tusi lena, sa faaalia ai faapea, o le tupu i mātū sa muamua ona faatatau ia Suria, i le itu i mātū o Isaraelu. Mulimuli ane, ona faafoeina lea e Roma lenei tofiga. O le tupu i toga sa amataina mai ia Aikupito.

Feteenaiga i le Taimi o le Iuga

3. E tusa ai ma faamatalaga a le agelu, o afea o le a tatalaina ai le malamalamaga i le valoaga e uiga i le tupu i mātū ma le tupu i toga, ma e faapefea?

³ O le agelu na faailoaina atu nei mea ia Tanielu na faapea atu: “A o oe Tanielu e, ia e pupuni o ia upu, ma faamaufaailogaina le tusi, seia oo i ona po o le iuga; e fetaufetuliai tagata e toatele, e tupu tele foi le malamalama.” (Tanielu 12:4) Ioe, o le valoaga e fesootai atu i le vaitaimi o le iuga—le vaitaimi lea na amataina i le 1914. I lea vaitaimi faailogaina, e toatele o le a “fetaufetuliai” i le Tusi Paia, ma faatasi ai ma le fesoasoani a le agaga paia, o le a tupu tele ai le poto saʻo, e aofia ai foi ma le malamalamaga i valoaga a le Tusi Paia. (Faataoto 4:18) A o tatou lalata tele atu i lea vaitaimi, ua faamaninoina atili mai le tele o faamatalaga auiliili o valoaga a Tanielu. O lea la, e ao faapefea ona tatou malamalama i le valoaga e faatatau i le tupu i mātū ma le tupu i toga i le 1993, ona ua 35 nei tausaga ua tuanai talu ona lomia le tusi “Your Will Be Done on Earth”?

4, 5. (a) O fea i le valoaga a Tanielu e uiga i le tupu i mātū ma le tupu i toga e maua ai le tausaga e 1914? (e) E tusa ai ma faamatalaga a le agelu, o le ā o le a tupu i le 1914?

⁴ O le amataga o le vaitaimi o le iuga i le 1914, sa faailogaina i le taua muamua a le lalolagi, faatasi ai ma isi puapuaga o le lalolagi ia na valoia e Iesu. (Mataio 24:3, 7, 8) Pe e mafai ona tatou sueina tonu lena tausaga i le valoaga a Tanielu? Ioe. O le amataga o le vaitaimi o le iuga o le taimi “tuupoina” lea o loo faasino i ai le Tanielu 11:29. (Tagai i le “Your Will Be Done on Earth,” itulau e 269-270.) Sa o se taimi ua uma ona tuupoina e Ieova i ona po o Tanielu, auā sa taunuu i le faaiuga o le 2,520 tausaga e pei ona aliali mai i mea tāua faavaloaga i le Tanielu mataupu e 4.

 ⁵ O na tausaga e 2,520, e mai le taimi o le faaumatiaga o Ierusalema i le 607 T.L.M., a o talavou Tanielu seia oo atu i le 1914 T.A., na taʻua o “tausaga o nuu ese.” (Luka 21:24) O ā mea e tutupu i tulaga faaupufai e faailogaina ai lona iuga? Sa faailoa atu e le agelu lenei mea ia Tanielu. Sa faapea atu le agelu: “O ona po ua tuupoina e toe foi mai ai o ia [le tupu i mātū], ma alu atu i le itu i toga; a e le iu faapei o le na muamua, po o lē mulimuli.”—Tanielu 11:29.

Ua Faiaina le Tupu i se Taua

6. I le 1914, o ai sa avea ma tupu i mātū, ma o ai sa fai ma tupu i toga?

⁶ I le 1914, o le tofiga o le tupu i mātū na tauaveina lea e Siamani, o lona taʻitaʻi sa o Kaiser Wilhelm. (“Kaisa,” e mai le suafa Roma o “Kaisara.”) O le mapuna aʻe o faiga sauā i Europa o se tasi na o mea i le faasologa o feteenaiga i le va o le tupu i mātū ma le tupu i toga. O le tofiga o lea na mulimuli mai, le tupu i toga, sa nofoia e Peretania, lea na ia vave pulea Aikupito, le pulega muamua a le tupu i toga. A o faagasolo le taua, sa aufaatasi atu ia Peretania lana kolone muamua, le Iunaite Setete o Amerika. Ona avea loa lea o le tupu i toga ma Malo Malosi o le Lalolagi o Peretania ma Amerika, le emepaea silisili ona malosi i talafaasolopito.

7, 8. (a) I le taua muamua a le lalolagi, o ā tulaga na lē foliga mai ai mea “faapei o le na muamua”? (e) O le ā le iuga na oo i ai le taua muamua a le lalolagi, ae e tusa ai ma le valoaga, na faapefea ona tali atu le tupu i mātū?

⁷ I feteenaiga muamua i le va o ia tupu e lua, sa manumalo pea le Emepaea o Roma, le tupu i mātū. I le taimi lenei, ‘ua lē tusa ai e pei ona iai muamua.’ Aisea ua lē faapea ai? Ona e talu ai na toilalo le tupu i mātū i le taua. O se tasi o mafuaaga ona sa ō atu ai “fua [vaa o] Kitimo” e tetee atu i le tupu i mātū. (Tanielu 11:30) O ā nei vaa? I ona po o Tanielu, o Kitimo na avea o Kuperu, ma i le tauamataga lava o le taua muamua a le lalolagi, sa avea ai Kuperu ma vaega o Peretania. E lē gata i lena, e tusa i le Zondervan Pictorial Encyclopedia of the Bible, o le igoa Kitimo, “ua faalauteleina atu e aofia ai S[isifo] i se tulaga lautele, ae [maise] lava tagata folau i S[isifo].” Ua faaupuina e le New International Version le faaupuga ‘fuavaa o Kitimo’ o “vaa o gataifale i sisifo.” I le taua muamua a le lalolagi, na faamaonia ai le avea o vaa o Kitimo ma vaa o Peretania, na taula i tala ane o le gataifale i sisifo o Europa. Mulimuli ane, sa faamalosia atili le Fuavaa Tau o Peretania e vaa mai i le konetineta i sisifo o Amerika i Mātū.

⁸ I lenei osofaiga, sa “tigaina” ai le tupu i mātū ma toilalo ai i le 1918. Peitai sa leʻi iu ai i inā. “Ona toe foi mai ai lea, e ita atu foi o ia i le feagaiga paia; na te faapea lava ona fai, na te toe foi mai ma faasaga lona manatu i e ua lafoai le feagaiga paia.” (Tanielu 11:30) O le valoaga lea a le agelu, ma sa faamaonia foi le moni.

Gaoioi le Tupu ma le Uigā

9. O le ā na iu i ai le tulai mai o Adolf Hitler, ma na faapefea ona ia ‘gaoioi’ ma le uigā?

⁹ Ina ua mavae le taua i le 1918, o Malo na soo faatasi ia na manumalo, na latou tuuina atu se feagaiga o le filemu o se faasalaga ia Siamani, ma na manino sa fuafuaina ina ia taofiofia ai tagata Siamani i se tulaga e lalata atu i le matelaina i se vaitaimi lē mautinoa i le lumanai. I le iuga, ina ua mavae lona tautevateva i lalo o tulaga sili ona pagatia, ona nofo sauni ai lea o Siamani e talia le tulai mai o Adolf Hitler. Na maua e ia le tele o le pule i le 1933, ma amata ai loa i lea lava taimi ona agaʻi atu se osofaiga sauā faasaga i le “feagaiga paia,” lea sa avea ai uso faauuina o Iesu Keriso ma ona sui. I lenei auala, sa ia gaoioi ai ma le uigā faasaga i nei Kerisiano faamaoni, i le faasauaina ma le ogoogo o le toatele o i latou.

10. I le sailia o le lagolagosua, o ai na faapipii atu i ai Hitila, ma o ā iuga?

¹⁰ Sa matuā fiafia tele Hitila i manuia tau tamaoaiga ma manuia i le va fealoai, ma sa  manuia foi ana gaoioiga i lea itu. I ni nai tausaga, sa ia faia ai Siamani o se malo e tatau ona amanaiaina lona malosi, ma sa mafai ona oo i lea tulaga, ona o le fesoasoani mai i ē ua latou “lafoai le feagaiga paia.” Ma o ai i latou nei? Ma le manino lava, o taʻitaʻi o Kerisinetoma, o ē o loo latou faapea mai o loo iai i se faiā tau feagaiga ma le Atua, peitai ane ua leva lava ona lē toe avea i latou ma soʻo o Iesu Keriso. Sa manuia le tālo atu a Hitila ia i latou o ē ua “lafoai le feagaiga paia” mo la latou lagolagosua. Sa faia e le pope i Roma se feagaiga ma ia, e faapena foi le Lotu Katoliko Roma, ma le lotu Porotesano i totonu o Siamani, sa lagolagoina Hitila i tausaga e 12 o lana pulega sauā.

11. Na faapefea e le tupu i mātū ona “faaleagaina le malumalu” ma “aveeseina foi le taulaga fai soo”?

¹¹ Sa manuia le alo atu o Hitila i le taua, e pei lava ona valoia mai ma le saʻo e le agelu. “O ʻau foi latou te ʻau ma ia, latou te faaleagaina le malumalu e malu ai, latou te aveeseina foi le taulaga fai soo.” (Tanielu 11:31a) I Isaraelu anamua, o le mea paia sa avea o se vaega o le malumalu i Ierusalema. E ui i lea, ina ua teena e tagata Iutaia Iesu, ona teena foi lea e Ieova i latou ma lo latou malumalu. (Mataio 23:37–24:2) Talu mai le uluai senituri, o le malumalu o Ieova, ua avea moni lea ma malumalu faaleagaga, ua iai lona mea e silisili ona paia i le lagi, ma o lona lotoā faaleagaga o loo i le lalolagi, lea o loo auauna ai uso faauuina o Iesu, le Ositaulaga Sili. Talu mai le tausaga e 1930 e oo i le 1939, ua tapuai atu ai le motu o tagata e toatele i le faatasitasi atu ma le vaega totoe faauuina; o lea e mafai ona faapea atu ai, o loo auauna i latou i ‘totonu o le malumalu o le Atua.’ (Faaaliga 7:9, 15; 11:1, 2; Eperu 9:11, 12, 24) O le lotoā o i le lalolagi o le malumalu, sa faaleagaina e ala i sauaga lē motusia o le vaega totoe faauuina ma a latou aumea i atunuu na pule ai le tupu i mātū. Sa matuā matuitui sauaga, o lea na oo ai lava i taulaga fai soo—o taulaga ia i le lautele o viiga i le suafa o Ieova—sa aveesea. (Eperu 13:15) Ae ua faaalia pea i talafaasolopito, e ui lava i puapuaga matautia, ae sa faaauau pea e Kerisiano faauuina faamaoni, faatasi ai ma “isi mamoe,” le faia o le talaʻiga i se tulaga faanana.—Ioane 10:16.

“Le Mea Inosia”

12, 13. O le ā le “mea inosia,” ma—e pei ona uluai vaaia e le auauna faamaoni ma le mafaufau—o anafea ma na faapefea ona toe faaolaolaina?

¹² Ina ua tatafa mai le iuga o le taua lona lua a le lalolagi, sa tulai mai ai se isi faagasologa. Latou te “tuuina ai le mea inosia e faatafunaina ai.” (Tanielu 11:31e) O lenei “mea inosia,” lea sa fetalai foi i ai Iesu, ua uma ona faailoaina mai o Malo Sosoo, le manu feai mūmū e tusa ai ma le Faaaliga, ua alu atu i le to e lē gata. (Mataio 24:15; Faaaliga 17:8; tagai i le  tusi Light, Tusi e Lua, itulau 94.) Sa oo i ai lea mea ina ua pa aʻe le Taua Lona Lua a le Lalolagi. E ui i lea, i le Fonotaga o le Lalolagi Fou Faatiokarate a Molimau a Ieova i le 1942, sa talanoaina ai e Nathan H. Knorr, le peresitene lona tolu o le Watch Tower Bible and Tract Society, le valoaga o le Faaaliga 17 ma lapatai mai ai o le a toe aliae mai le manu feai mai le to e lē gata.

¹³ Ua faamaonia e talafaasolopito le moni o ana upu. I le va o Aokuso ma Oketopa i le 1944, i Dumbarton Oaks, i le Iunaite Setete, sa amataina ai le galuega mo le feagaiga o le a faaigoaina o Malo Aufaatasi. Sa taliaina lenei feagaiga e atunuu e 51, e aofia ai ma le atunuu na taʻua i tausaga muamua o le Soviet Union, ma ina ua faagaoioia lea feagaiga ia Oketopa 24, l945, ona toe foi mai ai lea nai i le to e lē gata Malo Sosoo na fai a mate.

14. O anafea ma na faapefea ona suia le tulaga o le tupu i mātū?

¹⁴ Na avea Siamani ma fili sili o le tupu i toga i le vaitaimi o taua uma e lua a le lalolagi. Ina ua mavae le Taua Lona Lua a le Lalolagi, sa toe faatulaga ai se vaega o Siamani ma ʻau atu i le tupu i toga. Ae o le isi vaega o Siamani, na faatasi atu i se isi emepaea sa iai foi ni ana taaʻiga. O atunuu ia sa i lalo o faiga Faa-Komunisi, lea na aofia ai se vaega o Siamani, sa tulai mai e tetee malosi atu i atunuu sa i lalo o Peretania ma Amerika, ma o le fefaloaiga i le va o nei tupu e lua na avea o se Taua Faaupufai.—Tagai i le “Your Will Be Done on Earth,” itulau 264-284.

Le Tupu ma le Feagaiga

15. O ai i latou ia na ‘agasala i le feagaiga,’ ma o le ā le faiā na latou maua ma le tupu i mātū?

¹⁵ Ua faapea mai nei le agelu: “O e agasala i le feagaiga e leaga i latou ia te ia i faaoleolega.” (Tanielu 11:32a) O ai i latou nei ua agasala i le feagaiga? O i latou moni lava o taʻitaʻi o Kerisinetoma, o ē ua faapea mai o Kerisiano, a o a latou amioga ua faaleagaina ai le Faa-Kerisiano moni. I le taua lona lua a le lalolagi, “sa taumafai ai Malo o le Soviet ina ia maua mai le fesoasoani faaletino ma le faaleamio mai i Lotu mo le puipuiga o le atunuu autū.” (Religion in the Soviet Union, tusia e Walter Kolarz) Ina ua mavae le taua, sa taumafai taʻitaʻi lotu ina ia tausia pea lea faigauo e ui lava i le faapaupau o tulafono a le malo sa avea ma tupu i toga i lea taimi. * O lea, ua sili atu ona aafia Kerisinetoma i le taimi nei na i lo o se isi lava taimi, o se vaega o lenei lalolagi—o se aposetasi inosia i fofoga o Ieova.—Ioane 17:14; Iakopo 4:4.

16, 17. O ai i latou “ua popoto,” ma na faapefea ona latou feagai ai ma le tupu i mātū?

¹⁶ Ae faapefea la Kerisiano moni? “A o le nuu o e ua iloa lo latou Atua latou te faamalolosi ma fai mea tetele. O e ua popoto i le nuu latou te aʻoaʻoina atu i tagata e toatele; a o aso e tele e pauu ai i latou i le pelu ma le afi, ma le tafeaga, ma le veteina. (Tanielu 11:32e, 33) O Kerisiano o ola i lalo o le tupu i mātū, e “usiusitai . . . i faipule silisili,” ae e leai sa latou vaega i lenei lalolagi. (Roma 13:1; Ioane 18:36) Latou te totogi atu ma le faaeteete mea a Kaisara ia Kaisara, ae latou te avatu foi “mea a le Atua . . . i le Atua.” (Mataio 22:21)  Ona o lenei tulaga, sa luia ai lo latou faamaoni.—2 Timoteo 3:12.

¹⁷ O ā iuga? Sa “faamalolosi” ma “pauu” foi i latou. Na pauu i latou i se uiga faapea, na sauaina ma tele lo latou puapuaga, o nisi na oo lava ina fasiotia. Ae na faamalolosi i latou auā, na tutumau ma le faamaoni le toatele i lenei taimi. Ioe, ua latou manumalo i le lalolagi, e pei lava ona manumalo Iesu i le lalolagi. (Ioane 16:33) E faaopoopo atu i lena, sa leʻi taofia lava la latou talaʻiga, e tusa lava pe na tuu i latou i le falepuipui. I le faia faapea, ua latou ‘faaooina atu ai le malamalama i le toatele.’ E ui lava i sauaga i le tele o atunuu na pulea e le tupu i mātū, ae sa faatuputeleina pea le faitau aofai o Molimau a Ieova. Faafetai i le faamaoni o i latou “ua popoto,” ua aliai mai ai pea se vaega faateleina o le “motu o tagata e toatele” i na atunuu.—Faaaliga 7:9-14.

18. O le ā le “fesoasoani itiiti” ua mauaina e le vaega totoe faauuina o loo soifua i lalo o le pule a le tupu i mātū?

¹⁸ Ina ua taʻua le sauaina o tagata o le Atua, na valoia mai faapea e le agelu: “A pauu foi i latou, latou te maua se fesoasoani, o se fesoasoani itiiti.” (Tanielu 11:34a) Na faapefea ona tupu lenei mea? O se tasi o mea, o le manumalo lea o le tupu i toga i le taua lona lua a le lalolagi, na iu ai i se mapusaga tele mo Kerisiano na soifua i lalo o le tupu i mātū. (Faatusatusa i le Faaaliga 12:15, 16.) Ma o i latou na sauaina e le malo na suia le tulaga o le tupu i mātū, sa faagasolo ona faifai malie le mauaina o le saolotoga, ma a o agaʻi atu ina faatoafilemuina le Taua Faaupufai, o le toatele o taʻitaʻi o faiga malo ua oo ina latou iloaina faapea, o Kerisiano faamaoni ua lē o se tau faamataʻu ma sa tuu atu loa ia i latou le aloaia faaletulafono. * E tele foi se fesoasoani ua maua mai i le motu o tagata e toatele ua faateleina lo latou faitau aofai, o ē ua tali mai i le talaʻiga faamaoni a ē ua faauuina ma ua fesoasoani atu ia i latou, e pei ona faamatala mai i le Mataio 25:34-40.

O se Faamamāina mo Tagata o le Atua

19. (a) Sa faapefea e nisi ona faatasitasi atu ona o a latou “faaoleolega”? (e) O le ā le uiga o le faaupuga “seia oo i ona po o le iuga”? (Tagai i le faamatalaga i lalo.)

¹⁹ E lē o tagata uma na naunau e auauna i le Atua i lenei vaitaimi, na iai ni faanaunauga lelei. Na lapatai mai faapea le agelu: “A e toatele e pipii atu ia te i latou ma faaoleolega. E pauu foi nisi o e popoto, e tofotofoina ai i latou, ma faamamāina ai, ma faasinasinaina ai, seia oo i ona po o le iuga; auā e lei oo i ona po ua tuupoina.” * (Tanielu 11:34e, 35) O nisi sa faaalia le naunau i le upu moni, ae sa lē mananao e faia se tuuina atu faamaoni ina ia auauna i le Atua. O isi na foliga mai na latou taliaina  le tala lelei sa avea moni o ni sipai mo ē e pule i malo. Ua faitauina faapea se lipoti mai i se tasi o atunuu: “O nisi o nei tagata faatagafai o ni Komunisi aʻiaʻi, o ē na ō ane faaleiloga i le faalapotopotoga a le Alii, sa latou faaalia se maelega tele, ma na oo foi ina tofiaina i ni tofiga tāua i le faalapotopotoga a Ieova.”

20. Aisea na faatagaina ai e Ieova nisi o Kerisiano faamaoni ina ia “pauu” ona o ē faatagafai na ō ane faaleiloga?

²⁰ O le aufaaleiloga o ē na ō ane i totonu na faapogaia ai le pueina o nisi o ē faamaoni e taʻitaʻi o malo. O le ā le mafuaaga na faatagaina ai e Ieova mea faapena ina ia tutupu? Ona e talu ai, e mo se faaleleia ma le faamamāina. E pei lava o Iesu, “o mea sa tiga ai o ia na aʻoaʻoina ai o ia ia usiusitai,” e faapena foi i nei tagata faamaoni ona aʻoaʻoina le onosai e ala i le tofotofoina o lo latou faatuatua. (Eperu 5:8; Iakopo 1:2, 3; faatusatusa i le Malaki 3:3.) O lea, na ‘faaleleia, faamamāina, ma faasinasinaina’ ai i latou. O loo iai se fiafiaga tele o loo faatali mai mo ē faamaoni pe a oo mai le taimi atofaina e tauia ai lo latou onosai. O le a mafai ona iloaina lenei mea pe a tatou talanoaina atili le valoaga a Tanielu.

[Faaopoopoga i lalo]

Pe E te Manatua?

□ Aisea ua tatou faatalitalia ai i aso nei o le a iai se malamalamaga e sili ona manino i le valoaga a Tanielu?

□ Na faapefea e le tupu i mātū ona ‘ita atu i le feagaiga ma manuia ai ana faiga’?

□ Na faapefea ona uluai vaaia e le vasega o le auauna le toe aliai mai o le “mea inosia”?

□ Na faapefea e le vaega totoe faauuina ona ‘pauu, faamalolosi, ma mauaina se fesoasoani itiiti’?

[Fesili mo le Suʻesuʻega]

[Ata i le itulau 15]

I le pulega a Hitila, na faatoʻā atoatoa le manumalo o le tupu i mātū mai i lima o le tupu i toga talu lona toilalo i le 1918

[Ata i le itulau 16]

Na taumafai taʻitaʻi o Kerisinetoma e fafau aʻe se faiā ma le tupu i mātū

[Ē Ana le Ata]

Zoran/Sipa Press