“Ia Outou Saili ia Ieova, Outou Uma ua Agamalu”

“IA OUTOU saili ia Ieova, outou uma ua agamalu i le nuu, o e ua faia Lana faamasinoga; ia outou saili le amiotonu, ia outou saili le agamalu, atonu e lilo ai outou i le aso o le toasa o Ieova.”—Sefanaia 2:3.

Sa fai atu e le perofeta o Sefanaia na upu i ē “uma ua agamalu i le nuu,” ma na ia uunaia foi i latou ina ia “saili le agamalu” ina ia puipuia ai i latou i “le aso o le toasa o Ieova.” E leai lava la se tau masalosalo, o le agamalu, o se uiga e manaomia mo le faasaoina. Ae aisea?

Aisea e Saili ai le Agamalu?

O le agamalu, o le uiga lea o se tagata e tauagafau, e lē faamaualuga pe loto fefete. E fesootai lelei lava ma isi uiga e pei o le loto maulalo ma le agavaivai. Ona o lea tulaga, o tagata agamalu la, e aʻoaʻo gofie, ma e loto malilie e talia aoaiga mai le aao o le Atua, e ui lava e foliga mai o le a avea o se mea e faanoanoa ai i lena taimi.—Salamo 25:9; Eperu 12:4-11.

I le agamalu lava ia, atonu e itiiti lava sona sootaga atu i tulaga tau aʻoaʻoga o se tasi, po o lona tulaga i le olaga. Ae peitai, o i latou o ē e maualuluga a latou aʻoaʻoga, pe manuia foi i latou i se auala faalelalolagi, ua tauau ina oo i ai se lagona faapea, ua agavaa i latou e faia a latou lava faaiuga i mea uma, e oo lava i mataupu tau tapuaiga. O lenei mea ua taofia ai i latou mai le faatagaina o se isi tagata e toe aʻoaʻoina i latou i nisi mataupu, ia po o le talia foi o se fautuaga ma faia ai suiga manaomia i o latou olaga. O isi o ē tamaoaiga i le itu faaletino, e ono pauu atu i ni mafaufauga sese faapea, o lo latou saogalemu, e maua mai i a latou oa faitino. I lea, ua latou lagona ai e faapea, e lē o mananao i ni tamaoaiga faaleagaga mai le Afioga a le Atua, le Tusi Paia.—Mataio 4:4; 5:3; 1 Timoteo 6:17.

Seʻi manatunatu i le au tusiupu, le au Faresaio, ma ositaulaga sili i aso o Iesu. I se tasi taimi, ina ua toe foi mai auauna na latou aauina atu ina ia puʻe ia Iesu, ae lē o aumaia o ia, ona faapea atu ai lea o le au Faresaio: “Po ua faaseseina foi outou? Po ua talia o ia e se tasi o le au faipule, po o se tasi o le au faresaio? A o lenei vao tagata ua le iloa le tulafono, ua fetuuina lava i latou.” (Ioane 7:45-49) I se isi faaupuga, i manatu o le au Faresaio, e na o tagata vālea ma tagata e leʻi aʻoaʻoina o le a talitonu ia Iesu.

Ae ui i lea, sa tosina nisi o Faresaio i le upu moni, ma sa oo lava ina latou puipuia Iesu ma Kerisiano. Ia i latou nei, sa iai Nikotemo ma Kamalielu. (Ioane 7:50-52; Galuega 5:34-40) Ina ua mavae le maliu o Iesu, “ua anaana foi faitaulaga e toatele lava i le faatuatua.” (Galuega 6:7) E mautinoa lava o le faaaoaoga aupito sili ona mataina, o le aposetolo o Paulo. Sa aʻoaʻoina o ia i le aʻoga a Kamalielu, ma sa o se lagolagosua tomai ma le faaaloalogia o faiga faa-Iutaia. Ae peitai, i se taimi na ia tali  atu ai ma le loto maulalo i le valaau a Keriso Iesu ma avea ai loa o sona soʻo maelega.—Galuega 22:3; 26:4, 5; Kalatia 1:14-24; 1 Timoteo 1:12-16.

Ua faataitaia ai i nei mea uma e faapea, e tusa lava po o le ā le talaaga o le olaga o se tasi, po o le ā foi le lagona o iai nei i se tasi e uiga i le feau mai le Tusi Paia, ae o loo aogā pea upu a Sefanaia. Afai e manao se tasi ina ia faamaonia o ia e le Atua, ma taitaiina e lana Afioga, e matuā tatau lava ona agamalu.

I Latou o Ē o “Saili le Agamalu” i Aso Nei

E faitau miliona tagata i le lalolagi aoao ua tali atu i le tala lelei o le Malo. O loo faia e Molimau a Ieova le sili atu i le fa miliona suesuega faale-Tusi Paia faalevaiaso i aiga o na tagata. O i latou nei e ō mai mai le tele o talaaga eseese ma e eseese foi tulaga o le tamaoaiga ma le vafealoai. Ae e tasi le mea ua laugatasia ai i latou uma, o le lava lea o lo latou loto maulalo e talia ai le feau o le Tusi Paia na tuuina atu e se tasi ia i latou i o latou lava aiga, po o se isi mea. O le toatele o i latou, ua agaigai lelei i luma ona o lo latou naunau e faia se taumafaiga e foia ai toatuga i o latou ala. Ioe, ua iai i latou faatasi ma ‘ē agamalu i le lalolagi’ i aso nei.

Seʻi fai ma faaaoaoga ia Maria i Mekisikō. Sa aʻoga faaloia o ia i le iunivesite, ma sa lelei lona tulaga tau tupe ona sa maua sona tofi mai ona mātua. Ona o lena mea, sa tuputupu aʻe ai ia te ia ni talitonuga e matuā tetee lava, na suia ai o ia i se ituaiga o tagata e pei ona ia fai mai ai, e “fouvale, lē migao, faasausili, ma le lē talitonu i le Atua.” Na manatua faapea e Maria: “Sa oo ina ou manatu faapea, e mafai e tupe ona faia mea uma lava, ma sa lē tāua ai le Atua. O le mea moni, sa oo lava ina ou manatu faapea e lē o soifua o ia.” Na ia faaopoopo mai e faapea: “Ia te aʻu, sa avea le lotu o se mea e amusia, ma ua na o se mea e manaomia e le lautele.”

Mulimuli ane, sa matauina e Maria ni suiga i le olaga o le atalii o le uso o lona tamā ina ua avea ma Molimau a Ieova. Sa faamatala mai e Maria e faapea: “Sa matuā matautia lava o ia, ae ua avea nei o se tagata filemu ma amio saʻo. Na fai mai ona aiga, ua avea o ia ma tagata talaʻi ma ua faitau i le Tusi Paia, ma o le pogai lena ua lē toe inu pia ai o ia, ma ua lē toe fia fai teine ai foi. O lea, sa ou manao ai e sau o ia ma faitau mai le Tusi Paia ia te aʻu, ona sa ou manatu o le auala lenei o le a ou maua ai le filemu ma le leai o ni faalavelave, lea sa ou manaomia tele.” O le iuga, sa talia e Maria se suesuega faale-Tusi Paia ma se ulugalii Molimau.

E tele naua mea sa manaomia ona ia foia, ma sa faigata tele foi mo ia ona talia le mataupu silisili o le Tusi Paia e uiga i le tulaga ulu, ina ia gauai atu i lana tane. Ae sa ia faia ni suiga tetele i lona olaga ma ona uiga. Sa ia tautino mai e faapea: “Ou te manatuaina faapea, talu mai lava le taimi na ō mai ai uso i loʻu fale ma aumai le fesoasoani a Ieova, sa iai le fiafia, toafimalie, ma le faamanuiaga a Ieova i loʻu aiga.” I aso nei, ua avea ai Maria  o se Molimau tuuina atu ma papatisoina a Ieova.

I le sailia o le tapuaiga moni, e iai foi se isi vaipanoa ua faia ai e le agamalu, po o le leai foi o se agamalu, se vaega tāua. E masani lava, o le avā i se aiga na te taliaina le upu moni ma manao e auauna i le Atua, ae e faatalatu pea le tane. Atonu e faigata i nisi tane ona talia le manatu e faapea, e iai se isi—o Ieova le Atua—lea e tatau ona gauai atu i ai lana avā. (1 Korinito 11:3) Na talosaga atu se fafine i Chihuahua, i Mekisikō mo se suesuega faale-Tusi Paia, ma i se taimi, na ō mai ai o ia ma lana fanau e toafitu i le upu moni. Muamua sa tetee lana tane. Aisea? Talu ai sa lē manao o ia e ō atu lona aiga e talaʻi mai lea fale i lea fale, e ofo atu lomiga faale-Tusi Paia. E foliga mai sa manatu o ia faapea, o lenei galuega, ua maulalo ifo i lona tulaga. Ae peitai, sa tumau pea lona aiga i la latou faaiuga e auauna i le Atua. Mulimuli ane, na amata ai ona iloa e le tane le tāua o le talia o faatulagaga a le Atua. Ae peitai, e 15 tausaga na mavae, ae faatoʻā tuuina atu o ia ia Ieova.

I Mekisikō atoa, o loo iai pea le tele o nuu tūtū solo o loo nonofo ai tagatanuu o loo tautatala pea i la latou gagana ma faia pea tu faa-Initia. Ua oo atu le feau a le Tusi Paia i nei tagata, ma ua fesoasoani ia i latou e faaleleia ai tulaga o a latou aganuu, ona ua iloa ai e nisi faitau ma tusitusi a o latou aʻoaʻoina le upu moni. Ae peitai, o le mea moni e lē faapea a itiiti se aʻoaʻoga o tagata pe laiti foi a latou mea faitino, ona sili atu ai lea o lo latou tali lelei mai. O le mimita i le lanu ma le pipii malosi i tu a tuaā, ua faigata ai i nisi taimi ona talia e isi le upu moni. Ua faamatalaina ai foi i inei le pogai e masani ai ona faalavelavea e isi tagata o le nuu i latou o ē talia le upu moni. O lea, e tele auala e faaalia ai le agamalu.

Tali atu ma le Agamalu

Ae faapefea oe lava ia? Po o e tali atu i le upu moni o le Afioga a le Atua? Po o faigata ia te oe ona talia nisi upu moni o le Tusi Paia? Atonu e manaomia ona e suesue ifo ia te oe lava ma iloa ai po o le ā o taofia oe. Po ua faateia oe ona o le toatele o tagata faaletaualoa ua tosina mai i le upu moni? Po o aafia ai i ou mafaufauga le manatu faamaualuga? O se mea lelei le manatunatu i upu a le aposetolo o Paulo e faapea: “Ua filifilia e le Atua mea vālea a le lalolagi, ina ia faamāina ē popoto, ma mea vaivai a le lalolagi ua filifilia ia e le Atua e faamāina ai mea malolosi; ma mea a tagata nuu, ma mea faatauvaa a le lalolagi, ua filifilia ia e le Atua, atoa ma mea e leai, ina ia faaleaogaina e ia mea o i ai; ina neʻi mitamita se tagata e toatasi i ona luma.”—1 Korinito 1:27-29.

Po o le a e teena se oloa tāua ona sa e mauaina i se ipu omea faatauvaa? O le mea moni e leai! O le auala lena ua filifilia e le Atua e tuuina mai ai lana Afioga faasaoola o le upu moni ia i tatou, e pei ona faamatala mai e le aposetolo o Paulo e faapea: “A ua ia te i matou lenei oa i ipu omea, ina ia i le Atua le matuā tele o le mana, a e le mai ia te i matou.” (2 Korinito 4:7) O le agamalu ma le loto maulalo, o le a mafai ai ona tatou iloa le tāua moni o le oa ae lē tau o “ipu omea,” po o tagata o loo latou aumaia ia i tatou. O le faia faapea, o le a faateleina ai foi le avanoa e “lilo ai i tatou i le aso o le toasa o Ieova” ma iai faatasi ma i latou o ē agamalu “o le a fai mo latou tofi le nuu.”—Sefanaia 2:3; Mataio 5:5.