E Foai Mai e Ieova le Tele o le Filemu ma le Upu Moni
E Foai Mai e Ieova le Tele o le Filemu ma le Upu Moni
“Ou te faamalolo lava ia te i latou, ma ou faaali atu ia te i latou le tele o le filemu ma le upu moni.”—IEREMIA 33:6, NW.
1, 2. (a) E tusa ai o le filemu, o le ā le talaaga o atunuu? (e) I le 607 T.L.M., o le ā le lesona na aʻoaʻo atu e Ieova ia Isaraelu e faatatau i le filemu?
FILEMU! Maeu le moomia o lena mea, ae pagā le seāseā ona maua i le gasologa mai o talafaasolopito o le tagata! Ae maise lava i le lona 20 o senituri, ua lē o se senituri o le filemu. Nai lo lea, ua gāpā ai taua e lua na sili ona faatamaʻia ai ola, i le talafaasolopito o le tagata. Ina ua mavae le taua muamua a le lalolagi, ona faavaeina lea o Malo Sosoo mo le tausisia o le filemu o le lalolagi. Sa lē taulau lena faalapotopotoga. Ina ua mavae le taua lona lua a le lalolagi, ona faavaeina lea o le faalapotopotoga o Malo Aufaatasi, ma o lo latou sini foi lena. Ua lava tusitusiga a nusipepa i aso taitasi tatou te manaomia e iloa ai le matuā lē taulau foi o lena faalapotopotoga.
2 Pe tatau ea ona faateʻia i tatou i le lē mafai e faalapotopotoga a tagata ona aumaia le filemu? E matuā leai lava. I le silia ma le 2,500 tausaga ua mavae, na aʻoaʻoina ai e le nuu filifilia o le Atua, le fanauga lea a Isaraelu, se lesona e tusa ai o lenei itu. I le senituri lona fitu T.L.M., na faamataʻuina ai le filemu o Isaraelu e le malo malosi na pulea le lalolagi i lena taimi, o Papelonia. Ona saili atu lea o Isaraelu ia Aikupito mo se filemu. Peitai na lē taulau Aikupito. (Ieremia 37:5-8; Esekielu 17:11-15) I le 607 T.L.M., na talepe uma ai i lalo e autau a Papelonia pa o Ierusalema ma susunu le malumalu o Ieova. Ona aʻoaʻoina ai lea ma le tiga e Isaraelu, le lē aogā o le faalagolago atu i faalapotopotoga a tagata. Nai lo le olioli o le nuu i se filemu, na aveina atu faamalosi i latou e faaaunuua i Papelonia.—2 Nofoaiga a Tupu 36:17-21.
3. I le faataunuuga o fetalaiga a Ieova e ala atu ia Ieremia, o ā mea tutupu i talafaasolopito na aʻoaʻoina ai e Isaraelu le lesona tāua lona lua e faatatau i le filemu?
3 Ae peitai ane, a o lei faatoilaloina Ierusalema, na faaalia ai e Ieova e faapea, o ia, ae lē o Aikupito, e aumaia le filemu ia Isaraelu. Na ia folafola e ala atu ia Ieremia e faapea: “Ou te faamalolo lava ia te i latou, ma ou faaali atu ia te i latou le silisili o le manuia ma le faamaoni [“filemu ma le upu moni,” NW]. Ou te faafoisia foi le tafeaga o Iuta, ma le tafeaga o Isaraelu, ma ou atiina ae i latou e pei o anamua.” (Ieremia 33:6, 7) Na amata ona faataunuu le folafolaga a Ieova i le 539 T.L.M. ina ua faatoilaloina Papelonia ma toe faasaʻoloto ai le fanauga a Isaraelu mai le tafeaga. (2 Nofoaiga a Tupu 36:22, 23) E oo ane i le faaiuiuga o le 537 T.L.M., na faamanatuina ai mo le uluai taimi talu mai tausaga e 70, e se vaega o le fanauga a Isaraelu le Tausamiga o Fale Apitaga i le laueleele o Isaraelu! Ina ua mavae le tausamiga, ona latou sauni loa lea e toe fausia le malumalu o Ieova. Sa faapeī o latou faalogona i lenei mea? Ua faapea mai le tala: “Ona alaga lea o le nuu uma i le alaga tele i viiga ia Ieova, ona ua faavaeina o le fale o Ieova.”—Esera 3:11.
4. Na faapefea ona uunaia e Ieova le fanauga a Isaraelu ina ia galulue i le fausiaina o le malumalu, ma o le ā le folafolaga na ia fai e faatatau i le filemu?
4 Ae ina ua mavae lena amataga fiafia, sa lotovaivai le fanauga a Isaraelu ona o tagata tetee, ma taofia ai le fausiaina o le malumalu. I ni tausaga mulimuli ane, na faatulai mai ai e Ieova perofeta e toalua o Hakai ma Sakaria, ina ia o la uunaia le fanauga a Isaraelu e faauma le galuega o le malumalu. Maeu ni lagona o le faagaeetia atonu na oo ia i latou i le faalogo atu i faamatalaga a Hakai e faatatau i le malumalu lea o le a fausia: “E sili le mamalu o lenei fale ua mulimuli i le na muamua, ua fetalai mai ai Ieova o ʻau; ou te avatu foi le manuia [“filemu,” NW] i le mea nei”!—Hakai 2:9.
E Faataunuu e Ieova Ana Folafolaga
5. O le ā e aogā ona mātauina e faatatau i le mataupu lona valu o le tusi o Sakaria?
5 I le tusi o Sakaria i le Tusi Paia, ua tatou faitau ai i le anoanoai o vaaiga ma valoaga faagaeeina sa faamalosia ai tagata o le Atua i tuā i le lona ono o senituri T.L.M. O valoaga foi na o loo faamautinoa mai ai pea ia i tatou le lagolagosua a Ieova. Ua aumaia ai ia i tatou mafuaaga uma e talitonu ai, o le a aumaia foi e Ieova i ona tagata le filemu i o tatou aso. Mo se faaaoaoga, i le mataupu lona valu o le tusi lea o loo taʻua ai lona igoa, e faasefulu ona taʻua ai e le perofeta o Sakaria upu nei: ‘O loo faapea ona fetalai mai o Ieova.’ O taimi uma lava e taʻua ai, e faailoa mai ai e le faaupuga se faasilasilaga tauatua e faatatau i le filemu o tagata o le Atua. O nisi o nei folafolaga sa faataunuuina i tuā i aso o Sakaria. O folafolaga uma lava, ua faataunuuina, pe o loo faasolo ina faataunuuina i aso nei.
“O le a Ou Fuā Ona o Siona”
6, 7. I ā auala na ‘fuā ai Ieova ma le ita tele ona o Siona’?
6 O loo muai taʻua le faaupuga lea i le Sakaria 8:2, (NW) ua tatou faitau ai: “O loo faapea ona fetalai ai o Ieova o ʻau, ‘O le a ou fuā ona o Siona i le fuā tele, o loʻu ita tele o le a ou fuā ai ona o ia.’” O le folafola mai e Ieova o lona fuā, o lona maelega tele ona o ona tagata, sa uiga e faapea, o le a matuā mataalia o ia i le toe faafoisia o lo latou filemu. O le toe faafoisia o Isaraelu i ona laufanua ma le toe fausiaina o le malumalu o ni faamaoniga na o lea maelega.
7 Ae faapefea la i latou o ē sa tetee i tagata o Ieova? O lona maelega mo ona tagata sa tutusa lelei ma lona “ita tele” i nei fili. A o faia le tapuaiga a tagata faamaoni o Iutaia i totonu o le malumalu lea sa toe fausia, sa mafai ai ona latou toe manatua le iuga matautia na oo ia Papelonia le aai malosi, lea na faatoilaloina. Sa mafai foi ona latou mafaufau ai i le matuā lē taulau o fili o ē na taumafai e taofia le toe fausiaina o le malumalu. (Esera 4:1-6; 6:3) Ma sa mafai ona latou faafetai atu ia Ieova ona o lona faataunuuina o lana folafolaga. O lona maelega na latou maua ai le manumalo!
“O le Aai e Faamaoni”
8. I aso o Sakaria, na faapefea ona avea Ierusalema ma aai o le faamaoni i le ese ai ma uluai taimi?
8 I le taimi lona lua, ua tusi mai ai Sakaria: “O loo faapea ona fetalai mai o Ieova.” O ā fetalaiga a Ieova i lena taimi? “Ua ou foi atu i Siona, ou te mau foi i totonu o Ierusalema; e igoa Ierusalema, O le aai e faamaoni; o le mauga foi o Ieova o ʻau, e igoa lea, O le mauga paia.” (Sakaria 8:3) A o lei oo i le 607 T.L.M., sa mautinoa le lē avea o Ierusalema ma aai e faamaoni. Sa amioleaga ana faitaulaga ma perofeta, ma sa lē faamaoni ona tagata. (Ieremia 6:13; 7:29-34; 13:23-27) Ae o lea ua toe fausia e tagata o le Atua le malumalu, e faaalia ai lo latou tuutoina atu i le tapuaiga mamā. Ona toe afio ai lea o le agaga o Ieova i Ierusalema. Sa toe taʻua upu moni o le tapuaiga mamā i totonu o le aai, o lea na mafai ai ona taʻua Ierusalema “o le aai e faamaoni.” O lona tulaga maualuga na mafai ai foi ona taʻua “o le mauga o Ieova.”
9. O le ā le suiga mataina i tulaga na oo i ai “le Isaraelu o le Atua” i le 1919?
9 E pei lava ona uigā nei faasilasilaga e lua ia Isaraelu anamua, ua faapena foi ona tele lo la uigā mo i tatou a o lalata atu lenei 20 senituri i lona iuga. I le toetoe 80 tausaga ua mavae, i le taimi o le taua muamua a le lalolagi, na oo ai ina faaaunuua faaleagaga se faitau afe o ē faauuina, o ē na fai ma sui o “le Isaraelu o le Atua,” e pei lava ona sa faaaunuua Isaraelu anamua i Papelonia. (Kalatia 6:16) I upu faavaloaga, na faamatalaina ai i latou e pei o ni tino o tagata oti o loo fola solo i le auala. Ae sa ia i latou pea se faanaunauga moni e fia tapuai atu ia Ieova i “le agaga ma le faamaoni.” (Ioane 4:24) O lea, i le 1919, na toe faaaʻe ai e Ieova i latou mai lo latou faaaunuua, i le toe faatūina aʻe o i latou mai lo latou tulaga oti faaleagaga sa iai. (Faaaliga 11:7-13) O le tali leotele mai lena a Ieova e Ioe atu ai i le fesili faavaloaga a Isaia: “E faatiga ea se nuu i le aso e tasi? E fanaua mai loa ea se nuu?” (Isaia 66:8) I le 1919, na toe iai ai tagata o Ieova e avea o se nuu faaleagaga i lo latou lava “laueleele,” po o lo latou tulaga faaleagaga i le lalolagi.
10. E amata mai i le 1919, o ā faamanuiaga ua olioli ai Kerisiano faauuina i lo latou “laueleele”?
10 I le saogalemu i lena laueleele, na auauna ai Kerisiano faauuina i le malumalu sili faaleagaga o Ieova. Sa filifilia i latou e avea o “le auauna faamaoni ma le mafaufau,” i le taliaina o le tiute tauave o le tausia o meatotino a Iesu o loo iai i le lalolagi, o se faaeaga o loo latou olioli ai pea a o latalata atu lenei 20 senituri i lona faaiuga. (Mataio 24:45-47) Sa lelei ona latou aʻoaʻoina le lesona e faapea, o Ieova o ia o “le Atua o le filemu.”—1 Tesalonia 5:23, NW.
11. Ua faaalia mai faapefea e taʻitaʻi lotu o Kerisinetoma o i latou lava o fili o tagata o le Atua?
11 Ae faapefea la i fili o le Isaraelu a le Atua? O le maelega o Ieova mo ona tagata ua tutusa lea ma lona toasa i ē tetee. I le taimi o le taua muamua a le lalolagi, na aumaia ai e taʻitaʻi lotu o Kerisinetoma le anoanoai o omiga a o latou taumafai—ma lē taulau—ina ia taofia lenei vaega toaitiiti o Kerisiano sa taʻutaʻuina atu le upu moni. I le taimi o le taua lona lua a le lalolagi, e tasi lava le manatu na autasi ai faifeau a Kerisinetoma: I itu uma e lua o le fetauaʻiga, sa latou uunaia ai faigamalo ina ia taofiofia Molimau a Ieova. E oo lava i aso nei, i le tele o atunuu, o loo faaoso ai e taʻitaʻi lotu faigamalo ina ia taofiofia pe faasā le galuega talaʻi faa-Kerisiano a Molimau a Ieova.
12, 13. Ua faapefea ona faaalia le toasa o Ieova faasaga ia Kerisinetoma?
12 E lē o lilo i le silafaga a Ieova lenei tulaga. Ina ua mavae le taua muamua a le lalolagi, na paʻū ai Kerisinetoma, faatasi ma le isi vaega uma o Papelonia le Aai Tele. (Faaaliga 14:8) Na amata ona lauiloa i le lautele le moni o le paʻū o Kerisinetoma, ina ua amata i le 1922 ona liligi ifo se faasologa o mala faafaatusa, ma faaalialia ai i lumāmea lona tulaga oti faaleagaga ma lapataia ai lona faaumatiaga o loo fotuai mai. (Faaaliga 8:7–9:21) O le faamaoniga o le faaauau pea ona liligi ifo o nei mala, na tauaaoina atu ai i le lalolagi aoao ia Aperila 23, 1995, le lauga “Ua Lata mai le Iuga o Lotu Sese” ona sosoo lea ma le tufatufaina atu o le faitau selau miliona o kopi o se lomiga faapitoa o Tala o le Malo.
13 I aso nei, ua iai Kerisinetoma i se tulaga pagatia. I le gasologa o le 20 senituri, ua fefasiotiai ai ona tagata lotu i taua sili ona matautia o loo faamanuia e ona patele ma faifeau. I nisi atunuu ua toetoe lava leai sona malosi. Ua fuafuaina nei o ia mo lona faaumatiaga, faatasi ai ma le isi vaega uma o Papelonia le Aai Tele.—Faaaliga 18:21.
Le Filemu mo Tagata o Ieova
14. O le ā le ata o upu faavaloaga ua aumaia ai tagata o loo filemu?
14 I se isi itu, i lenei tausaga o le 1996, ua olioli ai tagata o Ieova i le tele o le filemu i lo latou laueleele toe faafoisia, e pei ona faamatalaina i le faasilasilaga lona tolu a Ieova: “O loo faapea ona fetalai mai o Ieova o ʻau, E toe nonofo toeaina ma loomatutua i malae o Ierusalema; o le tagata foi ma lona tootoo i lona lima ona o le tele o latou tausaga. E tutumu foi malae o le aai i tama iti ma teine iti o loo taaalo i ona malae.”—Sakaria 8:4, 5.
15. E ui lava i taua a atunuu, ae o le ā le filemu lea ua olioli ai auauna a Ieova?
15 O nei upu matagofie ua faaata mai ai se mea mataina i lenei lalolagi o loo aasa ai faiga taua—o ni tagata o loo fifilemu. Ua faataunuuina upu faavaloaga a Isaia talu mai le 1919 e faapea: “O le filemu, o le filemu i le ua mamao, atoa ma le ua lata mai, ua fetalai mai ai Ieova; ou te faamaloloina foi o ia. . . . Ua fetalai mai loʻu Atua, E leai se filemu i e amio leaga.” (Isaia 57:19-21) O le mea moni, e ui ina leai se vaega a tagata o Ieova i le lalolagi, ae lē mafai ona latou ʻalo ese mai le aafia i faiga sauā a atunuu. (Ioane 17:15, 16) I nisi atunuu, o loo latou onosaia ai toatuga matuitui, ma ua oo lava ina fasiotia ai nisi. Peitai, o loo filemu Kerisiano moni i ni vala autū se lua. Muamua, ua latou “filemu ma le Atua ona o lo [latou] Alii o Iesu Keriso.” (Roma 5:1, NW) Lona lua, ua iai le filemu ia i latou lava. Ua latou atiina aʻe “le poto mai lugā,” lea e “muamua ona mamā, i le ua filemu.” (Iakopo 3:17; Kalatia 5:22-24) E lē gata i lea, o loo latou tulimatai atu ina ia olioli i le filemu i se tulaga e sili ona atoatoa, pe a avea “e agamalu, e fai mo latou tofi le lalolagi, ma o le a matuā faafiafia ai i latou ona o le filemu e tele.”—Salamo 37:11, NW.
16, 17. (a) Ua faapefea ona faamalosia le faalapotopotoga a Ieova, e “toeaina ma loomatutua” faapea foi ma “tama iti ma teine iti”? (e) O le ā e faataʻitaʻia mai ai le filemu o tagata o Ieova?
16 O loo iai pea ni “toeaina ma loomatutua” i le aufaatasiga a tagata o Ieova, o ē faauuina o loo latou manatua uluai manumalo sa iai o le faalapotopotoga a Ieova. O lo latou faamaoni ma lo latou tutumau ua matuā talisapaia. O ē faauuina sa lei matutua tele lo latou soifuaga, sa taʻimua i latou i le vaitaimi o aso ogaoga o tausaga e sefulu mai le 1930 e oo atu i le 1939, ma le Taua Lona Lua a le Lalolagi, faapea foi ma tausaga mataina o le tuputupu aʻe o le faalapotopotoga ia na sosoo mai ai. Ae maise lava foi talu mai le 1935, na faailoa manino mai ai e le “motu o tagata e toatele” o “isi mamoe” i latou lava. (Faaaliga 7:9; Ioane 10:16) A o faasolo ina afu le soifua o Kerisiano faauuina ma faasolo atu ina toaitiiti lo latou aofai, ua tauaveina ai e isi mamoe le galuega talaʻi ma faalautele atu i itu uma o le lalolagi. I tausaga talu ai nei, ua lolofi mai ai isi mamoe i le laueleele o tagata o le Atua. I le na o le tausaga lava ua tuanai, e 338,491 le aofai o i latou na papatisoina e faailogaina ai lo latou tuuina atu ia Ieova! I se tulaga faaleagaga, o loo matuā laiti lava nei tagata fou. O lo latou malaulau ma le aasa ua matuā faatāuaina a o latou faateleina aʻe muaʻau o i latou o loo pepese atu i viiga faafetai i “lo tatou Atua, o lē tietie i le nofoālii, atoa ma le Tamai Mamoe.”—Faaaliga 7:10.
17 I aso nei, ‘ua tutumu ai malae i tama iti ma teine iti.’ O Molimau ua matuā mataalia e pei o talavou. I le tausaga faaleauaunaga o le 1995, na maua ai lipoti mai le 232 o atunuu ma atumotu o le vasa. Ae ua leai se fetauaiga faavaomalo, e leai se feitagai i le va o ituaiga ma lanu, e leai se fuā lē tatau, i le va o ē faauuina ma isi mamoe. O loo tutupu aʻe faatasi i latou uma i le itu faaleagaga, ma autasi i le alofa. O le auuso i le lalolagi aoao o Molimau a Ieova ua matuā tutasi lava i le lalolagi.—Kolose 3:14; 1 Peteru 2:17.
Pe e Matuā Faigata ea ia Ieova?
18, 19. I tausaga talu mai le 1919, ua faapefea ona faataunuuina e Ieova se mea e foliga mai e matuā faigata ona talitonuina i le manatu faaletagata?
18 I tuā i le 1918 a o iai le na o ni nai afe o le vaega totoe faauuina o ē sa lotovaivai i lo latou faaaunuua faaleagaga, sa leai se tasi na mafai ona ia valoiaina le gasologa o le a faataunuu ai mea tutupu. Peitai ane, na silafia e Ieova—e pei ona faaalia mai i lana faasilasilaga lona fa faavavega e faapea: “O loo faapea ona fetalai mai o Ieova o ʻau, E ui lava ina faigata i le manatu o e ua totoe o lenei nuu i ia ona aso, pe faigata ea foi i loʻu manatu? ua fetalai mai ai Ieova o ʻau.”—Sakaria 8:6.
19 I le 1919, na toe faaolaolaina ai e le agaga o Ieova ona tagata mo galuega o loo fotuai mai. Ae sa manaomia ai pea le faatuatua ina ia tutumau ai i le faalapotopotoga toalaiti o tagata tapuai a Ieova. Sa toalaiti tele i latou, ma sa tele mea na lei manino i ai. Ae peitai, na auauai mālie ona faamalosia i latou e Ieova i le tulaga o le faalapotopotoga, ma faaauupegaina i latou e faia le galuega faa-Kerisiano o le talaʻia o le tala lelei ma le faia o soo. (Isaia 60:17, 19; Mataio 24:14; 28:19, 20) Sa faasolosolo mālie ona ia fesoasoani atu ia i latou ina ia latou mautinoa i mataupu tāua e pei o le solitu ma le pule silisili ese aoao. Pe sa matuā faigata ea mo Ieova ona faataunuuina lona finagalo e ala mai i lena vaega toalaiti o Molimau? O le tali i ai e matuā leai lava! O loo faaalia lenei mea i itulau e 12-15 o lenei mekasini, lea o loo taʻu mai ai le faasologa o galuega a Molimau a Ieova mo le tausaga faaleauaunaga o le 1995.
“E Fai foi Aʻu mo Latou Atua”
20. O le ā le tele na valoia o le a oo atu i ai le aoaoina o tagata o le Atua?
20 Ua faaalia atili i le faasilasilaga lona lima le tulaga fiafia o Molimau a Ieova i aso nei: “O loo faapea ona fetalai mai o Ieova o ʻau Faauta, ou te faaola i loʻu nuu nai le nuu e alu ae ai le la, ma le nuu e alu ifo ai. Ou te au mai na i latou, latou te nonofo ai i totonu o Ierusalema; e fai foi i latou moʻu nuu, e fai foi aʻu mo latou Atua i le faamaoni ma le amiotonu.”—Sakaria 8:7, 8.
21. I le ā le auala ua tausisia ma faalautele atu i ai le tele o le filemu o tagata o Ieova?
21 I le 1996 e mafai ona tatou fai atu e aunoa ma le faatalatū e faapea, ua talaʻia le tala lelei i le lalolagi aoao, mai “le nuu e alu ae ai le la” e oo atu i “le nuu e alu ifo ai.” Ua maua ni soo mai tagata o atunuu uma, ma ua latou vaaia ai le faataunuuga o le folafolaga a Ieova: “E aʻoaʻoina lau fanau uma lava e Ieova; e tele foi le manuia [“filemu,” NW] o lau fanau.” (Isaia 54:13) Ua tatou maua le filemu ona ua aʻoaʻoina i tatou e Ieova. Ona o lea fuafuaga, ua lomia ai lomiga i gagana e silia i le 300. I le na o le tausaga lava lea na teʻa nei, e 21 isi gagana na toe faaopoopo atu. E 111 gagana ua lomia ai nei le mekasini o Le Olomatamata i le taimi e tasi ma le faa-Peretania (simultaneous), ae 54 gagana ua faia ai faapea i le Awake! O tauaofiaga a atunuu ma faavaomalo ua aumaia ai se faailoaga i le lautele o le filemu o tagata o le Atua. O sauniga faalevaiaso ua autasia ai i tatou ma aumaia ai ia i tatou faalaeiauga tatou te moomia ina ia tumau mausalī ai. (Eperu 10:23-25) Ioe, o loo aʻoaʻoina e Ieova ona tagata i “le faamaoni ma le amiotonu.” Ua ia foaiina mai i ona tagata le filemu. Maeu lo tatou faamanuiaina ona ua tatou maua se vaega i lena anoanoai o le filemu!
Pe Mafai ona E Faamatala Mai?
□ I ona po nei, ua faapefea ona ‘fuā Ieova ma lona ita tele’ ona o ona tagata?
□ Ua faapefea ona olioli tagata o Ieova i le filemu, e oo lava i atunuu o loo aasa ai faiga taua?
□ I le ā le itu ua ‘tumu ai malae i tama iti ma teine iti’?
□ O ā sauniuniga ua faia ina ia mafai ai ona aʻoaʻoina e Ieova ona tagata?
[Fesili mo le Suʻesuʻega]
[Siata i le itulau 12-15]
LIPOTI O LE TAUSAGA FAALEAUAUNAGA O LE 1995 A MOLIMAU A IEOVA I LE LALOLAGI AOAO
(Tagaʻi i le lomiga)
[Ata i le itulau 8, 9]
I le senituri lona ono T.L.M., na iloa ai e tagata faamaoni o Iutaia, o ē na toe fausiaina le malumalu, e na o Ieova lava le puna maufaatuatuaina o le filemu