Galuega Laveai a Ieova i le Taimi Nei

UA TAʻU mai e le Tusi Paia ia i tatou lenei mea e uiga ia Ieova: “E tele lava mea leaga e oo i le ua amiotonu; a e laveaiina o ia e Ieova ai ia mea uma,” ma “ua silafia e le Alii se mea e laveai mai ai e amio Atua ai le faaosoosoga.”—Salamo 34:19; 2 Peteru 2:9.

E faapefea ona fesoasoani Ieova i ona tagata pe a oo i ai puapuaga? E lē ala i le aveesea faavavega o matagi po o mafuie malolosi pe ala foi i se isi faiga uigaese, e pei ona manatu ai le toatele faapea e ao ona ia faia faapena, ae e ala i se isi malosi e lē o malamalama moni i ai le toatele o tagata—o le alofa. Ioe, e alofa Ieova i ona tagata, ma ua ia faatupuina ia i latou se alofa matuā malosi o le tasi i le isi, lea ua mafai ai ona ia faataunuuina mo i latou mea e foliga mai e pei lava na faia faavavega.—1 Ioane 4:10-12, 21.

Atonu o le a finau mai nisi faapea, i taimi o faalavelave faafuasei, o mea e manaomia o meaai, vailaau, ma mea faigaluega—ae e lē o le alofa. E moni, o meaai, vailaau, ma mea faigaluega e tāua. Ae peitai, o le manatu lenei o le aposetolo o Paulo: “Afai foi o ia te au le faatuatua uma e ave ese ai mauga, a e leai soʻu alofa, ou te le aoga lava. Afai foi ou te tufatufaina aʻu mea uma e fagaina aʻi e matitiva; afai foi ou te tuuina atu loʻu tino ina ia susunuina, a e leai soʻu alofa, e leai lava sona aoga ia te au.”—1 Korinito 13:2, 3.

E masani ona tatou faitau e uiga i meaalofa mo mala o loo taatitia i uafu ma pala ai pe ʻaina foi e isumu, ae o loo feoti tagata matitiva i faamaʻi ma le matelaina. E sili foi ona leaga, pe afai e oo atu na meaalofa i lima o tagata matapeapea ma le faalēalofa, o ē ua latou faaaogāina na mea ina ia maua ai ni o latou lelei totino. O lea la, o se mea lelei le maua o mea ua manaomia, ae e manaomia foi ona faamautinoa ua maua e i latou o mafatia aogā mai i na mea. O le alofa moni ma le manatu mamafa e mafai ona faia ai le eseesega.

Faatinoina o le Alofa

Ia Setema 1992, na taia ai i le Afā o Iniki le motu o Hawaii, o Kauai, o lona faitau aofai e 55,000. O matagi malolosi mai le afā, sa agi malosi e tusa ma le 130 maila i le itula, ma matagi to faataʻutaʻu e oo atu i le 160 maila i  le itula, na maliliu ai tagata e toalua ma le toʻa 98 na manunua, e tusa ma le 75 pasene o fale na faaleagaina, na tuua ai le 8,000 o tagata ua leai ni fale e nonofo ai, ma o le tau o mea na faaleagaina ai e tusa ma le piliona tālā Amerika. Ia i latou na mau ai i lenei motu itiiti, sa iai pe tusa ma le 800 Molimau a Ieova i faapotopotoga e ono. Na faapefea ona latou fesagai ma lena tulaga?

A o leʻi agi atu Iniki, sa faafesootaia ai e toeaina o faapotopotoga i lalo o le taitaiga a le ovasia faimalaga, sui uma o faapotopotoga ina ia faamautinoa ua malupuipuia ma saogalemu tagata uma, e nofo sauni ai mo le mala. O lena manatu alofa sa avea o se fesoasoani i le puipuia ai o ni manuʻa matuia po o le oti semanu e oo i Molimau.—Faatusatusa i le Isaia 32:1, 2.

E ui lava sa matuā faaleagaina auala o fesootaiga ma felauaiga uma, ae e toatolu sui o le lālā o le Watch Tower Bible and Tract Society mai le ofisa o le lālā i Honolulu sa iai ia i latou na muai taunuu i le mea na tupu ai le faalavelave ina ua mavae le afā, ona sa tuuina atu i ai le faatagaga faapitoa mai le ofisa o le puipuiga lautele e felelei atu ai i Kauai. Sa vave loa ona latou faafesootaia Molimau i le motu, ma i le taeao na sosoo ai, na faamaopoopoina ai se feiloaiga ina ia fuafuaina se pulega mo ni fesoasoani. Na faavaeina loa se komiti e tufatufaina fesoasoani, ina ia fuafuaina mea manaomia, ma ina ia aumaia mea manaomia e ala mai i le ofisa o le lālā i Honolulu. I le galulue e aunoa ma le mapu, sa latou faatonutonuina ai le galuega o le avatua o mea mo i latou o manaomia, ma faamamā, ma toe faafouina fale na faaleagaina.

Sa vave foi ona tali atu Molimau i isi motu i manaoga o o latou uso. Ma i le taimi lava na tatala ai le malae vaalele i Kauai, e toʻa 70 Molimau na felelei atu e fesoasoani. O le aofai o meaalofa na aauina atu pe a faatupeina e tusa ma le $100,000 tālā Amerika, e aofia ai afi o molī eletise, ma tamai ogaumu kalasini, molī matagi, ma meaai, na auina atu i vaa. Sa faaaogā se tasi o Maota o le Malo i le motu e fai ma nofoaga autū e tufatufa atu ai na fesoasoani; ae sa iai se mataʻu ina neʻi vetea e ni tagata. Ona ō ane lea o nisi o loli a le Army i le Maota o le Malo, ma sa talosaga atu avetaavale pe mafai ona faatutū ai i inā a latou loli. Sa tiute ai fitafita ina ia puipuia loli ma foia ai foi le faafitauli o le vetea o fesoasoani.

Sa ave e uso afi o molī eletise mai lea fale i lea fale, ma faaola ai fale o aiga taitasi mo le lua po o le tolu itula e fesoasoani ai i tagata ina ia faaaogāina a latou pusa ʻaisa. Sa aauina atu i aiga eseese ni uso e fesoasoani i le faamamāina ma le toe faafouina o mea na faaleagaina. A o latou galulue i le fale o se tuafafine o lē sa matuā tetee i ai ma le ita lana tane i aso ua mavae, sa matuā ootia le loto o lenei tane, ma na pau lava lana mea na fai, sa na ona tūtū ma matamata ma tagi. O se tasi tagata asiasi mai le motu tele o lē na ia vaaia se isi vaega o Molimau o galulue, sa matuā faafiafiaina o ia i a latou amio ma le maopoopo, o lea na ia faalatalata atu ai ia i latou ma fesili atu, po o le ā ua matuā ese ai i latou. Ina ua faamatala atu e se uso e faapea, ona o lo latou alofa mo le Atua ma o latou uso Kerisiano, sa tali atu le tamaloa: “E mafai faapefea ona ou iloa le Atua?” (Mataio 22:37-40) Ona ia toe faapea mai lea: “E ese lo outou maopoopo, atonu o iai se isi o outou o faatali mai mo aʻu pe a ou toe foi i loʻu aiga i Florida!”

I le aotelega, na fesoasoani ai Molimau a Ieova i le faamamāina ma le toe fausiaina o fale e 295 i Kauai. Ma o le 207 o nei fale, sa laitiiti ni mea na manaomia ona toe faafou, ae e 54 na faaleagaina, ma e 19 sa matuā faatamaia atoatoa. Sa aofia ai foi i la latou galuega le asiasi atu i Molimau uma lava i le motu, ina ia faamautinoa ua avatu le fesoasoani i tagata taitoatasi. Ina ua aauina atu meaalofa i se tuafafine, sa matauina ai e se tuaoi e Lotu Puta faapea, na te leʻi maua mai lava i tagata o lana lotu, e oo lava i se tamai pepa lauti se tasi. Sa faapea mai foi se tasi fafine o lē sa faamamā e se au faamamā o Molimau lona fale e faapea: “Sa umi lava se taimi o tou ō mai pea  i loʻu fale, ma sa ou manatu ia te outou faapea o ni tuaoi lelei, ae o lenei faailoaga o le alofa i tuaoi, ua faailoa mai ai ia te aʻu le uiga o la outou faalapotopotoga. Faafetai mo a outou galuega mamafa uma.”

E ese ai mai le tausia o manaoga faaletino o o latou uso Kerisiano uma, ae sa manatu mamafa foi i latou sa pulea le tufatufaina atu o meaalofa mo lo latou lelei faaleagaga. E itiiti ifo i le lua aso talu ona agi o le afā, ae ua faia sauniga a nisi faapotopotoga. Sa vave foi ona toe amata vaega toaitiiti o suesuega tau tusi. E toasefulu toeaina mai isi motu na ō atu i Kauai ina ia fesoasoani i toeaina o lena motu mo le faia o asiasiga faaleoleo mamoe i Molimau uma i le motu. I le Aso Sa na sosoo ai, na faia ai Suesuega o le Olomatamata a faapotopotoga uma e ono, na faia foi se lauga e 30 minute e uiga i taualumaga o meaalofa e se sui o le Komiti o Fesoasoani, ma le 30 minute mulimuli o le lauga a le sui o le Komiti o le Lālā o lē na sau mai Honolulu ona o lea fuafuaga. Na taʻua i le lipoti a se molimau vaaitino e faapea: “Sa faamafanafanaina tagata uma ona o faatonuga na tuuina mai, ma lagona ai le nofo sauni faaleagaga e faafetaiaia o latou faafitauli ia o loo totoe. E toatele le aofia sa fetagisi a o faaiu le polokalama, ma sa matuā taufai pati uma ona o le talisapaia moni.”

Se Auuso i le Lalolagi Aoao

O lena alofa ma le manatu mamafa, o se faailoga lea o tagata o Ieova i le lalolagi aoao. Ina ua taia e le Afā o Valelia Samoa i Sisifo i le tausaga ua tuanai atu, sa matuā tele mea na faaleagaina ai, ae na vave foi ona oo atu Molimau a Ieova mai isi vaega o le lalolagi e fesoasoani i o latou uso i inā. Mulimuli ane, ina ua saunia e le malo tupe mo lotu uma—e  aofia ai ma Molimau a Ieova—ina ia toe fausia ai o latou fale, sa toe faafoi atu e Molimau le tupe faatasi ma se tusi na taʻu atu ai e faapea, ua uma ona toe faaleleia a latou mea na faaleagaina, ma e mafai ona faaaogā le tupe e toe faafouina ai fale o le malo. Sa lipotia i le nusipepa a le atunuu la latou gaoioiga. I le matauina o lenei mea, na taʻu atu ai e se sui o le malo i se Molimau e faapea, sa ia lagona le masiasi ona o lana lotu, talu ai na latou talia le tupe mai le malo, e ui lava o o latou fale uma sa faaleagaina i le afā sa faia uma e kamupani inisiua.

E faapena foi ia Setema, 1992, ina ua pa le Vaitafe o le Ouvèze i saute sasae o Falani, ma faaumatia ai Vaison-la-Romaine ma nuu e 15 sa siosiomia ai, na vave lava ona tali atu Molimau. I le po e tasi, na maliliu ai tagata e toʻa 40, faaleagaina fale e 400, ma faatamaia ai le faitau selau o isi fale, ma tuua ai le faitau afe o aiga e aunoa ma se vai po o le eletise. I le taeao pō o le aso na sosoo ai, na muai taunuu atu ai Molimau mai isi faapotopotoga, e fesoasoani i ē na mafatia i lologa. O i latou sa manaomia ni fale e nonofo ai, sa ave ma le alofa e aiga Molimau i o latou fale. E faitau selau Molimau na ō ane mai nofoaga mamao ma nofoaga lata ane e fesoasoani i ai. Sa faavaeina se komiti o fesoasoani i le aai lata ane o Orange, e faatonutonuina taumafaiga a vaega tauofo e fa, o ē na latou fufuluina le palapala ma faamamā fale, ma tataina le anoanoai o lavalava na matuā palapala, ma sauniuni ma tufaina atu meaai ma vaiinu i vaipanoa sa aafia. Sa latou tauofo foi e faamamā se faleaoga ma nisi o fale o le malo. Sa talisapaia a latou taumafaiga ma le lē faavaivai e o latou uso ma tagata foi o le nuu.

I le tele o isi nofoaga, sa mafatia ai Molimau a Ieova i mala, e pei o lologa, afā, ma mafuie, e pei lava o isi tagata uma. I le malamalama faapea o nei mea o ni iuga o mea lē mailoa e tutupu po o tulaga lē maalofia, latou te lē tuuaia ai le Atua po o se isi. (Failauga 9:11) Na i lo o lea, latou te mautinoa o le alofa faataulagaina totino o o latou uso talitonu, o le a oo mai ai e laveai i latou, e tusa lava po o le ā le tulaga faigata e oo ia i latou. O na galuega alofa, o le iuga lea o le faatuatua ua tofusia ai i latou. Ua faamatala mai e le soʻo o Iakopo e faapea: “Afai ua le ofu se uso po o se tuafafine, ua leai foi sana mea e ʻai i lea aso ma lea aso, a fai atu so outou ia te i latou, Ina o ia outou ma le manuia, ia mafanafana, ma ia maoona, a ua le foai atu ia te i latou ni mea e tatau i le tino, se a lona aoga? E faapea foi le faatuatua, pe afai e le i ai galuega, e mate lava ia ina ua na o ia.”—Iakopo 2:15-17.

Le Puna o le Puipuiga Moni

Na i lo o le faatalitalia o ni vavega mai le Atua po o se ituaiga o mea faapena, ua iloa lelei e Molimau a Ieova e faapea, o le a maua le puipuiga mai lo latou auuso Kerisiano i le lalolagi aoao. O le mea moni, o mea ua mafai ona faataunuuina i taimi o puapuaga ona o lena autasi faaleuso, e leai lava se mea e ese ai ma se vavega. Latou te manatua upu a Iesu na e maua i le Mataio 17:20: “Afai e tusa lo outou faatuatua ma le fua o le sinapi, e fai atu outou i lenei mauga, Alu ia oe i lela mea; ona alu atu ai lea; e leai foi se mea tou te le mafaia.” Ioe, o toatuga e pei o mauga, e mafai ona mou atu pe afai e gaoioi faatasi le faatuatua moni faa-Kerisiano ma le alofa.

E lagona e tagata o Ieova i le lalolagi aoao le aao puipui o lo latou Atua i nei taimi lē mautu ma faigata. Ua latou lagona e pei ona lagona ai e le faisalamo e faapea: “Ou te taoto, ma ou moe filemu; auā o oe Ieova e, na o oe lava, ua ou nofo ai ma le filemu.” (Salamo 4:8) Ma le mautinoa, latou te taulai atu o latou manatu i le galuega o loo latou faia nei: “E talaʻiina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.” (Mataio 24:14) Ma le mautinoa lava, o loo latou vaavaai atu i luma i le taimi o le a faataunuuina ai le folafolaga a Ieova e uiga i se lalolagi fou filemu, ma le amiotonu, lea o le a lē toe oo ai ia i latou so o se ituaiga o mala, e faia e tagata pe faalenatura.—Mika 4:4.

[Ata i le itulau 12]

Sa ō ane Molimau mai so o se nofoaga e fesoasoani i tagata na aafia i lologa