Le Foai o “Mea Lelei Uma”

“I se tasi mea na tupu, na amia ai aʻu e le faifeau o le Lotu Toe Fuatai. Sa ia fia iloa le auala o loo tausia ai laʻu lotu. Na ou faapea atu ia te ia: . . . ‘E lē totogia i matou; e leai se mafuaaga e fefinauai ai tagata. Matou te lē faia foi ni saogatupe.’ ‘Ae e faapefea la ona maua tou tupe?’ o lana fesili lea. Na ou tali atu, ‘Lau Susuga—, afai ou te taʻuina atu nei ia te oe le upu moni faigofie, o le a faigata ona e talitonu i ai. Pe afai e fiafia tagata i lenei tapuaiga, e lē faia ai ni aogatupe. Peitai, latou te iloa e iai ni tupe e faaalu. Latou te faapea ifo ia i latou lava, “E tatau lava ona iai se tau o lenei maota. . . . E mafai faapefea ona faia saʻu foai laitiiti mo lenei maota?”’ Na ia tepa mai ia te aʻu e pei o loo mafaufau faapea, ‘O le ā lou manatu ia te aʻu—faapea a oe ou te valea?’ Na ou fai atu, ‘Ia, lau Susuga—, ua ou taʻuina atu ia te oe le mea moni. . . . Pe a faamanuiaina se tasi ma iai foi ni ana ālā manuia, e manao o ia e faaaogā mo le Alii. Afai e lē iai ni mea a se tagata, aisea o le a matou faamalosia ai fua o ia e faia lena tulaga?’”

—Charles T. Russell, o le uluai peresitene o le Sosaiete o le Olo Matamata, “The Watch Tower,” Iulai 15, 1915.

MATOU te foai auā o Ieova le Atua na muai foai mai. O lana foai na amata mai lava i tuā i ana foafoaga—i lana uluai foafoaga, o lona “Atalii e toatasi.” (Ioane 3:16) Ona o lona alofa, na ia foai mai ai le meaalofa o le ola i isi tagata.

O le Alo o le Atua, o Iesu Keriso, o le meaalofa silisili lea a Ieova ia i tatou. Peitai, i le Alo o le Atua lava ia, e lē o ia le mutaaga o le foai a le Atua. “O le alofa tunoa o le Atua” o le mea lea na taʻua e Paulo o le “mea foai fua e le mafaamatalaina” a Ieova (2 Korinito 9:14, 15) O lenei meaalofa ua manino le aofia ai o le lelei ma le alofa tunoa uma o le Atua ua ia faasalafa mai i ona tagata e ala mai ia Iesu. O lena alofa tunoa e ofoofogia, ma ua matuā iso ai le malosi faaletagata i le faamatalaina po o le faatinoina. Peitai, e iai isi vala o le foai a le Atua.

I tuā lava, na faailoa mai ai ma le poto ma le loto maulalo e se tupu e faapea, o mea lelei uma lava na te foaia e fai ma meaalofa, e ā Ieova ia. Na ia faapea mai: “Auā o ia te oe mea uma o i le lagi ma le lalolagi; Ieova e, e ou le malo, o faasilisili oe e silisili i mea uma lava. . . . A o ai ea aʻu nei? O ai ea foi loʻu nuu, ina ua matou mafaia ona fai taulaga ma le loto faapenei? Auā mai ia te oe mea uma lava; o au mea foi ua matou foaiina atu ai ia te oe.”—1 Nofoaiga a Tupu 29:11-14.

Faaaoaoga a le Atua

Sa iloa e Iakopo, o se soʻo o Iesu Keriso e faapea, o Ieova le Atua o le puna o mea lelei uma. E na o meaalofa e atoatoa ona lelei e maua mai ia te ia. Na tusi mai Iakopo e faapea: “O mea lelei uma e foaifuaina mai, atoa ma mea alofa uma e atoatoa ona lelei, mai luga lava ia, e alu ifo mai le Tamā o malamalama, e le o ia te ia se mea faaletumau, po o sina liliu itiiti.”—Iakopo 1:17.

E oo foi i le tulaga i foai o meaalofa, sa vaaia ai e Iakopo le ese o le Atua mai i tagata. E mafai e tagata ona foai meaalofa e lelei, peitai e lē masani ona latou faia faapea. O nei meaalofa e ono faia mai i se agaga manatu faapito, pe faaaogā foi e faaosoosoina ai se tagata e faia se mea leaga. O Ieova  e lē fefoifoiai; e lē masuia. O lea, e lē mafai foi ona suia le tulaga o ana meaalofa. O ana meaalofa e mamā. Latou te siitia le soifua lelei ma le fiafia o tagata. E agalelei ma fesoasoani, e lē faaumatiaina ai.

Mafuaaga mo le Foaiina o Meaalofa

I aso o Iakopo, sa faaalialia ai le foaiina o meaalofa a taʻitaʻi lotu tautaua ina ia iloa e tagata. Na latou foai atu ma se agaga ʻaluʻalua. Ona o le fia viia e tagata, na latou faalotolotolua ai i tulaga amiotonu. E ui i lea, o Kerisiano e ao ona ese mai ai. Na lapataia e Iesu i latou e faapea: “A e avatu ai ni mea alofa, aua neʻi e ilia le pu i ou luma, pei ona faia e tagata pepelo i sunako ma ala, ina ia viia o i latou e tagata. E moni, ou te fai atu ia te outou, ua maua e i latou lo latou taui. A ē avatu ni mea alofa, aua neʻi iloa e lou lima tauagavale le mea ua faia e lou lima taumatau; ina ia lilo au mea alofa; o lou Tamā foi, o lē silafia i le mea lilo, o ia lava na te avatu faaaliali se taui ia te oe.”—Mataio 6:2-4.

O le pogai e foai ai e Kerisiano meaalofa ina ia fesoasoani ai i manaoga o isi, pe faafiafiaina ai i latou, pe ina ia lagolagoina ai pea le tapuaiga moni. E lē mo se viiga o le tagata lava ia. Auā o fofoga o Ieova e mafai ona ati i so o se tulimanu o o tatou loto. E mafai foi ona ia silafia le uiga lilo o loo faia ai a tatou meaalofa.

E taumafai Molimau a Ieova e mulimuli i faaaoaoga a Ieova ma lona Alo i le foaiina o meaalofa. Latou te avatua mea ua latou maua. Ua ia i latou le tala lelei o le Malo, ma latou te avatua mo le manuia o isi. Latou te iloa ua faapea mai le Faataoto 3:9: “Ia e ava ia Ieova i lou oa, ma le faapolopolo o au mea uma e tutupu.” Talu ai o ofisa o lālā taitasi, o faapotopotoga, ma tagata taitoatasi, o loo vilivilitai e saosaolaumea mo le lelei o tagata uma, ua avea lena ma ala e faamalosia ai le auuso i le itu faaleagaga ma tamaoaiga ai. O le tamaoaiga faaletino e lē taitaiina ai i le tamaoaiga faaleagaga, ae peitai, o le mauoa faaleagaga e tamaoaiga ai faaletino, e lava ma totoe mo mea manaomia mo le galuega a Ieova.

Auala e Fai ai le Foai

E tele auala e mafai ai e tagata taitoatasi ona faia a latou foai i le lagolagoina o le tala lelei. O se tasi o na auala, o Maota o le Malo. O sui taitoatasi uma o le faapotopotoga, latou te faaaogāina le Maota o le Malo. Ua saunia e se tasi tupe mo lona fausiaina po o lona faaaogāina, o molī, o ea malulu, ma lona tausiga. Ona e talafeagai ona lagolagoina e tagata uma le faapotopotoga, o le pogai lea ua faatutuina ai pusa mo foai i le Maota o le Malo, ma ua faaaogāina foai tauofo e maua mai, ina ia totogia ai tupe faaalu a le faapotopotoga. Peitai, o tupe faasili, e mafai ona foai atu lea i le lālā o le Olo Matamata o i la outou lava oganuu pe a malilie i ai le faapotopotoga.

E mafai ona faia foai i le lālā o le Sosaiete lava ia mo le aʻoaʻoina ma le tausiaina o misionare ma paeonia faapito, i vaega o le lalolagi e leʻi oo atu i ai le tala lelei i le toatele. O isi tupe faaalu mo le faalauteleina o le tala lelei e fuafua lea mo le galuega a ovasia femalagaai. O le aposetolo o Paulo, o lē sa fai ma faaaoaoga o le galuega femalagaai i le uluai senituri, na ia faamalo atu i le faapotopotoga i Filipi e faapea: “Na outou avatu mea na ou mativa ai, ua atu tasi, ma le atu lua foi.” (Filipi 4:14-16) E ese ai mai tupe faaalu i vala uma o le auaunaga faasauatoa ua iai i lālā uma, ua iai foi le manaomia mo le toe faaleleia o aiga Peteli taitasi ma le tausia o i latou o loo nonofo ma galulue ai. O le tusia ma le lolomia o lomiga o loo iai le feau matagofie o le tala lelei, o ni faaeaga moni na aumaia e le Atua, ae o le tufatufaina atu o  nei lomiga e manaomia foi ona faia, ma e manaomia ai foi ni tupe faaalu. E lē gata i lena, e iai foi tupe faaalu mo fonotaga ma tauaofiaga, ae lē faitaulia ai faamasinoga e ‘puipuia ma faatumauina faaletulafono ai le tala lelei.’—Filipi 1:7.

O le taimi e faaalu e auauna taitoatasi a Ieova i le talaʻiina o le tala lelei e tauofo, ma e faapena foi i foai tau tupe. O le tuuesea e lē aunoa o ni tupe e faaaogā i le lagolagoina o le faatelega o le tapuaiga moni, ua fautua mai ai le aposetolo o Paulo e faapea: “A o le aotelega mo le au paia, . . . o le aso muamua o lea vaisapati ma lea vaisapati, ia outou taitasi ma tuu ane ai ni ana mea, ia faatatau mea e teu ma lona manuia.”—1 Korinito 16:1, 2.

Pe a faia e se tagata se foai, na te lē iloa le auala moni o loo faaaogāina ai, peitai e mafai ona ia vaaia lona āuga, i le vaai atu lea i le faatelega o le galuega talaʻi o le Malo. Ua faaalia mai i lipoti o le 1993 Yearbook of Jehovah’s Witnesses le sili atu i le 200 atunuu ma atumotu o loo talaʻiina ai le tala lelei o le Malo, e le sili atu i le 4,500,000 faifeau Kerisiano. O nei lipoti ua avea ma faamafanafana loto. O lea la, po o le ā lava le ituaiga o meaalofa e foaiina atu, e tusa foi po o le ā le tele o le fesoasoani e tuuina atu i le faalauteleina o le tala lelei i le lalolagi aoao.

Ua faatupeina lenei galuega e foai tuufaatasi a tagata uma. O nisi tagata ua mafai ona tele a latou foai, ma ua avea lea ma  fesoasoani tele i le galuega talaʻi. O nisi e itiiti a latou foai. Peitai, o i latou o faia ni foai e faatatau i le mea latou te mafaia, e lē tatau ona latou mamā pe manatu faapea ua lē taulia la latou foai. E mautinoa e lē manatu faapena Ieova. Sa faamaninoina mai e Iesu lenei mea ina ua ia faaalia mai le matuā talisapaia e Ieova o le pene a le fafine ua oti lana tane. Na fetalai o ia e faapea: “Ua silafia foi e ia le tasi fafine mativa ua oti lana tane, ua lafo i ai tupe iti e lua. Ona fetalai atu lea o ia, E moni, ou te fai atu ia te outou, o mea a lenei fafine mativa ua oti lana tane ua lafo i ai, ua sili lea i a latou uma. Auā o i latou uma, ua latou lafo atu i taulaga a le Atua nisi mea mai a latou mea ua tele; a o ia ua mativa, ua lafo e ia ana mea uma e ola ai sa ia te ia.”—Luka 21:2-4.

E tusa lava po o le ā o tatou tulaga tau tupe o iai, ae e mafai lava ona tatou foai i auala e fiafia i ai Ieova. Ua matuā lelei ona faaupu mai e le faisalamo le auala tatou te avatu ai le viiga i lo tatou Tupu ma lo tatou Faamasino. Na ia faapea mai: “Ia outou avatua ia Ieova le viiga o lona suafa; ia outou avatu taulaga, ma outou o atu i ona lotoā.” (Salamo 96:8) O lea la, seʻi o tatou faataitai ia i faaaoaoga agaalofa a lo tatou Tamā faalelagi e ala i lo tatou foai ma le fiafia, auā o ia na muai foai mai ia te i tatou.

[Pusa i le itulau 30]

AUALA E FAIA AI E NISI FOAI I LE GALUEGA TALAʻI O LE MALO

□ MEAALOFA I LE GALUEGA I LE LALOLAGI AOAO: O le toatele o tagata latou te tuu ese ni vaega tupe pe fuafua foi se tinoitupe e lafo i le pusa o loo faailogaina o: “Meaalofa mo le Galuega a le Sosaiete i le Lalolagi Aoao—Mataio 24:14.” E avatu e faapotopotoga i masina taitasi ia faaputuga tupe i le ofisa ulu i Brooklyn, Niu Ioka, po o so o se ofisa o le lālā e latalata ane.

□ MEAALOFA: O foai tauofo o tupe e mafai ona auina saʻo atu lava i le Watch Tower Bible and Tract Society of Pennsylvania, 25 Columbia Heights, Brooklyn, New York 11201, pe auina atu i le ofisa o le Sosaiete i lo outou lava atunuu. E mafai foi ona foai atu maataua po o isi mea tāua. O na foai tuusao e tatau ona auina mai faatasi ma se tusi puupuu e faamanino mai ai le tulaga o na foai.

□ FUAFUAGA O FOAI FAATASI AI MA TUUTUUGA: E mafai ona auina atu i le Sosaiete o le Olomatamata se tupe e teuina ai o se mavaega seia maliu lē na ia tuuina atu lena vaega tupe, ae e iai le fuafuaga e toe faafoi i le tagata e ana le foai pe a toe manaomia.

□ INISIUA: E mafai ona faaigoaina le Sosaiete o le Olo Matamata o sē e mauaina le inisua o ola o tagata po o se fuafuaga foi mo le litaea po o le penisione. E ao ona logoina le Sosaiete mo sea ituaiga o fuafuaga.

□ TEUGA TUPE: O teuga tupe, o tusi o teuga tupe, po o ni teuga tupe a ē ua litaea, e mafai ona tausia pe totogiina i le Sosaiete o le Olo Matamata, e avea o se mavaega pe a maliu se tagata, ae ia tusa ai ma fuafuaga a le faletupe. E tatau ona logoina le Sosaiete pe a faia ni fuafuaga faapea.

□ OLOA MA PEPA FAAMAONIA MO TUPE: O oloa ma pepa faamaonia mo tupe e mafai ona foai atu i le Sosaiete o le Olo Matamata a lē o se meaalofa e tuusao, po o se fuafuaga e faapea o se tupe maua e faaauau pea ona totogi atu i le tagata e ona le foai.

□ FANUA TOTINO: O fanua totino e mafai ona faatauina atu, e mafai ona foai atu i le Sosaiete e ala i le faia o se foai tuusao po o le taofia lea ia faaauau ona nofo ai pea lē e ana seia maliu. E ao i lena tagata ona faafesootai le Sosaiete ae na te leʻi faapepaina so o se fanua totino mo le Sosaiete.

□ UILI MA MAVAEGA: E mafai ona faaui atu se fanua po o se vaega tupe i le Watch Tower Bible and Tract Society of Pennsylvania e ala i se uili ua faatulafonoina, pe avea foi le Sosaiete ma ē e mauaina lena mavaega. So o se mavaega lava e faia mo se manuia o se faalapotopotoga faalelotu atonu e iai ni lelei i le itu tau lafoga. E tatau ona auina atu i le Sosaiete se kopi o lena uili po o le mavaega.

Mo ni faamatalaga atili e tusa ai ma ia tulaga, faamolemole ia tusi atu i le Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201, po o se ofisa o le lālā a le Sosaiete e latalata ane.

[Ata i le itulau 31]

Auala ua faaaogā ai a outou foai:

1. Tagata galulue tauofo i Peteli

2. Fauina o ofisa o lālā

3. Fesoasoani i faalavelave

4. Maota o le Malo

5. Misionare