Aʻoaʻoina i Kiliata i le Faatuatua e Silisili ona Paia

“UA MATUĀ lelei le aʻoaʻoina o a tatou tagata aʻoga i le faatuatua e silisili ona paia.” O upu amata ia i le polokalama o le faauuga o le vasega lona 95 o le Aʻoga Faale-Tusi Paia a le Olomatamata o Kiliata, sa faia i le Aso Sa, Setema 12, 1993. I lena taeao sa taitaia ai le 4,614 o malo valaaulia ma sui o le aiga Peteli sa potopoto i le Maota Fono i Jersey City, i se tatalo e George Gangas. O le Uso o Gangas sa fai ma sui o le aiga Peteli mo le 65 tausaga, ma i le 97 tausaga, o ia lava le sui pito i matua o le Vaega Pule.

O Albert Schroeder, o se tasi foi o le Vaega Pule ma o ia foi o le taitaifono o le polokalama, sa ia faaalia e faapea: “Mo le lima masina, e faia ai aʻoaʻoga i Kiliata i le faatuatua e silisili ona paia.” Peitai, o le ā le “faatuatua e silisili ona paia”? Sa ia faamatalaina e faapea, o lenei “faatuatua e silisili ona paia” o loo taʻua i le Iuta 20, o le taaofaiga atoa lea o le upu moni o le Tusi Paia. O lea la, e faavae aʻe aʻoaʻoga a Kiliata i le Afioga a Ieova, le Tusi Paia, lea ua fai ma ana tusi aʻoga autū.

Maua e Tagata Aʻoga Faatonuga e Tele

O le failauga muamua lava o John Stuefloten o le Komiti o le Faatoaga a le Olomatamata, sa ia talanoaina le matua e faapea “Mauaina o Aogā Mai Taaʻiga a Tagata Popoto.” Ua fai mai le Tusi Paia o i latou e “feoai ma tagata popoto, e poto lava ia.” (Faataoto 13:20) A o faagasolo le aʻoaʻoga i Kiliata, sa faaaluina ai e tagata aʻoga le sili atu i le 900 itula e suesueina ai le Tusi Paia. Sa fesili atu le Uso o Stuefloten i tagata aʻoga: “O le a taaina faapefea outou e Ieova i le lumanai? O le a outou ō atu i atunuu e 18 e iai se aofaiga o tagata e 170 miliona. O le a faapefea la ona outou taaina na tagata?” O le a mafai e misionare fou ona fesoasoani i isi ina ia avea ma ni ē e tapuai ia Ieova, e ala i lo latou faaatagia atu lea o le poto o Ieova, o le Puna o le poto e leai se mea gata mai ai.

O le matua o le lauga na sosoo ai e faapea “Ia Avea ma Mea Uma mo Tagata Uma” sa faia e Lloyd Barry o le Vaega Pule. (1 Korinito 9:22, Tusi Paia Samoa) I le 45 tausaga ua mavae, sa avea ai foi le Uso o Barry ma tagata aʻoga o le vasega lona 11 o Kiliata. O lea, na talisapaia ai e le vasega lona 95, fautuaga aogā mai se uluai misionare ua iai le tomai i tausaga sa galue ai i se atunuu ese. Sa ia faalaeiauina tagata aʻoga ina ia vave faamasani atu i latou i tagata o a latou oganuu fou i atunuu ese, e ala i lo latou taumafai e iloa tu masani ma aʻoaʻoina le gagana a le atunuu. Fai mai a ia o le auala sili e faia ai lenei mea, o le miomio ma galulue faatasi ma tagata o le atunuu, ma aʻoaʻoina a latou aganuu ma faamasani i ai i so o se taimi e talafeagai ai.

Ona sosoo ai lea ma le lauga a Dean Songer o le Komiti a le Falegaosimea, i lana matua faaoso naunau e faapea: “Tuu Saoloto Mai Tiute.” Ina ua maeʻa le sili atu i le 35 tausaga o iai i le auaunaga faasauatoa le Uso o Songer, ua malamalama lelei ai o ia i le ola i se olaga faigofie, e tepa taulai i se sini, ma galue punouai i le galuega ua tofia ai, i se olaga e saoloto mai faanaunauga faaletino. Ma o le aano lea o lana fautuaga i tagata aʻoga. O ē sa pepese i le malumalu o Ieova sa saoloto i latou mai i galuega masani sa faia e le au sa Levī ina ia mafai ai ona tuutoina atu atoatoa i latou i o latou tofiga faapitoa. (1 Nofoaiga a Tupu 9:33) E faapena foi le tulaga e iai misionare i Kiliata, ua tuu saoloto i latou mai mea e masani ai e pei o galuega faaletino, ina ia mafai ai ona latou uai atu i la latou auaunaga faapitoa. Ona faaiu ai lea e le Uso o Songer i le timaiga lenei: “Ia faafaigofie lou olaga ma ia tepa taulai i le sini. O la outou avega tauave, ia pei o i latou ua tuu  saoloto mai galuega ina ia iai i le galuega i le ao atoa ma le po, i le viiaina o Ieova.”

O le sui o le Vaega Pule, o Daniel Sydlik, sa sosoo ai i lana matua e faapea: “Aʻoaʻoina Isi i le Auala e Maua ai le Mea Silisili i le Olaga.” Sa ia faalaeiauina tagata aʻoga ina ia “aua neʻi tau o le aʻoaʻo atu o aʻoaʻoga, ae ia loto tetele e faaali atu i tagata le mea e tatau ona latou faia ina ia ogatasi ai o latou olaga ma le finagalo o le Atua.” O faiaoga lelei, e tatau ona faagaeeina ma uunaia isi. “Ia naunau e atiina aʻe tulaga faa-Kerisiano na i lo o le filigā e aʻoaʻoina tulafono ma faasasaaga,” o lana tala lea, ma na toe faaopoopo mai i le faaiuga e faapea: “I na mea uma, uso e, aʻoaʻo oe lava ma isi i le auala e faaalia ai le alofa, auā o le fusi lea e atoatoa ona lelei ai.”—1 Korinito 13:1-3; Kolose 3:14.

Ina ua uma le lima masina o aʻoaʻoga, na matuā iai se lagona mafana i tagata aʻoga i a latou faiaoga e toalua. O Jack Redford, o lē sa muai avea ma misionare, sa lauga muamua i le mataupu e faapea: “Ua Outou Faia le Filifiliga Saʻo.” I le lotolotoi o tagata Iutaia anamua, a o leʻi avea o ia ma aposetolo Kerisiano, sa ia Paulo  se tofi, se tulaga, se taaʻiga, ma le tamaoaiga tau tupe. Ae i le Filipi 3:8, sa taʻua ai e Paulo na mea uma o “otaota lava ia mea,” po o “lapisi,” e tusa ai ma le faaliliuga a Phillip. O lona loto sa i lana faiva, ma sa ia faia ai se filifiliga saʻo. I le faaeseesega, o le toatele o tagata i aso nei, ua faaalia i a latou filifiliga o le olaga lo latou faatauaina o mea faitino na i lo o le ola e faavavau. Ua faia e misionare o Kiliata se filifiliga saʻo. Ona faaiu ai lea e Jack Redford e faapea: “E augapiu ma se mea e mafai ona ofo mai e le lalolagi a le Tiapolo ia te outou e faatusa i ai la outou auaunaga faamisionare. Ia tausi lelei lena faaeaga e lē mafaatusalia, ae faitalia ai le lalolagi ma ana lapisi!”

Mo le 32 tausaga ua mavae, na avea ai Ulysses Glass ma faiaoga i Kiliata. Sa ia avatu i tagata aʻoga nisi o fautuaga maʻoti faatasi ma le matua o lana lauga sa faavae i le Salamo 1:3 e faapea “E Na o le Atua Lava Na te Mafaia ona Faia se Laau.” E lē mafai e suesuega i ona po nei ona iloa le auala na faia ai le laau, na fuafuaina e le Atua. I se uiga faapena, ua faatusaina ai Kerisiano moni i laau, na totoina ma faasūsūina e Ieova. Sa faailoa mai e le Uso o Glass e faapea, mo le lima masina, sa “lelei ona faasūsūina tagata aʻoga mai le punavai o vai o le ola i le Afioga a le Atua,” e pei o laau i le parataiso faaleagaga. O lea la, i le avea ma misionare, e tatau ona latou leoleo i o latou “tulaga faaleagaga ina neʻi faaleagaina.” Sa lapataia i latou ina ia ‘faaauau pea ona feinu i le vai o le ola mai ia Ieova, auā e na o le Atua lava e mafai ona faia se laau’

O le lauga faaiu sa tauaaoina e Carey Barber, o se sui o le Vaega Pule. Ina ua mavae tausaga e 70 o auai o ia i le auaunaga faasauatoa, sa mafai loa e Uso Barber ona lauga atu ma le faamalosi i le mataupu e faapea “Ia Matuā Tuutoina Atu ia Ieova.” O le anoanoai o tagata latou te lē o matuā tuutoina atu ia Ieova. (Teuteronome 5:9) E ui i lea, e pei ona faailoa mai e Uso Barber, e tusa lava pe tatou te lē lelei atoatoa, “ae e mafai ona tatou tuutoina atu atoatoa i le Atua.” Na ia faaopoopo mai e faapea: “E lē mafai e se tasi ona faapea mai: ‘Ua ou faia ona o le Tiapolo.’” Peitai, e mafai ona faatoilaloina i tatou e le Tiapolo pe afai tatou te lē tetee atu ia te ia. (Iakopo 4:7) O le faateleina o lo tatou taimi i le galuega a Ieova, o le auala sili lea e tetee atu ai ia Satani ma lana lalolagi, ma matuā tuutoina atu ai ia Ieova.

Tofia e Avea o ni Misionare

Sa faaiuina le polokalama o le taeao i le tofia aloaia o tagata aʻoga uma e 46 e avea ma misionare. Sa maua uma e ulugalii e 23 tusi pasi o loo faaalia ai i se vaega o lena tusi e faapea, o le ʻau faauu ua “tauagavaaina faapitoa i galuega faaleaoaoga, e faaauilumaina ai le finagalo lelei ma galulue e faatumauina ai le filemu ma le tulafono o le maopoopo lelei atoa ma le amiotonu i le va o tagata uma.” E mautinoa o lenei vasega lona 95 o Kiliata o le a taumafai e faataunuuina lenei galuega maualuga i atunuu e 18 ua tofia i ai i latou. O o latou tofiga e soo ai le lalolagi e aofia ai atunuu i Asia, Aferika, Europa, Amerika Latina ma le Caribbean.

I le aoauli, ina ua maeʻa se suesuega puupuu o le Olomatamata, sa taitaia e Charles Woody o le Komiti o le Matagaluega o le Auaunaga, ona faia loa lea e le ʻau faauu fou a Kiliata la latou polokalama, ma le matua e faapea: “Ua Saunia i Matou e Kiliata e Aʻoaʻo atu o ni Misionare.” Ona faaiuina lea o lea vaega e le tala e faapea “O le Fifilifiga ua Fesagai ma i Matou.”

Ina ua uma lenei polokalama faagaee fiafia, ona sauni loa lea o misionare fou mo le auina atu i tulimanu e fa o le lalolagi, ina ia fetufaai ai ma isi i lenei “faatuatua e silisili ona paia.”

[Pusa i le itulau 26]

Faamaumauga o le Vasega

Aofai o atunuu o loo iai o latou sui: 7

Aofai o atunuu ua tofia i ai: 18

Aofai o tagata aʻoga: 46

Aofai o ulugalii faaipoipo: 23

Faatatauga o tausaga: 30.06

Faatatauga o tausaga i le upu moni: 12.92

Faatatauga o tausaga i le faiva sauatoa: 9.4

[Ata i le itulau 26]

95th Graduating Class of the Watchtower Bible School of Gilead

In the list below, rows are numbered from front to back, and names are listed from left to right in each row.

(1) Buelow, D.; Donzé, V.; Innes, S.; Fulk, N.; Billingsby, M.; Hoddinott, L.; Nygren, B.; Eriksson, L. (2) Boker, J.; Thomas, M.; Stedman, S.; Billingsby, D.; Waugh, I.; Purves, M.; Luttrell, M. (3) Jacobsen, T.; Boker, J.; Martínez, L.; Nilsson, E.; Purves, P.; Holt, L.; Larsen, M.; Jones, L. (4) Numminen, P.; Numminen, H.; Buelow, M.; Olson, W.; Holt, S.; Donzé, G.; DesJardins, C.; DesJardins, D. (5) Larsen, K.; Martínez, D.; Nygren, P.; Waugh, P.; Jones, D.; Hoddinott, J.; Thomas, G. (6) Innes, B.; Fulk, R.; Eriksson, A.; Nilsson, S.; Stedman, J.; Olson, K.; Jacobsen, F.; Luttrell, J.