Pe na Fanau mai Iesu i le Tau Malulu?

“O LE Tetele o le Kiona, ua Taofia ai Mea Uma i Ierusalema” ma le “Faaumiumi o Timu Aisa ua Faaletonu ai le Itu i Mātū.” O na tala tomua i le Jerusalem Post sa masani ai le au faitau o Isaraelu i le 1992, e faatatau i se tau malulu o le senituri sa sili ona faigata i Isaraelu.

Ia Ianuari, na ufitia ai le tumutumu o le Mauga o Heremoni i le kiona e tusa ma le 22 i le 40 futu le maualuga, ae leʻi taitai ona uma le malulu. Mai laufanua Maualuluga o Golan ma Kalilaia i Luga, e faasolo ifo i lalo ma pasia ai Ierusalema ma Peteleema e i tafatafa ane (e pei ona vaaia i le faavaa), ma agaʻi atu i saute e oo i Negeb, sa taofia ai pea galuega ma masaniga o le olaga i aso faisoo o tagata Isaraelu ona o se kiona matagofie, ae matautia le malulu. Na taʻua i se tasi o tala i le Jerusalem Post e faapea: “Ona o le tetele o le timu aisa, na mafai ai se mea sa lē mafai ona faia i le vaiaso ua mavae e uafana o roketi e taʻua o Katyusha, o le tapunia lea o aai ma taofia tagatanuu ua matuā puipuia i totonu o o latou fale.”

E lē na o ē e nonofo i aai na aafia i le matautia o le tau malulu. Na lipotia mai le faitau selau o povi ma tamai povi, faapea ma le faitau afe o moa na mamate ina ua faateteleina le malosi o le malulu i le po. E pei sa foliga mai e lē lava le malosi o le kiona, ina ua totō ifo foi timu aisa latou. I se tasi aso, e foliga mai a o taumafai ma le naunautai ni tama leoleo mamoe talavou se toalua e faasaoina nisi o a la mamoe, ae puea ai i se lologa faafuasei, na tafefea ma malelemo ai i laua i le aave o le vai.

E ui lava e lē masani ona faapena se tau malulu i Sasae Tutotonu, ae na lipotia mai e le mekasini a Isaraelu, o le Eretz e faapea: “O faamatalaga i le tau na aoaoina ma faamaumauina e le au vāai tau i le nuu o Isaraelu mo le 130 tausaga ua mavae, ua faaalia ai e faapea, o le tau malulu i Ierusalema, o se tulaga moni lava e masani ai, na i lo o se mea atonu na faatalitalia . . . I le va o le 1949 ma le 1980, na lavea ai le aai o Ierusalema i ni tau malulu se luasefulufa, na matuā toʻa ai le kiona.” Peitai ane, po o lenei ea mea ua avea e na o se mea tāua i faamaumauga a le au vāai tau, ma o ni manatu o tagata, pe na i lo o lea, o se mea o loo iai sona uiga faapitoa mo tagata aʻoga o le Tusi Paia?

 O le ā le Uiga Tāua mo Tagata Aʻoga o le Tusi Paia?

Pe a mafaufau i le fanau mai o Iesu, ua manatua ai e le toatele o tagata le vaaiga faamomoi loto i le pusa e tuu ai meaai a manu lea e masani ona faaalia i le taimi o le Kirisimasi. O i inā o loo taoto ai le pepe o Iesu, o loo aui faamafanafana ma vaavaaia e lona tinā, a o ufitia atoa e le kiona le laufanua o loo siomia ai. Pe e talafeagai lenei vaaiga masani ma le faamatalaga a le Tusi Paia e uiga i lenei mea na tupu i talafaasolopito?

Ua faamatala mai e le tusitala o le Tusi Paia o Luka se faamatalaga na faamauina ma le faaeteete e uiga i le fanau mai o Iesu e faapea: “Sa i le vao o lea nuu leoleo mamoe, sa nonofo ai ma leoleo po i lo latou lafu mamoe. Faauta foi, ua tu mai ia i latou le agelu a le Alii, ua pupula faataaliolio mai foi ia te i latou le pupula o le Alii, ua matuā fefefe ai lava i latou. Ona fai mai lea o le agelu ia te i latou, Aua tou te matatau; auā faauta, ou te au mai ia te outou le tala lelei e olioli tele i le nuu uma; auā o le aso nei ua fanau ai i le aai a Tavita [o Peteleema], lo outou Faaola, o le Alii ia o Keriso. O le faailoga lenei ia te outou, e iloa e outou le tama meamea ua aui i le ie, o loo taoto i le fale povi. Ona faafuasei lea ona faatasi mai ma le agelu o ʻau mai le lagi e toatele, ua vivii i le Atua, ua faapea ane, O le viiga i le Atua i mea aupitoaluga; ma le manuia i le lalolagi; o le finagalo alofa i tagata.”—Luka 2:8-14.

Afai e te faitauina atu lenei faamatalaga i so o se tagata o Isaraelu i aso nei, ma fesili i ai pe faamata o le ā le taimi o le tausaga na tupu ai lenei mea, o le a ia tali mai e faapea, “O se vaitaimi i le va o Aperila ma Oketopa.” Aisea? E faigofie lava le tali. E amata mai ia Novema e oo ia Mati, o le vaitaimi lena o le malulu ma timuga i Isaraelu, ma o le mea moni, o Tesema 25 e aofia ai i le taimi o le tau malulu. E lē mafai ona ō i fafo leoleo mamoe i le fanua e leoleo a latou lafu i le po. O le manatunatu i lipoti i le amataga o lenei mataupu, o le a mafai ai ona e malamalama lelei i le pogai. O Peteleema, le mea na fanau ai Iesu, e  tu i ni nofoaga maualuluga e malulu, ma e na o ni nai maila le mamao ma Ierusalema. E oo lava i tausaga e lē matuā malulu ai le tau, ae i inā, e fai lava sina malulu i le po i le vaitaimi o le tau malulu.—Mika 5:2; Luka 2:15.

O le tilofaia o le talafaasolopito i le taimi o le fanau mai o Iesu, ua faamalamalamaina ai le mea moni e faapea, e leʻi fanau mai o ia i le taimi o le tau malulu ia Tesema. O le tinā o Iesu, o Maria, e ui lava ina ua latalata i le taimi e fanau ai o ia, ae sa faimalaga mai lona aiga i Nasareta agaʻi i Peteleema. Sa faia faapea e i laua ma Iosefa ina ia mafai ai ona faataunuuina le poloaiga a le tupu o Roma o Kaisara Aokuso, mo se tusiga igoa. (Luka 2:1-7) O le taimi lena, na amata ai ona faia e tagata Iutaia se fouvalega, ona o le feita i le pulega a Roma ma le mamafa o ana lafoga. Aisea la e saga faaita ai fua i latou e Roma e ala i le mananao e faimalaga atu le toatele ina ia tusia o latou igoa i lenei taimi sili ona faigata ma matautia o le tau malulu? Pe e lē sili ea ona magafagafa le faia o lenei poloaiga i se vaitau e mafai ai ona malaga, e pei o le tau e totogo ai mea, po o le tau e afu ai mea?

Faitauina o Taimi e Faavae i le Tusi Paia

Ua faaleaogaina e faamaoniga o talafaasolopito, atoa ma mea moni o le soifuaga, le lē talafeagai o Tesema po o so o se isi lava masina o le tau malulu e faapea na fanau mai ai Iesu. E lē gata i lea, ua faaalia e le Tusi Paia e ala i valoaga, le taimi o le tausaga na fanau mai ai Iesu. O fea o tusia ai lenei mea?

I le tusi o Tanielu mataupu e 9, ua tatou maua ai se tasi o valoaga e sili ona malosi e uiga i le Mesia. O loo faamatalaina uma ai lona afio mai ma lona maliu, lea na saunia ai se taulaga togiola e fai ma togisala, ma faatuina ai se faavae mo tagata usiusitai ina ia maua ai “le amiotonu e faavavau.” (Tanielu 9:24-27; faatusatusa i le Mataio 20:28.) E tusa ai ma lenei valoaga, o nei mea uma o le a faataunuuina i se vaitaimi e tusa ma le 70 vaiasosa o tausaga, e amata mai i le 455 T.L.M., ina ua  avatu le poloaiga e toe fausia Ierusalema. * (Neemia 2:1-11) Mai le vaevaeina o taimi o loo i lenei valoaga, ua mafai ai ona iloa lelei o le a aliai mai le Mesia i le amataga o le 70 vaiasosa o tausaga. Na tupu lenei mea ina ua ofoina atu e Iesu ia lava ina ia papatisoina i le 29 T.A., ma amata aloaia ai lana vaega faa-Mesia. “O le vaeluagalemu foi o le vaiasosa,” po o le mavae o le tolu ma le ʻafa tausaga, o le a fasiotia ai le Mesia, ma faaiuina ai le tāua o taulaga uma na faia i lalo o le feagaiga o le Tulafono a Mose.—Eperu 9:11-15; 10:1-10.

Ua faaalia i lenei valoaga e faapea, o le umi o le faiva a Iesu, e tolu ma le ʻafa tausaga. Na maliu Iesu i le Paseka, ia Nisani 14 (e tusa ai ma le kalena faa-Iutaia), i le tau e totogo ai mea i le 33 T.A. O le aso e talafeagai ma lena tausaga, o Aperila 1. (Mataio 26:2) Pe a faitau i tua i le tolu ma le ʻafa tausaga, e tau tonu lava i lona papatisoga i le 29 T.A., i le amataga o Oketopa. Ua faailoa mai e Luka ia i tatou, e tusa ma le 30 tausaga o Iesu ina ua papatisoina o ia. (Luka 3:21-23) O le uiga o lenei mea, na latalata foi le fanau mai o Iesu i le amataga o Oketopa. I le ogatasi ma le faamatalaga a Luka, o le taimi lena o le tausaga sa iai “i le vao o lea nuu leoleo mamoe, sa nonofo ai ma leoleo po i lo latou lafu.”—Luka 2:8.

Mai i le ā le Puna?

Ona ua faasino atu e faamaoniga i le amataga o Oketopa e faapea o le taimi lena na fanau ai Iesu, aisea la ua faamanatu ai ia Tesema 25? Ua faaalia e le New Encyclopædia Britannica, o lenei aso faamanatu na talia mulimuli ane i le tele o senituri talu ona mavae le fanau mai o Iesu: “I lona 4 o senituri, sa auaumalie ai lava ona faaofi mai le faamanatuina o le fanau mai o Keriso ia Tesema 25 e le tele o lotu i Sasae. I Ierusalema, sa umi lava se taimi o tetee tagata i le Kirisimasi, ae na iu lava ina talia.”

Aisea na faigofie ai ona talia lenei tu e ē na taʻua o ni Kerisiano i le tele o senituri ina ua mavae Keriso? Ua faasusulu atu e le New Encyclopædia Britannica se malamalamaga atili i le mataupu e faapea: “O tu faaleaganuu na sa fesootai ma le Kirisimasi, na tuputupu mai i nisi puna ona ua palu faatasi le faamanatuga o le fanau mai o Keriso, ma faamanatuga faapaupau o faiga o faatoaga ma faamanatuga o le la i le ogatotonu o le tau malulu. I le malo o Roma, o Saturnalia (Tesema 17) o le taimi lea o fiafiaga ma feaveai ai meaalofa. Sa manatu foi ia Tesema 25 e faapea, o le aso lea na fanau mai ai le atua o mealilo o Iran e igoa ia Mithra, o le La o le Amiotonu.”

Pe na “tutupu faatasi” uma ea nei mea? E matuā leai lava! O le mea moni e tusa ai ma talafaasolopito, i lona fa o senituri T.A., i le taimi o le pulega a le Emeperoa o Konesetatino, na matuā suia ai le Emepaea o Roma mai se pulega e sauaina Kerisiano, ae avea o se malo na te lagolagoina le “Faa-Kerisiano” o se lotu ua taliaina. A o taliaina lenei faatuatuaga fou e le toatele o tagata lautele, o ē latou te leʻi iloa le uiga moni o le Faa-Kerisiano, na amata ai loa ona latou faamanatuina a latou faigaai  faapaupau, faatasi ma nei taʻu fou “faa-Kerisiano.” O le ā se aso e sili ona talafeagai mo le faamanatuina o le fanau mai o Keriso na i lo o Tesema 25, lea ua uma ona faailogaina o le aso fanau o “le La o le Amiotonu”?

Pe e Iai Sona Afaina?

E mautinoa, sa leʻi faamanatuina e uluai soʻo Iutaia o Iesu lona aso fanau. E tusa ai ma le tala a le Encyclopaedia Judaica, “o le faamanatuina o aso fanau, sa leʻi iloa lava i aganuu faa-Iutaia.” E mautinoa foi, sa lē talia e uluai Kerisiano sea faamanatuga. Na i lo o le faamanatu o lona fanau mai, sa latou faaaloalo i le poloaiga a Iesu e faamanatu lona maliu, lea e iai sona aso patino, e mautinoa, o Nisani 14.—Luka 22:7, 15, 19, 20; 1 Korinito 11:23-26.

I senituri a o leʻi afio mai Keriso, na lapataia faavaloaga ai tagata Iutaia, i le iuga o lo latou faaaunuuaina i Papelonia e faapea: “O ese ia, ina o ese outou, ia outou o atu nai lea mea; aua neʻi paʻi atu i se mea leaga; o atu ia outou nai totonu ia te ia; ia mamā outou o e tauave ipu a Ieova.” (Isaia 52:11) Sa ao ona latou toe foi atu i lo latou nuu moni ina ia toe faavaeina le tapuaiga mamā a Ieova. Sa matuā lē tatau mo i latou le talia o tu lē mamā faapaupau ma ituaiga o tapuaiga ia na latou faia i Papelonia.

E lē o se mea e ofo ai, ona ua toe aumai foi lenei lava poloaiga mo Kerisiano i le 2 Korinito 6:14-18. Na i lo o le nuu o tagata Iutaia lea na latou teena Keriso, na avea ai ona soʻo ma sui o le tapuaiga mamā. Ua ia i latou se avega tauave o le fesoasoani lea i isi ia ō ese mai le pouliuli faaleagaga, ae ō atu i le malamalama o le upu moni. (1 Peteru 2:9, 10) E mafai faapefea ona latou faia lenei mea pe afai latou te palu faatasi aʻoaʻoga a Keriso, ma aganuu ma aso malōlō e amata mai i faiga faapaupau?

E ui ina atonu e fetaui lenei mea ma manatu o le lautele, ae o le faamanatuina o se “Kirisimasi i le Tau Malulu,” ua tutusa lea ma le “paʻi atu i se mea leaga.” (2 Korinito 6:17) O sē alofa moni i le Atua ma Keriso, e ao ona aloese ai.

E lē gata i le mea moni e faapea na amata mai i faamanatuga faapaupau, ae ua tatou iloa foi e lē o aumaia e le Kirisimasi le upu moni, auā na fanau mai Iesu ia Oketopa. Ioe, e tusa po o le ā le vaaiga e ono mafaufau i ai se tasi, ae e leʻi fanau mai Iesu i le tau malulu.

[Faaopoopoga i lalo]

[Ata i le itulau 4, 5]

Na ufitia Ierusalema e le kiona, e pei ona vaaia mai sasaʻe

[Ē Ana le Ata]

Garo Nalbandian

[Ata i le itulau 6]

Le kiona i tafatafa o pa o Ierusalema

[Ata i le itulau 7]

Na o le tau mafanafana e nonofo ai leoleo mamoe ma a latou lafu i le po i luga o mauga e pei ona vaaia i lalo

[Ē Ana le Ata]

Garo Nalbandian