Ia ‘Faafaigofie’ La Tatou Vaai mo le Galuega o le Malo

O LEA faatoʻā oo le Democratic Republic o Siamani (G.D.R.), po o Siamani i Sasae e pei ona iloa ai i le taulotoaiga o tausaga. Na faaiuina le fasefulu tasi tausaga talu ona faavaeina ia Oketopa 3, 1990, ina ua toe soofaatasi lona oganuu, e tusa lona telē ma Liberia, po o le setete o Tennessee i Amerika, ma le malo o le Federal Republic o Siamani, lea na taʻua o Siamani i Sisifo.

O le toe tuufaatasia o Siamani e lua, o lona uiga, o le faia lea o ni fesuiaiga matuā tetele. O le mea na vaeluaina ai nei atunuu e lua, sa lē na o se tuaoi po o se pa pupuni faaletino, ae o se pa pupuni foi i le eseese o manatu ma talitonuga. O le ā na uiga i ai nei mea uma mo tagata i inā, ma na faapefea le suiga o le olaga mo Molimau a Ieova?

O le Wende, po o le fouvalega ia Novema 1989, na mafai ai ona faia lena tuufaatasiga, sa sosoo ai ma pulega faigata a Socialism (Sosalisi) lea na faia mo le fasefulu tausaga. Mai lena vaitaimi, na faasaina ai le galuega a Molimau a Ieova, ma sa matuā ogoogo sauaga na oo ia i latou i na taimi. * Ina ua oo mai le saolotoga i le G.D.R., (Siamani i Sasae), na  matuā fiafia tagata uma. Ae a o mou atu lena fiafia, e toatele sa lē mautonu, na faameo, ma ua lē fiafia. O le taumafaiga ina ia tuufaatasia Siamani e lua i se malo tumaoti e tasi e pulea i le vafealoai, i faiga faapolotiki, ma tau tamaoaiga, ua faamaonia le faigata.

E tusa ai ma le lipoti faapitoa, o le “162 Tage Deutsche Geschichte” (162 Aso o le Talafaasolopito o Siamani) i le Der Spiegel, e faapea, ina ua mavae le toe tuufaatasia, sa matuā tele le mataʻu ona o le leai o ni galuega, le paʻū o le aogā o le tupe, ma le siiina o le totogi o mea e nonofo ai. Sa tuufesili le toatele sa iai muamua i Siamani i Sasae e faapea: “Po o le a lava ea saʻu penisione o le a maua? Ae faapefea fale? “I G.D.R., [Siamani i Sasae] atoa, ua oo ina pala uma fale tuai, ma ua tele taulaga ua lē mafai ona toe nofoia.” Ua oo atu le polusione i tulaga e sili atu ona leaga.

I le feagai ai ma na faalavelave ma fevesiaiga i le vafealoai ma le tamaoaiga, o faapefea ona feagai Molimau a Ieova sa i le mea na taʻua muamua o Siamani i Sasae ma na tulaga?

Taulai Saʻo Pea le Vaai

E leai ni pa pupuni i talitonuga o Molimau a Ieova. O lo latou faatuatua e faavae i le Tusi Paia, e tutusa, e tusa lava pe i Sasae po o i  Sisifo. E tusa ai ma fesuiaiga o le vafealoai i lo latou siosiomaga, e tausia ai pea e le toatele o Molimau le tulaga paleni faaleagaga, i le taulai atu pea lea o la latou vaai i le sini autū, o le auauna ia Ieova. Aisea ua alagatatau ai lenei mea?

Auā “o le a mavae atu le tu a le lalolagi nei.” (1 Korinito 7:31) Na faapea mai se tasi toeaina Kerisiano, o le talaʻi i lalo o faasasaaga a o leʻi faia le Wende, sa manaomia ai le lototele; sa aʻoaʻoina ai Molimau ina ia faalagolago ia Ieova ma toleniina ai i latou i le auala e taulimaina ai le Tusi Paia. Ae peitai, i le taimi nei, “e tatau ona tatou matuā faaeteete ina neʻi maileia e ala i le manao tele i mea faitino ma popolega o le olaga.”

E masani lava ona fuaina le saolotoga ma le agaigai i luma i mea faitino. O le toatele o tagata i lenei vaega, ua latou lagona le manaomia ona toe foi e faafetaui le taimi lea na leiloa po o faafiafiaga foi sa lē mafai ona faia i taimi ua tuanai atu. E manino lenei mea pe a malaga atu se tasi i se taavale i auala maā i aai ma nuu i Thuringia ma Saxony i saute. O auala, atonu e manaomia ona toe faaleleia, siitia foi tulaga o fale, ae e matuā anoanoai anetena faaofuofu ua iai mo faasalalauga i televise! E faigofie lava ona maileia ai se tagata e talitonu faapea, o le saogalemu ma le fiafia, e mafai ona maua mai le mauaina o mea uma e tuinanau i ai mata. Pagā se mailei matautia!

I le Lauga i luga o le Mauga, na fetalai ai Iesu e uiga i le matautia o le manao tele i mea faitino ma popolega o le olaga. Na ia lapatai mai e faapea: “Aua tou te toloʻaʻi oa mo outou i le lalolagi.” Na ia faaopoopo mai foi e faapea: “O le lamepa o le tino, o mata ia; pe afai foi e lelei ou mata, e malamalama uma ai lou tino.” (Mataio 6:19, 22) O le ā na uiga i ai lana fetalaiga? O mata e lelei, o mata na e taulai atu pea ma na te puʻea mai ata manino i le mafaufau. O mata faaleagaga e lelei, e manino pea lana vaai i le ata o le Malo o le Atua. O lea, pe a faia e se Kerisiano se faaiuga e faafaigofie lana vaai, ma tepa taulai atu ma le manino i le Malo o le Atua, ae tuu i tua popolega o le olaga, o le a fesoasoani lea e tausia lona paleni faaleagaga.

E mafai ona faataitaia lenei mea e ala i se mea na tupu i se ulugalii mai Zwickau, i Saxony, o ē na faaalia le naunau i le Tusi Paia i le taimi o le Wende. Sa tele so la taimi e faaalu i le la pisinisi, peitai na la faamuamua faanaunauga faaleagaga, i le auai lea i sauniga faa-Kerisiano uma. Na la ioeina e faapea: “E tusa ai ma le manatu i la ma pisinisi, ma te lē gafatia le taimi, ae i le tulaga faaleagaga, ma te manaomia tele le taimi.” Maeu se faaiuga atamai!

Seʻi manatu foi i se aiga i Plauen, i Saxony. O le tane o se fai uati, o se matai tufuga matuā poto i lana lava pisinisi. Ina ua uma le Wende, sa matuā maualuga le sii o le totogi o lona fale. O le ā e ao ona ia faia? “E matuā taugata tele le fale, ma na ou aʻoaʻoina le upu moni ina ia ou ola mo le upu moni.” O lea, na siitia atu ai o ia i se isi nofoaga e faalēlelei lona tulaga ae maulalo le totogi. Ioe, sa vave ona iloa e le fai uati le tatau ona faafaigofie lana vaai.

Ae ui i lea, e iai nisi na fai si tuai ona iloa. Sa manatu se tasi toeaina Kerisiano e faapea, o fefaatauaiga fou o le tamaoaiga faatoʻā faailoa mai, sa tele ni mea o le a maua ai, ma faia ai loa sana pisinisi. Sa fautuaina ma le alofa o ia e se ovasia faimalaga ina ia aua neʻi avea ana avega tauave tau pisinisi ma mea e faavaivaia ai lona itu faaleagaga. Peitai, e faanoanoa lava, ona o le mea lena na tupu. I ni nai masina mulimuli ane, na faamavae ai le uso mai le tofi toeaina. Mulimuli ane, na tusi mai o ia e faapea: “E tusa ai ma le mea na oo ia te aʻu, ou te fautuaina so o se uso o sē ua maua ni faaeaga o le auaunaga, ina ia ʻaua lava neʻi faia sana pisinisi na o ia.” E lē o le uiga o lenei mea faapea e sese mo se Kerisiano le faia o sana ia lava pisinisi. Ae pe faia sa oe lava pisinisi pe leai, o le popole tele i le tamaoaiga e mafai ona avea ai pea i tatou ma pologa a le oa. Sa faaalia e Iesu le iuga: “E leai se na te mafaia ona auauna i alii e toalua; auā e ʻinoʻino o ia i le tasi, a e alofa atu i le tasi; a le o  lea, e faapipii atu o ia i le tasi, a e faaleaoga i le tasi.” (Mataio 6:24) Na taʻua e se tagata tusi solo Siamani o Goethe e faapea: “E leai se tasi e sili atu ona pologa na i lo o i latou o talitonu sese e faapea o loo saoloto i latou.”

Pe a taia i se afā moni, e manaomia ai ona faapuiti o tatou mata ina ia lelei ai ona taulai atu la tatou vaai, pe faaofuofu foi o tatou lima i o tatou mata ina ia mafai ai pea ona tatou iloa atu lo tatou sini. Pe a siomia i faiga lē mautonu faapolotiki, tamaoaiga, po o le vafealoai, e tatau ona tatou uai totoʻa atu ina ia manatua pea lo tatou sini faaleagaga. O ā mea o faia e nisi Kerisiano e faafaigofie ai la latou vaai i le galuega o le Malo?

Faateleina Gaoioiga o le Malo

I le atunuu atoa lea sa muai avea ma Siamani i Sasae, ua tuutoina atu ai e Molimau le sili atu ona tele o le taimi i le talaʻiga na i lo muamua. I le lua tausaga ua mavae, o le faatatauga o le taimi na faaaluina i le auaunaga i le fanua, na oso aʻe i le 21 pasene. O le iuga, o se faatelega mataina e 34 pasene o suesuega faale-Tusi Paia. O le faitau aofai foi o paeonia sauatoa i le taimi nei, ua sili atu i le faafā taimi le maualuga na i lo o le na o le lua tausaga ua mavae! A o popole isi ma faitio, ua mafai e le sili atu i le 23,000 Kerisiano i le atunuu na uluai taʻua o Siamani i Sasae ona fesagai ma lea tulaga e ala i le faafaigofie o la latou vaai. Ua saosaolaumea lenei i le faatelega maoae i le galuega o le Malo.—Faatusatusa i le Iosua 6:15.

O le faatelega o le galuega, o lona uiga, o loo lelei ona tausia le oganuu i le itu i saute, o i inā o loo nonofo ai le toatele o Molimau. O le tele o igoa o nofoaga, e tāua ma lauiloa i le tala faasolopito. Afai e te fiafia i ipu omea matagofie taugata, o le a e iloa la le taulaga o Meissen, e latalata i Dresden, o i inā o loo aumaia ai nisi o ipu tāua aupito sili ona matagofie i le lalolagi. Ua avea nei Meissen ma nofoaga o nisi o le 130 o le au talaʻi o le Malo. Pe seʻi manatunatu ia Weimar, “o le laumua tau tusitusiga o Siamani.” O le maa Faamanatu o Goethe ma Schiller i le ogatotonu o le taulaga, ua molimau i le taualoa o sootaga o Weimar, ma na tusitala e toalua, ma o se puna o le mitamitaga mo le toatele o tagata i inā. I aso nei, e mafai ona mitamita Weimar ona ua sili atu i le 150 ona tagata talaʻi o le tala lelei.

Ae peitai, i le itu i mātū, e matuā ese ai le tulaga o mea, e toaitiiti le au talaʻi ma e vavamamao le va o faapotopotoga. Ae maise lava le tau lē maua o ni galuega. O le toatele o loo maua galuega, ua i lalo o ni omiga ina ia galulue ovataimi ina ia tumau ai pea i a latou galuega. Ua faamatala mai e se tasi uso o lē e auauna o se tagata talaʻi faataimiatoa i le itu i mātū e faapea: “I lalo o faasasaaga, sa manaomia ai e uso taitoatasi le puipuiga a Ieova i le auaunaga i le fanua, ae o le sailia o se galuega sa lē faigata. I le taimi nei, ua tuufaafeagai. Ua matou maua le saolotoga e talaʻi ai, ae matou te manaomia lana taitaiga e tusa ai ma ni galuega. O na suiga e alu ai se taimi tele ina ia faamasani i ai.”

Po o fiafia le au talaʻi ona o le mafai ona talaʻi e lē aunoa? O le manatu lenei o Wolfgang: “E sili atu ona lelei mo le tagata talaʻi e toatasi ona galueaiina soo le oganuu lava lea e tasi. Ua oo ina faatuatuaina o ia e tagata, ma ua sili atu ona talanoa saoloto i ai tagata.” E lē gata i lea, o tagata o aiga “ua lē o toe mamā e talanoa e uiga i le lotu i o latou fale, e tusa lava pe faalogo mai i ai se tagata o savali ane. Ua lē toe faasaina foi ona talanoaina se mataupu tau lotu.” E ioeina e Ralf ma Martina e faapea. “Ma te fiafia e galulue pea lava pea i la ma oganuu. E mafai ai ona ma iloa lelei tagata, ma e fiafia foi ona o le tele o lomiga eseese ua mafai ona maua.”

Talisapaia o a Tatou Lomiga

E talisapaia faapitoa lava e Ralf ma Martina le tusi Life—How Did It Get Here? By Evolution or by Creation? Mo le toatele i Siamani i Sasae o ē sa lē talitonu e iai se Atua, sa faamaonia le avea o lenei tusi o se fesoasoani aogā mo suesuega faale-Tusi Paia. Sa latou mananao foi mo se lomiga e iai mataupu lava ia, ae ia puupuu. “Maeu lo ma fiafia ina ua tatalaina le polosiua Po o Silasila Alofa mai ea le Atua ia i Tatou? i le Tauaofiaga Itumalo 1992, ‘O Ē Faasusulu  atu le Malamalama’ i Dresden. Sa o se tali lena i a ma tatalo.”

E toatele e lē o ni Molimau na viiviia lomiga a le Sosaiete o le Olo Matamata. Ia Iulai 1992, na tusi atu ai se faiaoga o aʻoaʻoga lautele e faaalia lona “matuā faaaloalo ma le loto faafetai” mo lomiga na ia faaaogāina e sauniuni ai ana lesona. Ia Ianuari 1992, na talia ai e se tamaitai i Rostock se kopi o le tusi E Mafai Ona E Ola e Faavavau i Parataiso i Le Lalolagi mai ni Molimau se toalua o ē na ō atu i lona fale. Sa ia tusi atu i le lālā i Siamani e faapea: “O aʻu, ou te auai i le Lotu Luteru. E matuā maualuga loʻu faaaloalo i gaoioiga a le faalapotopotoga a Molimau a Ieova. Ua latou taʻu saʻo mai e faapea, e lē mafai e le tagata ona ola e aunoa ma le taitaiga a le Atua.”

O le ā le tele o se taitaiga faaleagaga o avatu e lotu a Kerisinetoma i o latou tagata lotu? Na taʻua e le nusipepa lauiloa o le Die Zeit ia Tesema 1991 e faapea, o le Lotu Luteru sa “lauiloa lona mamalu mo sina taimi puupuu i le avea o le faatinā o le fouvalega filemu, e foliga mai ua tauau ina mavae vave atu lona lauiloa.” O le mea moni, na oi mai se sui o le Lotu Luteru e faapea: “Ua faafeleilogai e tagata le olaga i faiga o maketi saoloto ma le parataiso.” Na tusi mai se tagata lotu i Magdeburg i le ofisa o le lālā i Siamani mo ni faamatalaga. Aisea? Na tusi mai o ia e faapea: “Ina ua mavae le tele o tausaga na ou ʻataʻata ai i le lē talitonu, ua ou talitonu mausali nei e faapea, ua iai nei le lalolagi i ona aso mulimuli, ma o le a tatou fetaiai ma faalavelave tetele i le lumanai lata mai.”—2 Timoteo 3:1-5.

Fausiaina Fale mo le Faatelega

A o leʻi faia le Wende, sa lē faatagaina ni Maota o le Malo i Siamani i Sasae. I le taimi nei, ua matuā manaomia vave lava; ua faamuamua ai la le fausiaina o na Maota. O se tasi lenei o vala o le tapuaiga moni, lea ua faia nei i ai ni suiga tetele. O le mea na tupu i se tasi uso, ua faaalia ai le vave ona faia o lenei suiga.

Ia Mati, 1990, i na o ni nai itula talu ona maua e Molimau a Ieova se faailoaga faaletulafono i Siamani i Sasae, sa valaaulia ai se uso e lauga i se vaega o Molimau, e faaaogā ai se mea faaleotele leo mo le uluai taimi o lona olaga. I le lua ma le ʻafa tausaga mulimuli ane, na faapaiaina ai e le faapotopotoga o loo ia faatasi atu i ai se Maota fou lava o le Malo. E oo atu i le faaiuga o le 1992, e fitu isi Maota o le Malo ua uma ona fausiaina mo faapotopotoga e 16. E sili atu i le 30 isi maota, atoa ma se Maota Fono matagofie ua fuafuaina nei.

Taulai le Vaai i le Malo o le Atua

Ua taʻua e se toeaina Kerisiano e faapea: “E leʻi pine lava talu ona uma le Wende, sa toatele tagata na tetee i le Tusi Paia. Sa tuu atu o latou faamoemoega i le pulega fou, lea na ia folafola maia ni tulaga lelei mulimuli ane.” Pe sa faataunuuina lo latou faamoemoe? “E leʻi uma tausaga e lua, ae ua suia o latou mafaufau. Ua ioe faatasi nei tagata ma i tatou e faapea, e lē mafai lava e pulega faaletagata ona aumaia le filemu ma le amiotonu.”

Sa olioli le vao o tagata ina ua mavae atu pulega aasa faasosalisi i Siamani i Sasae, ma alagaina ai le mea na latou manatu i ai faapea o se vaitaimi faaauro o le tafa o ata i manatu ma talitonuga o atunuu i Sisifo. Ae sa lē taulau o latou faanaunauga. E ui lava po o ai le malo o loo pule, sa tausia pea le faigofie o le vaai a Molimau a Ieova, ma taulai atu pea ma le mausali i le Malo o le Atua, lea o loo susulu e pei o se fetu i le lagi. O lena faamoemoe, o le a lē taitai ona iuvale.—Roma 5:5.

[Faaopoopoga i lalo]

[Ata i le itulau 26]

O loo faaaogā e Molimau i Siamani lo latou saolotoga e matuā faaaafia ai i le galuega o le Malo