Raava—Taʻuamiotonuina e Ala i Galuega o le Faatuatua

SEʻI mafaufau ane! O se fafine talitane na taʻuamiotonuina i le silafaga a le Atua. O le toatele o le a faapea mai, “E lē taitai ona mafai!” Ae, o le mea lena na tupu i le fafine talitane o Raava mai Ieriko, o se aai anamua o Kanana.

Ua faamauina e le tusitala o le Tusi Paia, o Iakopo e faapea: “O lenei, ua outou iloa ua taʻuamiotonuina le tagata i galuega, a e le na o le faatuatua. E faapea foi Raava le fafine talitane, e lei taʻumiotonuina ea o ia i galuega, ina ua talia e ia e na aauina atu, na ia au ese atu ai foi ia te i laua i le tasi ala? E faapei o le tino ua oti ia pe a teʻa le agaga, e faapea foi le faatuatua ua mate pe a leai ni galuega.” (Iakopo 2:24-26) Aisea na taʻuamiotonuina ai Raava? O le ā na ia faia ua ala ai ona tuuina atu i ai sea faiā faaeaina ma le Atua?

Ua Ō mai Sā Isaraelū!

Seʻi tatou toe tepa i tua i le tausaga e 1473 T.L.M. Ia faaata i le mafaufau le faatulagaga. Sa matuā puipuia i ʻolo le aai o Ieriko. I luga aʻe o pa o le aai, o loo iai le fale o Raava le fafine talitane. Mai i lenei tulaga e lelei ai le vaai, e mafai ona ia tepa atu i le itu i sasaʻe i le pa aʻe o le vaitafe o le Ioritana. (Iosua 3:15) I lona auvai i sasaʻe, atonu o le a ia iloa atu ai le togalauapi o Isaraelu ma lana autau e sili atu i le 600,000. Ua na o ni nai maila lava lo latou mamao ese!

Na iloa e Raava ia manumalo o Isaraelu i taua. Ua ia faalogo foi i faaaliga o le mana o Ieova, ae maise i le faaavanoaina o se ala e sosola ai Isaraelu i le Sami Ulaula. Ma le mautinoa lava la, o le a lē avea le vai o Ioritana lea ua pa ma faalavelave. Ua tulai mai se taimi faigata! O le a faapefea ona gaoioi Raava?

Ua Faia le Filifiliga a Raava

E leʻi leva lava, ae taunuu loa ni mālo faafuasei a Raava—o ni sipai mai le togalauapi o Isaraelu. O loo saili se mea e nonofo ai, ma ua ia faatagaina i lona fale. Ae, ua logotala le tupu o Ieriko i le iai o sipai. Sa ia aauina atu loa ana alii ofisa o le tulafono e ave ia sipai ma taofia.—Iosua 2:1, 2.

E taunuu ane alii ofisa a le tupu, a ua filifili Raava mo le itu a Ieova le Atua. Ua faatonu atu faapea alii ofisa a le tupu, “Ina tuu mai ia o ia tagata na o atu ia te oe.” Ua tanumai e Raava ia sipai i laau o lino sa folasia e faamamagoina i luga o lona fale. Ua ia faapea atu: “Na o mai tagata ia te au, a ou te lei iloa pe na o mai ifea i laua; ua oo ina a punitia o le faitotoa [o le aai], ina ua pouliuli, ona o atu ai lea o ia tagata; ou te lei iloa le mea na o atu ai ia tagata; ia vave ona tuliloa atu ia te i laua; auā tou te maua atu i laua.” (Iosua 2:3-5) Sa faia faapea e alii ofisa a le tupu—e aunoa ma se taulau.

Sa faaseseina e Raava ala o le fili. Sa ia faia loa isi laasaga e faaalia ai lona faatuatua ia Ieova e ala i galuega. Sa ia alu atu i luga o le fale ma taʻu atu i sipai e faapea: “Ua ou iloa ua foaiina atu e Ieova le nuu ia te outou.” Ua taʻua e Raava le matatau uma o le nuu ona ua faalogo “na faamateina e Ieova le suāsami o le sami Ulaula” i luma o Isaraelu i le 40 tausaga ua tuanai. Sa iloa foi e tagata le faaumatiaina e Isaraelu o tupu e toalua o sā Amorī. Ua faapea atu Raava: “Na matou faalogo i ia mea, ona liu suāvai ai lea o matou loto, ua le toe ai lava se malosi i se tagata, ona o outou; auā o Ieova lo outou Atua, o le Atua ia i le lagi i luga, ma le lalolagi i lalo nei.”—Iosua 2:8-11.

Ona aioi atu lea o Raava e faapea: “O lenei,  seʻi oulua tauto mai ia te au ia Ieova, auā ua ou agalelei atu ia te oulua, ia oulua agalelei mai foi i le aiga o loʻu tamā, ma ia oulua tuu mai ia te au se faailoga faamaoni; ma ia outou faaolaina loʻu tamā, ma loʻu tinā, ma oʻu tuagane, ma oʻu uso, ma i latou uma ua ia te i latou.”—Iosua 2:12, 13.

Sa ioe i ai tamaloloa ma taʻu atu ia Raava le mea e fai. E tatau ona ia faatautauina i lona faamalama le maea mūmū lea na faaaogāina e tuutuu ifo ai i lalo sipai i fafo o pa o Ieriko. E tatau ona ia faapotopoto mai lona aiga i lona fale, ma nonofo ai i inā ina ia latou maua ai le puipuiga. Sa taʻuina atu e Raava ni faamatalaga aogā e tusa ai ma le tulaga o le laueleele, ma faamatala atu i ai le auala e ui ese ai mai ē o tuliloaina i laua. Sa faia faapea e sipai. Ina ua uma ona faatautauina le maea mūmū ma faapotopotoina lona aiga, ona nofo faatali loa lea o Raava mo nisi mea e tutupu.—Iosua 2:14-24.

O le ā ua faia e Raava? O le mea moni, na ia faaalia lona faatuatua i le Atua e Ona le Malosi Uma Lava, o Ieova! O le a ia ola e tusa ai ma ana faatulagaga. Ioe, ma o le a tauamiotonuina o ia mo na galuega o le faatuatua.

Ua Solo i Lalo le Pa!

Ua mavae ni nai vaiaso. Ona faataamilo ai lea i Ieriko o autau a Isaraelu, faatasi ma le ʻau faitaulaga—o nisi o loo iai ni pu e fai i seu o ʻoti poa, a o nisi sa tauaveina le atolaau paia o le feagaiga. Ua faatasi i le aso ona latou faia faapea, mo aso e ono. Ae i le aso lona fitu lea, sa latou faataamilo faaono ai i le aai. O le la foi ua toe faataamilo!

Ua maeʻa le faataamilosaga lona fitu, ma ua faalogoina le iliina faaumiumi o pu. Ua alalaga ma le leo tetele Isaraelu. I lea, na faapogaia ai loa e Ieova pa puipui o Ieriko e solo i lalo ma se gogolo tele. E na o le itu lava sa lagolagoina le fale o Raava na mau. O le isi vaega uma o le  aai, ma i latou na aumau ai, na faaumatiaina. Ona o le faamaonia o lona faatuatua i galuega, na faasaoina ai le fafine talitane ua salamō faatasi ma lona aiga, ma ua ia mau faatasi ma tagata o Ieova.—Iosua 6:1-25.

O se Iloiloga o Uiga o Raava

Sa lē o se fafine na faavalea ona fai ma paie ia Raava, auā sa faalalā i luga o lona fale ia laau o lino e faamamago ai. Sa faaaogāina ia laau e fai ai ie lino. Sa iai foi se faaputuga o maea mūmū i le fale o Raava. (Iosua 2:6, 18) O lea, atonu sa ia faia ni ie lino, ma atonu sa ia iloa foi le valiga o ie. Ioe, sa o se fafine e galue mamafa Raava. Ae e sili i mea uma, ua ia maua le mataʻu loloto mo Ieova.—Faatusatusa le Faataoto 31:13, 19, 21, 22, 30.

Ae ā le isi galuega a Raava? Sa lē na ona avea o ia ma se tamaitai talimalo o se faletalimalo. E leai, ua faailoaina mai o ia e le Tusi Paia e ala i le faaaogāina o le upu Eperu ma le upu Eleni e faaalia ai se fafine talitane. Mo se faataitaiga, o le upu Eperu zoh·nahʹ, e faatatau pea i se faiā lē mamā lē faaletulafonoina. Ae, i tagata Kanana, sa lē o se galuega inosia le talitane.

O le faaaogāina e Ieova o se fafine talitane, e faaalia ai le tele o lona alofa mutimutivale. E mafai e le vaaiga i fafo ona faaseseina ai i tatou, “a e vaai Ieova i le loto.” (1 Samuelu 16:7) O lea, o fafine talitane e lotolelei ma salamō mai la latou taligātane, e mafai ona latou maua le faamagaloga a Ieova le Atua. (Faatusatusa i le Mataio 21:23, 31, 32.) Sa liliu ese Raava mai le agasala i se ala amiotonu e maua ai le tauleleia mai le Atua.

Sa ola ia sipai Isaraelu e tusa ai ma le Tulafono a le Atua, o lea, sa leʻi mau ai i le fale o Raava mo ni mafuaaga tau amioga leaga. Atonu sa la manatu faapea, o le a itiiti le masalomia o i laua i lo la iai i le fale o se fafine talitane. O le tulaga o le fale i luga o le pa o le a faafaigofie ai foi ona la sosola ese. Sa manino le taitaiina o i laua e Ieova i sē e agasala ua aafia lelei lona loto i tala e uiga i feutagaiga tauatua ma Isaraelu, ma na ia salamō ai ma suia ona ala. Sa manino e leʻi faia e sipai se amioga leaga, ona o le fetalaiga a le Atua ia faaumatia e Isaraelu sā Kananā ona o ā latou amioga leaga, faatasi ma lana faamanuiaga ia Raava, ma le manumalo ia Ieriko.—Levitiko 18:24-30.

Ae faapefea upu taufaasese a Raava i ē na tuliloa i sipai? Sa talia e le Atua lana gaoioiga.  (Faatusatusa i le Roma 14:4.) Sa ia tuuina o ia i se tulaga matautia e puipuia ai ana auauna ma faamaonia ai lona faatuatua. E ui e sese i le silafaga a Ieova le pepelo taufaasese, ua lē iai i se tagata se avega tauave e faailoa atu ai faamatalaga moni i ē e lē tatau i ai. E oo lava ia Iesu, na te leʻi faamatalaina atoatoa pe faia ni tali tuusao pe afai o le faia faapea e oo mai ai mafatiaga lē tatau. (Mataio 7:6; 15:1-6; 21:23-27; Ioane 7:3-10) E mautinoa lava, o lea le auala e tatau ona vaaia ai le gaoioiga a Raava i le faaseseina o le fili po o alii ofisa.

Le Taui o Raava

Na faapefea ona tauia Raava i le faaalia o le faatuatua? O lona faasaoina mai le faaumatiaga o Ieriko, sa avea moni ma faamanuiaga mai ia Ieova. Mulimuli ane, sa ia faaipoipo ia Salemona le atalii o le alii sili o Naasona, o le ituaiga o Iuta. I le avea ma mātua o le tagata sa mataʻu i le Atua o Poasa, sa faia ai e Salemona ma Raava se sootaga i le laina o le gafa, lea na tau i le Tupu o Isaraelu, o Tavita. (1 Nofoaiga a Tupu 2:3-15; Ruta 4:20-22) O le mea e sili atu ona tāua, o Raava lea na talitane muamua, o ia o se tasi o fafine e toafā, ua na o i latou ia ua taʻua igoa i le gafa o Iesu Keriso o loo i le tusi o Mataio. (Mataio 1:5, 6) Maeu se faamanuiaga mai ia Ieova!

E ui lava e lē o ia o se Isaraelu, ma sa avea foi o ia o se fafine talitane, ae ua avea Raava ma faataitaiga mataina o se fafine na faaalia lona faatuatua atoatoa ia Ieova e ala i ana galuega. (Eperu 11:30, 31) I le pei o isi, ua iai ma ni ē ua tuua se olaga talitane, o le a ia maua se isi foi taui—o se toetu mai le oti i le ola i le lalolagi parataiso. (Luka 23:43) Ona o lona faatuatua e lagolagoina e galuega, na maua ai e Raava le finagalo malie o lo tatou Tamā faalelagi e alofa ma faamagalo. (Salamo 130:3, 4) Ma e mautinoa o lana faataitaiga lelei, ua aumaia ai se faalaeiauga mo ē uma e alolofa i le amiotonu e vaavaai atu ia Ieova le Atua mo le ola e faavavau.

[Ata i le itulau 23]

Na taʻuamiotonuina Raava ona o ana galuega na faamaonia ai lona faatuatua

[Ata i le itulau 24]

Na maua e tagata suesue i le palapala ni vaega sa totoe o Ieriko anamua e aofia ai ma sina vaega o le pa muamua

[Ē Ana le ]

Pictorial Archive (Near Eastern History) Est.