Amuia ē Loto Maulalo
Amuia ē Loto Maulalo
“E tetee atu le Atua i e faamaualuga, a e foaiina mai le alofa tunoa i e faamaulalo.”—1 PETERU 5:5.
1, 2. Na faapefea ona faafesootai e Iesu le fiafia i le loto maulalo i lana Lauga i luga o le Mauga?
PE E fesootai le fiafia ma le loto maulalo? I lana lauga e sili ona tautaua, na faamatala atu ai e le tagata silisili o ē uma na soifua mai, o Iesu Keriso, fiafiaga e iva. (Mataio 5:1-12) Pe sa faafesootai ea e Iesu le fiafia i le loto maulalo? Ioe, sa ia faia faapea, auā o le loto maulalo o loo aafia ai i le tele o fiafiaga sa ia taʻua. Mo se faaaoaoga, e tatau ona loto maulalo se tagata ina ia manatunatu ai o ia i ona manaoga faaleagaga. E na o tagata loto maulalo lava e fia aai ma fia feinu i le amiotonu. A o tagata faamaualuluga, e lē agamalu ma e leai se alofa, latou te lē tausia foi le filemu.
2 E fiafia ē e loto maulalo auā o se mea e tatau ma faamaoni ina ia loto maulalo. E lē gata i lea, e fiafia ē e loto maulalo auā o se auala atamai le loto maulalo; e maua ai se faiā lelei ma Ieova le Atua ma uso Kerisiano. Ae e sili atu i lena, e fiafia tagata loto maulalo ona o se faailoaga lea o lo latou alofa ina ia loto maulalo.
3. Aisea e manaomia ai e le faamaoni le loto maulalo?
3 Aisea e manaomia ai e le faamaoni i tatou ina ia loto maulalo? O se tasi mafuaaga, ona o i tatou uma lava ua tuufaasolo mai i ai le lē lelei atoatoa, ma tatou te faia pea mea sese. Na faapea mai le aposetolo o Paulo e uiga ia te ia lava: “Auā ua ou iloa e leai se mea lelei ua nofo i totonu ia te au, o loʻu tino lea; auā ua ia te au le loto atu, a ou te lei iloa ona fai o le mea lelei.” (Roma 7:18) Ioe, o i tatou uma lava ua agasala ma ua lē oo i le viiga mai le Atua. (Roma 3:23) O le tautala saʻo e aveesea ai le faamaualuga mai ia i tatou. Ina ia tautino se mea sese, e manaomia ai le loto maulalo, ma o le a fesoasoani le faamaoni ia i tatou e taliaina ai le tuuaiga i so o se taimi tatou te faia ai se mea sese. Talu ai ona tatou te faia pea mea sese i mea tatou te mananao e fai, ua ia i tatou la se mafuaaga lelei e loto maulalo ai.
4. O le ā le mafuaaga autū o loo aumaia i le 1 Korinito 4:7 ina ia tatou faaalia ai le loto maulalo?
4 Ua aumaia e le aposetolo o Paulo ia i tatou se isi mafuaaga e tatau ai ona tatou faaalia le loto maulalo ona o le faamaoni. Ua faapea mai o ia: “Auā o ai ea se na te faaeseina oe? se a foi se mea ua ia te oe e lei foaiina atu? A e afai na foaiina atu ia te oe, se a le mea ua e mitamita ai, peiseai e lei foaiina atu lava?” (1 Korinito 4:7) Ma le mautinoa lava la, o le a tatou lē faamaoni ia i tatou lava, pe afai tatou te faamamaluina i tatou lava, pe faamaualuga i a tatou oa, po o agavaa, po o mea foi ua tatou mafaia. O le faamaoni e saosaolaumea lea i le mauaina o se loto fuatiaifo lelei i luma o le Atua, ina ia mafai ai ona tatou ‘faamaoni i mea uma lava.’—Eperu 13:18.
5. O le a faapefea foi ona fesoasoani le faamaoni ia i tatou pe a tatou faia se mea sese?
5 E fesoasoani le faamaoni ia i tatou e loto maulalo ai pe a tatou faia se mea sese. O le a avea foi lena ma mea tatou te nofo sauni ai e talia le tuuaiga, na i lo o le taumafai e taʻumamāina i tatou lava po o le tuuaia foi o isi. Ma, e ui ina tuuaia e Atamu Eva, ae sa lē tuuaia e Tavita Patisepa, i le faapea atu, ‘Sa lē tatau ona taele o ia i le mea e iloa atu ai e tagata. Ua lē mafai ai ona ou alofia le faaosoosoga.’ (Kenese 3:12; 2 Samuelu 11:2-4) O le mea moni, e ono mafai ona faapea atu i se isi itu, o le faamaoni, e fesoasoani lea ia i tatou ina ia loto maulalo; ae i le isi itu, o le loto maulalo e fesoasoani lea ia i tatou ina ia faamaoni.
O le Faatuatua ia Ieova e Fesoasoani ia i Tatou Ina ia Loto Maulalo
6, 7. E faapefea i le faatuatua i le Atua ona fesoasoani ia i tatou ina ia loto maulalo?
6 O le faatuatua ia Ieova o le a fesoasoani lea ia i tatou ina ia loto maulalo. O le talisapaia o le silisili o Lē na Foafoaina mea, le Pule Silisiliese i le Vateatea Aoao, o le mea moni o le a taofia ai i tatou mai le faatauaina o i tatou lava. Maeu le lelei o le faamanatu mai e le perofeta o Isaia o lenei mea ia i tatou! I le Isaia 40:15, 22, tatou te faitau ai e faapea: “Faauta! o atu nuu e tusa i latou ma si mea e sisina ifo nai le pakete; e faatatauina i latou e pei o le efuefu i le fua faatautau. . . . O ia lē tietie i luga o le faataaliolio o le lalolagi, a o e nonofo ai e tutusa i latou ma sē.”
7 O le faatuatua foi ia Ieova o le a fesoasoani lea ia i tatou pe a tatou lagona ua tatou pagatia ona o ni faiga lē tonu. Na i lo o le popole i le mataupu, o le a tatou faatalitali ai ma le loto maulalo ia Ieova, e pei ona faamanatu mai e le faisalamo i le Salamo 37:1-3, 8, 9. Na taʻua foi faapea e le aposetolo o Paulo le manatu lava lea e tasi: “Le au pele e, aua le taui atu ma sui, a ia outou tuu atu i le toasa; auā ua tusia, Ua faapea mai le Alii, O ia te au le taui ma sui, ou te taui atu.”—Roma 12:19.
Loto Maulalo—O se Ala Atamai
8. Aisea e mafai ai e le loto maulalo ona maua se faiā lelei ma Ieova?
8 E tele mafuaaga ua avea ai le loto maulalo o se ala atamai. O se tasi o mafuaaga e pei ua uma ona faailoa mai, e maua ai se faiā lelei ma Lē na Foafoaina i tatou. Ua faamaninoina mai i le Afioga a le Atua i le Faataoto 16:5 e faapea: “E inosia e Ieova atoa uma e ua loto faamaualuga.” Tatou te faitau ai foi i le Faataoto 16:18 e faapea: “E muamua le faamaualuga i le malaia; e muamua foi le loto faasiasia i le paū.” I se taimi, e oo ai faanoanoaga i lē faamaualuga. E tatau lava ona iai i le tulaga lena, talu ai ona o le mea ua tatou faitau i ai i le 1 Peteru 5:5 e faapea: “Ia usiusitai outou uma lava o le tasi i le tasi, ia oofu outou i le loto maulalo; auā, E tetee le Atua i e faamaualuga, a e foaiina mai le alofa tunoa i e faamaulalo.” E te mauaina lena lava manatu e tasi i le talafaatusa a Iesu e uiga i se Faresaio ma se ao lafoga, o ē na taufai tatalo. Sa faamaonia le sili atu ona amiotonu o le ao lafoga loto maulalo.—Luka 18:9-14.
9. O le ā le fesoasoani a le loto maulalo i taimi o faigata?
9 O le loto maulalo o se ala atamai, auā o le loto maulalo, e faafaigofie ai ona tatou utagiaina le fautuaga o loo i le Iakopo 4:7 e faapea: “O le mea lea ia outou gauai ai i le Atua.” Afai tatou te loto maulalo, o le a tatou lē tetee la pe afai e faatagaina i tatou e Ieova ina ia puapuaga i ni tulaga faigata. O le loto maulalo o le a mafai ai ona faamalieina i tatou i o tatou tulaga o iai ma ia onosai. O se tagata faamaualuga, e lē faamalieina, e manao pea ia tele ana mea, ma e tetee pe a oo i tulaga e faanoanoa ai. I le isi itu, o le tagata loto maulalo, e onosai i mea faigata ma tofotofoga, e pei ona faia e Iopu. Na puapuagatia Iopu ona o le leiloa o ana mea totino, ma sa matuā aafia o ia i se maʻi tiga na aofia ai lona tino atoa, ma mulimuli ane, na fautuaina o ia e lana avā ina ia uia se ala faamaualuga, i le faapea atu: “Ina faifai ia e oe o le Atua, ma e oti ai!” Na faapefea ona tali atu Iopu? Ua taʻu mai e le faamaumauga a le Tusi Paia ia i tatou e faapea: “Ona fai atu ai lea o ia ia te ia, Ua e tautala mai, e pei ona tautala mai o se tasi o le vao fafine vālea; ua tatou talia mea lelei mai le Atua, a e tatou te le talia ea ma mea leaga? Ua le agasala Iopu i nei mea uma i ona laugutu.” (Iopu 2:9, 10) Talu ai ona sa loto maulalo Iopu, sa lē tetee ai o ia, ae sa ia gauai atu ma le atamai ia Ieova, i so o se mea lava na faatagaina e Ieova e oo mai ia te ia. Ma mulimuli ane, na ia maua se taui faaoaina.—Iopu 42:10-16; Iakopo 5:11.
O le Loto Maulalo e Maua ai ni Faiā Lelei ma Isi
10. E faapefea ona faaleleia e le loto maulalo a tatou faiā ma o tatou uso Kerisiano?
10 O le loto maulalo o se ala atamai, talu ai ona e mafai ai ona maua ni faiā lelei ma o tatou uso Kerisiano. Ua fautuaina i tatou e le aposetolo o Paulo e faapea: “Aua neʻi faia se mea e tasi ma le finau vale, ma le mitamita fua; a ia taitasi outou ma manatu ma le loto maulalo, ua sili nisi uma ia te ia. Aua neʻi taitasi ma vaavaai i ana lava mea, a ia taitasi ma vaavaai i mea a isi.” (Filipi 2:3, 4) O le loto maulalo o le a tatou aloese ai ma le atamai mai le tauva ma isi, po o le taumafai e faasili atu oe i lo o isi. O na uiga faalemafaufau e mafua ai faafitauli i lo tatou va feagai ai ma uso Kerisiano.
11. Aisea e mafai ai ona fesoasoani le loto maulalo ia i tatou ina ia alofia ai le faia o mea sese?
11 O le tele lava o taimi, e fesoasoani ai le loto maulalo ia i tatou e alofia le faia o mea sese. E faapefea? Talu ai ona o le loto maulalo na te taofia i tatou mai le soona mautinoa naua. Na i lo o lena, o le a tatou talisapaia ai le fautuaga a Paulo i le 1 Korinito 10:12 e faapea: “O lenei, o lē manatu o loo o tu ia, ina faaeteete ia neʻi paū.” O le tagata faamaualuga, e soona mautinoa naua ia te ia lava, o lea e faigofie ai ona ia faia mea sese, ona o taaʻiga mai fafo po o ona lava vaivaiga.
12. O le ā le faatonuga faale-Tusi Paia o le a uunaia i tatou e le loto maulalo e faia?
12 O le loto maulalo o le a fesoasoani lea ia i tatou ina ia ausia ai mea e manaomia e le gauai atu. I le Efeso 5:21, ua fautuaina ai i tatou e faapea: “Ia usiusitai le tasi i le tasi ma le mataʻu i [“a Keriso,” NW].” Pe e lē moni ea o i tatou uma e manaomia ona gauai atu? E manaomia ona gauai atu le fanau i o latou mātua, o avā i a latou tane, ma e manaomia ona gauai atu o tane ia Keriso. (1 Korinito 11:3; Efeso 5:22; 6:1) Ma, i so o se faapotopotoga Kerisiano lava, o tagata uma lava e aofia ai ma auauna o le faiva, e tatau ona faaalia le gauai atu i toeaina. Pe e lē moni ea foi, e tatau i toeaina ona gauai atu i le vasega o le auauna faamaoni ma le mafaufau, ae maise lava ē ua fai ma sui o lena vasega, o ovasia matagaluega? Ua faapea foi i ovasia matagaluega ona manaomia ia gauai atu i ovasia itumalo, ma o le ovasia itumalo, e manaomia ona gauai atu i le Komiti o le Lālā a le atunuu o loo ia auauna ai. Ae faapefea sui o le Komiti o le Lālā? E tatau ona latou “usiusitai le tasi i le tasi” ma ia faapena foi i le Vaega Pule, o loo fai ma sui o le “auauna faamaoni ma le mafaufau,” lea o loo tali atu ia Iesu, le Tupu faauuina. (Mataio 24:45-47) E pei ona faia e so o se vaega o toeaina, e faapena foi i sui o le Vaega Pule ona faaaloalo le tasi i manatu o le isi. Mo se faaaoaoga, atonu e manatu se tasi o loo ia te ia se manatu lelei. Ae seʻi vaganā ua malilie faatasi i ai le toatele o isi sui, ona faatoʻā faaaogāina lea o lona manatu. E moni, o i tatou uma lava e manaomia le loto maulalo, auā o i tatou uma lava e manaomia ona gauai atu.
13, 14. (a) I le ā le tulaga patino o le a fesoasoani ai le loto maulalo ia i tatou? (e) O le ā le faaaoaoga na faataatia e Peteru e uiga i le taliaina o fautuaga?
13 Ae maise lava, ua avea le loto maulalo o se ala atamai, ona o le loto maulalo o le a faafaigofie ai ona tatou taliaina fautuaga ma aoaiga. E manaomia e i tatou uma lava taitoatasi aoaiga i lea taimi ma lea taimi, ma e ao ona tatou utagiaina le fautuaga o loo i le Faataoto 19:20: “Ia e faalogo i le faatonu mai, ma e talia le aʻoaʻo atu; ina ia e poto ai pe a oo i ou tausaga amuli.” E pei lava ona taʻua, o le loto maulalo e aveesea ai le tiga o le aoaiga. E lē gata i lea, ua fautua mai foi le aposetolo o Paulo ia i tatou i le Eperu 12:4-11, e uiga i le atamai o le gauai atu ma le loto maulalo i le aoaiga. E na o le pau lava lea o le auala e mafai ai ona tatou faamoemoe, o le a taitaia ma le atamai o tatou ala i le lumanai, ma mauaina ai le taui o le ola e faavavau. Maeu se lumanai fiafia o le a iai!
14 I lenei tulaga, atonu e mafai ona tatou faasino atu i le faaaoaoga a le aposetolo o Peteru. Na ia mauaina se aoaiga malosi mai le aposetolo o Paulo, e pei ona tatou aʻoaʻoina mai le faamatalaga o loo i le Kalatia 2:14: “A ua ou iloa latou te lei savavali tonu e tusa ma le upu moni a le tala lelei, ona ou fai atu lea ia Kefa [Peteru] i luma o i latou uma, O oe le Iutaia, afai e te amio faanuuese, a e le faa-Iutaia, se a le mea ua e tauanau atu ai i nuu ese ia latou faa-Iutaia?” Pe sa ita ai ea le aposetolo o Peteru? Afai sa ita o ia, e leʻi umi, e pei ona iloa mulimuli ane i lana faamatalaga e uiga i “a Paulo lo matou uso pele” i le 2 Peteru 3:15, 16.
15. O le ā le faiā i le va o lo tatou loto maulalo ma lo tatou fiafia?
15 E aafia ai foi le tulaga o le toafilemu, le loto malie. E lē mafai ona tatou fiafia seʻi vaganā ua tatou loto malie i mea tatou te maua, i o tatou faaeaga, ma o tatou faamanuiaga. O le Kerisiano loto maulalo, na te maua le vaaiga e faapea: “Pe a faatagaina e le Atua, ona mafai lea ona ou faia,” auā o le mea tonu lena na fai mai ai le aposetolo o Paulo, e pei ona tatou faitau i ai i le 1 Korinito 10:13 e faapea: “Ua le maua outou e se tofotofoga e ese i lo tagata; a ua faamaoni le Atua, o le na te le tuuina atu outou i le tofotofoga e sili i se mea ua outou lavatia, a e sauni foi faatasi ma le tofotofoga se mea e sao ai, ina ia outou lavā oono.” O lea, ua tatou toe iloaina foi le mafuaaga e avea ai le loto maulalo o se ala atamai, auā e fesoasoani lea ia i tatou ina ia fiafia ai e tusa lava po o le ā le tulaga o tatou iai.
E Fesoasoani le Alofa ia i Tatou Ina ia Faaalia le Loto Maulalo
16, 17. (a) O le ā le faaaoaoga faale-Tusi Paia ua faamatilatila mai ai le uiga sili e fesoasoani ia i tatou ina ia loto maulalo? (e) O le ā se faaaoaoga faalelalolagi o loo faataitaia mai ai foi lenei manatu?
16 E sili atu na i lo so o se isi lava mea, o le alofa lē manatu faapito, a·gaʹpe, o le a fesoasoani lea ia i tatou ina ia faaalia le loto maulalo. Aisea na mafai ai e Iesu ona onosai ma le loto maulalo i le amoina o lona satauro, lea e pei ona faamatalaina e Paulo i tagata Filipi? (Filipi 2:5-8) Aisea sa lē manatu ai o ia e faapea e tutusa o ia ma le Atua? Talu ai, e pei ona fetalai mai ia lava: “Ou te alofa i le Tamā.” (Ioane 14:31) O le pogai lena na ia tuuina atu ai le mamalu ma le viiga ia Ieova, lona Tamā faalelagi i taimi uma lava. O lea, i se tasi taimi, na ia taʻu atu ai e na o lona Tamā faalelagi lava e lelei.—Luka 18:18, 19.
17 Ina ia faataitaia lenei manatu, sa iai se mea na tupu i le olaga o se tasi o uluai tagata tusisolo o Amerika, o John Greenleaf Whittier. Sa fai se uo teine a lenei tagata a o laitiiti o ia, ma sa fai ai se tauvaga i se tasi aso i le sipelaina o upu, sa saʻo le upu na sipelaina e le teine, ae sese ona sipelaina e John. Sa matuā faanoanoa ai lava le teine. Aisea? E pei ona toe faamatalaina e le tusisolo, sa faapea mai le teine: “Ou te faatoese atu ona sa ou sipelaina lena upu. Ou te lē manao e fiasili atu i lo o oe . . . talu ai ona ou te alofa ia te oe.” Ioe, afai tatou te alolofa i se tasi, o le a tatou mananao la e faasili lena tagata, ae lē o le faamaulaloina ia i tatou, talu ai ona o le alofa e loto maulalo.
18. O le ā le fautuaga faale-Tusi Paia o le a fesoasoani le loto maulalo ia i tatou e utagiaina?
18 O se lesona lelei lea mo Kerisiano uma lava, ae maise lava i uso. Pe a oo i se faaeaga faapitoa o le auaunaga, pe o le a tatou olioli ea ona ua maua e so tatou uso lena faaeaga, na i lo o i tatou, po o le mea ea o le a maua ai i tatou i le loto leaga ma le matauʻa? Afai tatou te alolofa moni i o tatou uso, o le a tatou olioli ai la ona ua ia maua lena tofiga faapitoa po o se tulaga aloaia, po o se faaeaga i le auaunaga. Ioe, o le loto maulalo o le a faafaigofie ai ona utagiaina le fautuaga e faapea: “Ia tausolomua ona ava o le tasi i le tasi.” (Roma 12:10) E faitauina faapea se isi faaliliuga: “Ia āva le tasi i le tasi i ē e maualuga atu ia te oe.” (New International Version) Ua toe fautuaina foi i tatou e le aposetolo o Paulo e faapea: “Ia outou auauna le tasi i le tasi i le alofa.” (Kalatia 5:13) Ioe, afai e ia i tatou le alofa, o le a tatou fiafia la e galulue mo o tatou uso, auauna mo i latou, faamuamua o latou manaoga ma mea latou te fiafia i ai na i lo o i tatou lava, lea e manaomia ai le loto maulalo. O le loto maulalo foi e mafai ai ona taofia i tatou mai le gugutu, ma alofia ai le faia o mea e faagaee aʻe ai le agaga o le fuā ma le matauʻa. Na tusia faapea e Paulo, o le alofa “e le mitamita vale, e le faafefeteina.” Aisea e lē faapena ai le alofa? Talu ai ona o le uunaiga o loo i tua o le mitamita vale ma le faafefeteina, o le manatu faapito ma le mitamita vale, ae o le alofa o se uiga moni lea o le lē manatu faapito.—1 Korinito 13:4.
19. O ā faaaoaoga mai le Tusi Paia ua faataitaia ai le ō faatasi o le loto maulalo ma le alofa, e pei foi o le faamaualuga ma le manatu faapito?
19 O le faiā a Tavita ma le tupu o Saulo, ma lona atalii o Ionatana, o se faaaoaoga mataina lea o le auala na avea ai le alofa ma le loto maulalo o se fusi vavalalata, ma le auala e ō faatasi ai le faamaualuga ma le manatu faapito. Ona o le manumalo o Tavita i le taua, na pepese ai fafine Isaraelu e faapea: “Ua fasia e Saulo ana toaafe, a o Tavita ana sefulu o afe.” (1 Samuelu 18:7) I le matuā leai o se loto maulalo, ae faatumulia i le faamaualuga, na amata mai ai lava i le taimi lena ona totō i le loto o Saulo le ita ia Tavita. Maeu le eseese o lena mai le agaga o lona atalii o Ionatana! Ua tatou faitau ai e faapea, na alofa Ionatana ia Tavita e pei o lona lava tino. (1 Samuelu 18:1) O lea la, sa faapefea ona tali atu Ionatana, e tusa ai ma le gasologa o mea na tutupu, e foliga mai sa faamanuiaina e Ieova Tavita, ae lē o Ionatana, e avea ma tupu o Isaraelu e sui ia Saulo? Pe sa fuā ea pe matauʻa Ionatana? E matuā leai lava! Ona o lona alofa tele mo Tavita, sa mafai ai ona ia faapea atu, e pei ona tatou faitau ai i le 1 Samuelu 23:17: “Aua le fefe, auā e le maua oe e le lima o Saulo loʻu tamā; a e fai oe ma tupu o Isaraelu, o aʻu foi ou te aupito atu ia te oe; ua iloa lava e loʻu tamā o Saulo e faapea lava.” O le alofa tele o Ionatana mo Tavita, na mafua ai ona ia loto maulalo e talia le mea sa ia lagona o le finagalo lea o le Atua, e uiga i lē na soloai ane i lona tamā e avea ma tupu o Isaraelu.
20. Na faapefea ona faaalia e Iesu le faiā vavalalata i le va o le alofa ma le loto maulalo?
20 O le isi auala mataina o le faiā i le va o le loto maulalo ma le alofa, o le mea lea na tupu i le po mulimuli lava na faatasi ai Iesu Keriso ma ona apsetolo a o leʻi maliu. I le Ioane 13:1, ua tatou faitau ai e uiga ia Iesu, “na alofa i ona tagata o i le lalolagi, ua ia alofa ia i latou ua oo i le gataaga.” Ina ua uma lena, e pei ona tatou faitau ai e faapea, sa mulumuluina e Iesu vae o lona au aposetolo, i le gaoioi e pei o se auauna maualalo. Maeu se lesona malosi o le loto maulalo!—Ioane 13:1-11.
21. I le aotelega, aisea e ao ai ona tatou loto maulalo?
21 E moni, e tele mafuaaga e faaalia ai le loto maulalo. O se mea tatau la ma o se auala faamaoni le faaalia o le loto maulalo. O le auala o le faatuatua. E maua ai se faiā lelei ma Ieova le Atua, ma o tatou uso talitonu. O se ala atamai lea. E sili i mea uma, o le auala o le alofa ma e aumaia ai le fiafiaga moni.
E Faapefea ona E Tali?
□ I ā auala e fesoasoani ai le faamaoni i le faaalia o le loto maulalo?
□ Aisea e mafai ai e le faatuatua ia Ieova ona fesoasoani ia i tatou ia loto maulalo?
□ O le ā e faaalia ai, o le loto maulalo o se auala atamai?
□ Aisea e aogā faapitoa ai le alofa i lo tatou faaalia o le loto maulalo?
[Fesili mo le Suʻesuʻega]
[Ata i le itulau 21]
Na gauai atu ma le loto maulalo Iopu ia Ieova. Sa leʻi ‘faifai o ia i le Atua ma oti ai’
[Ata i le itulau 23]
Sa gauai atu ma le loto maulalo Peteru ina ua aoaia o ia e Paulo i luma o le lautele