Faaaoaoga o le Loto Maulalo ia Faataitai i ai

“O lou agamalu [“loto maulalo,” NW] ua faasilisiliina ai aʻu.”—SALAMO 18:35.

1. O ā faamaoniga o le loto maulalo e mafai ona vaaia i se peresitene ua mavae o le Sosaiete o le Olo Matamata?

O JOSEPH F. RUTHERFORD o se tagata tinoese, e sili atu i le ono futu lona umī, ma e sili atu i le 200 pauna lona mamafa. E matuā malosi foi lona leo, lea sa ia faaaogāina e lē gata i le faalauiloaina atu o le suafa o Ieova i se auala e leʻi faapea ona iai i le taimi muamua, ae sa faaaogā foi e faaalialia atu ai faiga taufaaʻoleʻole a taʻitaʻi lotu a Kerisinetoma, ma faaigoaina a latou lotu o “se mailei ma o se faufauga faagaoi.” Peitai, e ui lava ina malosi lona leo i ana lauga, ae a tatalo o ia faatasi ma le aiga Peteli i le ofisa ulu, e pei lava lona leo o se leo o se tamaitiiti o loo talanoa atu i lona tamā, e faaalia ai faamaoniga o lana faiā vavalalata ma Lē na Faia o ia, atoa ma lona loto maulalo. Ioe, sa loto maulalo o ia e pei lava o se tamaitiiti laitiiti.—Mataio 18:3, 4.

2. I le ā le vala patino e matuā ese ai auauna a Ieova mai tagata o le lalolagi?

² E mautinoa o auauna moni uma a Ieova, o ni tagata e loto maulalo. I lea la, ua matuā ese ai lava i latou mai tagata o le lalolagi. I aso nei, e sili atu na i lo o se isi lava taimi muamua, ua faatumulia ai tagata i le faamaualuga. O tagata maualuluga ma taʻutaʻua, o tagata mauoa ma ē e aʻoaʻoina, ma e oo lava i le toatele o tagata matitiva ma i latou e faatauvaa i isi auala, o loo iai lea lava uiga o le faamaualuga.

3. O le ā e mafai ona taʻua e uiga i fua o le faamaualuga?

³ O le faamaualuga e mafua ai finauga e tele ma le atuatuvale. O le mea moni, na amata puapuaga uma i le vateatea, ona o se agelu na avea ma sē e faamaualuga, na manao ina ia tapuaia o ia i le auala na avatu ai le tapuaiga tutasi e tatau i Lē na Foafoaina Mea, o Ieova le Atua. (Mataio 4:9, 10) E lē gata i lea, a o ia foi o lē na ia faia ia lava ma Tiapolo, ma Satani, o lē na manuia i le ooleina o le uluai fafine o Eva, e ala i le faagaeeina o le faamaualuga o le fafine. Na ia folafola atu ia te ia e faapea, afai na te aiina le fua o le laau faasaina, o le a mafai ai ona pei o ia o le Atua, e iloa le lelei ma le leaga. Pe ana loto maulalo o ia, semanu e mafai ona ia fai atu, ‘Aisea e ao ai ona ou manao ia pei o le Atua?’ (Kenese 3:4, 5) Pe a tatou manatunatu i le tulaga pagatia ua iai tagata, i le tulaga faaletino, le mafaufau, ma le tulaga tauamio, pagā le leai o se faamolemolega o le faamaualuga o tagata! E letioa la ona tatou faitau ai e faapea, e inosia e Ieova “le faamaualuga, ma le loto fefete”! (Faataoto 8:13) I se faaeseesega ma tagata uma e faamaualuluga, o loo iai faaaoaoga o loo maua i le Afioga a le Atua, le Tusi Paia e uiga i ē loto maulalo.

E Loto Maulalo Ieova le Atua

4. O ā mau e faaalia ai e loto maulalo Ieova?

⁴ O Ieova le Atua—o Lē e Sili ona Maualuga, o le Pule Silisiliese i le Vateatea aoao, o le Tupu o le vavau—e loto maulalo. (Kenese 14:22) Pe e saʻo lena faamatalaga? Ioe, e moni! Na faapea mai le tupu o Tavita, e pei ona faamauina i le Salamo 18:35: “Ua e foaiina foi ia te au le talita o le olataga mai ia te oe; ua faatumauina aʻu e lou aao taumatau; o lou agamalu [“loto maulalo,” NW] ua faasilisiliina ai aʻu.” I inei, ua faamanino mai ai e le tupu o Tavita le loto maulalo o Ieova i le faasilisilina o Tavita. Ma tatou te faitau ai foi i le Salamo 113:6 e faapea, o Ieova, “o lē faamaulaloina e ia ia ia e silasila  mai i le lagi atoa ma le lalolagi.” Ua faitauina faapea isi faaliliuga, “faanounou i lalo e vaai,” (New International Version) “matuā punou i lalo ina ia vaai i le mea pito sili ona maualalo.”—The New English Bible.

5. O ā mea na tutupu e faamaonia ai le loto maulalo o Ieova?

⁵ O le mea moni sa faamaulalo Ieova le Atua i le auala na ia feagai ai ma Aperaamo, i le faatagaina o Aperaamo e fesiligia Lona tulaga amiotonu i lana fuafuaga e faaumatia aai amio leaga o Sotoma ma Komoro. * (Kenese 18:23-32) Ma ina ua faaalia e Ieova lona uai atu ina ia faaumatia le nuu o Isaraelu—i se tasi taimi ona o le ifo i tupua, ae i le isi taimi ona o le fouvale—sa talanoa atu Mose ia Ieova i na taimi taitasi uma e pei lava o loo ia talanoa atu i se isi tagata. I na taimi taitasi, na tali mai ai ma le fiafia Ieova. Na faaalia ai Lona loto maulalo i le taliaina o talosaga a Mose e uiga i Ona tagata o Isaraelu. (Esoto 32:9-14; Numera 14:11-20) O isi faaaoaoga o le faamaulalo o Ieova i le feagai ai ma tagata e ala i lona talanoa totino ma i latou, ua matauina lea i lana faiā ma Kitiona ma Iona, e pei ona faamauina i le Faamasino 6:36-40 ma le Iona 4:9-11.

6. O le ā le uiga moni o Ieova e faaalia atili ai lona loto maulalo?

⁶ O le mea moni, e tusa ma le faaiva ona taʻua faapea o Ieova e “telegese lona toasa.” * O le onosai o Ieova, ma le telegese o lona toasa i le feagai ai ma ana foafoaga o tagata lē lelei atoatoa mo le faitau meleniuma, o se faamaoniga atili lea o lona loto maulalo. O tagata faamaualuluga e lē onosai, e vave ona oso aʻe le ita, e matuā eseese mamao lava mai le onosai. Maeu le loto maulalo o Ieova, ua pei ai tagata faamaualuluga lē lelei atoatoa o ni tagata vālea! Ona ua poloaia i tatou ina ia ‘faaaoao i le Atua e pei o le fanau pele,’ e tatau ai ona tatou loto maulalo e pei ona loto maulalo o ia.—Efeso 5:1.

Le Faaaoaoga a Keriso o le Loto Maulalo

7, 8. O le ā ua fai mai ai le Tusi Paia e uiga i le loto maulalo o Iesu Keriso?

⁷ O le faaaoaoga matilatila lona lua o le loto maulalo e ao ona tatou faaaoao i ai, o loo i le 1 Peteru 2:21: “Auā na valaauina outou ona o  lea lava mea; auā na tigaina Keriso lava o le sui o outou, ua tuuina mai ai e ia le faaaʻoaʻo mo outou, ina ia outou mulimuli atu i ona tulagāaao.” A o leʻi taitai ona afio mai o ia i le lalolagi e avea o se tagata, sa valoia e uiga ia te ia i le Sakaria 9:9: “Ia e matuā fiafia o oe le tama fafine a Siona; ia alaga fiafia o oe le tama fafine a Ierusalema; faauta, o le a alu atu lou Tupu ia te oe; o ia o le amiotonu ma le faaola; e agamalu [“loto maulalo,” NW] o ia, o loo tietie i le asini.” Pe ana faapea sa faamaualuga Iesu Keriso, atonu na te talia lelei le ofoina atu e le Tiapolo o malo uma lava o le lalolagi e fai ma sui o se gaoioiga e tasi, o le ifo atu lea ia te ia. (Mataio 4:9, 10) Sa ia faaalia foi lona loto maulalo e ala i le tuuina atu o le viiga uma ia Ieova ona o mea na ia aʻoaʻoina ai o ia, i lona fetalai atu e faapea: “Pe a siitia i luga e outou le Atalii o le tagata, ona iloa lea e outou o aʻu lenei o ia; ou te le fai fua foi se mea, a e peitai, faapei ona aʻoaʻo mai e loʻu Tamā ia te au, o mea ia ou te tautala atu ai.”—Ioane 8:28.

⁸ Ia, sa mafai foi ona ia faapea atu i lana au faalogologo: “Ia outou amoina laʻu amo, ma ia outou faaaʻoaʻo ia te au, auā o aʻu lē agamalu ma le loto maulalo; ona maua lea e outou o le malologa mo outou agaga.” (Mataio 11:29) Ma e maeu se faaaoaoga sili o le loto maulalo na ia faataatia e ala i le mulumuluina o vae o lona au aposetolo, i le po mulimuli na latou faatasi ai ma ia o se tagata! (Ioane 13:3-15) Ma le matuā talafeagai lelei, i le Filipi 2:3-8, na fautuaina ai e le aposetolo o Paulo Kerisiano ina ia faaalia le “loto maulalo,” i lona siiina mai o Iesu Keriso e fai ma faaaoaoga e faapea: “Ia ia te outou foi lea lava manatu sa ia Keriso Iesu, o ia sa uiga faatasi ma le Atua, e lei manatu ia o se mea faoa ina ia tusa lava o ia ma le Atua; a ua faamaulalo e ia ia te ia, ua uiga o ia faatasi ma le pologa, ina ua faia o ia faapei o se tagata; na iloa foi o ia ua tino mai i le tagata, ua faamaulalo e ia ia te ia, ua na anaana ua oo ina maliu, o le maliu lea i le satauro.” Ina ua fesagai ma le tulaga sili ona faigata o lona soifuaga, sa ia tatalo atu ma le loto maulalo i lona Tamā: “Aua le faia loʻu loto, a o lou finagalo.” (Mataio 26:39) Ma le mautinoa, ina ia avea i tatou ma ē e faaaoao ia Iesu Keriso, e mulimulitui i ona tulagaaao, e tatau ona tatou loto maulalo.

O le Aposetolo o Paulo, o se Faaaoaoga Lelei o le Loto Maulalo

9-12. I ā auala na faataatia ai e le aposetolo o Paulo se faaaoaoga lelei o le loto maulalo?

⁹ Na tusia e le aposetolo o Paulo e faapea: “Ia outou faaaʻoaʻo mai ia te au, pei o aʻu ia Keriso.” (1 Korinito 11:1) Pe sa faaaoao ea le aposetolo o Paulo ia Iesu Keriso e ala i le loto maulalo, ma tuuina mai ai ia i tatou se isi faaaoaoga o le loto maulalo e faaaoao i ai? E mautinoa sa ia faia faapea. Ina ia amata, sa ia iloa ma le loto maulalo e faapea, o ia o se auauna a Iesu Keriso. (Filipi 1:1) Sa ia taʻu atu i toeaina i Efeso e uiga i lona ‘auauna mo le Alii ma le matuā loto maulalo lava, ma loimata, ma tofotofoga na oo ia te ia, ona o le taupulepulega a  tagata Iutaia.’ (Galuega 20:17-19) Pe ana lē ia te ia le loto maulalo, semanu na te lē tusia upu o loo i le Roma 7:18, 19 e faapea: “Auā ua ou iloa e leai se mea lelei ua nofo i totonu ia te au, o loʻu tino lea; . . . auā ou te le faia o le mea lelei ou te loto i ai, a o le mea leaga ou te le loto i ai, o le mea lea ou te faia.”

¹⁰ Sa faaalia foi le loto maulalo o Paulo i upu na ia tusi atu ai i Kerisiano i Korinito, e pei ona faamauina i le 1 Korinito 2:3: “Na ou i ai foi ia te outou ma le vaivai, ma le mataʻu ma le gatete tele.” I le faasino atu ma le loto maulalo i ona uiga sa faia a o leʻi avea o ia ma Kerisiano, na ia tusia ai e faapea: “O aʻu sa muai taufaifai, ma faasaua, ma faatāutala; . . . na maliu mai Keriso Iesu i le lalolagi, na te faaolaina o e agasala; ua sili musa aʻu nei ia i latou.”—1 Timoteo 1:13, 15.

¹¹ O isi faailoaga atili o lona loto maulalo, o lona tuu atu lea o le viiga ia Ieova le Atua ona o le faamanuiaina o ana taumafaiga. Sa ia tusia e uiga i lana faiva e faapea: “Na ou totōina, na faasūsūina e Apolo; a e peitai o le Atua ua faatupuina. O lenei, e le o lē totō, e le o lē faasūsū; a e peitai o le Atua o le na te faatupuina.” (1 Korinito 3:6, 7) Sa ia fai atu foi i ona uso e tatalo mo ia ina ia mafai ai ona ia tuuina atu se molimau lelei, e pei ona tatou faitau ai i le Efeso 6:18-20: “Ia outou tatalo . . . mo aʻu foi, ina ia tuuina mai le upu ia te au, . . . ina ia ou faamalosi ai ona tautala i le [tala lelei paia sa lilo], pei ona tatau ona ou tautala atu ai.”

¹² Sa loto maulalo foi Paulo i le auala na ia felagolagomai ai ma isi aposetolo: “Ona latou fetagofi lea i lima taumatau o le faatasiga ia te i maua ma Panapa e Iakopo, ma Kefa, atoa ma Ioane, . . . ina ia ma o i nuu ese, a o i latou ia o i e ua peritomeina.” (Kalatia 2:9) Sa ia faaalia atili lona naunau e felagolagomai ma le au toeaina o le faapotopotoga i Ierusalema e ala i le faatasi atu i tagata e toafa i le malumalu, ma totogi ni tupe mo i latou, a o latou faataunuuina se tautoga.—Galuega 21:23-26.

13. O le ā na mataina ai le loto maulalo o Paulo?

¹³ Ua sili atu foi ona mataina le loto maulalo o Paulo, pe a tatou matauina le auala malosi na faaaogāina ai o ia e Ieova le Atua. Mo se faaaoaoga, tatou te faitau ai e faapea: “Ua faia foi e le Atua vavega sili i lima o Paulo.” (Galuega 19:11, 12) E sili atu i lena, sa faailoa atu ia te ia vaaiga uigaese, atoa ma faaaliga. (2 Korinito 12:1-7) E ao foi ona tatou matauina le faagaeeina o ia e tusia tusi e 14 o tusi e 27 (o lona uiga o tusi) o le Tusi Paia Kerisiano Eleni. O na mea uma sa lē tautala faamaualuga ai o ia. Sa tumau pea o ia i le loto maulalo.

Faaaoaoga i Aso Nei

14-16. (a) Sa faapefea ona avea le uluai peresitene o le Sosaiete o le Olo Matamata ma faaaoaoga lelei o le loto maulalo? (e) O le faaaoaoga a ai e matuā ese mai lana faaaoaoga?

¹⁴ I le Eperu 13:7, tatou te faitau ai i le fautuaga a le aposetolo o Paulo e faapea: “Ia outou manatua o outou taʻitaʻi, o e ua folafola atu le afioga a le Atua ia te outou; ia outou faaaʻoaʻo i lo latou faatuatua, ma ia mafaufau i le iuga o  a latou amio.” I le ogatasi ma lenei mataupu silisili, e mafai ona tatou fai ma faaaoaoga le uluai peresitene o le Watch Tower Bible and Tract Society, o Charles Taze Russell, o lē atonu tatou te faaaoao i ai i lona faatuatua. Pe sa avea ea o ia o se tagata loto maulalo? O le mea moni lena! E pei ona tatou matauina lelei, i le aotelega o ana tusi o le Studies in the Scriptures, i tusi e ono e tusa ma le 3,000 itulau, na te leʻi faia ai lava sina faamatalaga e uiga ia te ia lava. O loo mulimuli ai foi lomiga a le Watch Tower Bible and Tract Society i aso nei i lenei mataupu silisili i le lē taulai atu i tagata e ala i le faailoa mai o igoa o ē na tusia mataupu.

¹⁵ I le Olo Matamata, na tusia ai e Russell i se tasi taimi e faapea, na te leʻi iloaina ai lava se “aʻoaʻoga a Russell,” po o ni “tagata o Russell,” lea sa faaaogāina e ē na tetee ia te ia, peitai sa ia teena na aʻoaʻoga. Na ia tusia e faapea: “O la matou galuega . . . o le tuufaatasia lea o vaega eseese na faataapeapeina o le upu moni, ma tuuina atu i tagata o le Alii—e lē o se mea fou, e lē sā matou, ae o lā a le Alii. . . . O le galuega o loo fiafia le Alii e faaaogāina i ai o matou tomai ma le loto maulalo, e lē o se galuega faatoʻā amata, peitai, o se galuega o le toe fausiaina, toe faaleleia, ma ia talafeagai lelei.” O le mea moni, na ia faaleoina mai manatu o le aposetolo o Paulo, ia o loo i le 1 Korinito 3:5-7.

¹⁶ O ona uiga sa matuā tuufaafeagai lava ma uiga o Charles Darwin. I lana uluai tusi o le Origin of Species i le 1859, na faasino atu ai e Darwin i “laʻu” aʻoaʻoga, ae faagalogaloina manatu na fai mai ai isi na muamua ia te ia e uiga i le faaevolusione. Na faasino atu e se tasi o tusitala o lena senituri, o Samuel Butler, lona faaleaogaina o manatu o Darwin, i le faasino atu e faapea, o le toatele o isi na muamua atu, sa latou faalauteleina le faaevolusione; ae e leʻi amataina e Darwin.

17. O ā faaaoaoga atili o le loto maulalo o le uso o Rutherford?

¹⁷ O se tasi o auauna faamaoni o aso nei sa faaaogāina ma le malosi e Ieova le Atua, o Joseph F. Rutherford, lea na taʻua i le amataga. O ia o se tasi sa faalauiloaina atu ma le faamalosi le upu moni o le Tusi Paia, ae maise lava le suafa o Ieova. E ui ina lauiloa o ia o le faamasino o Rutherford, ae o ia o se tasi e sili ona loto maulalo. Mo se faaaoaoga, sa ia faia ni faamatalaga maumauai e uiga i le mea sa ono faatalitalia e Kerisiano i le 1925. Ina ua lē taulau ona lagolagoina ona manatu e mea na tutupu, sa ia taʻu atu ma le loto maulalo i le aiga Peteli i Brooklyn e faapea, na ia faia se faaiuga lē saʻo. O se isi o le vaega o Kerisiano faauuina o lē sa aufaatasi vavalalata atu ia te ia, sa molimau mai e faapea, o le tele lava o taimi sa faalogo ai i le uso o Rutherford o faatoese atu i le agaga o loo taʻua i le Mataio 5:23, 24, e lē gata i le lautele, ae faapea foi pe a na o i laua ma se tasi, pe a ia faatiga i se uso Kerisiano, e ala i se fautuaga e lē tusa ai. E manaomia ai le loto maulalo mo se tasi o loo i se tulaga o le pule, ina ia faatoese atu ia i latou o ē o loo i lalo o lana pulega. Na faataatia e le uso o Rutherford se faaaoaoga sili mo ovasia uma lava, po o i le faapotopotoga, po o i le galuega femalagaai, po o totonu o se tasi o lālā a le Sosaiete.

18. O le ā le faamatalaga e faaalia ai le loto maulalo o le peresitene lona tolu o le Sosaiete?

¹⁸ Na faaalia foi e le peresitene lona tolu o le Watch Tower Bible and Tract Society, o Nathan H. Knorr, lea lava uiga, e ui ina lausilafia o ia e tagata o Ieova, ae sa leʻi fiasili ai o ia ona o lona tulaga. E ui lava ina lelei tele o ia i le tomai o le faamaopoopoina ma le tautala atu i le lautele, ae sa matuā faaaloalo tele o ia i mea na faia e isi. Ma sa ia asiasi atu i se tasi taimi i le ofisa o se tasi o sui o le Matagaluega o Fetusiaiga ma faapea atu: “O le vaega pito sili lenei ona tāua, ma o le matagaluega pito sili foi lenei ona faigata galuega o loo faia ai. O le mafuaaga lena e itiiti ai saʻu vaega e faia i ai.” Ioe, sa ia matuā faatatauina ma le loto maulalo le fautuaga o loo i le Filipi 2:3 e faapea, ‘ia manatunatu ma le loto maulalo faapea e sili nisi uma ia te oe.’ Sa ia talisapaia e faapea, e ui lava ina tāua lana auaunaga i le avea ma peresitene o le Sosaiete, ae e tāua foi isi galuega. Ona o lona loto maulalo, sa lagona ai ma mafai ai foi ona faailoa atu ma le manino ona  lagona. O ia foi o se tasi o faaaoaoga lelei e ao ona tatou faaaoao uma i ai, ae maise lava ia i latou o ē atonu o loo iai ni faaeaga o le pule.

19, 20. (a) O le ā le faaaoaoga o le loto maulalo na faataatia e le peresitene lona fa o le Sosaiete? (e) O le ā le fesoasoani o le a aumaia e le mataupu o sosoo mai e uiga i lo tatou faaalia o le loto maulalo?

¹⁹ Sa avea foi le peresitene lona fa o le Sosaiete, o Fred W. Franz, ma faaaoaoga lelei o le loto maulalo. A o avea ma peresitene lagolago o le Sosaiete mo le 32 tausaga, sa tele lava ina ia faia galuega o le tusiaina o mekasini ma polokalama o tauaofiaga; ae i nei mea uma, sa fifilemu pea o ia, ae na te leʻi saili e faauai atu tagata ia te ia. Atonu e mafai ona siiina mai se faaaoaoga anamua e tali faapena. Ina ua faatoilaloina e Ioapo le fanauga a Amoni i Rapa, sa ia faamautinoa ua maua e le tupu o Tavita le viiga mo le manumalo.—2 Samuelu 12:26-28.

²⁰ E moni, e matuā tele faaaoaoga lelei, o le taimi ua mavae ma le taimi nei, e aumaia ai ia i tatou ni mafuaaga malolosi ina ia faaalia ai le loto maulalo. Ae e ui i lea, e tele atu isi mafuaaga e tatau ai ona tatou faaalia le loto maulalo, ma o nei faaaoaoga faatasi ai ma fesoasoani ina ia avea ai i tatou ma ē e loto maulalo, o le a talanoaina i le mataupu o sosoo mai.

[Faaopoopoga i lalo]

Pe E te Manatua?

□ O ā fua o le faamaualuga?

□ O ai na ia faataatia le faaaoaoga silisili o le loto maulalo?

□ O le ā e faaalia ai po o ai sa avea ma faaaoaoga silisili lona lua o le loto maulalo?

□ O le ā le faaaoaoga lelei o le loto maulalo na faataatia e le aposetolo o Paulo?

□ O ā faaaoaoga lauiloa i aso nei o le loto maulalo?

[Fesili mo le Suʻesuʻega]

[Ata i le itulau 15]

Na tuuina mai e Iesu se faatinoga sili o le loto maulalo

[Ata i le itulau 16]

Na faataatia e Paulo se faaaoaoga lelei o le loto maulalo

[Ata i le itulau 17]

Sa leʻi viia e le uso o Russell ia lava i mea na ia tusia