Mala Faalenatura—Pe E Tuuaia Ea Le Atua?

“LE ATUA e, o le ā lenei mea ua e faia ia i matou?”

O le tali lena na lipotia mai a sē na faasaoina, o sē na suesueina mea na faaumatia e le maugamu o Nevado del Ruiz, na ufitia e le kiona, lea na pasae aʻe i Kolomepia ia Novema 13, 1985. Ona o sologa o palapala, na iu ina tanumia ai le aai atoa o Armero ma feoti ai le silia i le 20,000 tagata i le po e tasi.

E manino lava, atonu o le tali atu lena a le tagata na faasaoina. I le lē mafesoasoania ona sa fesagai ma le matautia o malosi faalenatura,  na tuuaia ai e tagata i aso anamua le Atua ona o na mea matautia na tutupu. Sa faia e tagata faapaupau taulaga, e oo lava i taulaga i tagata, ina ia faamalie ai o latou atua o le sami, le lagi, le lalolagi, mauga, maugamu, ma isi lava puna o mea matautia. E oo foi i aso nei, ua ioe nisi e faapea, o iuga o mala faalenatura e tutupu, o se iuga tuupoina po o se mala mai le Atua.

Pe moni ea e tatau ona tuuaia le Atua mo mala ia ua aumaia ai le tele o mafatiaga i tagata ma mea ua faatamaia i le lalolagi? Pe e tatau ea ona tuuaia o ia? Ina ia maua ni tali, e manaomia ona tatou vaai totoʻa i mea o aafia ai i na mala. O le mea moni, e manaomia ona tatou iloiloina nisi o mea moni ua lauiloa.

O le ā le “Mala Faalenatura”?

Ina ua taia e se mafuie Tangshan, i Saina, ma e tusa ai ma lipoti a tagata o le malo o Saina, e 242,000 tagata na maliliu ai, ma ina ua osofai atu le Afā o Andrew i Florida i Saute ma Louisiana i le Iunaite Setete ma faaleagaina ai le tele o mea e tusa ma le faitau piliona tālā le tau, o na mala faalenatura, na fai ma tala tomua o faasalalauga o tala fou faavaomalo. Peitai, ae faapefea pe ana taia e lena mafuie le Toafa o Gobi e lē o aināina e ni tagata, e tusa ma le 700 maila i mātū i sisifo o Tangshan, pe faapefea foi pe ana agi atu le Afā o Andrew i se isi itu ma pepesi atu i le sami, ma misia atoa ai le laufanua? E matuā lē toe manatua lava i le taimi nei.

E manino lava la, pe a tatou talanoa e uiga i mala faalenatura, tatou te lē o talanoa faatatau i na o ni faaaliga o le uigaese o malosi faalenatura. I tausaga uma, e iai le faitauafe o mafuie tetele ma laiti, ma le faitau taseni o matagi malolosi, asiosio, afā, ma lamala, le pasae aʻe o se maugamu, ma isi lava mea mataina e leai so latou tāua na i lo o le na ona avea ma fuainumera faamaumauina i ni tusi faamaumau. Ae peitai, pe a avea na mea tutupu ma pogai e maliliu ai le anoanoai o tagata, faaumatia ai mea totino, ma faaleagaina ai tulaga masani o le olaga, ona avea loa lea ma mala.

E ao ona matauina e faapea, o mea ua faaleagaina ma tagata ua maliliu ai, e lē tutusa pea ma malosi faalenatura o loo aafia ai. O le mala aupito sili, e lē faapea ua mafua ona o le faaaliga aupito sili o malosi faalenatura. Mo se faaaoaoga, i le 1971 na taia ai San Fernando, i Kalefonia i le Iunaite Setete i se mafuie e tusa lona malosi ma le 6.6 i le fua Mafuie, ma maliliu ai tagata e 65. I se tausaga mulimuli ane, na taia ai foi Managua, i Nicaragua, e se mafuie e 6.2 lona malosi ma maliliu ai le 5,000 tagata!

O lea, pe a oo ina faateteleina le malosi o mala faalenatura, e tatau ona tatou fesili ifo, Po ua sili atu ea ona matautia mea faalenatura? Po o saosaolaumea gaoioiga a tagata i le faafitauli?

O Ai e Tuuaia?

Ua faailoa mai e le Tusi Paia e faapea, o Ieova le Atua o Lē Sili na Foafoaina mea uma lava, e aofia ai ma malosi faalenatura o lenei lalolagi. (Kenese 1:1; Neemia 9:6; Eperu 3:4; Faaaliga 4:11) E lē o faauigaina lenei mea e faapea, o ia o loo faapogaia gaoioiga uma a matagi po o timuga uma. Ae na i lo o lea, ua uma ona ia faataatiaina gaoioiga a nisi o tulafono e pulea ai le lalolagi ma lona siosiomaga. Seʻi fai ma faaaoaoga, i le Failauga 1:5-7, ua tatou faitau ai e uiga i gaoioiga faavae e tolu, ua mafai ai ona maua le ola i le lalolagi—o le oso aʻe pea ma le goto atu o le la, o le auala lē masuia e feagiai ai matagi, faapea foi ma le faataamilosaga o le vai. E tusa lava pe iloa pe lē iloa e tagata na mea, ae mo le faitau afe o tausaga, o loo galulue ai pea na faiga faalenatura, ma isi mea faapena, e aafia ai le tau, le tulaga o le ola i le lalolagi ma lona siosiomaga. O le mea moni, sa tatai atu e le tusitala o le Failauga manatu i le eseesega tele i le va o le lē masuia ma le lē muta o auala o le foafoaga, ma le natura faatapulaaina ma le puupuu o le olaga o le tagata.

 E lē gata o Ieova o Lē na Foafoaina malosi faalenatura, ae e ia te ia foi le malosi e pulea ai. I le Tusi Paia atoa, ua tatou maua ai faamatalaga e uiga i le puleaina po o le faaliliuina e Ieova o na malosi ina ia faataunuuina ai lana fuafuaga. E aofia ai i nei mea le vaeluaina o le Sami Ulaula i aso o Mose, ma le taofia o le la ma le masina mai o la ala i le lagi i taimi o Iosua. (Esoto 14:21-28; Iosua 10:12, 13) O Iesu Keriso, le Alo o le Atua ma o le Mesia folafolaina, sa ia faaalia foi lona mana i luga o malosi faalenatura, e pei o se faataitaiga, ina ua ia faafilemuina se matagi malosi i le Sami o Kalilaia. (Mareko 4:37-39) O faamatalaga e pei o nei, e matuā mautinoa ai e mafai atoatoa e Ieova le Atua ma lona Alo o Iesu Keriso ona pulea mea uma e aafia ai le ola i inei i le lalolagi.—2 Nofoaiga a Tupu 20:6; Ieremia 32:17; Mataio 19:26.

Afai o lea le tulaga, pe e mafai la ona tatou tuuaia le Atua ona o le faateleina o mea tutupu ma le tele o mea ua faaumatia e mala faalenatura talu ai nei? Ina ia taliina lenei fesili, e tatau ona tatou muai talanoaina pe e iai se faamaoniga e iloa ai faapea sa mataina le matuā matautia o malosi faalenatura na tutupu talu ai nei, pe sa lē mafai foi ona pulea.

E tusa ai o lenei mea, seʻi mātau le mea o fai mai le tusi o le Natural Disasters—Acts of God or Acts of Man? e faapea: “E leai se faamaoniga faapea ua suia uiga o le tau e fesootai ma lamala, lologa ma afā. Ma e leai foi ni suesuega tau i le eleele ua faapea mai o gaoioiga a le eleele e fesootai atu ma mafuie, maugamu ma galulolo, e faapea ua sili atu ona matautia.” Ua faapena foi ona matauina e le tusi o le Earthshock e faapea: “O papa uma o so o se konetineta o loo iai se faamaumauga o le lē mafaitaulia o mea tetele ma mea iti o loo tutupu i le eleele, e faapea o na mea uma lava o le a avea o ni mala matautia i tagata pe a tutupu i aso nei—ma ua mautinoa i le suesuega faasaienitisi e faapea, o na mea o le a tutupu ma e toe tutupu foi i le lumanai.” I se isi faaupuga, o le lalolagi ma ona malosi uigaese, sa tumau pea i le faagasologa o tausaga. O lea, e tusa lava pe sa faaalia pe leʻi faaalia foi e nisi o fuainumera faamaumauina se faatelega o le matautia o nisi gaoioiga a le eleele, ae e leʻi faapea lava ua lē mafai ai ona pulea le matautia o le laueleele i taimi talu ai nei.

O le ā la ua mafua ai ona faateleina pea ma le faaumatiaina o mea e mala faalenatura ua tatou faitau ai? Afai e lē tuuaia malosi faalenatura, o lona uiga la e tuuaia faiga a tagata. Ma o le mea moni, ua iloa e pule faalemalo faapea, ona o gaoioiga a tagata ua matuā faigofie ai ona lamatia lo tatou siosiomaga e mala faalenatura, ma sili atu ai foi ona lamatia atili. I atunuu tau atiae, o le faatuputeleina o le manaomia o meaai, ua uunaia ai faifaatoaga e soona ta o latou laueleele, pe ina ia toe maua mai foi isi laufanua e ala i le aveesea o laau aogā o loo iai i le laueleele. O lenei faiga ua iu ai ina āia le eleele. O le faateleina foi o le faitau aofai o tagata, ua vave ai ona faateleina ē nonofo i faleoo feomaʻi ma le fauina o fale i nofoaga palapala vaiti, ma ola ai i se olaga maualalo i nofoaga e lē saogalemu. E oo lava i atunuu tamaoaiga, e nonofo ai tagata e pei o le faitau miliona na o loo nonofo i luga o le augutu o se tō e taʻua o le San Andreas Fault i Kalefonia, ua tuuina ai i latou i se tulaga lamatia e ui lava i lapataiga manino ua tuuina atu. I tulaga faapena, pe a tutupu mai la ni mea e lē masani ai—e pei o se afā, se lologa, po o se mafuie—pe e tatau la ona tuuaia iuga matautia e oo i ai ona o le “natura”?

O se faaaoaoga mataina, o le lamala i Sahel i Aferika. E masani lava ona tatou manatu i lamala e faapea, ona o le leai o se timu po o ni vai, e iu ai i se oge, matelaina, ma le oti. Ae pe e na o le leai ea o ni vai ua mafua ai lena oge matautia ma le matelaina i lena vaipanoa? Fai mai le tusi o le Nature on the Rampage e faapea: “O faamaoniga na aoaoina e saienitisi ma sui o ē tufatufaina atu fesoasoani ona o mala, ua faaalia ai e faapea, o oge ua iai i aso nei, e lē ona o le faaumiumi o lamala, ae ona o le faaumiumi ona faaaogaseseina o le laueleele  ma vai. . . . O le faaauau pea ona faatoafaina o Sahel, e tele lava ina tuuaia faiga a tagata.” Ua matauina e se nusipepa a Aferika i Saute, o le Natal Witness e faapea: “O oge e lē mafua ona o le leai o ni meaai; ae ona o le lē mafai ona faatau o meaai. I se isi faaupuga, ona o le mativa.”

E mafai ona taʻua faapena e uiga i le tele o le faatamaiaga na iu i ai ona o isi mala. Ua faaalia i suesuega e faapea, o atunuu e sili ona matitiva, ua mafatia i le sili atu ona toatele o tagata feoti mai mala faalenatura na i lo o atunuu e sili atu ona mauoa o le lalolagi. Mo se faaaoaoga, mai le 1960 e oo i le 1981, e tusa ai ma se tasi o suesuega, i Iapani, e 43 mafuie ma isi mala na tutupu ai, ma e 2,700 tagata na maliliu ai, o se fua faatatau lea e 63 ē na maliliu i le mala e tasi. I le vaitaimi lava lena, na tutupu ai mala e 31 i Peru, ma e 91,000 na maliliu ai, o se fua faatatau lea e tusa ma le 2,900 i le mala e tasi. Aisea ua eseese ai? Atonu o malosi faalenatura na amata ai, ae o gaoioiga a tagata—le vafealoai, le tamaoaiga, ma polotiki—ua tatau ona tuuaia ona o le sili atu ona toatele o ē ua maliliu ma le tele o mea totino na faaumatia ai.

O Ā ni Vaifofo?

Ua tele tausaga o taumafai pea saienitisi ma tagata popoto, ina ia sailia ni auala e mafai ai ona foia mala faalenatura. Ua latou matuā eli loloto i le eleele ina ia sailia ai se malamalamaga e faatatau i mafuaaga o mafuie ma le sasao aʻe o maugamu. Ua latou faaaogāina satelite i le vateatea e matauina ai uiga o le tau, ma puea ai ala o afā ma matagi malolosi, pe muai iloa ai foi lologa ma lamala. O nei suesuega uma, ua avatua ai ia i latou faamatalaga o loo latou faamoemoe i ai e faapea, o le a latou mafaia ona faaitiitia āuga o nei malosi faalenatura.

Pe na taulau na taumafaiga? E tusa ai ma lenei ituaiga o suesuega taugata, ma le poto maoae, ua matauina ai e se tasi faalapotopotoga latou te suesueina le siosiomaga masani e faapea: “O nei mea, e iai o latou lava tulaga tatau. Ae afai e alu ai se vaega tele o tupe ma taumafaiga—afai e fai ma faamolemolega e lē amanaia ai tulaga matautia ua faia i nofoaga tāua na o loo mau ai se vaega o le sosaiete o tagata na mafatia i mala, ma avea ai o se nofoaga e sili atu ona leaga i mala—o lona uiga, ua sili atu ona afaina ai na i lo o le lelei ai.” Mo se faaaoaoga, e aogā ona iloa faapea o le eleele maualalo i le talafatai o le vaitafe o Bangladesh, e masani pea ona faamatauina i lologa ma galulolo, ae o lena iloa, e leʻi taofia ai le faitau miliona o tagata o Bangladesh mai le ō atu faamalosi ma nonofo ai i ina. O le iuga, e faitau selau afe tagata e maliliu ai i mala faifai pea.

E manino lava la, o faamatalaga o le poto maoae, e faatapulaaina le aogā. O le isi mea e manaomia, o le tomai lea e faaitiitia ai omiga na ua lē mafai ai e tagata ona faia ni filifiliga, ae ō atu ma nonofo ai ae maise lava i vaipanoa e sili ona lamatia, pe ola foi i ni auala e faatamaia ai le siosiomaga. I se isi faaupuga, ina ia faamāmā le faatamaiaga ua faia e natura, e manaomia ai ona toe faatulagaina atoatoa le tulaga o le vafealoai, le tamaoaiga, ma faiga faapolotiki ia o loo tatou ola ai nei. O ai e mafai ona faia o na galuega? E na o Lē lava e mafai ona ia pulea e oo lava i malosi e mafua ai mala faalenatura.

Galuega a le Atua i le Lumanai

O le a lē na ona aveesea e Ieova le Atua o āuga, ae o le a ia aveesea foi le pogai o mea leaga uma ua oo i tagata. O le a ia faamutaina le matapeapea, le faasaua o faiga faapolotiki, le tamaoaiga, ma faiga faalotu na ua “pule ai le tasi tagata i le tasi, e leaga ai o ia lava.” (Failauga 8:9) So o se tasi e masani lelei ma le Tusi Paia, o le a mafai ona ia matauina e faapea i ona itulau, o loo iai le anoanoai o valoaga o loo faasino atu i le taimi o le a gaoioi ai le Atua e aveesea le amio leaga ma puapuaga mai le lalolagi, ma toe faafoisia ai se parataiso faalelalolagi o le filemu ma le amiotonu.—Salamo 37:9-11, 29; Isaia 13:9; 65:17, 20-25; Ieremia 25:31-33; 2 Peteru 3:7; Faaaliga 11:18.

 I le iuga, o le mea lena na aʻoaʻo e Iesu Keriso ona soʻo uma e tatalo i ai, e faapea, “Ia oo mai lou malo. Ia faia lou finagalo i le lalolagi e pei ona faia i le lagi.” (Mataio 6:10) O le Malo faa-Mesia o le a na aveesea ma suia pulega lē lelei atoatoa uma faaletagata, e pei ona valoia e le perofeta o Tanielu e faapea: “O ona po o ia tupu e faatuina ai e le Atua o le lagi o le malo e le faaumatia e faavavau; o lea malo foi, e le tuuina atu ia i se tasi nuu, na te tuʻimomomoina ma faaumatia ia malo uma lava, a o ia e tumau lava e faavavau.”—Tanielu 2:44.

O le ā le mea o le a faataunuuina e le Malo o le Atua, lea e lē o mafai ona faia e malo i aso nei? Ua saunia e le Tusi Paia se faamatalaga mataina e valoia ai le mea o le a oo mai. Na i lo o tulaga e pei ona faaatagia i nei itulau, e pei o oge ma le mativa, ‘o le a tele le saito i le laueleele; o le a fau ma soloi i tumutumu o mauga,’ ma ‘e fua mai e laau o le fanua ona lava fua; e fua mai foi e le laueleele ona fua, latou te nonofo filemu foi i lo latou nuu.’  (Salamo 72:16; Esekielu 34:27) E tusa ai ma le siosiomaga faalenatura, ua taʻu mai e le Tusi Paia ia i tatou e faapea: “E olioli ona o i latou le vao lafulafua, ma le nuu naumati; e fiafia le toafa, ma fua mai e pei o le aute. . . . Auā e oso mai le vai i le vao lafulafua, ma vaitafe i le toafa; e avea foi le serapi ma vailepa, e avea foi le nuu naumati ma vaipuna.” (Isaia 35:1, 6, 7) E lē toe iai foi ni taua.—Salamo 46:9.

E lē o taʻu maia i le Tusi Paia po o le ā le auala o le a faataunuuina ai e Ieova le Atua na mea uma, ma le auala o le a ia faia i malosi faalenatura uma ina ia lē toe avea ai ma pogai e afaina ai. Ae peitai, o le mea mautinoa e faapea, o i latou uma o le a ola i lalo o lena pulega amiotonu, “latou te le galulue fua, latou te fananau, a e le tupu ai le atuatuvale; auā o le fanau ua faamanuia e Ieova i latou, atoa ma i latou e tutupu mai ia te i latou.”—Isaia 65:23.

I itulau o lenei mekasini, atoa foi ma isi lomiga a le Sosaiete o le Olo Matamata, ua  faasino atu ai pea e Molimau a Ieova e faapea, o le Malo o le Atua na faavaeina i le lagi i le 1914. I lalo o le taitaiga a lena Malo, ua tuuina atu ai nei se molimau i le lalolagi aoao mo le toetoe lava 80 tausaga, ma i aso nei, ua tatou tutū ai i faitotoa o le “lagi fou ma le lalolagi fou” ua folafolaina mai. O le a faasaolotoina mai tagata e lē gata i le maemaea o mala faalenatura, ae faapea foi mai tiga uma ma mafatiaga ua malaia ai faiga faaletagata mo le ono afe tausaga ua mavae. E mafai ona faapea moni atu e uiga i lena taimi, “ua mavae atu mea muamua.”—2 Peteru 3:13; Faaaliga 21:4.

Ae faapefea la le taimi nei? Po o gaoioi ea le Atua mo i latou o mapuitiga ona o tulaga o mala faalenatura po o isi mea? O le mea moni lava, o loo ia faia faapea, ae e lē i le auala atonu o faatalitalia ai e le toatele o tagata.

[Ata i le itulau 8, 9]

O gaoioiga a tagata ua faigofie ai ona lamatia lo tatou siosiomaga i mala faalenatura

[Ē Ana le Ata]

Laif/Sipa Press

Chamussy/Sipa Press

Wesley Bocxe/Sipa Press

Jose Nicolas/Sipa Press