Ia Loto Tetele!
Ia Loto Tetele!
“Ia fai atu ma le loto tetele: ‘O Ieova o loʻu fesoasoani ia.’”—EPERU 13:6, NW.
1. O le ā le loto tetele na faaalia e i latou o ē na aʻoaʻoina le upu moni a le Atua i le uluai senituri T.A.?
O LE uluai senituri o o Tatou Aso Taatele. Na afio mai ai le Mesia ua loa ona faatalitalia. Sa lelei ona ia aʻoaʻoina ona soʻo ma amataina se galuega talaʻi e matuā tāua. O le taimi tonu lava lea mo tagata e faalogo ai i le tala lelei o le Malo o le Atua. O lea, o tane ma fafine o ē na aʻoaʻoina le upu moni, sa latou folafolaina atu ma le lē fefefe lena feau ofoofogia.—Mataio 28:19, 20.
2. Aisea e manaomia ai e Molimau a Ieova le loto tetele i aso nei?
2 Sa leʻi faavaeina le Malo i na aso. Peitai, sa vavalo le Tupu Tofia o Iesu Keriso e faatatau i lona faatasi mai lē vaaia i le lumanai i le mana o le Malo. E faailogaina lea i mea e pei o taua e lē mafaatusaina, o oge, o faamaʻi, o mafuie, ma le talaʻiina o le tala lelei i le lalolagi aoao. (Mataio 24:3-14; Luka 21:10, 11) I le avea ma Molimau a Ieova, tatou te manaomia le lototele e faafetaiaia ai nei tulaga, atoa ma sauaga tatou te fetaiai. O le mea lea e aogā tele ai ona manatunatu i tala o loo i le Tusi Paia e uiga ia i latou na folafolaina le Malo ma le loto tetele i le uluai senituri T.A.
Loto Tetele e Faaaoao ia Keriso
3. O ai ua ua saunia le faaaoaoga sili o le lototele, ma o le ā sa taʻua e uiga ia te ia i le Eperu 12:1-3?
3 Ua saunia e Iesu Keriso le faaaoaoga e sili ona lelei o le lototele. Ina ua uma ona faasino atu i le ‘motu o tagata e toatele’ o molimau a Ieova loto tetele a o lumanai le faa-Kerisiano, ona taulai atu loa lea o le aposetolo o Paulo ia Iesu i lona faapea mai: “O i tatou foi, o loo ua vagavagaia e le faapotopotoga o e matamata mai e faapea ona toatele, ina tatou tuu ese ia o mea mamafa uma, atoa ma le agasala e faalavelavegofie ai i tatou, ia tatou taufetuli ma le onosai i le ala tanu o i o tatou luma, ma ia vaavaai atu ia Iesu o le na te taʻitaʻiina ma le na te faaatoatoaina le faatuatua; o le na onosai i le satauro, na faatauvaa ia te ia le mā, ona o le olioli sa tuu i ona luma, ua nofo foi o ia i le itu taumatau o le nofoālii o le Atua. Auā, ia outou mafaufau i le na onosai i le faatuʻi ese faapena ia te ia o e agasala, neʻi faavaivai o outou loto ma outou le lavatia.”—Eperu 12:1-3.
4. Na faapefea ona faaalia e Iesu le lototele ina ua tofotofoina e Satani?
4 Sa teena ma le lototele e Iesu le tofotofoina o ia e Satani i le vao ina ua mavae lona papatisoga, lona mafaufau loloto, lana tatalo, atoa ma lana anapogi i le vao mo le 40 o aso. I le tofotofoina e le Tiapolo ina ia faaliu areto maa, sa teena e Iesu talu ai e sese ona faia se vavega e faamalieina ai se faanaunauga totino. Na fetalai atu Iesu. “Ua tusia, E le na o mea e ʻai e ola ai le tagata, a o afioga uma e tūlei mai i le fofoga o le Atua.” Ina ua luiina o ia e Satani ina ia oso i lalo mai le tumutumu o le malumalu, na teena e Iesu talu ai ona o se agasala le tofotofoina o le Atua ina ia faasaoina o ia mai le pule o ia i lona lava ola. Na fetalai Iesu: “Ua tusia foi, Aua e te tofotofo i le Alii lou Atua.” Na ofoina atu e Satani ia te ia malo uma lava o le lalolagi mo le na o le tasi lava lana gaoioiga e fai, o le “faapaū ma ifo,” peitai sa lē faalotolotolua Iesu ma lagolagoina le lui a le Tiapolo e faapea, o le a leai se tasi e tumau i le faamaoni i le Atua i lalo o tofotofoga. O lea na tali atu ai Iesu: “Ina alu ese ia oe Satani; auā ua tusia, E te ifo atu i le Alii lou Atua, ua na o ia lava e te auauna i ai.” Ina ua maeʻa lena, “ona alu ese ai lea ia te ia,” o Lē na tofotofoina o ia “seia i se aso.”—Mataio 4:1-11; Luka 4:13.
5. O le ā e mafai ona tatou teena ai tofotofoga?
5 Sa gauai Iesu ia Ieova ae tetee atu ia Satani. Pe afai foi tatou te faia lea lava tulaga e tasi, o le ‘gauai atu o i tatou lava i le Atua ma tetee atu i le Tiapolo, o le a sola ese o ia mai ia i tatou.’ (Iakopo 4:7) I le pei o Iesu, e mafai foi ona tatou teena ma le loto tetele tofotofoga pe afai tatou te faatatauina le Tusi Paia, atonu pe oo lava ina tatou siiina mai ai mau na i le taimi e tofotofoina ai i tatou e faia le agasala. Pe faamata tatou te lolo atu i le tofotofoga ina ia faia le gaoi pe afai o loo faamanatu mai pea ia i tatou i lena taimi le tulafono a le Atua: “Aua e te gaoi”? Pe ono lolo atu ea ni Kerisiano se toalua i le faia o feusuaiga faaleituaiga lē mamā pe afai e sii atu ma le lototele e se tasi o i laua upu nei: “Aua le mulilua”?—Roma 13:8-10; Esoto 20:14, 15.
6. Sa faapefea ona avea Iesu o sē na manumalo ma le lototele i le lalolagi?
6 Ona e inoino le lalolagi i Kerisiano, e tatau la ona tatou alofia lona agaga ma ana amioga leaga. Na fetalai atu Iesu i ona soʻo: “E maua foi outou e le puapuaga i le lalolagi, a ia outou loto tetele, ua ou manumalo i le lalolagi.” (Ioane 16:33) Sa manumalo o ia i le lalolagi i lona lē faataitai i ai. O lana faaaoaoga i le avea ma sē na manumalo ma le tu matilatila o lona tausisi i le faamaoni, e mafai ona faatumulia ai i tatou i le lototele e faataitai ia te ia e ala i le tumau pea ona vavae ese mai lenei lalolagi ma ia mamā mai ai.—Ioane 17:16.
Loto Tetele e Faaauau Pea le Talaʻiga
7, 8. O le ā o le a fesoasoani ia i tatou ina ia tumau ai i le talaʻiga e ui lava i sauaga?
7 Sa faalagolago Iesu ma ona soʻo i le Atua mo le lototele e faaauau ai le talaʻiga e ui lava i sauaga. Sa faataunuuina ma le lototele e Keriso lana faiva e ui lava i sauaga, ma ina ua mavae le Penetekoso i le 33 T.A., sa faaauau ai pea e ona soʻo na sauaina ona faalauiloa atu le tala lelei e ui lava ina taumafai taʻitaʻi lotu Iutaia e taofia i latou. (Galuega 4:18-20; 5:29) Na tatalo faapea le au soʻo: “Le Alii e, ia e silasila i lo latou faamatau mai; ma ia e foai mai i au auauna, ina ia latou matuā tautala i lau afioga ma le faamalosi.” Ma o le ā na tupu? Fai mai le faamatalaga: “Ua mavae atu la latou tatalo, ona luluina lea o le mea ua faapotopoto ai i latou; ua tutumu foi i latou uma i le Agaga Paia, ma ua tautala atu i le afioga a le Atua ma le faamalosi.”—Galuega 4:24-31.
8 Talu ai ona o le toatele o tagata i aso nei latou te lē fia uai mai i le tala lelei, o lea e manaomia ai pea le lototele ina ia faaauau ai ona talaʻi atu ia i latou. Ae maise lava pe a sauaina auauna a Ieova, e manaomia ai lava le lototele mai le Atua ina ia avatu ai se molimau maeaea. (Galuega 2:40; 20:24) O lea na taʻu atu ai e Paulo o lē na faalauiloaina ma le lototele le Malo, i se talavou sa la galulue faatasi, o lē sa lē lava sona poto masani e faapea: “Auā ua le foaiina mai e le Atua ia te i tatou le Agaga e mataʻu ai, a o le Agaga e faamalosi ai, ma alofa ai, ma mafaufau tonu ai. O lenei, aua e te mā i le molimau i lo tatou Alii, po o ona o aʻu o loo noanoatia ona o ia; a ia tiga faatasi i tatou ona o le tala lelei, e tusa ma le mana o le Atua.” (2 Timoteo 1:7, 8) Afai tatou te tatalo mo le lototele, o le a mafai ona tatou faaauauina le talaʻiga, ma e oo lava i sauaga, o le a lē mafai ona aveesea ai lo tatou olioli o ni ē e folafolaina atu le Malo.—Mataio 5:10-12.
Loto Tetele e ʻAu ma Ieova
9, 10. (a) O le ā le mea sa faia e tagata Iutaia ma Nuu Ese i le uluai senituri ina ia avea ai ma soʻo papatisoina o Keriso? (e) Aisea na manaomia ai le lototele ina ia avea ai ma Kerisiano?
9 E toatele tagata Iutaia ma Nuu Ese o le uluai senituri na latou lafoaia ma le loto tetele uputuu e lē faale-Tusi Paia ina ia avea ma soʻo papatisoina o Keriso. Ina ua faatoʻā mavae le Penetekoso i le 33 T.A., na “matuā faatoateleina le au soʻo i Ierusalema; ua anaana foi faitaulaga e toatele lava i le faatuatua.” (Galuega 6:7) O na Iutaia sa iai le lototele e vavae ese ai mai noanoataga faalelotu ae talia Iesu o le Mesia.
10 E amata mai i le 36 T.A., e toatele tagata o Nuu Ese na talitonu. Ina ua faalogo Konelio, o lona au aiga, ma isi o Nuu Ese i le tala lelei, ona latou taliaina loa lea, ma maua le agaga paia, ma ua “papatisoina i latou i le suafa o” Iesu Keriso. (Galuega 10:1-48) I Filipi, na taliaina ai e se leoleo o le falepuipui, o se Nuu Ese ma lona aiga le faa-Kerisiano, “ona papatisoina loa lea o ia ma lona aiga uma.” (Galuega 16:25-34) Sa manaomia e Kerisiano le lototele e faia ai na laasaga talu ai ona o Kerisiano o se vaega e toaitiiti, e sauaina, ma e lē taliaina e le toatele. O loo faapena lava. Ae afai e te leʻi tuuina atu oe i le Atua ma papatisoina e avea o se tasi o Molimau a Ieova, pe e lē o le taimi ea lenei mo oe e faia ai nei laasaga ma le lototele?
Loto Tetele i Aiga e Lē Talitonu
11. O ā faaaoaoga lelei o le lototele na saunia e Eunike ma Timoteo?
11 Sa faataatia e Eunike ma lana tama o Timoteo ni faaaoaoga sili ona lelei o le faatuatua malosi i totonu o se aiga e lē talitonu uma. E ui lava o le tane a Eunike o se tagata faapaupau, peitai sa ia aʻoaʻoina lana tama tama “i le Tusi Paia” a o tama meamea o ia. (2 Timoteo 3:14-17) I le avea ma Kerisiano, sa ia faaalia ‘le faatuatua e aunoa ma so o se faagutugutulua.’ (2 Timoteo 1:5) Sa ia te ia foi le lototele e aʻoaʻoina ai Timoteo i aʻoaʻoga faa-Kerisiano, ae i le taimi lava foi lea sa ia faaalia ai lona faaaloalo mo le tulaga ulu o lana tane lē talitonu. Ma le mautinoa, sa matuā tauia lava lona faatuatua ma le lototele ina ua filifilia lana tama sa lelei le aʻoaʻoina e avea ma aumea a Paulo i ana malaga faamisionare. Maeu le mafai ona faalaeiauina ai o mātua Kerisiano i lenei mea o ē o loo faapena foi o latou tulaga!
12. O le ā le ituaiga tagata na iai Timoteo, ma o ai i aso nei ua faamaonia le pei o ia?
12 E ui lava sa ola aʻe Timoteo i totonu o se aiga e lē talitonu uma, ae sa ia taliaina ma le lototele le faa-Kerisiano ma avea ai o se tagata faaleagaga o lē sa mafai ona faapea atu ai Paulo: “Ae ou te faamoemoe i le Alii o Iesu ou te vave auina atu Timoteo ia te outou [tagata Filipi], ina ia fiafia au nei foi, pe a aʻu iloa se tala ia te outou; auā e le o ia te au se tasi ma te loto faatasi, na te tausia faamaoni mea e manuia ai outou. . . . A ua outou iloa lona faamaoni, na ia auauna faatasi ma aʻu i le tala lelei, e pei o se atalii i lona tamā.” (Filipi 2:19-22) I aso nei, e toatele tama ma teine o loo ola aʻe i aiga e lē talitonu uma, ua latou taofimauina ma le loto tetele le faa-Kerisiano moni. Ua latou pei o Timoteo i le tuuina atu o le faamaoniga mo i latou lava, ma maeu so tatou olioli ona ua avea i latou ma vaega o le faalapotopotoga a Ieova!
Loto Tetele e ‘Faataulaga o Tatou Ola’
13. I le ā le auala na faaalia ai e Akula ma Pisila le loto tetele?
13 Na faataatia e Akula ma lana avā o Pisila se faaaoaoga e ala i le loto tetele e faataulaga o la ola mo o la uso talitonu. Na la taliaina Paulo i lo la fale, ma latou galulue faatasi i le faiga o fale ie, ma fesoasoani ia te ia i le faatuina o le faapotopotoga fou i Korinito. (Galuega 18:1-4) I le 15 tausaga o la latou faigauo, sa oo ai lava ina la tuuina atu o la ola i se tulaga lamatia e fai ma sui o ia i se auala e lē iloa. Sa la nonofo ai i Roma ina ua ia taʻu atu i Kerisiano i inā e faapea: “Ua ou alofa atu ia Pisila ma Akula, na la fai galuega faatasi ma aʻu i le galuega a Keriso Iesu. O i laua ia na la tuu atu o la ua e sui aʻi aʻu, ia aʻu ola; e le na o aʻu e faafetai ia te i laua, a e atoa ma ekalesia uma i nuu ese.”—Roma 16:3, 4.
14. E ala i le faataulagaina o o la ola mo Paulo, o le ā le poloaiga na gaoioi ai ma le talafeagai Akula ma Pisila?
14 E ala i le faataulagaina o o la ola mo Paulo, na gaoioi ai Akula ma Pisila e tusa ai ma upu a Iesu e faapea: “O le poloaiga fou ou te tuu atu ai ia te outou, ia outou fealofani; faapei ona ou alofa atu ia te outou, ia fealofani foi outou.” (Ioane 13:34) E “fou” lenei poloaiga ona e talu ai, e sili atu lea i le mea sa manaomia i le Tulafono faa-Mose o le alofa atu o le tagata i lona tuaoi e pei ona ia alofa ia te ia lava. (Levitiko 19:18) E matuā manaomia ai le alofa faataulagaina totino lea e mafai ona tuuina atu ai e se tasi lona lava ola mo isi, e pei ona sa faia e Iesu. Na siiina mai e le tusitala o Tetuliano o lona lua ma le lona tolu o senituri T.A., upu a tagata o le lalolagi e faatatau i Kerisiano ina ua ia tusi mai e faapea: “‘Vaai,’ fai mai tagata o le lalolagi e faapea, ‘maeu lo latou alolofa atu o le tasi i le isi . . . ma maeu foi lo latou nofo sauni e oo lava i le oti e fai ma sui mo isi.’” (Apology, mataupu XXXIX, 7) Ae maise lava pe afai e sauaina i tatou, atonu e manaomia ai ona faaalia le alofa faaleuso e ala i le lototele e faapuapuagatia o tatou ola ina ia alofia ai le faailoaina o o tatou uso talitonu i ē e faia faasalaga faamanu po o le oti i lima o le fili.—1 Ioane 3:16.
O le Lototele e Maua ai le Olioli
15, 16. E pei ona faaalia i le Galuega mataupu e 16, atonu e faapefea ona fusia faatasi le lototele ma le olioli?
15 Na saunia e Paulo ma Sila le faamaoniga e faapea o le faaalia o le lototele i taimi o tofotofoga e mafai ona maua ai le olioli. E ala i le faatonuga a le faamasino i le aai o Filipi, na sasaina ai i laua i laau ma tuuina i le falepuipui. Peitai, sa lē matatau ai i laua. E ui lava i o la tulaga faigata, ae sa iai pea ia i laua le lototele mai le Atua ma le olioli, e maua mai ai mo Kerisiano faamaoni.
16 I le tulua o po, sa tatalo ai Paulo ma Sila ma vivii atu i le Atua i le pese. Na faafuasei lava ona luluina le falepuipui i se mafuie, ma motusi ai o la noanoataga, ma matala ai faitotoa o le falepuipui. Na tuuina atu ai se molimau lototele i le pule o le falepuipui ma lona auaiga o ē sa matatau, ma iu ai i le papatisoina o i latou e avea ma auauna a Ieova. Ua “olioli o ia ma lona aiga uma, ua faatuatua i le Atua.” (Galuega 16:16-34) Maeu se olioli na maua e Paulo ma Sila! I le manatunatu i lenei tala faatasi ma isi faaaoaoga faale-Tusi Paia o le lototele, e mafai faapefea la ona tatou faatumauina lo tatou loto tetele o ni auauna a Ieova?
Ia Faaauau Pea ona Loto Tetele
17. E pei ona faaalia i le Salamo 27, e faapefea ona fesootai le faamoemoe ia Ieova ma le lototele?
17 O le faamoemoe ia Ieova o le a fesoasoani ia i tatou e tumau ai i le lototele. Na pese Tavita e faapea: “Ina faatalitali atu ia ia Ieova, ina loto tele ia, e faamalosia foi e ia lou loto; ina faatalitali lava ia ia Ieova.” (Salamo 27:14) Ua faaalia i le Salamo 27 e faapea sa faalagolago Tavita ia Ieova e avea “o se malosi” o lona ola. (Fuaiupu 1) O le matauina o le auala na feagai ai le Atua ma ē na sauā ia Tavita i le taimi ua mavae na faalototeleina ai o ia. (Fuaiupu 2, 3) O le faaalia o le talisapaia mo le tapuaiga moni ia Ieova o se tasi lena o vala. (Fuaiupu 4) O le faalagolago i le fesoasoani mai ia Ieova, lana puipuiga, ma le laveaiina, sa faamalosia atili ai foi Tavita e faaalia le lototele. (Fuaiupu 5-10) O le isi mea sa fesoasoani atili ia te ia, o le faaauau pea lea ona taitaia o ia e mataupu silisili o ala amiotonu o Ieova. (Fuaiupu 11) O le tatalo ma le mautinoa mo le laveaiina mai o ia mai ē na sauā ia te ia, faatasi ai ma le faatuatua ma le faamoemoe, sa fesoasoani foi ia Tavita ina ia lototele ai. (Fuaiupu 12-14) E mafai foi ona tatou atiina aʻe lo tatou lototele i auala faapena, e faaalia ai faapea o loo tatou faaalia moni lava le “faamoemoe ia Ieova.”
18. (a) O le ā ua faaalia ai faapea o le faatasitasi pea ma uso tapuai ia Ieova e mafai ona fesoasoani ia i tatou e tumau ai i le lototele? (e) O le ā le vaega a sauniga faa-Kerisiano e fai i le atiina aʻe o le lototele?
18 O le auaufaatasi pea ma ē e tapuai ia Ieova e mafai ona fesoasoani ia i tatou ina ia tumau ai i le lototele. Ina ua talosaga atu Paulo i luma o Kaisara ma i lana malaga i Roma, sa faafeiloaia ai o ia e uso talitonu i le Maketi o Apio ma Fale Faatau e Tolu. Fai mai le faamatalaga: “Ua vaai atu Paulo ia te i latou, ona faafetai lea i le Atua, ma loto tele ai.” (Galuega 28:15) A o tatou auai pea e lē aunoa i sauniga faa-Kerisino, ua tatou utagia ai le fautuaga a Paulo e faapea: “Ia tatou manatunatu foi le tasi i le tasi, ina ia taufaatupu ai le alofa ma galuega lelei; aua le lafoaiina le faapotopotoina o i tatou, pei o le masani o isi, a ia fefaamafanafanai; ia atili ai foi ona faapea ina ua outou iloa o le aso o loo tāulata mai.” (Eperu 10:24, 25) O le ā lona uiga ia fefaamafanafanaai le tasi i le isi? O le fefaamafanafanaai o lona uiga ia “faagaeeina i le lototele, i le agaga, po o le faamoemoe.” (Webster’s Ninth New Collegiate Dictionary) E mafai ona tatou faia mea e tele e faalaeiauina ai isi Kerisiano ia loto tetele, ma o a latou faalaeiauga e faapena foi ona atiina aʻe ai lenei uiga ia i tatou.
19. E faapefea i le Tusi Paia ma lomiga faa-Kerisiano ona fesootai ma le faatumauina o lo tatou lototele?
19 Ina ia tumau i le lototele, e tatau ona tatou suesue pea e lē aunoa i le Afioga a le Atua ma faatatau ana fautuaga i o tatou olaga. (Teuteronome 31:9-12; Iosua 1:8) E tatau ona aofia ai i a tatou suesuega faifai pea ni lomiga faa-Kerisiano e faavae mai i le Tusi Paia, auā o ana fautuaga ua uma ona saunia o le a fesoasoani ia i tatou e faafetaiaia ai tofotofoga o le faatuatua faatasi ai ma le malosi mai le Atua. Mai tala o loo i le Tusi Paia, ua tatou iloa ai le auala na faaalia ai e auauna a Ieova le loto tetele i vala eseese. I le taimi nei, atonu tatou te lē o iloa pe faapefea ona aogā na faamatalaga ia i tatou, ae o loo i le Afioga a le Atua le mana, ma o mea tatou te aʻoaʻoina mai ai, e mafai ona aogā pea ia i tatou. (Eperu 4:12) Mo se faataitaiga, afai o le mataʻu i tagata o le a amata ai ona aafia la tatou faiva, e mafai ona tatou manatu i le auala na faaalia ai e Enoka le lototele e folafolaina atu le feau a le Atua i tagata lē amioatua.—Iuta 14, 15.
20. Aisea e mafai ai ona faapea atu, e tāua le tatalo pe afai tatou te mananao e tumau pea i le loto tetele o ni auauna a Ieova?
20 Ina ia faatumauina le lototele e pei ona tatau i auauna a Ieova, e tatau ona tatou finafinau i le tatalo. (Roma 12:12) Sa onosai ma le lototele Iesu i ona tofotofoga ona sa ia “aioi atu ma le tagi tele ma loimata i le na mafaia ona faaola ia te ia nai le oti, na faafofogaina foi o ia i le mea na ia fefe ai.” (Eperu 5:7) E ala i le pipiimau atu ia Ieova i le tatalo, o le a lē pei ai i tatou o tagata palaaai o le lalolagi ua agaʻi atu i le “oti faalua” e leai se toetu. (Faaaliga 21:8) O le puipuiga mai le Atua ma le ola i le lalolagi fou a le Atua e mo ana auauna loto tetele.
21. Aisea e mafai ai e Molimau faamaoni a Ieova ona loto tetele?
21 I le avea ma Molimau faamaoni a Ieova, e lē manaomia ona tatou fefefe i temoni ma fili faaletagata, auā o loo ia i tatou le lagolagosua mai le Atua ma le faaaoaoga lototele a Iesu o sē na manumalo i le lalolagi. O le atiina aʻe faaleagaga o le auaufaatasi ma tagata o Ieova e fesoasoani foi ia i tatou e faaalia ai le lototele. O loo fausia aʻe foi lo tatou lototele e ala i le taitaiga ma fautuaga mai le Tusi Paia ma lomiga faa-Kerisiano. Ma o tala o loo i le Tusi Paia e uiga i auauna a le Atua i le taimi ua mavae, e fesoasoani foi lea ia i tatou ina ia savavali ai i ona ala ma le loto tetele. O le mea lea, i nei aso faigata e gata ai, seʻi o tatou agaʻi ai pea i luma ma le faamalosi i le auaunaga paia. Ioe, ia avea tagata uma o Ieova ma ē e loto tetele!
E Faapefea ona E Tali?
□ E mafai faapefea i le faaaoaoga a Iesu ona faatumulia ai i tatou i le lototele?
□ O le ā le mea na loto tetele ai Iesu ma ona soʻo e faaauau le talaʻiga?
□ Aisea na manaomia ai e tagata Iutaia ma Nuu Ese le loto tetele ina ia ʻau ma Ieova?
□ O ā faaaoaoga o le lototele na saunia e Eunike ma Timoteo?
□ O ā faamaoniga e iloa ai e aumaia e le lototele le olioli e ui lava i sauaga?
[Fesili mo le Suʻesuʻega]
[Ata i le itulau 18]
I le pei o Iesu, e mafai ona tatou teena tofotofoga pe afai tatou te faatatauina ma siiina atu mau o le Tusi Paia