“Le Toe Fili” o le a Faaumatia!

A O AVEA oe ma tamaitiiti, atonu sa e fefe i le pogisa. O tala faafefe tagata e oo foi i tala aitu atonu sa faatumulia ai oe i le popole. Maeu se faamafanafanaga o le tuua e lou tamā po o lou tinā o se molī e ola pea a o e faagalegale moe!

E fefefe foi tagata e toatele i le oti. Ae e lē manaomia ona faapea. Aisea? Ona o le tulaga moni o le oti.

Iloa Lou Fili

Na faalauiloa mai e le Tupu poto o Solomona o Isaraelu anamua e faapea: “O e ua ola, ua latou iloa e oti i latou; a o e ua oti, latou te le iloa se mea.” (Failauga 9:5) E tusa ai ma lenei manatu faagaeeina tauatua o loo maua i lau lava Tusi Paia, ua manino ai la o le oti, o le tuufaafeagai lea o le ola. O le tagata ua oti na te lē toe iloa se mea.

I le tautala faafaatusa i le oti, na tusia ai e le aposetolo o Paulo e faapea: “Le oti e, o fea o i ai lou tui? Le tuugamau e, o fea o i ai lou manumalo?” O le ā le tui o le oti? Fai mai Paulo: “O le tui o le oti, o le agasala lea.” (1 Korinito 15:55, 56; Hosea 13:14) O le ā la le amataga o lenei tui matautia? I se isi manatu i le Tusi Paia o loo faapea mai ai Paulo: “Faapei ona oo mai o le agasala i le lalolagi i le tagata e toatasi, o le oti foi ona o le agasala, ona oo mai ai lea o le oti i tagata uma lava, auā ua agasala uma lava.” (Roma 5:12) E leʻi faaletonu le aposetolo i le faailoaina mai o lena “tagata e toatasi” ina ua ia faapea mai: “Faapei ona oti uma ia Atamu.” (1 Korinito 15:22) Ioe, o le lē usiusitai o lo tatou uluai tamā, o Atamu, ua aafia uma ai i tatou i le tui o le oti.—Kenese 3:1-19.

A lelei le soifua maloloina ma iai se siomaga toafimalie i se aiga fiafia, o le a leai se tasi o i tatou e fia  oti. E ui i lea, e pei ona faaalia e le Tusi Paia o le “tausaga ma le mea e tupu ai” atonu e oo mai ai le oti ia i tatou. (Failauga 9:11) O le mea moni, tatou te lē iloa le mea o le a tupu i le olaga a taeao. (Iakopo 4:14) E tasi le mea ua mautinoa—o i tatou uma lava ua maua i le agasala ma le oti. O lea la, ua tatou aafia uma ai i lenei fili o le oti.

Faafetaiaia o le Oti o Sē Pele

E avea moni lava le oti o se fili pe a oo i sē pele ia te oe. “O le a sili atu ona leaga mo oe” o le tala lea a se tasi avā sa maʻi tigaina, na fai i lana tane ina ua lata ona oti. Aisea na mafai ai ona ia tautala faapea? Auā fai mai le Tusi Paia: “O mea uma ua e iloa e faia e ou lima, ina faia ia ma lou malosi; auā e leai se galuega, po o se mafaufau, po o se iloa, po o se poto i le tuugamau, o loo e alu atu i ai.” (Failauga 9:10) E lē toe mafatia lē ua oti. Peitai, o le avega o faanoanoaga o le a paʻū i luga o ona auaiga ma ana uo o loo feola. Pe e mafai ona faia se mea i lena faanoanoa?

Ua iai upu faamafanafana e tele i itulau o le Afioga a le Atua, le Tusi Paia. O se faaaoaoga, o le faitau ma le mafaufau loloto i salamo, o se tasi lea o puna mautinoa o faamafanafanaga. O le mea moni, o se faamafanafanaga ni upu e pei o nei: “Ia faafetaia Ieova o le na te tauaveina a tatou avega i lea aso ma lea aso, o le Atua moni o lo tatou olataga.”—Salamo 68:19, NW.

O le isi puna o faamafanafanaga o le faapotopotoga Kerisiano. I le uluai senituri T.A. na tusia ai e le aposetolo o Paulo e faapea: “Ia ava i fafine ua oti a latou tane, o e ua ausage lava. Afai foi o i ai i se fafine ua oti lana tane ni ana tama po o fanau a ana tama [o ē e mafaia ona tausia o ia faaletino], ia aʻoaʻoina i latou ia muamua ona agalelei i lo latou lava aiga, ma taui atu i o latou mātua; auā o le mea lelei lea ma le mālie i luma o le Atua. Aua neʻi faitauina se fafine ua oti lana tane seia oo i ona tausaga e onogafulu, sa toatasi foi lana tane; o loo taʻuleleia foi ona o ana galuega lelei, pe afai ua tausia e ia ni fanau, pe afai ua na alofa i tagata ese, pe afai ua na mulumulu i vae o tagata paia, pe afai ua na agalelei atu i e ua puapuagatia, pe afai ua na tausisi i galuega lelei uma lava.” (1 Timoteo 5:3, 4, 9, 10) E faapena foi i Molimau a Ieova i aso nei ona fesoasoani e faamafanafana o latou uso talitonu.

O le suiga tele lava e masani ona faia e ē loto mafatia, o o latou faalogona ootia. Na tusi mai se tasi tamaloa na oti lana avā i le lua tausaga talu ai e faapea: “Sa ou alofa tele i loʻu toalua. Ua avea lona oti ma mea e sili ona ou faanoanoa ai, ma ua faigata tele ona ou onosaia lenei faanoanoaga.” So o se tagata lava ua leva ona faaipoipo ua ola i se faiā e sili ona vavalalata. Pe a maliu se tasi o le paaga, o le mea masani lava e tupu, o le tagata o loo ola e matuā sili ona faanoanoa. O ai la e mafai e lena tagata ona liliu atu i ai mo se fesoasoani?

Ona o na tulaga, e manaomia ai e lena tagata ni aufaatasiga faa-Kerisiano e atiae ai. E pei ona faapea mai se faataoto poto: “E alofa le uo i aso uma lava; a e fanau le uso mo le aso vale.” (Faataoto 17:17) E manaomia e se fafine ua oti lana tane po o le tane ua oti lana avā se fesoasoani—ni uo e fesoasoani moni. O uo popoto latou te faalaeiauina lē o faanoanoa ina ia  talatalanoa e uiga i lea mea, e ui lava o le faia faapea e maligi ai loimata. Atonu o se Kerisiano sa oo foi i ai le tigā ma le loto mafatia ona o le maliu o sē pele, e mafai ona ia ofoina atu sina fesoasoani ma le agalelei. Fai mai le fautuaga a le Tusi Paia: “Ia faamafanafana i e loto iti.” (1 Tesalonia 5:14) Ae ia manatua, o tane ma avā ua maliliu a latou paaga, o loo latou misia foi i latou. O lea la, e ao i ē loto mafatia ona sulu atu i isi i na o tulaga lava e mafai uma ai ona faatumauina pea le mamā tau amio.—1 Peteru 2:12.

O le vaifofo sili ona lelei mo mafatiaga ona o le oti, o le fesoasoani pea lea i isi—o se matuā lui lava lea mo i latou o ē e manatu o i latou na o loo manaomia se fesoasoani. O i inei e manaomia ai le lē manatu faapito. O le faia o mea ma le lē manatu faapito mo isi e fesoasoani lea e foia ai le faanoanoa ma le tulaga mafatia o loo maua ai, auā na fetalai Iesu e faapea: “E sili le manuia o le na te foai atu, i le manuia o le na te talia mai.”—Galuega 20:35.

Manumalo mai le Oti

O le ū a le pi e matuā tiga, pe oo ai lava ina oti ai se tasi. E ui i lea, o le aveesea o le mea maai lea sa mau i lou paʻu, o le a avea o se mapusaga mo oe. Ae o ā ni faamoemoe mo le aveesea ai o le tui o le oti?

Ina ua uma ona faamatalaina faapea o le agasala o le tui lea o le oti, ona faapea mai lea o Paulo: “E faafetai i le Atua, o le na te foaiina mai le manumalo ia te i tatou talu lo tatou Alii o Iesu Keriso!” (1 Korinito 15:57) E faapefea ona manumalo i le oti e ala ia Keriso? Na faaalia e Iesu lenei mea e ala i lona fetalai e faatatau ia te ia lava e faapea: “O le Atalii o le tagata e lei sau ia ina ia auauna mai tagata ia te ia, a ia auauna atu ia, ma foaiina atu lona ola e fai ma togiola e sui aʻi tagata e toatele.” (Mataio 20:28) Ioe, mo i latou uma lava e faaalia le faatuatua i le Alo o le Atua, o Iesu Keriso, ma le taulaga togiola na saunia e Ieova e ala ia te ia, o le a lē oo i ai le oti e faavavau, lea na tuufaasolo mai ia Atamu.—Ioane 3:16.

E faamafanafana loto upu a Iesu e faapea: “Auā e oo mai le aso e faalogo ai i lona leo o i latou uma ua i tuugamau, ma latou o mai ai; o e na amio lelei, e toe tutū i le ola; a o e na amio leaga, e toe tutū i le faasala.”—Ioane 5:28, 29.

I senituri muamua atu, na valoia ai e le perofeta o Isaia e faapea: “E faaumatia e [Ieova le Atua] le oti e faavavau; e soloiesea foi e le Alii o Ieova o loimata i mata uma lava.” (Isaia 25:8) E lē gata i lea, i le Faaaliga 21:4, o loo taʻua mai ai foi e le Tusi Paia lenei folafolaga matagofie: “E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.” I le faamalosia i lenei faamoemoe mo ē ua maliliu, e ao ai i ē faanoanoa ona aua neʻi “faanoanoa pei o isi e leai so latou faamoemoe.”—1 Tesalonia 4:13.

Taumafai e faaata i lou mafaufau le mea o le a faia e le Atua mo tagata, e pei ona faailoa mai e le Tusi Paia. O le puapuaga tele o loo fotuai mai o lona uiga o le faaumatiaga lea mo le faiga aoao o mea leaga. (Faaaliga 7:14) O i latou o loo tapuai i lotu sese e faaumatia foi. E mavae le au faipolotiki matapeapea ma faiga faapisinisi o loo mafua ai oge ma faiga taua.  E gaoioi Iesu Keriso lava ia, e lafoina i le to e lē gata Satani le Tiapolo, o lē o loo faapogaia le maliliu o tagata e toatele. Ona amata loa lea o le Pulega faa-Meleniuma a Keriso, ma i lena vaitaimi na te faatinoina ai le aogā o lana taulaga togiola mo tagata. E toe faatutuina mai ē ua maliliu, ma e susulu malosi le malamalama mai le Afioga a le Atua ina ia lē toe iai talitonuga faataulaitu e faatatau i le oti, le fili lea o tagata. O i latou uma lava la o le a ola ai i lena taimi latou te maua le avanoa e aʻoaʻoina ai ala o le Atua ma ola e ogatasi ma ona ala amiotonu.—Faataoto 4:18; Galuega 24:15; Eperu 2:14, 15; Faaaliga 18:4-8; 19:19-21; 20:1-3.

Ua fai mai atili Paulo e faapea: ‘Ona oo ai lea i le gataaga, e tuuina atu ai e Keriso Iesu le malo i lona Atua, o le Tamā lea. Auā e tatau ona pule o ia o se tupu (Iesu Keriso), seia tuuina e le Atua fili uma lava i lalo o ona vae. O le toe fili e faaumatia, o le oti lea.’ (1 Korinito 15:24-26) O so o se tiga e mafua mai i le agasala a Atamu ua uma ona soloiesea. Ona faia loa lea o se tofotofoga mulimuli, ma ua faasaoina mai ai ē alolofa i le Atua e ala i lo latou faamaoni. (Faaaliga 20:4-10) O nei tagata usiusitai, e toe faafoisia i le lelei atoatoa, e lē na o se selau tausaga po o se afe tausaga, ae peitai e faavavau. Maeu se meaalofa mai le Atua e ala i lona Alo pele!—Roma 6:23.

O lea la, o le ā le umi e mafai ona e ola ai? E mafai ona faateleina atu le umi o lou ola e oo i le faavavau. O lou ola ai i le lalolagi i nei “ona po o le iuga,” atonu o le a e lē oti. (Tanielu 12:4; Ioane 11:25, 26; 17:3) Afai e te faia le finagalo o le Atua, atonu o le a e ola i le taimi lenei ma oo atu ai lava i le lalolagi fou folafolaina a le Atua.—2 Peteru 3:13.

Peitai, afai ua matua lou soifuaga o loo iai nei, e manaomia la ona e iloiloina le tulaga e oo i ai le oti. E mautinoa o le a aumaia e le faamoemoe o le toetu le olioli ia te oe. Ae atonu o loo e mafaufau pe faapefea ona faavasega e Ieova le olaga faaleaiga i lena faiga fou. Aua neʻi avea lena ma mea e te popole ai, auā o le a faamautinoa e Ieova le Atua le fiafiaga tumau o i latou e faamaoni ia te ia.

A o agaʻi atu nei “aso e gata ai” o le faiga amio leaga a Satani i lona mutaaga, aua neʻi avea le fefe i le oti ma itu e aveesea ai lou faaeaga o le auauna ia Ieova i le taimi nei. (2 Timoteo 3:1) Afai ua aveesea se tasi e pele ia te oe ona o le oti, ia faamafanafanaina oe e faapea ua na ona iai mo se taimi lē tumau. (Faaaliga 20:13, 14) Faatuatua i le faamoemoe o le toetu. Ona tusa lava lea pe e te aulia atu le lalolagi fou e ala i lou faasaoina atu i le puapuaga tele pe ala i le toetutu, ae ia mautinoa le faamaoniga e faapea, o le oti, le toe fili, e mautinoa o le a faaumatia.—Faaaliga 7:9, 14.

[Ata i le itulau 5]

O aufaatasiga lelei faa-Kerisiano e atiina aʻe ai faaleagaga lē o faanoanoa.

[Ata i le itulau 7]

O le faateleina o lo tatou taimi e fesoasoani ai i isi e faaitiitia ai le faanoanoa ona o le maliu o sē pele