Pe e te Manatua?

Pe na e talisapaia le faitauina o lomiga fou o Le Olomatamata? Ia, seʻi vaai pe mafai ona e taliina fesili nei:

▫ O ā ni fesoasoani aogā e mafai ona faia i ē mamai ma ē matutua o i le faapotopotoga i aso nei?

I le uluai faapotopotoga Kerisiano, sa iai se lisi o fafine ua oti a latou tane o ē sa manaomia se tausiga faaletino. (1 Timoteo 5:9, 10) E faapena foi i aso nei, atonu e ao i toeaina ona faia se lisi o ē mamai ma ē matutua o loo manaomia se tausiga faapitoa. Ae peitai, e lē tatau ona tuua na o toeaina latou te taimua i lenei tulaga. E tatau i tagata uma lava o le faapotopotoga ona nofouta i manaoga o ē mamai ma ē matutua. (1 Timoteo 5:4-8)—8/15, itulau e 28-29.

▫ Pe e lē talitonuina ea le tala faale-Tusi Paia e faapea sa foloina Iona e se meaola o le sami?

E leai, auā e mafai e se tafolā telē po o se malie paʻepaʻe lapoa ona foloina se tagata. E lē gata i lea, na faamautinoa atili mai e Iesu lava ia e faapea, o le tala ia Iona e moni. (Mataio 12:39, 40)—8/15, itulau e 32.

▫ O ā iuga leaga e maua mai i le faaaogāina faataulaitu o tapui ma laki?

O le faaaogāina faataulaitu o tapui ua faavaivaia moni ai tagata mai le faafesagaia ma le atamai o o latou faafitauli, ma faalaeiauina ai i latou e vaavaai atu i se laki e fai ma vaifofo atoatoa mo mea uma. E mafai foi ona oo ai i lē o faaaogāina se lagona o le faatagā saogalemu. Ae e sili atu ona tāua, o se tagata e faatuatua i le mamana o tapui ma laki, e ono puleaina ai lona ola e malosiaga lē vaaia faatemoni.—9/1, itulau e 4.

▫ O ā vala e fa e mafai ona fesoasoani i le faatumauina o se faaipoipoga?

O mea nei e fa o le naunau e faalogo, le tomai e faatoese atu ai, le tomai e saunia ai le lagolagosua faifai pea i itu tau i faalogona, ma le faanaunauga ina ia paʻi atu ma le alofa. (1 Korinito 13:4-8; Efeso 5:33; Iakopo 1:19)—9/1, itulau e 20.

▫ O le ā se tasi o auala e foai mai ai e Ieova le tumau ia i latou o fesagai ma tofotofoga?

Ua faia e Ieova lenei mea e ala mai i faaaoaoga a ē na tumau, o loo taʻua i lana Afioga, le Tusi Paia. (Roma 15:4) A o tatou manatunatu pea i nei faaaoaoga, ua faalaeiauina i tatou ina ia tumau, ma tatou iloa atili ai foi le auala tatou te tutumau ai.—9/15, itulau e 11-12.

▫ O le ā le tuutoina i le Atua?

O le tuutoina i le Atua e faatatau lea i le tuutoina ia Ieova lea e uunaia ai i tatou ina ia faia le mea e finagalo malie i ai o ia, e tusa lava pe fesagai ma tofotofoga faigata, talu ai tatou te alolofa i le Atua mai le loto.—9/15, itulau e 15.

▫ E ao faapefea ona tatou manatu i le alofa mutimutivale o le Atua?

E lē tatau ona tatou manatu māmā i le tele o le alofa mutimutivale o le Atua. E ao ona tatou pei o Paulo ma faaalia lo tatou talisapaia e ala i lo tatou tauivi faasaga i o tatou lava tulga lē lelei atoatoa. (1 Korinito 9:27) I lenei auala, o le a tatou faataitaia ai, le iai ia i tatou o se faanaunauga moni e faia le mea ua saʻo, e tusa lava pe tatou te feagai ma faafitauli.—10/1, itulau e 23.

▫ Aisea ua fetaui ai le lisiina mai e Paulo o le onosai o se vala muamua lea o le alofa?

Ua taʻua faapea e lē mafai ona aufaatasi Kerisiano pe a leai se onosai, po o le lē faapalepale foi o le tasi i le isi. Ua mafua lena ona o i tatou uma lava e lē lelei atoatoa, ma o o tatou sese ma agasala, e ono tofotofoina ai isi. O lea la, o le onosai, o le faavae lea pe afai e iai le alofa i le va o uso.—10/15, itulau e 21.

▫ Pe sa faaaogā e uluai Kerisiano le suafa o le Atua?

Ua ioe i ai le faamaoniga. Sa aʻoaʻoina e Iesu lona ʻau soʻo e tatalo i le Atua e faapea: “Ia paia lou suafa.” (Mataio 6:9) Ma i le iuga o lana faiva, sa ia tatalo ai e faapea: “Ua ou faaali atu lou suafa i tagata na e foai mai ia te au i le lalolagi.” (Ioane 17:6) E lē gata i lea, o loo iai foi le suafa o le Atua i uluai tusitusiga o le Septuagint i le Tetakalamatone (mataitusi e fa) faa-Eperu.—11/1, itulau e 30.

▫ O ā faaaoaoga faale-Tusi Paia e faaalia ai e mafai ona aafia o tatou olaga i le auala o tatou taulimaina ai a tatou mea sese?

Sa tumau pea ona teena ma le faamaualuga e le Tupu o Saulo fautuaga, ma atili faateleina ai ana agasala, ma mulimuli ane na iu ina oti e aunoa ma se finagalo malie i ai o le Atua. (1 Samuelu 15:17-29) I le isi itu, e ui lava i mea sese ma agasala a le tupu o Tavita, ae sa salamō o ia ma talia aoaiga ma tumau ai pea ma le faamaoni ia Ieova. O nei faaaoaoga faale-Tusi Paia e faaalia ai e faapea, o le faaalia o a tatou agasala, e fesoasoani lea ia i tatou e maua ai se faiā lelei ma le Atua, ma i lea ua faamoemoe ai foi mo le mauaina o le ola e faavavau. (Salamo 32:1-5)—11/15, itulau e 29-30.

▫ O le a faapefea ona fesoasoani mai Ieova i ona tagata pe a mafatia ona o ni mala faalenatura po o nisi mafuaaga?

O le fesoasoani a Ieova, e na te lē aveesea faavavega malosiaga faalenatura po o ni gaoioiga mamana, ae faaalia i se isi auala e lē iloa e le tele o tagata, o le—alofa. Ioe, e alofa moni Ieova i ona tagata, ma ua ia foai mai foi ia i latou le alofa mo le tasi i le isi, lea ua sili ona malosi ua mafai ai ona ia faataunuuina mea e foliga mai o ni vavega mo i latou. (1 Ioane 4:10-12, 21)—12/1, itulau e 10.