Aisea e Tautino ai se Mea Sese?

O SE tasi lea o tala uigaese i talafaasolopito o taua. Na toe faafoisia e se avefeau e leʻi faaauupegaina ni fitafita e tusa ma le 400 sa matuā naunau e tau mo le fia taui ma sui. Ina ua faalogo i le olega a se fafine lototele e toatasi, ona taofia lea e le taʻitaʻi o na tagata le faataunuuina o le taua.

O lena taʻitaʻi o Tavita, o lē na avea mulimuli ane ma tupu o Isaraelu. Na ia faalogo atu i le fafine o Apikaila ona sa ia manao e faafiafia le Atua. Ina ua faaali atu ma le faautauta ia te ia e faapea, o le taui ma sui atu i lana tane o Napalu o le a agasala ai i le toto, na faaali atu ai e Tavita e faapea: “Faafetai ia Ieova le Atua o Isaraelu, o le na auina mai oe i le aso nei e faafetaiai ia te au. Faafetai foi i lou mafaufau, ma faafetai ia te oe, ina ua e taofia ia te au i lenei aso, ina neʻi ou alu e sasaa le toto, ma taui le leaga e loʻu lava lima.” Sa matuā faafetai Tavita ona ua faaaogā e le Atua, Apikaila e taofia ai o ia mai le faia o se mea sese matuia.—1 Samuelu 25:9-35.

I se salamo, na fesili ai Tavita: “O ai ea na te iloa mea sese?” (Salamo 19:12) I le pei o ia, atonu e lē mafai ona tatou iloaina a tatou mea sese seʻi vaganā ua faailoa mai e se tasi ia i tatou. I nisi o tulaga, o iuga lē fiafia e faamalosia ai i tatou ina ia iloa faapea ua tatou sese, ua lē atamai, po ua lē agalelei.

Leai se Mafuaaga mo le Faavaivai

E ui o i tatou uma e fai mea sese, ae lē o se mafuaaga lea e faavaivai ai. Na faaopoopo mai faapea sē e agavaa i feutagaiga i le va o malo, o Edward John Phelps: “O le tagata e leai sana mea sese e lē masani ona ia faia se mea.” Ma na fai mai foi le soʻo Kerisiano o Iakopo: “O mea e tele e sese ai i tatou uma.” (Iakopo 3:2) Pe mafai ea e se tamaitiiti laitiiti ona tau aʻoaʻo e savali e aunoa ma le tautevateva? E leai, o mea sese e aʻoaʻoina ai le tamaitiiti ma taumafai atili ai pea seia oo lava ina mafai ona faapaleniina lana savali.

Ina ia ola i se olaga paleni, e manaomia foi ona tatou aʻoaʻoina mai i a tatou mea sese atoa ma mea sese a isi. Talu ai o loo taʻua i le Tusi Paia le tele o mea na tutupu ia i latou o ē atonu e tutusa o latou tulaga ma i tatou, ua mafai ai ona tatou maua le fesoasoani ina ia alofia ai le faia o na lava mea sese na latou faia. O lea la, o le ā le mea e mafai ona tatou aʻoaʻoina mai i a latou mea sese?

O le Loto Maulalo o se Uiga Tāua

O se tasi o lesona tatou te aʻoaʻoina mai ai e faapea, e lē tausalaina e le Atua i latou uma o ē faia mea sese, ae na te faamasinoina na o i latou o ē e mumusu e faasaʻoina, pe afai e talafeagai ai. Na lē usitai le tupu o Isaraelu o Saulo i faatonuga a Ieova e uiga i le faatoilaloina o sa Amalekā. Ina ua fesiligia o ia e le perofeta o Samuelu, ona taumafai lea o Saulo e faamāmā le mataupu ma taumafai e tuuaia isi. Sa manatu tele o ia i le faamaualaloina o ia i luma o ona tagata na i lo o le faasaʻoina o le mea sese. O le mea lea, ‘na teena ai o ia e Ieova o se tupu.’—1 Samuelu 15:20-23, 30.

E ui sa faia e Tavita le tupu na sosoo ane ia Saulo ni mea sese matuia, ae sa faamagaloina o ia ona sa ia talia ma le loto maulalo le fautuaga ma le aoaiga. O le loto maulalo o Tavita na uunaia ai o ia e utagia upu a Apikaila. Sa sauniuni atu lana vaegaau mo le taua. Peitai, i luma o lana vaegaau, na tautino atu ai e Tavita e faapea ua ia faia se faaiuga faanatinati. O lena loto maulalo i lona olaga atoa na fesoasoani ia Tavita e sailia ai le faamagaloga ma faasaʻo ai ona ala.

O le loto maulalo foi e uunaia ai auauna a Ieova e faasaʻo ni tala tuulafoai. A o tu atu i luma o le au Saniterini, na faatonuina ai e le ositaulaga sili ina ia fepo ia Paulo. Na tali atu le aposetolo: “O oe na le pa faasinasinaina; o le a po atu le Atua ia te oe.” (Galuega 23:3) Atonu talu ai ona o le lē lelei o lana vaai, na lē iloa ai e Paulo po o ai lea na ia fai atu i ai seia oo ina  fesili atu ia te ia ē na tutū ai i inā e faapea: “Ua e faifai ea i le faitaulaga sili a le Atua?” O i inā na faatoʻā iloa ai e Paulo lana mea sese, ona ia faapea atu lea: “Le au uso e, ou te lei iloa o ia o le faitaulaga sili; auā ua tusia, Aua e te upu leaga i le alii o lou nuu.” (Galuega 23:4, 5; Esoto 22:28) Ioe, na tautino ma le loto maulalo e Paulo lana mea sese.

Na Latou Tautino Mea Sese

Ua faaalia foi i le Tusi Paia faapea na suia e nisi auala sese o o latou mafaufauga. O se faataitaiga, manatu i le faisalamo o Asafo. Talu ai le foliga lelei mai o tulaga faaletino o tagata amio leaga, na ia faapea atu ai: “E moni lava, ua ou faamamāfuaina loʻu loto.” Ae na toe faaleleia ona lagona ina ua alu atu i le fale o Ieova ma manatunatu loloto ai i aogā o le tapuaiga mamā. Na ia tautino mai foi lona sese i le Salamo e 73.

Na faatagaina foi e Iona mafaufauga sese e faapuaoa ai lona manatu. Ina ua uma ona talaʻi i Nineva, sa manatu tele o ia e uiga i le viiga faaletagata na i lo o le manatu i le faasaoina o ē o nonofo ai i lena aai. Sa lē fiafia Iona ina ua lē faasalaina e Ieova Nineva e ui ina salamō i latou, ae sa faasaʻoina e le Atua o ia. Na iloa mulimuli ane e Iona e faapea sa sese lona manatu, auā o le tusi o le Tusi Paia o loo faaigoa i lona igoa, ua faailoa mai ai ma le faamaoni ana mea sese.—Iona 3:10–4:11.

I le faaseseina o ia e faapea o Ieova le Atua, ae lē o Satani le Tiapolo na mafua ai ona puapuaga, na taumafai ai Iopu e faamaonia e faapea e lē tatau ona puapuagatia o ia. Sa ia lē iloa le finauga sili e faapea: Pe o le a tumau ea i le faamaoni auauna a le Atua ia te ia i lalo o tofotofoga? (Iopu 1:9-12) Ina ua uma atu tala a Eliu, ona sosoo loa lea ma Ieova i lona fesoasoani atu ia Iopu ina ia ona iloa lana mea sese, na ia tautino atu e faapea: “Ua ou tautala atu ma loʻu le mafaufau, . . . o le mea lea ua ou ʻinoʻino ai ia te au, ua ou salamo foi i le efuefu ma le lefulefu.”—Iopu 42:3, 6.

O le tautinoina o mea sese e fesoasoani lea ia i tatou e faatumauina ai se faiā lelei ma le Atua. E pei o faaaoaoga ia ua uma ona faaalia mai, na te lē tausalaina i tatou ona o a tatou mea sese pe afai tatou te tautino atu ma faia le mea tatou te mafaia e faasaʻoina ai mafaufauga sese, upu lē aogā, po o gaoioiga valea. E mafai faapefea ona tatou faatatauina lenei poto?

Faia se Gaoioiga e Uiga i a Tatou Mea Sese

O le faaalia ma le loto maulalo o se mea sese ma faia se mea e uiga i ai, e mafai ona faamalosia ai le fusi o le aiga. Mo se faataitaiga, atonu ona o le vaivai, po o le faasoesa soo, atonu ua soona inainā ai se matua i le aoaiina o lana tamaitiiti. O le musu e faasaʻoina lana mea sese e mafai ona iu ai i ni iuga leaga. E tusa ai ma lenei tulaga, na tusi ai le aposetolo o Paulo e faapea: “O outou tamā foi, aua neʻi tou faaonoono atu i a outou fanau, a ia tausi atu i ai i aoaiga ma apoapoaiga a le Alii.”—Efeso 6:4.

Na taʻua ma le mafana e se talavou Kerisiano e igoa ia Paulo e faapea: “E masani lava ona faatoese mai Papa pe a ia lagona ua soona sauā tele o ia. Sa fesoasoani  lena mea ia te aʻu e faaali atu ai le faaaloalo ia te ia.” O se faaiuga totino a le tagata lava ia pe afai ua tatau se faatoesega i se tulaga faapitoa e tulai mai. E ui i lea, o le faatoesega e manaomia ona sosoo mai ai ma taumafaiga filigā ina ia alofia ai le toe faia o le mea sese lava lea e tasi i le lumanai.

Ae e faapefea pe afai ua faia e le tane po o le avā se mea sese e mafua ai le lē fiafia? O le faailoa atu ma le faamaoni, se faatoesega ua faagaeetia mai le loto, ma se loto faamagalo, o le a fesoasoani lea e faatumauina ai le alofa i le la faiā. (Efeso 5:33; Kolose 3:13) Sa lē fia faamaualuga naua Jesús, o se tane Sepania ua silia i le 50 ona tausaga, i le faatoese atu i lana avā, o Albina. Na faapea mai lana avā: “E iai se tu masani ia i maʻua, o le faatoese atu pe afai e faatiga le isi i le isi. E fesoasoani tele lenei mea ia i maʻua e faaali atu ai le alofa o le tasi i le isi.”

Pe a Faia e se Toeaina se Mea Sese

O le tautino atu o mea sese ma faatoesega faamaoni o le a fesoasoani foi lea i toeaina Kerisiano ina ia galulue autasi ai ma ‘faaalia le ava o le tasi i le tasi.’ (Roma 12:10) Atonu e faatalatu se toeaina i le tautino atu o se mea sese ona e fefe o ia ina neʻi teʻi ua faaleamanaiaina ai lana pule i totonu o le faapotopotoga. Ae ui i lea, o le taumafai e tausaoina, faagalogalo, po o le faaleamanaiaina o se mea sese, e foliga mai e faapogaia ai se lē mautonu o isi i lana pulega. O se uso taumatuaina o lē e loto maulalo e faatoese, ona o ni faamatalaga lē mafaufau, na te mauaina ai le faaaloalo mai i isi.

Ua manatua e Fernando, o se toeaina i Sepania se mea na tupu i se ovasia asiasi o le matagaluega sa faafoeina se aufaatasiga toatele o toeaina, ma na ia faia ai se tala lē saʻo i le auala e faia ai le sauniga. Ina ua faasaʻo ma le faaaloalo o ia e se uso e tusa ai ma lana faamatalaga sa fai, na faailoa atu loa e le ovasia o le matagaluega lona sese. Na faapea mai Fernando: “Ina ua ou iloa ua ia faailoa atu lana mea sese i luma o na toeaina, na faagaeetia ai aʻu. Na atili ai loʻu faaaloalo ia te ia ina ua uma lea faatoesega. O lana faaaoaoga na ou aʻoaʻoina ai le tāua o le iloaina o oʻu lava vaivaiga.”

Ia Vave ona Tautino se Mea Sese

O se faatoesega, e masani lava ona talisapaia, ae maise lava pe afai e vave ona fai. O le mea moni, o le a sili atu ona lelei pe afai e vave ona tatou tautino atu a tatou mea sese. Ina ia faataitaia: Ia Oketopa 31, 1992, na faailoa atu ai e Pope Ioane Paulo II e faapea sa “sese” le Inquisition [Taupulega a le Lotu Pope] i le 360 tausaga ua mavae i le faasalaina lea o Galileo i lona faasalalauina atu e faapea, o le lalolagi e lē o le ogatotonu lea o le vateatea aoao. Ae peitai ane, o le tolopoina o le faatoesega mo lena vaitaimi umi e iu ai ina faaitiitia lona tāua.

E faapena foi ona moni lea tulaga i faiā totino faaletagata. O se faatoesega e vave ona fai, e mafai lava ona fofoina ai se manuʻa na mafua ona o se upu po o se gaoioiga lē agalelei. Na uunaia i tatou e Iesu ina ia aua neʻi faatuai ona sailia le filemu, i le fetalai mai: “Afai foi e te avatu lau taulaga i le fata faitaulaga, ona e manatua ai lea ua i lou uso se mea e tiga ai o ia ia te oe, ina tuu ia i lea mea o lau taulaga i luma o le fata faitaulaga, ae alu oe ia muai faalelei i lou uso, i le e sau ai, ma avatu lau taulaga.” (Mataio 5:23, 24) E masani lava, o le toe faafoisiaina o le faiā filemu e manaomia ai ona tautino atu e faapea ua sese ona tatou taulimaina se mataupu, ma ole atu mo le faamagaloga. O le umi tatou te faatali ai i le faia o lenei mea, o le sili atu foi lena ona faigata.

Ia Fiafia e Tautino Mea Sese

E pei ona faataitaia i le faaaoaoga a Saulo ma Tavita, o le auala tatou te taulimaina ai a tatou mea sese e mafai ona aafia ai o tatou ola. Na teena ma le loto maaa e Saulo le fautuaga, ma sa faateleina ai ana mea sese, ma iu ai i lona oti a o loo i se tulaga e lē o fiafia i ai le Atua. E ui lava i mea sese ma agasala a Tavita, ae peitai, na ia salamō ma talia le faasaʻoga ma tumau ai i le faamaoni ia Ieova. (Faatusatusa i le Salamo 32:3-5.) Pe e lē o lo tatou faanaunauga ea lena?

O le taui sili mo le tautinoina ma le faasaʻoina o se mea sese po o le salamō i le agasala, o le iloa lea e faapea ua faamagaloina e le Atua. Na faapea mai Tavita: “Amuia le tagata ua . . . ufitia lana agasala. Amuia le tagata e le taʻusalaina e Ieova.” (Salamo 32:1, 2) O lea la, maeu le atamai o lenei mea, o le tautino o se mea sese!

[Ata i le itulau 29]

Pe e mafai ea e se tamaitiiti laitiiti ona aʻoaʻo e savali e aunoa ma le tautevateva?