Ia Faatuatua ia Ieova!

“Ia e faatuatua ia Ieova ma lou loto atoa.”—FAATAOTO 3:5.

1. Na faapefea ona faagaeetia se tagata talavou i le Faataoto 3:5, ma faatasi ai ma ā iuga lelei?

NA TUSI mai se misionare ua leva i le galuega e faapea: “‘IA E FAATUATUA I LE ALII MA LOU LOTO ATOA; AE AUA LE FAALAGOLAGO I LOU LAVA ATAMAI.’ O upu na e mai le Tusi Paia, sa tuu i se faavaa ma faatautau i se puipui o se fale na ou asiasi i ai, na tosina i ai laʻu vaai. I lena aso atoa, sa ou mafaufau pea i ai i na upu. Sa ou fesili ifo ia te aʻu lava, Pe e mafai ona ou faatuatua i le Atua ma loʻu loto atoa?” O le taimi lena faatoʻā 21 tausaga o lenei tagata. Ua 90 nei tausaga o lona soifuaga, ma o loo auauna pea ma le faamaoni o se toeaina i Perth, i Ausetalia, ma o loo mafai pea ona ia toe tepa agaʻi i tua i se olaga faaoaina faatasi ai ma ni fua o le faatuatua ma le loto atoa ia Ieova, e aofia ai tausaga iloga e 26 na paeonia ai i le laufanua fou mo misionare i Ceylon (lea ua taʻua nei o Sri Lanka), o Burma (lea ua igoa nei o Myanmar), o Malaya, o Taialani, o Initia, ma Pakisitana. *

2. O le ā le faamautinoaga e ao i le Faataoto 3:5 ona atiina aʻe i totonu o i tatou?

² “Ia e faatuatua ia Ieova ma lou loto atoa”—o upu nei o loo i le Faataoto 3:5, e pei ona faamatalaina e le Tusi Paia Samoa, e ao ona uunaia ai i tatou uma lava ina ia faaauau pea ona tuutoina atu atoatoa o tatou ola ia Ieova, ma le mautinoa e mafai ona ia faamalosia lo tatou faatuatua, e oo lava i le tulaga o le manumalo i faafitauli e pei o ni mauga. (Mataio 17:20) Seʻi o tatou iloiloina nei la le Faataoto 3:5 ma lona aotelega.

Le Faatonuga Faatamā

3. (a) O le ā le faalaeiauga o loo maua i uluai mataupu e iva o le Faataoto? (e) Aisea e ao ai ia i tatou ona uai totoʻa atu i le Faataoto 3:1, 2?

³ O mataupu amata e iva o le tusi o le Tusi Paia o Faataoto, o loo taulai atu i faatonuga mafana faatamā, o fautuaga atamai mai ia Ieova mo i latou uma o ē o loo tepa taulai atu i luma e olioli i le avea ma atalii i le lagi, po o le “saolotoga o le fanau a le Atua,” i luga o se lalolagi parataiso. (Roma 8:18-21, 23) O lenei fautuaga atamai, atonu e mafai ona faaaogā e mātua i le tausia aʻe o atalii ma afafine. O le fautuaga matilatila o loo i le Faataoto mataupu e 3, lea o loo amata lava i le lapataiga e faapea: “Loʻu atalii e, aua neʻi galo ia te oe laʻu tulafono, a ia tausia aʻu poloaiga i lou loto.” A o agaʻi atu aso mulimuli o le lalolagi o le faiga leaga o mea a Satani i lona iuga, seʻi o tatou matuā uai totoʻa atu ia i le taimi nei na i lo o se isi lava taimi i faatonuga mai ia Ieova. Atonu e foliga mai e umi le auala, ae o le folafolaga mo i latou uma lava o loo tumau, e “faaopoopoina ai ia te oe o aso e tele, ma tausaga e te ola ai, atoa ma le manuia”—le ola e faavavau i le faiga fou o mea a Ieova.—Faataoto 3:1, 2.

4, 5. (a) O le ā le faiā fiafia ua faamatalaina i le Ioane 5:19, 20? (e) Ua faapefea ona faatatauina le fautuaga o loo i le Teuteronome 11:18-21 e oo mai i o tatou aso?

⁴ O se faiā fiafia i le va o le tamā ma le atalii, e mafai ona sili atu ona tautele. Ua fuafuaina e Lē na Foafoaina i tatou, o Ieova le Atua, ina ia faapena la tatou faiā ma ia. Na taʻua e Keriso Iesu e uiga i lana faiā vavalalata totino ma Ieova e faapea: “E le mafai e le Atalii ona fai o se mea, na o ia lava; a o mea na te vaai atu i le Tamā o faia; o mea foi o faia e ia, o loo faia foi ia lava mea e le Atalii. Auā o loo alofa le Tamā i le Atalii, ua faaali mai foi ia te ia  mea uma lava e faia e ia.” (Ioane 5:19, 20) Na fuafuaina e Ieova e faapea, e ao ona iai lena faiā vavalalata i le va o ia ma lona aiga uma lava i luga o le lalolagi, e pei ona iai i le va o se tamā faaletagata ma a latou fanau.

⁵ Na faamalosia se faiā maufaatuatuaina i totonu o le aiga i Isaraelu anamua. Na fautuaina e Ieova tamā i inā e faapea: “Ia outou tuu nei upu i o outou loto ma o outou manatu, ia fusi foi e fai ma faailoga i o outou lima, e avea foi ma pale i le va o outou mata. Ia outou aʻoaʻo atu ai i a outou fanau, ma tautalatala aʻi pe a e nofo i lou fale, pe a e savali foi i le ala, pe a e taoto, pe a e tulai foi. Ia e tusi ai foi i pou o lou fale atoa ma puipui; ina ia faateleina ai o outou aso ma aso o a outou fanau i le laueleele na tauto ai Ieova i o outou tamā, e avatu ia te i latou, ia pei o aso e i ai le lagi i luga o le lalolagi.” (Teuteronome 11:18-21) E mafai ona avea moni le Afioga faagaeeina a lo tatou Aʻoaʻo Sili, o Ieova le Atua, o se mea e fesootai vavalalata atu ai mātua ma a latou fanau ia te ia, e faapena foi ma isi uma o loo auauna atu ia te ia i le faapotopotoga Kerisiano.—Isaia 30:20, 21.

6. E mafai faapefea ona tatou maua le finagalo malie o le Atua ma tagata?

⁶ O le fautuaga atamai faatamā mo tagata o le Atua, o ē matutua ma ē talavou, o loo faaauau i le fuaiupu e 3 ma le 4 o le Faataoto mataupu e 3 e faapea: “Aua neʻi teʻa ma oe le alofa ma le faamaoni, ia asoa ai i lou ua; ia e tusi ai i le papa o lou loto; ona e maua ai lea o le alofa ma le manuia lelei i luma o le Atua, atoa ma tagata.” O Ieova le Atua lava ia e aupito sili atu i le faaalia o le alofa agalelei ma le faamaoni. E pei ona tusia i le Salamo 25:10 e faapea: “O ala uma lava o Ieova, o le alofa ia ma le faamaoni.” I le faaaoao ia Ieova, e ao ona tatou tausia nei uiga ma o latou malosi e puipuia ai, ia faataua e pei o se asoa taugata, ma ia ta mau i o tatou loto. O lea, e mafai ona tatou tatalo atu e lē aunoa e faapea: “Ieova e, . . . ia leoleoina pea lava aʻu e lou alofa ma lou faamaoni.”—Salamo 40:11.

Se Faatuatua e Tumau

7. I ā auala ua faaalia ai e Ieova lona maufaatuatuaina?

⁷ Ua faamatalaina le faatuatua i se isi ona uiga e le Webster’s Ninth New Collegiate Dictionary e faapea, o le “faalagolago ma le mautinoa i le uiga moni, le tomai, le malosi, po o le moni o se tasi po o se mea.” O le uiga moni o Ieova, o loo taula lea i lona alofa agalelei. Ma e mafai ona ia i tatou le mautinoa atoatoa i lona tomai i le faia o le mea ua ia folafolaina mai, auā o lona lava suafa, o Ieova, e iloa ai o ia o le Fai Fuafuaga sili. (Esoto 3:14; 6:2-8) I le avea ma Lē na Foafoaina mea, o ia o le Puna o le malosi ma le mana tele. (Isaia 40:26, 29) O ia o le atoatoa o le upu moni, auā “e le mafai ona pepelo le Atua.” (Eperu 6:18) Ioe, ua faalaeiauina i tatou ina ia tuu atu lo tatou faatuatua atoatoa ia Ieova, lo tatou Atua, o le Puna sili o upu moni uma, o lē e ona le malosi uma lava e puipuia ai ē o loo faatuatua ia te ia, ma aumaia ai ana fuafuaga ofoofogia uma i le manuia faamamaluina.—Salamo 91:1, 2; Isaia 55:8-11.

8, 9. Aisea ua matuā leai ai se maufaatuatuaina i le lalolagi, ma ua faapefea ona ese mai ai tagata o Ieova?

⁸ I le lalolagi paʻū maulalo o loo siomia ai nei i tatou, e faanoanoa lava ona ua matuā leai lava se maufaatuatuaina. Na i lo o lena, ua tatou vaaia le matapeapea ma le piopio i so o se mea. I le faavaa pito i luma o le mekasini o Me 1993, o le World Press Review, sa faamatamata tetele mai ai le feau e faapea lona faitauina: “THE CORRUPTION BOOM—Dirty Money in the New World Order. (FAIGA PIOPIO MO LE MAUAINA O TUPE—O Tupe Faagaoi i le Faiga Fou a le Lalolagi). O tagata ma faiga o loo faapogaia mai ai le piopio, ua aafia ai Pasili e oo i Siamani, o le Iunaite Setete e oo i Anitenitina, o Sepania e oo i Peru, o Italia e oo i Mekisikō, ma le Vatikana e oo i Rusia.” Talu ai o loo faavae aʻe na faiga i le feitagai, le matapeapea, ma le lē maufaatuatuaina, ua leai ai lava se mea o seleseleina e le faiga fou a le lalolagi e pei ona faaupuina ai e tagata, peitai ua na o le faateleina ai o le leaga mo tagata.

 ⁹ I le faaeseesega ma atunuu faapolotiki, o loo fiafia Molimau a Ieova e avea “ma nuu ua Atua ia Ieova.” E na o i latou lava o loo mafai ona fai atu ma le faamaoni e faapea, “Matou te faatuatua i le Atua.” O i latou uma lava taitoatasi o loo mafai ona alalaga atu ma le olioli tele e faapea: “Ou te mitamita i le Atua ona o lana afioga; . . . Ua ou faatuatua i le Atua; ou te le fefe.”—Salamo 33:12; 56:4, 11.

10. O le ā ua faamalosia ai le toatele o talavou Kerisiano ina ia tumau i le faamaoni?

¹⁰ I atunuu o Asia, i vaega o puapuagatia ai le faitau afe o Molimau talavou i le sasaina ma faafalepuipuiina, o le faatuatua ia Ieova na mafai ai e le toatele ona tutumau. I se tasi po i le falepuipui, na manatu ai se tasi o talavou o lē na matuā tigaina lava ona o le faataugaina e faapea, ua lē mafai ona ia onosai. Ae peitai, na alu atu faalilolilo se tasi talavou ia te ia a o pogisa. Sa ia musumusu atu e faapea: “Aua e te faavaivai; na ou faalotolotolua, ma ua lē maua ai se toafilemu o loʻu mafaufau talu mai lena taimi.” O le talavou lea na taʻua muamua, na toe faafouina lona lotomau ina ia tu mausali ai. E mafai ona tatou faatuatua atoatoa ia Ieova o le a ia fesoasoani mai ia i tatou ina ia manumalo ai i so o se taumafaiga lava a Satani e aveesea lo tatou faamaoni.—Ieremia 7:3-7; 17:1-8; 38:6-13, 15-17.

11. Ua faapefea ona faagaeeina i tatou ina ia faatuatua ia Ieova?

¹¹ E faapea ona faitauina se vaega o le uluai poloaiga: “Ia e alofa foi i le Alii lou Atua ma lou loto atoa.” (Mareko 12:30) A o tatou manatunatu loloto i le Afioga a le Atua, o le a goto ai i le taʻele o o tatou loto upu moni ofoofogia ia ua tatou aʻoaʻoina, ina ia uunaia atoatoa ai i tatou i le auaunaga i lo tatou Atua ofoofogia, le Alii Silisiliese o Ieova. O se talisapaia loloto lea e sau mai le loto mo ia—mo mea uma lava ua ia aʻoaʻoina ai i tatou, ma faia mo i tatou, atoa ma mea o le a ia faia mo i tatou—e faagaee ai i tatou e faatuatua ma le mautinoa i lana faaolataga.—Isaia 12:2.

12. A o faagasolo tausaga, ua faapefea ona faaalia e le toatele o Kerisiano lo latou faatuatua ia Ieova?

¹² E mafai ona atiina aʻe lenei faatuatua a o faagasolo tausaga. Na iai se Molimau a Ieova loto maulalo o lē na auauna ma le faamaoni mo le sili atu i le 50 tausaga i le ofisa ulu o le Sosaiete o le Olo Matamata i Brooklyn, e amata mai ia Aperila 1927, na ia tusia e faapea: “I le faaiuga o le masina lena, na ou mauaina ai se alauni e $5.00 e fafao mai i totonu o se teutusi, faatasi ma se pepa malō matagofie o loo tusia mai ai le mau o le Tusi Paia o le Faataoto 3:5, 6 . . . Sa iai mafuaaga uma e faatuatua ai ia Ieova, auā i inā i le ofisa ulu, na oo ina ou talisapaia ai e faapea, o loo i ai se ‘auauna faamaoni ma le mafaufau’ a Ieova o loo tausia ma le faamaoni mea uma lava a le Malo i inei i luga o le lalolagi.—Mataio 24:45-47.” * Sa taulai atu le loto o lenei Kerisiano, e lē i le manao i tupe, ae i le mauaina “o le oa i le lagi e le uma.” E tutusa lelei ma aso nei, o le faitau afe o loo auauna i Aiga Peteli o le Sosaiete o le Olo Matamata i le lalolagi atoa, o loo latou faia foi faapena i lalo o se ituaiga o tautoga faatulafonoina e faasa ai ona faigaluega i nisi galuega totogi. Latou te faatuatua ia Ieova na te saunia mea latou te manaomia i aso taitasi.—Luka 12:29-31, 33, 34.

Faalagolago ia Ieova

13, 14. (a) Atonu e na o fea lava e maua ai fautuaga atamai? (e) O le ā e tatau ona alofia ina ia mafai ai ona sao mai sauaga?

¹³ Ua faalaeiauina i tatou e lo tatou Tamā faalelagi e faapea: “Aua le faalagolago i lou lava atamai.” (Faataoto 3:5) E lē mafai e le au faufautua faalelalolagi ma fomai o le mafaufau, ona maua le atamai ma le malamalama lea ua faaalia mai e Ieova. “E le mafaamatalaina lona poto.” (Salamo 147:5) Na i lo o le faalagolago atu i le atamai o tagata popoto o le lalolagi, po o o tatou lava faalogona lē mafaatonuina, seʻi o tatou vāai atu ia Ieova, lana Afioga, atoa ma toeaina i le faapotopotoga Kerisiano  mo fautuaga maufaatuatuaina.—Salamo 55:22; 1 Korinito 2:5.

¹⁴ O le atamai faaletagata po o tulaga lauiloa, o le a matuā lē aogā i le aso tele o tofotofoga matuia ua lalata tele mai. (Isaia 29:14; 1 Korinito 2:14) I Iapani, i le taimi o le Taua Lona Lua a le Lalolagi, na filifili ai e se leoleo mamoe o tagata o le Atua e agavaa ae faamaualuga, e faalagolago i lona lava atamai. I lalo o omiga, na avea ai o ia ma aposetate, ma o le toatele o le lafu, sa faapena foi ona taofia le auaunaga ina ua sauaina. O se tuafafine faamaoni i Iapani, o lē na faasaoina mai ma le lototele i faasalaga matuitui i ni falepuipui namu leaga, na ia faapea mai: “O i latou o ē na tutumau ma le faamaoni, sa leai ni tomai faapitoa, ma sa faigata ona iloa. E mautinoa, o i tatou uma lava e tatau ona faatuatua pea ia Ieova ma o tatou loto atoa.” *

15. O le ā le uiga faaleatua e tāua pe afai tatou te mananao e faafiafia Ieova?

¹⁵ O le faatuatua ia Ieova na i lo o lo tatou lava malamalama, e aafia ai le loto maulalo. Maeu le tāua o lenei uiga mo i latou uma lava o ē e mananao e faafiafia Ieova! Ioe, e oo lava i lo tatou Atua, e ui o ia o le Alii Pule Silisiliese i le vateatea aoao, ae na faaalia le loto maulalo i lona feagai ai ma ana foafoaga atamamai. E mafai ona tatou faafetai mo lena mea. “O lē faamaulaloina e ia ia ia e silasila mai i le lagi atoa ma le lalolagi. Na te faatulaiina mai le tagatālautele nai le efuefu.” (Salamo 113:6, 7) Ona o lona alofa mutimutivale sili, ua ia faamagaloina ai a tatou mea sese na fai ona o le agasala, e faavae i lana meaalofa silisili i tagata, le taulaga togiola tautele a lona Alo pele, o Keriso Iesu. Maeu le fiafia e ao ona ia i tatou mo lenei alofa ma le agalelei!

16. E mafai faapefea ona aapa atu uso mo faaeaga i le faapotopotoga?

¹⁶ Na faamanatu mai e Iesu lava ia ia i tatou e faapea: “O sē faamaualuga o ia ia te ia, e faamaulaloina lea; a o sē faamaulalo o ia ia te ia, e faamaualugaina lea.” (Mataio 23:12) I le loto maulalo, e ao i uso papatisoina ona aapa atu mo avega tauave i le faapotopotoga Kerisiano. Peitai, e ao i ovasia ona manatunatu i o latou tofiga, e lē pei o se faailoga muamua, ae o se avanoa e faia ai se galuega, i le loto maulalo, le talisapaia, ma le naunau, e pei ona sa faia e Iesu, o lē na faapea mai: “O loo galue loʻu Tamā e oo mai lava i le aso nei; o loo galue foi aʻu.”—Ioane 5:17; 1 Peteru 5:2, 3.

17. O le ā e ao ia i tatou uma lava ona talisapaia, e taitaiina atu ai i le ā le gaoioiga?

¹⁷ Tau ia ina ia tatou talisapaia pea ma le loto maulalo ma tatalo e faapea, o i tatou ua na o se efuefu i le silafaga a Ieova. Maeu so tatou olioli e mafai ona iai, ona “o le alofa o Ieova, mai le vavau lava lea, e oo i le faavavau i e matatau ia te ia; o lana amiotonu foi e oo i le fanau a latou fanau”! (Salamo 103:14, 17) O le mea lea, o i tatou uma lava e ao ona avea ma tagata aʻoga mataalia o le Afioga a le Atua. O taimi o loo faaalu i suesuega totino ma suesuega a le aiga, atoa ma sauniga a le faapotopotoga, e ao ona avea ma itula e sili ona tautele ia i tatou i vaiaso taitasi. I lenei auala, tatou te atiina aʻe ai i tatou ‘i le poto o Lē e Silisili ona Paia.’ O le “atamai lava lea.”—Faataoto 9:10.

“I Ou Ala Uma . . .”

18, 19. E mafai faapefea ona tatou faatatauina le Faataoto 3:6 i o tatou olaga, ma faatasi ai ma le ā le iuga?

¹⁸ I le faasino atu o i tatou ia Ieova, le Puna tauatua o le atamai, ua sosoo ai ma le fai mai o le Faataoto 3:6: “Ia e manatua o ia i ou ala uma, ona faatonuina ai lea e ia lava ou ala.” O le manatuaina o Ieova, e aofia ai le faalatalata atu pea ia te ia i le tatalo. Po o fea lava tatou te iai, ma e tusa lava po o le ā le tulaga e ono tulai mai, ua avanoa pea o ia mo a tatou tatalo i so o se taimi. A o tatou feagai ai ma a tatou galuega masani i aso taitasi, a o tatou sauniuni mo le auaunaga i le fanua, a o tatou ō atu i lea fale ma lea fale e folafola atu lona Malo, o a tatou tatalo faifai pea e mafai ona tatou mautinoa ai o le a ia faamanuiaina la tatou  faiva. O lea, e mafai ona ia i tatou le faaeaga lē mafuafuaina ma le olioli o le ‘savavali ma le Atua,’ ma le mautinoa e faapea, o le a ia ‘faasaʻoina o tatou ala,’ e pei ona sa ia faia ia Enoka o lē na faaalia le mataʻu i le Atua, o Noa, ma tagata Isaraelu faamaoni, e pei o Iosua ma Tanielu.—Kenese 5:22; 6:9; Teuteronome 8:6; Iosua 22:5; Tanielu 6:23; tagai foi i le Iakopo 4:8, 10.

¹⁹ Pe a tatou ole atu ia Ieova, tatou te mautinoa e faapea, ‘o le filemu mai le Atua e silisili lava i mea uma e manatu i ai, o le a leoleoina ai o tatou loto ma le malosi o o tatou mafaufau ona o Keriso Iesu.’ (Filipi 4:7) O lenei filemu mai le Atua, e atagia atu i se faafeiloaiga fiafia, e mafai ona tuuina atu ai la tatou feau i tagata o aiga ia tatou te feiloai i la tatou galuega talaʻi. (Kolose 4:5, 6) E ono mafai foi ona faalaeiauina ai i latou o ē atonu o loo mafatia ona o ni faanoanoaga, po o faamasinoga lē tonu ua taatele i aso nei i le lalolagi, e pei ona faaalia mai i se tala o loo mulimuli mai. *

20, 21. (a) I le taimi o faiga leaga a Nazi, na faapefea e le faamaoni o Molimau a Ieova ona faalaeiauina ai isi? (e) O le ā le filifiliga mausali e ao i le siufofoga o Ieova ona faaolaolaina ia i tatou?

²⁰ O Max Liebster, o se tagata Iutaia moni lava o lē sa foliga mai na faasaoina faavavega mai i sauaga matautia o le Holocaust, na ia faamatalaina mai lana malaga i se vaega o le  falepuipui i Nazi i upu nei: “Sa lokaina i matou i pusa laʻu uta o nofoaafi, sa suia e fai ma tamai potu e lokaina ai ni tagata se toalua. Sa aaina aʻu i totonu o se tasi o nei potu, ma sa ma fesagai ai ma se pagota sa atagia mai i ona foliga le fiafia. Sa iai o ia i inā talu ai ona o lona faaaloalo mo le tulafono a le Atua, na filifili o ia e faafalepuipuiina ma malie e oti na i lo o le faamasaaina o le toto o isi tagata. O ia o se tasi o Molimau a Ieova. Sa aveesea lana fanau mai ia te ia, ma sa faaoo le sala oti i lana avā. Sa faatalitalia e lenei uso o lona taunuuga foi lea. O aso e 14 o le malaga na aumaia ai se tali i aʻu tatalo, auā i le taimi a o alu lenei faigamalaga e tau i le oti, na ou maua ai le faamoemoe o le ola e faavavau.”

²¹ Ina ua tatalaina o ia mai “le lua o leona,” i Auschwitz e pei ona sa ia faaigoaina ai lena nofoaga, ma i lona papatisoga, ona faaipoipo atu ai lea o lenei uso i se tuafafine Molimau a Ieova o lē na faafalepuipuiina foi, ma o lona tamā na faapuapuagatiaina i le falepuipui i Dachau. A o iai lona tamā i inā, na ia faalogo ai ua pueina foi lana avā ma lona afafine laitiiti. Na ia faamatalaina mai ona uiga e tusa ai ma ia gaoioiga e faapea: “Sa ou matuā popole lava. Ma i le tasi aso, a o oʻu tu i le laina e faasolo ai e taeele, sa ou faalogo atu ai i se leo o sii mai upu a le Faataoto 3:5, 6 . . . O se siuleo e pei o se leo e sau mai le lagi. Sa o le mea tonu lava lea na ou manaomia ina ia toe faaleleia ai loʻu tulaga paleni.” O le mea moni, o le leo sa sau mai se tasi o pagota, o lē o loo ia siiina mai le mau lenei, ae o lena mea e faaalia ai le malosi o le Afioga a le Atua, e mafai ona faamalosia ai i tatou. (Eperu 4:12) Ia avea le siufofoga o Ieova o se leo o loo fetalai malosi mai ia i tatou i aso nei, e ala i upu o la tatou mau o le tausaga o le 1994: “Ia e faatuatua ia Ieova ma lou loto atoa”!

[Faaopoopoga i lalo]

I le Aotelega

□ O le ā le ituaiga o fautuaga o loo tuuina mai i le tusi o Faataoto?

□ E faapefea ona aogā ia i tatou le faatuatua ia Ieova?

□ O le ā o loo aafia ai i le faalagolago ia Ieova?

□ Aisea e ao ai ia i tatou ona manatuaina Ieova i o tatou ala uma?

□ E faapefea ona faasaʻoina e Ieova o tatou ala?

[Fesili mo le Suʻesuʻega]

[Ata i le itulau 15]

O loo talia lelei e tagata loto faamaoni le feau fiafia o le Malo