Kerisiano Maelega i Peretania

E itiiti ifo i le 10 pasene o le 56 miliona o tagata i Peretania, o loo avea nei ma Kerisiano maelega, e tusa ai ma le mekasini o le Economist. E masani lava i Aso Sa, ona itiiti ifo i le fa miliona tagata e auai i sauniga lotu. E na o le 1.1 miliona o nei tagata, o ni ē e lotu Egelani. E ui lava la i le taatele o le lē talitonu i le Atua, ae ua avea pea le Lotu Egelani i lona tulaga faavaeina o le lotu a le Atunuu. Ua toe faapea mai lea lava mekasini: “Ua au tausagā ona lē avea Peretania ma se atunuu Kerisiano, ae e lē o fia ioeina lona tulaga lē talitonu i se Atua ona o lona manatu i lona faavae.” E letioa ona mananao ia le au faipolotiki ma le au fainusipepa ina ia solofua le faavae o le Lotu, ia motusia le sootaga a le Lotu ma le Malo.

Ua faapea mai ma le faanoanoa se tusitala o lona sefuluiva senituri o le Economist, e suafa ia Walter Bagehot e faapea: “O tagata e faapea mai e Kerisiano ae faaletino moni lava, ua sili lea ona leaga.” Ae i le uluai senituri T.A., na fetalai atu ai Iesu Keriso i ona soʻo e faapea, “e lē ni o le lalolagi i latou, faapei o aʻu foi, e lē so le lalolagi aʻu.” (Ioane 17:16) Ae ui i lea, na ia aauina atu i latou i le lalolagi e talaʻia le Malo o le Atua. Ua faapena foi i aso nei, o Molimau a Ieova i le lalolagi aoao ua lauiloa mo le talaʻiga ma le maelega i le lautele “ma lea fale ma lea fale.”—Galuega 20:20.

A faatusatusa i ē e lotu Egelani, o Molimau a Ieova e toʻa 126,173 i Peretania, ua na o se fuainumera itiiti. Ae latou te faaaluina le 20 itula i le masina e auai ai i sauniga faa-Kerisiano. E faaopoopo i lena, i le 1992, na faaaluina ai e Molimau taitoatasi le tuufaatatau e 16 itula i le masina, i le faalauiloaina atu i isi o le tala lelei o le Malo o le Atua, le malo lea ua toeitiiti ona faavaeina lea o se lalolagi fou amiotonu. (Mataio 24:14; 2 Peteru 3:13) A toe asiasi atu Molimau a Ieova i lou aiga, pe o le a e faafofoga i la latou feau maoti ma iloa ai po o le ā ua uunaia lo latou maelega?