Vaaiga Mai le Nuu o le Folafolaga

Susū mai e Asiasi i le Sami o Kalilaia!

E ITIITI vaaiga e manatua gofie e ē faitauina le Tusi Paia na i lo le Sami o Kalilaia. Ae faamata e mafai ona e moeiini ma faaata se vaaiga o lenei sami manino, e aofia ai ona nofoaga autū e pei o le mea e tafe mai ma toe tafe ese ai le Vaitafe o le Ioritana, po o nofoaga o Kapanaumi ma Tiperia?

Faaalu se taimi e suesue ai le vaaiga mai i luga o loo i lalo, ma faatusatusa i faamatalaga o i le pusa. E fia nuu na ua faafuainumera mai i le faafanua e te iloa? O le tele o nuu e te iloa, o le tele foi lena o le tāua ma le uigā o le Tusi Paia ia te oe. I lena mafuaaga, sau seʻi fai sina asiasiga puupuu ae tāua.

O lenei vaaiga mai luga e sagai atu i mātū i sasaʻe. Tatou amata i le #1. O le ā lena vaega o le sami? O le itu i saute, lea e iai le Ioritana ma agaʻi ai i lalo i le va o Samaria ma Kiliata ma tafe atu i le Sami Mate. I le itu agavale e lata atu ai lau vaaiga i le itu lenei o le sami, lea e faaalia foi i le 1993 Calendar of Jehovah’s Witnesses.

O le Sami o Kalilaia e taatia tonu lava i le loloto o le vanu e taʻua o le Rift Valley, pe tusa ma le 700 futu po o le 200 mita i lalo ifo o le Sami Metitirane. A o suesueina le vaaiga mai luga, mātau mauga na e te iloaina atu i le matafaga i sasaʻe (faataamilo i le #7). E faapena foi ona iloa atu ai mauga ma maupuepue e latalata mai i le matafaga i sisifo, e faailoa mai ai faapea, o lenei sami e taatia mai e pei o se faatanoa, pe tusa ma le 13 maila po o le 21 kilomita le umi, ma o le lautele e tusa ma le 7 1/2 maila po o le 12 kilomita le lautele. Sa iai ni avanoa e latalata i le matafaga sa nonofo ai ni nuu e oo foi i ni aai e pei o Tiperia (#2). Manatua foi, na sopoia e se vaega o tagata mai Tiperia le sami e agaʻi atu i le nofoaga lea na fafagaina ai faavavega e Iesu tagata e 5,000.—Ioane 6:1, 10, 17, 23.

Pe a e oo i le tuaoi i le matafaga i matū mai Tiperia, e te pasia le vaega  lafulemu o Kenesareta (#3). * O le vaipanoa lenei na fai ai e Iesu le Lauga i luga o le Mauga, ma atonu i luga o le matafaga e lata ane, na ia valaauina ai Peteru ma isi e toatolu e avea ma “faifaiva i tagata,” e pei ona taʻua i inei. (Mataio 4:18-22) Pe a faaauau le faigamalaga, e te taunuu ai i Kapanaumi (#4), lea sa avea ma nofoaga tutotonu o galuega a Iesu, ma sa oo lava ina faasino atu i ai faapea “o lana lava aai.” (Mataio 4:13-17; 9:1, 9-11; Luka 4:16, 23, 31, 38-41) I le faaauau pea i le itu i sasaʻe e faataamilo i le sami, e te sopoia ai le (#5) i le mea o loo tafe atu ai le Vaitafe o le Ioritana i le sami. Ia ona e taunuu mai loa lea i le oganuu o Petesaita (#6).

E mafai ona tatou faaaogā e oo lava i nei nofoaga e faataitaia ai lou iloa e uiga i le Sami o Kalilaia, ona fesoasoani lea e te malamalama ai ma faaata i lou mafaufau tala o i le Tusi Paia. Ina ua uma ona fafaga e Iesu tagata e 5,000 i le nuu o Petesaita, ma uma foi taumafaiga a se motu o tagata e fai o ia ma tupu, ona ia auina lea o aposetolo i le vaa agaʻi i Kapanaumi. A o alu le malaga, na agi faafuasei le matagi mai mauga ma pupue aʻe ai galu tetele, ma na fefefe tele ai le au aposetolo. Ae na savali atu Iesu i le sami ia i latou, faamalū le matagi, ma latou taunuu saogalemu ai e lata i Kenesareta. (Mataio 14:13-34) O ē na ō mai mai Tiperia na latou toe sopoia atu foi Kapanaumi.—Ioane 6:15, 23, 24.

I le faaauau o le taamilosaga i le itu i sasaʻe o le sami, e te pasia ai le vaega e pei ona faasino i ai o “le nuu o Kerekese.” E manatua ai foi, o i inei na tutuli ai e Iesu temoni mai tagata e toalua. O na agaga leaga na iu ina ulu i se lafu puaa tele, lea na feosofi uma i le tofē i le sami. Mulimuli ane, na molimau atu se tasi o na tagata i nuu lalata ane o ē tautatala i le gagana Eleni i aai o Tekapoli. Na malaga atu Iesu ma toe maliu ese mai lea vaipanoa i se vaa ma sopoia ai le Sami o Kalilaia.—Mataio 8:28–9:1; Mareko 5:1-21.

A o faaauau lau malaga agaʻi i le faatausiusiuga o le sami, e te pasia ai se vaitafe tele lava (e taʻua o le Yarmuk) e tafe mai ai vai i le vaega i lalo o le Vaitafe o le Ioritana.

E lē o auiliilia mai e le Tusi Paia ni nofoaga mo nisi o mea na tutupu e lata i le Sami o Kalilaia, e pei o le toe faaali atu o Iesu i le tino ina ua toe faatuina mai a o fagogota Peteru ma isi aposetolo (o loo i lalo ifo). Pe e te manatu sa tupu lea mea e latalata i Kapanaumi? I so o se tulaga, o lou iloaina o le tāua o lenei sami, e fesoasoani lea ia te oe e faaata ai na mea moni.

[Faaopoopoga i lalo]

[Ata i le itulau 24]

1

2

3

4

5

6

7

M

S

S

S

[Ē Ana le Ata i le itulau 24]

Pictorial Archive (Near Eastern History) Est.

[Ē Ana le Ata i le itulau 24]

Pictorial Archive (Near Eastern History) Est.

[Ē Ana le Ata i le itulau 24, 25]

Garo Nalbandian

[Ē Ana le Ata i le itulau 25]

Pictorial Archive (Near Eastern History) Est.