Le Manumalo Faaiu a Mekaeli, le Alii Sili

“O ona po foi ia e tulai ai Mekaeli, o le alii sili, o le na te tulai ona o tagata o lou nuu.”—TANIELU 12:1.

1. O ā uiga faasaga i le pule silisili ese a Ieova ua faaalia e le toatele o pule o malo o le lalolagi, ma ua faapefea ona tutusa ma le tupu i mātū?

“O AI ea Ieova ou te faalogo ai i lana upu, ma ou tuuina atu ai o Isaraelu e o?” (Esoto 5:2) O upu tauluilui nei a Farao sa fai atu ai ia Mose. I le teena o le tulaga tau Atua silisili ese o Ieova, sa filigā ai Farao ina ia taofia pea Isaraelu e fai ma ana pologa. Ua faaalia foi e isi taʻitaʻi le inoino ia Ieova, ma ua tutusa pau lena ma tupu o loo taʻua i le valoaga a Tanielu. (Isaia 36:13-20) Ma le mautinoa lava la, ua fai si maoae teisi o faiga a le tupu i mātū. Ua faapea mai le faamatalaga a le agelu: “Na te faia e tusa ma lona loto, ma faamaualuga o ia e ia, ma faasili ia te ia i atua uma; na te faia upu faasausili i le Atua o atua, . . . Na te le manatu i le Atua o ona tamā, na te le manatu i le manao i fafine, na te le manatu foi i se tasi atua; auā e faasilisili o ia e ia i mea uma.”—Tanielu 11:36, 37.

2, 3. I le ā le auala na teena ai e le tupu i mātū le “Atua o ona tamā” ae faasili ai le tapuai atu i se isi “atua”?

² I le faataunuuina o nei upu faavaloaga, na teena ai e le tupu i mātū “le Atua o ona tamā” (po o “atua o ona tuaā,” The New English Bible), o atua faapaupau o Roma po o le atua Tolutasi a Kerisinetoma. Na faaaogāina e Hitila Kerisinetoma mo ana fuafuaga, peitai ane na manino mai ai lona fafauina ina ia suitulaga ai le lotu fou a Siamani. Sa faaalialia atu i lumamea e lē na suitulaga ia te ia le lē talitonu i le Atua. O lea, na fai ai e le tupu i mātū ia lava ma atua, i le ‘faasilisilia o ia lava e sili atu i lo so o se isi.’

 ³ Ua faaauau atili mai faapea le valoaga: “E ava o ia i le atua o ʻolo i le mea e nofo ai o ia; o le atua foi sa le iloa e ona tamā na te ava i ai, ma avatu i ai auro, ma ario ma maa tāua, atoa ma mea matagofie.” (Tanielu 11:38) O le mea moni, ua tuuina atu e le tupu i mātū lona faatuatuaga i faiga o meatau faasaienitisi faaonaponei, “le atua o ʻolo.” I le vaitaimi atoa o le iuga, ua ia sailia ai pea lona faaolataga e ala mai i lenei “atua,” ma faataulagaina ai le anoanoai o le tamaoaiga i lona fata faitaulaga.

4. O le ā le tulaga ua manuia ai le tupu i mātū?

⁴ “E faia lava lea e ia i ʻolo e sili ona malolosi, i le atua ese, o le e manatua e ia ma faasilisili ona ava i ai; na te tuuina atu foi ia te i latou le pule i tagata e toatele, na te vaevaeina foi le laueleele e maua ai le taui.” (Tanielu 11:39) I le faatuatua atu i lana vaegaau, “le atua ese,” ua matuā ‘faia ai lava’ ma le manuia gaoioiga a le tupu i mātū, ma ua faamaonia mai le matautia o lona malosi faavaegaau i “aso e gata ai.” (2 Timoteo 3:1) O ē na lagolagoina ona manatu, na tauia i latou e ala i le tuuina atu i ai o le lagolagosua faaupufai, le lagolagosua tau tupe, ma i nisi taimi, o le lagolagosua i tulaga faavaegaau.

“I Ona Po o le Iuga”

5, 6. Ua faapefea ona ‘oso faamalosi’ atu le tupu i toga, ma ua faapefea ona tali mai i ai le tupu i mātū?

⁵ Ua faitauina faapea le Tanielu 11:40a: “A oo i ona po o le iuga, ona sii atu lea ia te ia o  le taua e le tupu o le itu i toga.” O lenei mea, ma isi fuaiupu o sosoo mai ai, ua manatu i ai e iai se faataunuuga i lo tatou lumanai. Ae ui i lea, afai o “ona po o le iuga” i inei ua uiga tutusa ma lea o loo taʻua i le Tanielu e 12:4, 9, ua tatau ai la ona tatou tagai atu i ai i le faataunuuina o nei upu i aso e gata ai. Pe ua ‘oso faamalosi’ atu ea le tupu i toga i le tupu i mātū i lenei vaitaimi? Ioe, ma le mautinoa lava. Ina ua mavae le taua muamua a le lalolagi, o le feagaiga e faasala aʻi o le filemu sa avea moni o se ‘oso faamalosi’ atu, o se faagaeeina o le taui ma sui. Ina ua mavae lona manumalo i le taua lona lua a le lalolagi, ona faasaga atu ai lea o le tupu i toga i auupega faaniukelea mo lana fefaloaiga ma faamaopoopoina faasaga ia te ia, se tuufaatasiga o malosiaga faavaegaau o le, NATO. A o faagasolo atu tausaga, ua aofia ai i le ‘oso faamalosi’ atu i ana faiga maoae faaonaponei le mauaina o faamatalaga faalilolilo, faapena foi i puipuiga faavafealoai ma faavaegaau.

⁶ Na faapefea le tali mai a le tupu i mātū? “E pei se afā ona oso atu ia te ia o le tupu o le itu i mātū ma kariota, ma ē o tietie i solofanua, atoa ma vaa e tele; na te oo atu foi i nuu, ma lolofi i ai, ma ui ane ai.” (Tanielu 11:40e) Ua faaalia e talafaasolopito o aso o le iuga, le faalauteleina atu o atunuu o le tupu i mātū. I le taimi o le taua lona lua a le lalolagi, na faateleina atu ai e le “tupu” o Nazi ona tuaoi i atunuu na siomiaina o ia. Ina ua mavae le taua, o le “tupu” na soloai ane, na ia fausiaina aʻe se emepaea malosi i fafo atu o ona lava tuaoi. I le vaitaimi o le Taua Faaupufai, na tau ai le tupu i mātū, i lona tetee atu i le tupu i toga e ala i le lagolagoina o isi atunuu i a latou taua, o fouvalega i Aferika, Asia ma Amerika Latina. Na ia sauaina foi Kerisiano faamaoni, ma faatapulaaina (ae na te lē mafai ona taofia) a latou gaoioiga. Ma o lana puipuiga faavaegaau ma faaupufai na mafai ai ona ia pulea le tele o atunuu. O lenei tulaga ua tutusa pau lava ma le mea lea na valoiaina e le agelu e faapea: “E oo atu foi o ia i le nuu matagofie [le laufanua faaleagaga o tagata o le Atua], e faaumatia foi nuu e tele.”—Tanielu 11:41a.

7. O ā tapulaa ua iai i inā mo le faateleina atu o laueleele o le tupu i mātū?

⁷ E ui i lea,—e mai le vaaiga a lē o tetee atu ia te ia—o le tupu i mātū, ua iai i se vaaiga mamao taufaamatau, e leʻi ausia lava e ia le puleaina o le lalolagi. “A e sao nai lona lima o nuu ia, o Etoma, ma Moapi, atoa ma e ua sili i le fanauga a Amoni.” (Tanielu 11:41e) I aso anamua, o Etoma, o Moapi, ma Amoni sa tutū e tau lalata ane i le va o Aikupito ma Suria. E mafai ona faapea atu ua fai lena ma sui o atunuu ma faalapotopotoga i aso nei, ia na uai atu i ai le tupu i mātū, peitai ane, na te leʻi mafaia ona ia aumaia i lalo o lana pule.

‘O le a Lē Sao Aikupito’

8, 9. Ua lagonaina faapefea taaʻiga a le tupu i mātū, e oo foi lava i lē sili ona faatautee atu ia te ia?

⁸ Ua faapea atili mai le agelu: “Na te faaoo atu lona lima i nuu, e le sao foi le nuu o Aikupito. A e pule o ia i oloa, o auro, ma ario atoa ma mea matagofie uma o Aikupito; e mulimuli atu foi ia te ia o Lipua ma Aitiope.” (Tanielu 11:42, 43) E oo foi lava i le tupu i toga, o “Aikupito,” sa leʻi sao mai i āuga o tulafono o le faalauteleina atu o laueleele o le tupu i mātū. Mo se faataitaiga, na tigaina o ia i se toilalo mataina i Vietiname. Ae faapefea ia “Lipua ma Aitiope”? O nei tuaoi o Aikupito anamua, atonu ua fetaui lelei ona faaatagia atu ai atunuu i se uiga, i o latou tulaga i le faafanua, o loo tuaoi ma “Aikupito” i o tatou aso, ma i lea taimi ma lea taimi, ua mulimuli atu ai i ‘tulagavae’ o le tupu i mātū.

⁹ Pe ua puleaina ea e le tupu i mātū ‘oloa lilo o Aikupito’? Ia, e mautinoa lava na te leʻi faatoilaloina le tupu i toga, ma e oo mai i le 1993, ua faafoliga mai e mea tutupu i le lalolagi o le a ia lē faia faapea. Peitai, ua iai pea sana taaʻiga malosi i le auala o loo faaaogāina ai e le tupu i toga mea o loo maua mai ai lona tamaoaiga. Ona o lona mataʻu i lē o loo faatautee  atu ia te ia, ua faaaluina ai e le tupu i toga le anoanoai o tupe i tausaga taitasi, mo le tausia o se vaegaau tele i le eleele, i le sami, ma le ea. I lenei tulaga, e mafai ai ona faapea atu ua ‘pulea’ po ua faatonutonuina e le tupu i mātū le faasoaina o le tamaoaiga o le tupu i toga.

Le Tauiviga Faaiu a le Tupu i le Itu i Mātū

10. I le ā le auala o faamatalaina ai e le agelu le iuga o le feteenaiga i le va o nei tupu e toalua?

¹⁰ Pe o le a faaauau ai ea e faavavau le feteenaiga i le va o nei tupu e toalua? E leai. Na taʻu atu e le agelu ia Tanielu e faapea: “A o tala mai sasae, ma le itu i mātū e atuatuvale ai o ia [le tupu i mātū]; ona alu atu ai lea o ia ma le ita tele ia faaumatia ma fasiotia tagata e toatele. Na te faatuina fale ie o lona maota i le va o sami, i le mauga matagofie ma le paia; a e oo atu i lona iuga, e leai foi se tasi e fesoasoani ia te ia.”—Tanielu 11:44, 45.

11, 12. O ā mea na tutupu lata mai nei i tulaga faapolotiki e fesootai atu i le feteenaiga i le va o le tupu i mātū ma le tupu i toga, ma o le ā le mea e leʻi oo ina tatou iloaina?

¹¹ O nei mea tutupu e mo le lumanai, o lea la, e lē mafai ona auiliiliina atu pe o le a faapefea ona faataunuuina le valoaga. O tulaga tauupufai i le va o nei tupu e toalua, ua iai ni ona suiga talu ai nei. Ua faatoafilemuina le feteenaiga aasa sa iai i le va o le Iunaite Setete ma atunuu i Europa i Sasae. E faaopoopo atili atu i lena, na faataapeina le Soviet Union i le 1991, ma ua lē o toe iai nei.—Tagai i le lomiga o Le Olomatamata o Iulai 1, 1992, itulau e 4, 5.

¹² O lea la, o ai le tupu i mātū i le taimi lenei? Pe o faailoa mai ea o ia o se tasi o atunuu mai i na atunuu sa avea muamua ma vaega o le Soviet Union ua tuanai atu? Po ua matuā suia atoatoa ea o ia, e pei ona faia ai i nisi o taimi muamua ua mavae atu? Tatou te lē o iloaina lena tulaga. O ai o le a avea ma tupu i mātū pe a faataunuuina le Tanielu 11:44, 45? Pe o le a toe pasae aʻe ea le feteenaiga i le va o ia tupu e toalua? Ae faapefea i faaputuga tetele o meatau faaniukelea ia o loo iai pea i nisi o atunuu? O le a maua ni tali i nei fesili a o faagasolo le taimi.

13, 14. O le ā le mea ua tatou iloaina e tusa ai ma le lumanai o nei tupu e toalua?

¹³ E tasi le mea ua tatou iloaina. Ua toeitiiti nei ona faia lea e le tupu i mātū se tauiviga mo se osofaiga, o le a faapogaia ai “tala mai sasae, ma le itu i mātū e atuatuvale ai o ia.” O lenei tauiviga o le a faanatinati ai le aumaia o lona “iuga.” E mafai ona aʻoaʻoina atili i tatou e tusa ai ma nei “tala” pe afai tatou te manatunatu atili i isi valoaga o le Tusi Paia.

¹⁴ Muamua lava, seʻi mātau, o nei gaoioiga a le tupu i mātū e lē faapea, o loo fai e faasaga i le tupu i toga. E lē o faapea ua oo atu o ia i lona iuga talu ai e mai i lima o lē sili o faatautee atu ia te ia. E faapena foi ona lē faaumatiaina le tupu i toga e le tupu i mātū. O le tupu i le itu i toga (e pei ona faaatagia mai i isi valoaga, o le nifo mulimuli lea e aliali mai i le manu feai), e faaumatia “e le se lima [o le tagata]” ae e le Malo o le Atua. (Tanielu 7:26; 8:25) O le mea moni o tupu uma faalelalolagi o le a mulimuli ane faaumatia e le Malo o le Atua i le taua o Amaketo, ma o le mea moni lenei e tupu i le tupu i mātū. (Tanielu 2:44; 12:1; Faaaliga 16:14, 16) Ua faamatalaina i le Tanielu 11:44, 45 tulaga o mea o le a taitaiina atu ai i le taua faaiu. E letioa a “leai foi se tasi e fesoasoani ia te ia” pe a fetaiai le tupu i mātū ma lona iuga!

15. O ā fesili tāua o totoe e manaomia ona talanoaina?

¹⁵ Ae e faapefea la isi valoaga o aumaia ai se malamalamaga i “tala” e mafua ai ona alu atu le tupu i mātū “ia faaumatia ma fasiotia tagata e toatele.” O ai le “toatele” o le a manao o ia e faaumatia?

Se Tala Mai le Mea o Alu aʻe ai le La

16. (a) O le ā le mea mataina e ao ona tupu a o leʻi oo ia Amaketo? (e) O ai tupu e mai le mea “e alu ae ai le la”?

¹⁶ A o leʻi oo i le taua faaiu, o Amaketo, o se fili sili o le tapuaiga moni e tatau ona faaumatia—Papelonia le aai Tele, e pei se fafine  talitane, le emepaea o lotu sese i le lalolagi aoao. (Faaaliga 18:3-8) O lona faaumatiaga ua uluai faaatagiaina mai i le liligiina atu o le ipu lona ono o le toasa o le Atua i luga o le vaitafe o Eufirate faafaatusa. E matūtū le vaitafe “ina ia saunia le ala o tupu mai nuu e alu ae ai le la.” (Faaaliga 16:12) O ai nei tupu? E mautinoa o Ieova le Atua ma Iesu Keriso! *

17. (a) O le ā ua taʻu mai e le Tusi Paia ia i tatou e tusa ai ma le faaumatiaga o Papelonia le aai Tele? (e) Atonu o le ā ua faamaonia o le tala mai le mea “e alu ae ai le la”?

¹⁷ O le faaumatiaga o Papelonia le aai Tele ua manino lona faamatalaina mai i le tusi o Faaaliga: “O nifo foi e sefulu [‘tupu’ o loo pule i le taimi o le iuga] na e iloa i le manu feai [le manu feai—mūmū, o suia ai le faalapotopotoga o Malo Aufaatasi], latou te ʻinoʻino i le fafine talitane, ma faasaunoa ia te ia, ma to ese ona ofu, latou te aai foi i lona tino, ma susunu ia te ia i le afi.” (Faaaliga 17:16) O le mea moni, e ‘faaumatia tino e tele ’ e atunuu! (Tanielu 7:5) Ae aisea o le a faaumatia ai e ē o pule, e aofia ai ma le tupu i mātū, ia Papelonia le aai Tele? “Auā ua tuuina atu e le Atua i o latou loto ia faia lona finagalo.” (Faaaliga 17:17) O le tala ‘mai le mea o alu aʻe ai le la’ atonu e faasino i lenei gaoioiga a Ieova, pe ana tuuina i le auala e finagalo lava o ia i ai i loto o taʻitaʻi faaletagata ina ia faatafunaina le fafine talitane sili faalelotu.—Tanielu 11:44.

O se Tala Mai Mātū

18. O le ā le isi taulaiga o le tauiviga a le tupu i mātū, ma o fea ua faatulaga ai o ia e lenei mea pe a oo i lona iuga?

¹⁸ Peitai, e iai le isi taulaiga o le tauiviga a le tupu i mātū. Ua faapea mai le agelu, o le a na “faatuina fale ie o lona maota i le va o sami, i le mauga matagofie ma le paia.” (Tanielu 11:45) I ona po o Tanielu, o le sami tele, sa o le Metitirani, ma o le mauga paia sa o Siona, lea na avea muamua ma mea na tu ai le malumalu o le Atua. I lea, i le faataunuuina o le valoaga, ua faia ai e le tupu sauā i mātū se tauiviga faavaegaau faasaga i tagata o le Atua! I se uiga faaleagaga i aso nei, o le “va o sami, i le mauga matagofie ma le paia,” ua maua ai lona tulaga i le laufanua faaleagaga o auauna faauuina a le Atua, o ē ua ō ese mai le “sami” o tagata ua ō ese mai le Atua, ma ua iai le faamoemoe o le pule mai i le Mauga o Siona faalelagi faatasi ma Iesu Keriso.—Isaia 57:20; Eperu 12:22; Faaaliga 14:1.

19. E pei ona faaalia mai i le valoaga a Esekielu, e mafai faapefea ona tatou iloaina le tala lea e faaosoina ai le osofaiga a Koku? (Tagai i faamatalaga i lalo.)

¹⁹ O Esekielu, o sē na tupulaga faatasi ma Tanielu, na ia valoiaina foi se osofaiga i tagata o le Atua i “ona aso amuli.” Na faapea mai o ia, o faiga sauā o le a faapogaia aʻe e Koku ma Makoku, ua suitulaga ai Satani le Tiapolo. (Esekielu 38:16) O fea le itu faafaatusa e sau ai Koku? Ua fetalai mai Ieova e ala ia Esekielu e faapea: “E sau lava oe ai lou nuu, le vaega pito sili ona mamao i mātū.” (Esekielu 38:15, NW) O lea, o le tala mai “le itu i matu” e ono avea o tala faasese a Satani e faagaepu ai le tupu i matu ma isi tupu uma ina ia osofaia tagata o Ieova. *—Faatusatusa i le Faaaliga 16:13, 14; 17:14.

20, 21. (a) Aisea e faaosoina ai e Koku atunuu, e aofia ai le tupu i mātū, ina ia osofaia tagata o le Atua? (e) Po o le a manuia ea lana osofaiga?

²⁰ Ua faamaopoopoina e Koku lenei osofaiga, o le osofaiga faaiu ona o le tulaga manuia o le “Isaraelu o le Atua,” o i latou, faatasi ai ma le motu o tagata e toatele o isi mamoe, ua lē toe avea ma vaega o lana lalolagi. (Kalatia 6:16; Ioane 10:16; 17:15, 16; 1 Ioane 5: l9) Ua tilotilo atu ma le lē fiafia Koku i se “nuu foi ua faapotopotoina nai nuu ese, ua iai oloa ma le  manuia [faaleagaga].” (Esekielu 38:12, NW; Faaaliga 5:9; 7:9) Ma i le faataunuuina o nei upu, ua manuia ai pea tagata o Ieova i aso nei e lē pei ona iai muamua. O le tele o atunuu i Europa, Aferika, ma Asia ia na faasaina ai le galuega muamua, ua saoloto nei la latou tapuaiga. I le va o le 1987 ma le 1992, e sili atu i le tasi le miliona “mea ua manaomia” sa aumaia mai nuu i le fale o Ieova, o lana tapuaiga moni. I le tulaga faaleagaga, o loo tamaoaiga ma filemu i latou.—Hakai 2:7; Isaia 2:2-4; 2 Korinito 8:9.

²¹ I le vaai atu i le manuia o le laufanua faaleagaga o Kerisiano e pei “o aai e le nofo ʻolo” e faigofie ona puea, ona faia ai lea e Koku se taumafaiga silisili ina ia tafieseina ai lenei mea ua fai ma faalavelave i lona puleaina atoatoa o tagata. (Esekielu 38:11) Peitai ane, e lē taulau o ia i lenei mea. Pe a osofaia e tupu o le lalolagi tagata o Ieova, o le a ‘oo uma ai i latou i lo latou fanoga.’ E faapefea?

Le Tupu Lona Tolu

22, 23. Pe a osofai mai Koku, o ai o le a tulai mai mo tagata o le Atua, ma o ā iuga?

²² Ua faapea mai Esekielu, o le osofaiga a Koku, o le faailoilo lea mo Ieova le Atua e tulai mai ai ona o ona tagata ma faaumatia ʻau a Koku “i mauga o Isaraelu.” (Esekielu 38:18; 39:4) Ua faamanatu mai ai ia i tatou le mea na fai atu ai le agelu ia Tanielu: “O ona po foi ia e tulai ai Mekaeli, o le alii sili, o le na te tulai ona o tagata o lou nuu; e oo mai foi aso vale, e leai sona tusa talu ona faatoa tupu o nuu, ua oo i ia lava aso; o ona po foi ia e laveaiina ai ou tagata, o i latou uma o e ua tusia i le tusi.”—Tanielu 12:1.

²³ I le 1914, o Iesu—le toa faalelagi o Mekaeli—sa avea ma Tupu i le Malo i le lagi o le Atua. (Faaaliga 11:15; 12:7-9) Talu mai lea taimi, ua tulai ai pea o ia ‘ona o fanau a tagata o Tanielu.’ Peitai, ua toeitiiti, ona “tulai” mai foi lea o ia i le suafa o Ieova, e pei o se Tupu Toa manumalo “na te taui ma sui i e ua le iloa le Atua, ma ua le anaana i le tala lelei a lo tatou Alii o Iesu Keriso.” (2 Tesalonia 1:8) O atunuu uma o le lalolagi, e aofia ai ma tupu o le valoaga a Tanielu, o le a “taufaitagituʻi” foi i latou uma. (Mataio 24:30) Faatasi ai ma manatu leaga o iai pea i o latou loto faasaga ‘i tagata o Tanielu,’ o le a fano i latou e faavavau i aao o ‘Mekaeli le alii sili.’—Faaaliga 19:11-21.

24. O ā āuga e ao ona oo ia i tatou i le suesueina o lenei valoaga a Tanielu?

²⁴ Pe tatou te lē o faanaunau atu ea e vaaia le manumalo sili o Mekaeli ma lona Atua, o Ieova? Auā o lea manumalo, o le a uiga i le “laveaiina,” po o le faaolataga, mo Kerisiano moni. (Faatusatusa i le Malaki 4:l-3.) O lea, a o tatou tepa atu ma le naunautai i le lumanai, tatou te manatua ai upu a le aposetolo o Paulo: “Ia e talaʻi atu le upu, ia e faamalosi i ona aso e taugalemu ai, ma ona aso e le taugalemu ai.” (2 Timoteo 4:2) Seia tatou taofi mau atu ia i le Upu o le ola ma saili ma le naunautai mamoe a Ieova a o faaauau pea aso e taugalemu ai. Ua tatou iai nei i le taufaaiuga o le tausinioga mo le ola. Ua ataata mai le taui. Talosia ia ia tatou finafinau ina ia tutumau seia oo i le iuga ma avea ai ma ē o le a faasaoina.—Mataio 24:13; Eperu 12:1.

[Faaopoopoga i lalo]

Pe E te Malamalama?

□ Ua oso faamalosi atu faapefea le tupu i toga i le tupu i mātū i le vaitaimi atoa o le iuga?

□ O ā mea e leʻi oo ina tatou iloaina e tusa i le taunuuga o le feteenaiga i le va o ia tupu e toalua?

□ O ā mea e lua e tutupu a o leʻi oo mai Amaketo e mautinoa lava e aafia ai le tupu i mātū?

□ O le a faapefea ona puipuia tagata o le Atua e ‘Mekaeli le alii sili’?

□ E ao faapefea ona tatou tali atu i la tatou suesueina o le valoaga a Tanielu?

[Fesili mo le Suʻesuʻega]

Pito i luga i le itu tauagavale ma le ogatotonu: UPI/Bettmann; pito i lalo i le itu tauagavale: Reuters/Bettmann; pito i lalo i le itu taumatau: Jasmin/Gamma Liaison

[Ata i le itulau 19]

Ua tapuaia e le tupu i mātū se atua e ese mai le atua o ē na muamua atu ia te ia

[Ē Ana le Ata]

Top left and middle: UPI/Bettmann; bottom left: Reuters/Bettmann; bottom right: Jasmin/Gamma Liaison