Savavali ma le Loto Tetele i Ala o Ieova
Savavali ma le Loto Tetele i Ala o Ieova
“Amuia i latou uma o e matatau ia Ieova, o e savavali i ona ala.”—SALAMO 128:1.
1, 2. O le ā le fesoasoani ua tatou maua mai i tala a le Tusi Paia e uiga i upu ma gaoioiga a uluai molimau a Ieova?
UA TUMU le Afioga Paia a Ieova i tala e uiga i tofotofoga, ma fiafiaga na oo i ana auauna faamaoni. O tala e uiga ia Noa, Aperaamo, Sara, Iosua, Tepora, Parako, Tavita, ma isi, o ni tala ua matuā manino atoatoa mai i ona itulau. O i latou uma lava o ni tagata moni, e iai se mea faapitoa e tutusa pau ai. Sa latou faatuatua i le Atua, ma savavali ma le loto tetele i ona ala.
2 O upu ma galuega a uluai molimau a Ieova, e mafai ona faalaeiauina ai i tatou a o tatou taumafai e savavali i ala o le Atua. E lē gata i lena, o le a tatou fiafia pe afai tatou te faaalia le faaaloalo mo le Atua, ma le mataʻu tatau neʻi lē faafiafiaina o ia. Ua moni lenei mea e ui lava ina tatou fesagai ma tofotofoga i le olaga, ae e pei ona pese ai le faisalamo faagaeeina e faapea: “Amuia i latou uma o e matatau ia Ieova, o e savavali i ona ala.”—Salamo 128:1.
Le Uiga o le Lototele
3. O le ā le lototele?
3 E tatau ona tatou loto tetele e savavali i ala o Ieova. O le mea moni, ua faatonuina e le Tusi Paia tagata o le Atua ina ia faaalia atu lea uiga. Mo se faataitaiga, na pese le faisalamo o Tavita e faapea: “O outou na uma lava, o e faamoemoe ia Ieova, ina faalototetele ia; e faamalolosia foi e ia o outou loto.” (Salamo 31:24) O le lototele, “o le malosi faalemafaufau po o le malosi tauamio e taumafai ai, e finafinau, ma manumalo ai i tulaga matautia, le fefe po o mea faigata.” (Webster’s Ninth New Collegiate Dictionary) O se tagata lototele, e malosi, e tu mausali, ma e lē fefe. E tuuina atu e Ieova le malosi i ana auauna e pei ona manino mai i upu a le aposetolo o Paulo i lana aumea faigaluega o Timoteo e faapea: “Auā ua le foaiina mai e le Atua ia te i tatou le Agaga e mataʻu ai, a o le Agaga e faamalosi ai, ma alofa ai, ma mafaufau tonu ai.”—2 Timoteo 1:7.
4. O le ā se tasi o auala e maua ai le lototele?
4 O se tasi auala e maua ai le malosi mai le Atua, o le tatalo ma manatunatu loloto i le Afioga a Ieova, le Tusi Paia. E tele tala o loo i le Tusi Paia e mafai ona fesoasoani ia i tatou e faaalia atili ai le lototele. O lea, seʻi o tatou vaai muamua, po o le ā e mafai ona tatou aʻoaʻoina mai i faamaumauga o i le Tusi Paia Eperu e faatatau i nisi o ē na savavali ma le loto tetele i ala o Ieova.
Loto Tetele e Faasalalau atu le Feau a le Atua
5. E mafai faapefea e le lototele o Enoka ona aogā i auauna a Ieova i aso nei?
5 E mafai e le lototele o Enoka ona fesoasoani i auauna a Ieova i aso nei e tautatala atu ai ma le loto tetele i le feau a le Atua. A o leʻi fanau mai Enoka, “a ua amata ona valaau tagata i le suafa o Ieova.” Fai mai nisi tagata popoto e faapea, ‘sa amata ona valaau tagata ma le lē āva’ i le suafa o Ieova. (Kenese 4:25, 26; 5:3, 6) Atonu sa faatatauina le suafa tauatua i tagata e oo foi i faatusa. O lea, sa lauolaola ai tapuaiga sese, ina ua fanau mai Enoka i le 3403 T.L.M. O le mea moni, na foliga mai sa na o ia lava sa savavali ma le Atua,’ ma tuliloaina se ala amiotonu e ogatasi ma le upu moni a Ieova o loo faaalia mai i lana afioga faagaeeina.—Kenese 5:18, 24.
6. (a) O le ā le feau malosi na folafolaina atu e Enoka? (e) O le ā le faamautinoaga e mafai ona tatou maua?
6 Sa folafolaina atu ma le lototele e Enoka le feau a le Atua, atonu e ala i le talaʻiga. (Eperu 11:5; faatusatusa i le 2 Peteru 2:5.) Na faalauiloa atu e lenei molimau na o ia: “Faauta, e afio mai le Alii ma ona au paia e manomano, e faamasino ai i tagata uma, ma faasalaina ai e ua amio faalematau uma lava o ia i latou, ona o a latou galuega faalematau uma ua latou faia ma le faalematau, ona o a latou upu faatautala foi na fai ia te ia e tagata agasala ua faalematau.” (Iuta 14, 15) Sa faaaogāina ma le lototele e Enoka le suafa o Ieova a o ia folafolaina atu lena feau e uiga i le faasalaina o ē e lē amio atua. Ma e pei ona avatu e le Atua ia Enoka le lototele e folafola atu ai lena feau malosi, ua faapena foi ona faamalosia e Ieova Ana Molimau i aso nei, ina ia tautatala atu ai i Lana afioga ma le faamalosi i le faiva, i aʻoga, ma i so o se mea.—Faatusatusa i le Galuega 4:29-31.
Loto Tetele i Lalo o Tofotofoga
7. O le ā le faaaoaoga o le lototele na saunia e Noa?
7 O le faaaoaoga a Noa e mafai ona fesoasoani ia i tatou ina ia faaalia ai le lototele i le faia o galuega o le amiotonu pe a tofotofoina. Ona o le lototele ma le faatuatua, na ia gaoioi ai e tusa ma le lapataiga mai le Atua e uiga i le lolo i le lalolagi atoa, ‘ma fausia le vaa mo le faasaoina o lona aiga.’ E ala i le usiusitai ma galuega o le amiotonu, na faasalaina ai e Noa le lalolagi lē talitonu, ona o ana galuega leaga, ma sa faamaonia le tatau i ai o le faaumatiaga. (Eperu 11:7; Kenese 6:13-22; 7:16) O le mafaufau loloto i ala o Noa, e fesoasoani lea i auauna a le Atua i aso nei ina ia auai ma le loto tetele i na galuega o le amiotonu, e pei o le faiva faa-Kerisiano.
8. (a) O le ā na fesagai ma Noa i le avea “ma sē talaʻi le amiotonu” ma le lototele? (e) O le ā o le a faia e Ieova mo i tatou pe afai e avea i tatou ma ē e talaʻia le amiotonu ma le lototele?
8 Afai o tatou tuliloaina le ala amiotonu, ae ua lē iloa pe faapefea ona faafetaiaia se tofotofoga patino, seʻi o tatou tatalo la mo le atamai ina ia manumalo ai. (Iakopo 1:5-8) O le faamaoni o Noa i le Atua i lalo o tofotofoga, ua faaalia ai e faapea, e mafai ona faafetaiaia tofotofoga i le lototele ma le faamaoni. Na manumalo o ia i omiga mai le lalolagi amio leaga, ma mai agelu ia na liutino, atoa ma fanau na tupuga mai ia i latou. Ioe, sa avea Noa o “lē talaʻi le amiotonu” i se “lalolagi tuai” sa agaʻi atu mo le faaumatiaga. (2 Peteru 2:4, 5; Kenese 6:1-9) E ui lava sa tautala atu o ia ma le faamalosi o sē e faalauiloaina atu le lapataiga a le Atua i lena vaitaimi a o lumanai le lolo, ae “na le iloa foi e i latou ina seia oo le lolo, ma aveesea i latou uma.” (Mataio 24:36-39) Ae, ia tatou manatuaina e faapea, e ui lava i sauaga, ma le teena e le toatele i aso nei o la tatou feau e faavae i le Tusi Paia, o le a lagolagoina lava i tatou e Ieova, e pei foi ona sa ia lagolagoina Noa, pe afai tatou te faaalia lena lava faatuatua ma le lototele o ni ē e talaʻi le amiotonu.
Loto Tetele e Usiusitai i le Atua
9, 10. I ā vala na faaalia ai e Aperaamo, Sara ma Isaako le usiusitai ma le loto tetele?
9 “O le uo a le Atua” o Aperaamo, o se faaaoaoga lelei o le lototele e usiusitai i le Atua. (Iakopo 2:23) Sa manaomia e Aperaamo le faatuatua ma le lototele e usitai ai ia Ieova, ma tuua Uro o Kaletaia, o se aai sa tumu i le tamaoaiga faaletino. Na ia talitonu i le folafolaga a le Atua e faapea, o le a faamanuiaina “aiga uma o le lalolagi” e ala ia te ia, ma o le a tuuina atu i lana fanau se nuu. (Kenese 12:1-9; 15:18-21) O le faatuatua o Aperaamo na “āumau ai o ia i le nuu na folafolaina,” ma vaavaai atu ai i se “aai ua faavaeina”—le Malo faalelagi o le Atua, lea o le a toe faatuina mai ai o ia e ola ai i luga o le lalolagi.—Eperu 11:8-16.
10 O le avā a Aperaamo o Sara, sa manaomia foi e ia le faatuatua ma le lototele, ina ia tuua ai Uro, ae malaga faatasi atu ma lana tane i se nuu ese, ma onosaia so o se faigata o le a latou fetaiai ai i inā. Ma maeu se taui na ia mauaina ona o lona lototele e usitai i le Atua! E ui ina pa o ia seia oo i le 90 o ona tausaga, ma “ua mavae tausaga o lona malosi,” peitai sa toe faamalosia Sara ‘ina ia toe fanau ai, auā na manatu o ia e faamaoni le Atua na ia folafola mai.’ Ina ua oo i le taimi atofaina, ona ia fanauina mai lea o Isaako. (Eperu 11:11, 12; Kenese 17:15-17; 18:11; 21:1-7) I tausaga mulimuli ane, na usitai ai ma le lototele Aperaamo i le Atua ma “na faitaulaga ai o ia ia Isaako.” Ina ua taofia e se agelu, na maua ai e lenei augatama lona atalii lototele ma le usiusitai e aunoa ma le oo i ai o le oti “i se auala faafaatusa.” O lea la, o i laua ma Isaako, na faaataina faavaloaga mai ai e faapea, o le a saunia e Ieova le Atua ma lona Alo o Iesu Keriso, le togiola ina ia mafai e i latou uma lava o ē e faatuatua ia te ia ona maua le ola e faavavau. (Eperu 11:17-19; Kenese 22:1-19; Ioane 3:16) Ma le mautinoa, o le lototele ma le usiusitai o Aperaamo, Sara ma Isaako, e ao ona uunaia ai i tatou e usiusitai ia Ieova, ma ia faia pea lona finagalo.
Loto Tetele e Tutū Faatasi ma Tagata o le Atua
11, 12. (a) Na faapefea ona faataitaia e Mose le lototele e tusa ai ma tagata o Ieova? (e) E tusa ai ma le lototele o Mose, o le ā le fesili atonu e ono fesiligia?
11 Sa lototele Mose e tutū faatasi ma tagata o le Atua sa faapologaina. I lona 16 senituri T.L.M., na faaalia ai e mātua o Mose le loto tetele. Sa lē fefefe i laua i le poloaiga a le tupu ina ia fasiotia tama tane uma o Eperu e fananau mai, ae sa la nanaina Mose, ma mulimuli ane ai, na la tuua o ia i totonu o se ato kome, ma tuu i le vao utuutu i le auvai o le vaitafe o le Naila. Ina ua maua o ia e le afafine o Farao, ona ia tausia lea o ia e pei lava o sana tama moni, peitai, na mauaina e Mose le uluai toleniga faaleagaga mai ona mātua moni. I le avea o ia ma se tasi o le aiga o Farao, “na aʻoaʻoina foi Mose i le poto uma lava o Aikupito,” ma ua avea ma tagata “malosi i ana upu ma ana mea na faia,” le malosi faalemafaufau, ma le faaletino.—Galuega 7:20-22; Esoto 2:1-10; 6:20.
12 E ui lava i le tamaoaiga i le maota o le tupu, ae sa filifili ma le lototele Mose ina ia iai faatasi ma tagata tapuai o Ieova, ia na faapologaina e tagata Aikupito. Ona o lona puipuia o se tagata Isaraelu, na ia fasiotia ai se tagata Aikupito ma sola ai i Mitiana. (Esoto 2:11-15) Pe tusa ma le 40 tausaga mulimuli ane ai, ona faaaogāina lea o ia e le Atua na te taitaieseina le nuu o Isaraelu mai le nofo pologa. Mulimuli ane, “ona tuua lea e Mose o Aikupito, ua lē fefe i le ita o le tupu,” o lē na faamatauina o ia i le oti ona o le fai ma sui o Ieova mo tagata Isaraelu. Sa savali Mose e pei o sē iloa atu i ‘Lē e lē o vaaia,’ o Ieova le Atua. (Eperu 11:23-29; Esoto 10:28) Po o ia te oe ea lena ituaiga o faatuatua ma le lototele, e te pipii atu ai i a Ieova ma ona tagata, e ui lava i tulaga faigata ma sauaga?
Loto Tetele e ‘Mulimuli Atoatoa ia Ieova’
13. Na faapefea ona faataatia e Iosua ma Kalepo le faaaoaoga o le loto tetele?
13 O le loto tetele o Iosua ma Kalepo, na saunia ai se faamaoniga e faapea, e mafai ona tatou savavali i ala o le Atua. Na la “matuā mulimuli mai ia Ieova.” (Numera 32:12) O Iosua ma Kalepo, o i laua na o nisi mai tagata e toʻa 12 ia na aauina atu e asiasi i le Nuu o le Folafolaga. Ona o le matatau i tagata na aināina le nuu, sa taumafai ai isi sipai e toasefulu e faavaivaia loto o le nuu o Isaraelu mai le ulu atu i Kanana. Ae peitai, sa fai atu ma le loto tetele Kalepo ma Iosua e faapea: “Afai e finagalo alofa mai Ieova ia te i tatou, na te faaootia lava i tatou i lena nuu, ma foai mai ai ia te i tatou; o le nuu lava ua tafe ai le suāsusu ma le meli. A e aua lava neʻi outou fouvale ia Ieova, aua foi tou te matatau i tagata o le nuu, auā e faia lava i latou ma mea e ʻai mā tatou; ua mavae lo latou mamalu ia te i latou, a o loo ia te i tatou Ieova; aua tou te matatau ia te i latou.” (Numera 14:8, 9) Ona o le leai o se faatuatua ma se lototele, na lē oo ai lena tupulaga o tagata Isaraelu i le nuu o le folafolaga. Ae na o Iosua ma Kalepo, faatasi ma se tupulaga fou, na ulu atu i ai.
14, 15. (a) A o faatatauina e Iosua upu o loo i le Iosua 1:7, 8, o le ā na oo ia te ia faatasi ai ma le fanauga a Isaraelu? (e) O le ā le lesona e aofia ai le lototele ua mafai ona tatou aʻoaʻoina mai ia Iosua ma Kalepo?
14 Na fetalai atu le Atua ia Iosua e faapea: “Tau ina e faamalosi, ma ia matuā loto tele lava; ia e anaana e fai e tusa ma le tulafono uma na fai atu ai Mose laʻu auauna ia te oe; aua e te alu ese ai i le itu taumatau po o le itu tauagavale, ina ia manuia ai oe i mea uma e te alu i ai. E le teʻa i lou gutu le tusi o lenei tulafono, a ia mafaufau i ai i le ao atoa ma le po, ina ia e anaana e fai e tusa ma mea uma ua tusia i ai; ona manuia ai lea ia te oe o lou ala, ona e manuia ai lea.”—Iosua 1:7, 8.
15 A o faatatauina e Iosua na upu, na faatoilaloina ai Ieriko ma isi aai e Isaraelu. Na oo foi ina faatumauina e le Atua le la ina ia susulu mai pea, seia faataunuuina le manumalo o Isaraelu i tagata Kipeona. (Iosua 10:6-14) Ina ua lamatia e ʻau malolosi a le fili “o tagata e toatele e pei o le oneone i le matafaga ona tele,” sa gaoioi ma le lototele Iosua, ma sa tuuina atu foi e le Atua le manumalo ia Isaraelu. (Iosua 11:1-9) E ui lava o i tatou o tagata e lē lelei atoatoa, e pei o Iosua ma Kalepo, ae e mafai lava ona tatou mulimuli atoatoa ia Ieova, ma e mafai e le Atua ona faamalosia i tatou ina ia savavali ma le loto tetele i ona ala.
Loto Tetele e Faalagolago i le Atua
16. I ā auala na faaalia ai e Tepora, Parako ma Iaeli le loto tetele?
16 E tauia le lototele e faalagolago i le Atua, e pei ona faaalia i mea na tutupu i aso na faia ai e faamasino le faamasinoga i Isaraelu. (Ruta 1:1) Mo se faaaoaoga, na faalagolago ma le loto tetele faamasino o Parako ma le perofeta fafine o Tepora i le Atua. Na faapologaina e le tupu o Iapino o Kanana tagata Isaraelu mo le 20 tausaga, ona faapogaia lea e Ieova o Tepora ia uunaia Parako ina ia faapotopotoina tagata e 10,000 i le mauga o Tapora. Ona nanati atu lea o Sesera o lē e pule i le itu taua a Iapino i le alia o Kisona, ma le mautinoa, i lenei laugatasi, e lē taitai ona mafaia ai e tagata Isaraelu lana autau ma kariota tau e 900 e iai mea maamaai i o latou uili. Ina ua oo atu tagata Isaraelu i le laugatasi o le alia, sa gaoioi loa le Atua e fai mo latou sui, ma sa lolovaia faafuasei ma avea ai lea nofoaga ma pala e faafaigata ai i kariota a Sesera ona gaoioi. Ona manumalo ai lea o tagata o le itu a Parako, a “ua oti le itu taua uma a Sesera i le pelu.” Ona sola ai lea o Sesera i le faleie o Iaeli, ae a o moe o ia, sa lototele Iaeli e fasioti o ia, e ala i le aumaia o se fao mai le faleie, ma tutuʻi ai i lona ulu. E tusa ai ma le faamatalaga faavaloaga a Tepora ia Parako, “o le viiga” o lenei manumalo, e tuuina atu lea i se fafine. Talu ai ona sa faaalia e Tepora, o Parako, ma Iaeli le loto tetele e faalagolago ai i le Atua, ‘ona filemu ai lea o le nuu o Isaraelu i tausaga e fagafulu.’—Faamasino 4:1-22; 5:31.
17. O le ā le faaaoaoga o le faalagolago ma le lototele ia Ieova na saunia e le faamasino o Kitiona?
17 Sa faalagolago ma le lototele le faamasino o Kitiona ia Ieova le Atua, ina ua osofaia Isaraelu e tagata Mitiana ma isi nuu. E ui lava pe tusa ma le 135,000 tagata osofai na silia ai autau a Isaraelu, ae atonu sa manatu tagata Isaraelu e toʻa 32,000 i le manumalo mai le Atua e faapea o lo latou lava faamalosi na mafai ai. I lalo o le taitaiga a Ieova, na faaitiitia ai e Kitiona lana autau i vaega e tolu e taitoa 100. (Faamasino 7:1-7, 16; 8:10) A o faataamilo le toʻa 300 o i latou i le toagalauapi o Mitiana i le po, sa tofu i latou ma pu, ma kate o vai, ma sulu i totonu o kate. Sa latou ilia pu, ma taei kate, ma uu sulu i o latou lima, e fai ma faailoga ma alalaga atu: “O le pelu a Ieova ma Kitiona!” (Faamasino 7:20) Ona sosola ai lea o tagata Mitiana ma le matatau lava ma faatoilaloina ai. O na mea na tutupu, e ao ona faamautinoa mai ai ia i tatou e faapea, o le lototele e faalagolago i le Atua, e tauia foi i aso nei.
Loto Tetele e Faapaiaina Ieova ma Siitia ai le Tapuaiga Mamā
18. O le ā na faia ma le lototele e Tavita ina ua ia faatoilaloina Koliata?
18 O loo iai nisi faaaoaoga i le Tusi Paia e faaalia ai le lototele e faapaiaina Ieova ma siitia ai le tapuaiga mamā. Sa faamaonia le lototele o le talavou o Tavita, o lē na faasaoina ma le lototele mamoe a lona tamā, ina ia tu atu i luma o le sauai Filisitia o Koliata. Na fai atu Tavita: “Ua e sau ia te au ma le pelu, ma le tao, ma le tao leoleo; a o aʻu, ou te alu atu ia te oe i le suafa o Ieova o ʻau, o le Atua o le itu taua a Isaraelu ua e faifai i ai. O le aso nei e tuuina mai oe e Ieova i loʻu lima, ou te fasi ia te oe, ma ave ese lou ulu; . . . e iloa ai le lalolagi uma, o i ai le Atua ia Isaraelu. E iloa ai foi e lenei faapotopotoga uma, e le faaolaina tagata e Ieova i se pelu ma se tao; auā o loo ia Ieova le taua.” (1 Samuelu 17:32-37, 45-47) Ona o le fesoasoani mai le Atua, na lototele ai Tavita e faapaiaina Ieova, i lona fasiotia o Koliata, ma faia ai se vaega tāua i le aveeseina o le tau faamataʻu o Filisitia i le tapuaiga mamā.
19. O le ā le galuega na manaomia ai e Solomona le lototele, ma e mafai faapefea e lona ala ona faatatauina i o tatou aso?
19 Ina ua sauni le atalii o le Tupu o Tavita o Solomona e fausia le malumalu o le Atua, na fautua atu lona tamā ua matua ia te ia e faapea: “Ia faamalosi ma loto tele, ma ia faia lenei mea; aua le fefe, aua le mataʻu; auā o Ieova le Atua, o loʻu Atua e ia te oe o ia, na te le tuua oe, na te le lafoai foi ia te oe, seia faaiuina le faiga o le galuega uma o le fale o Ieova.” (1 Nofoaiga a Tupu 28:20) I le gaoioi ma le lototele, na faaumaina ai ma le manuia e Solomona le malumalu. Pe afai o se lui i aso nei le polokalama faatiokarate ua tuuina mai o le fausiaina o fale, seʻi o tatou manatuaina upu a Tavita e faapea: “Ia faamalosi ma loto tele ma ia faia lenei mea.” Maeu se auala e sili ona lelei e faapaiaina ai Ieova ma siitia ai le tapuaiga mamā!
20. O le ā le vala na faaalia ai le lototele o le tupu o Asa?
20 Ona o le faanaunauga o le Tupu o Asa e faapaiaina le Atua ma siitia le tapuaiga mamā, na ia aveesea uma ai tupua o Iuta ma faiga faatalitane na faia i le malumalu. Na ia aveesea foi le tinā aposetate o lona tinā mai lona tulaga maualuga, ma susunu ‘lana tupua inosia.’ (1 Tupu 15:11-13) Ioe, “ona faamalosi ai lea o [Asa], ma na aveeseina o mea leaga i le nuu uma o Iuta ma Peniamina, atoa ma aai foi na ia faoa i le mauga o Efaraima, ma ua toe teuteu le fata faitaulaga o Ieova sa i luma o le faapaologa o le fale o Ieova.” (2 Nofoaiga a Tupu 15:8) Pe e te teena foi ma le lototele faiga faaaposetasi ma siitia le tapuaiga mamā? Po o e faaaogāina ea au mea faitino e faaauilumaina ai fiafiaga o le Malo? Ma i le avea o oe o se tasi o ana Molimau, po o e saili ea ina ia e āva ia Ieova e ala i le auai pea lava pea i le faasalalauina atu o le tala lelei?
21. (a) E mafai faapefea ona fesoasoani ia i tatou tala e uiga ia i latou na tausisi i le faamaoni a o lumanai le faa-Kerisiano? (e) O le ā o le a talanoaina i le mataupu o sosoo mai?
21 Maeu so tatou loto faafetai, ona ua faasaoina mai e le Atua i le Tusi Paia tala e faatatau i le loto tetele o ē sa tausisi i le faamaoni a o lumanai le faa-Kerisiano! E mautinoa, o a latou faaaoaoga lelei, e mafai ona fesoasoani ia i tatou ina ia ofoina atu ai le auaunaga paia ia Ieova ma le lototele, le mataʻu faaleatua, ma le migao. (Eperu 12:28) Ae o loo i ai foi i le Tusi Paia Kerisiano Eleni nisi o faaaoaoga o le faatinoina o le lototele tauatua. E mafai faapefea i nisi o nei tala, ona fesoasoani ia i tatou ina ia savavali ai ma le loto tetele i ala o Ieova?
E Faapefea ona E Tali?
□ O le ā le lototele?
□ Na faapefea ona faaalia e Enoka ma Noa le loto tetele?
□ I ā vala na gaoioi ai ma le loto tetele Aperaamo, Sara ma Isaako?
□ O ā faaaoaoga o le lototele na faataatia e Mose, Iosua ma Kalepo?
□ Ua faapefea ona faaalia e isi e faapea, o loo ia i latou le lototele e faalagolago ai i le Atua?
[Fesili mo le Suʻesuʻega]
[Ata i le itulau 15]
Sa faalagolago ma le loto tetele Kitiona ma lana autau toaitiiti ia Ieova