‘Ia Vaevaetonuina le Upu Moni’

UA AVEA le Afioga a le Atua e pei o se maota o loo teuina ai mataupu silisili ia e matuā aogā mo le mauaina o se olaga manuia. E mafai ona fesoasoani i se faifeau ina ia mafai ona aʻoaʻo atu, aoai ma faatonu atu. (2 Timoteo 3:16, 17) Peitai, ina ia mauaina atoatoa aogā mai i nei taʻiala ua saunia e le Atua, e tatau ona tatou mulimuli i le fautuaga a le aposetolo o Paulo ia Timoteo: “Ia e taumafai ina ia avea oe ma le ua fiafia mai i ai le Atua, o le faigaluega e leai se mea e mā ai, na te vaevaetonuina le upu moni.”—2 Timoteo 2:15, LT.

Ua faatusaina le Afioga a le Atua, i mea e pei o le suāsusu, meaʻai aano, vai ua faamamāina ma faafouina ai, se faʻata, ma se pelu maʻai. O le malamalama i mea o loo faatatau i ai nei faaupuga o le a fesoasoani ai i se faifeau e faaaogā ma le tomai le Tusi Paia.

Faasoaina le Suāsusu o le Afioga a le Atua

O le suāsusu o le meaʻai e manaomia e pepe fou faatoʻā fananau mai. A o tuputupu aʻe le pepe, e faasolosolo ona auauaʻi atu meaʻai aano i ana meaʻai, ae i le amataga lava, e na o le suāsusu e mafai ona ia faaaogaina. I le tele o tulaga, o i latou e itiiti so latou iloa e uiga i le Afioga a le Atua e pei i latou o pepe. E tusa lava pe o se tagata fou faatoʻā fiafia i le Afioga a le Atua pe faapea foi ua masani i ai mo se taimi umi, ae afai e gata lava lona malamalama i mataupu faavae o le Tusi Paia, o ia la o le pepe faaleagaga ma na te manaomia ia meaʻai e faigofie ona faamalūina—“suāsusu” faaleagaga. E lei oo ina mafai ona ia faamalūina “mea aano,” o mea loloto o le Afioga a le Atua.—Eperu 5:12.

O le tulaga lenei sa iai i le faapotopotoga fou faatoʻā amata i Korinito ina ua tusi atu Paulo ia i latou: “Na ou fafaga ia te outou i le suāsusu, a e le o mea aano; auā na outou le lavā i ona po ia.” (1 Korinito 3:2) Sa manaomia muamua i tagata Korinito ona latou aʻoaʻoina “mataupu muamua o le Afioga a le Atua.” (Eperu 5:12) O le tulaga sa iai lo latou tutupu aʻe, latou te lei mafai ona malamalama i “mea loloto . . . a le Atua” —1 Korinito 2:10.

I le pei o Paulo, e faaalia e faifeau Kerisiano i aso nei lo latou manatu mamafa mo pepe faaleagaga e ala i le avatu ia i latou o le “suāsusu,” o lona uiga, o le fesoasoani lea i ai ina ia mautū ona atiaʻe i aʻoaʻoga faavae faa-Kerisiano. Latou te faalaeiau i nei tagata fou po o ē e lei taʻumatuaina ina ia “atiaʻe le naunau i le suāsusu e le suia o le upu.” (1 Peteru 2:2, NW) Sa faaalia e le aposetolo o Paulo lona manatu mamafa i le uaʻi atu faapitoa lea e manaomia e tagata fou, ina ua ia tusi mai: “Auā o i latou uma ua faasusuina i le suāsusu, e le atamamai i latou i le upu o le amiotonu; auā o tama meamea i latou.” (Eperu 5:13) E manaomia e faifeau a le Atua le onosai, magafagafa, malamalama, ma le faapelepele a o latou tufa atu le suāsusu mamā o le Upu i tagata fou ma ē e leai se poto masani e ala i suesuega faale-Tusi Paia i aiga ma i le faapotopotoga.

Taulimaina o Meaʻai Aano o le Afioga a le Atua

Ina ia tupu aʻe ma maua le faaolataga, e tele mea e manaomia e le Kerisiano nai lo le “suāsusu.” Afai ua ia malamalama lelei ma taliaina upu moni faavae o le Tusi Paia, ua ia sauni la e faasolo atu i ‘mea aano ma ē matutua ia.’ (Eperu 5:14) E faapefea ona ia faia lenei mea? O le tulaga autū lava, e ala i se faasologa faifai pea o suesuega totino ma le aufaatasiga i sauniga faa-Kerisiano. O le iai o se masani lelei faapena o le a fesoasoani ai i se Kerisiano ina ia malosi  faaleagaga, taʻumatuaina, ma agavaa i le faiva. (2 Peteru 1:8) E lē tatau ona tatou faagaloina e faapea, e faaopoopo atu i le poto, o le faia o le finagalo o Ieova e aofia ai i meaʻai faaleagaga.—Ioane 4:34.

I aso nei, ua tofia le “auauna faamaoni ma le mafaufau” ina ia avatu i auauna a le Atua meaʻai i taimi talafeagai, ma fesoasoani ia i latou ia malamalama i le “poto uiga eseese o le Atua.” E ala i lona agaga, ua faaalia ai e Ieova, ia upu moni loloto o le Tusi Paia e ala mai i lenei auauna faamaoni, lea o loo lomiaina ma le faamaoni ia “mea e ʻai i ona itu aso [“taimi talafeagai,” NW].” (Mataio 24:45-47; Efeso 3:10, 11; faatusatusa i le Faaaliga 1:1, 2.) O loo i Kerisiano taitoatasi le matafaioi o le faaaogaina atoatoa o nei lomiga ua lomia.—Faaaliga 1:3.

E moni, o nisi mea o i le Tusi Paia e “faamatalagatā,” e oo lava i Kerisiano taʻumatuaina. (2 Peteru 3:16) E iai faamatalaga e lē faigofie ona malamalama i ai, o valoaga, ma talafaatusa e manaomia ai se suesuega tele ma mafaufau loloto i ai. O le mea lea, o le suesuega totino e aofia ai le eli i le Afioga a le Atua. (Faataoto 1:5, 6; 2:1-5) E faapitoa lava le iai o se tiute tauave a toeaina i lenei mea pe a latou aʻoaʻo atu le faapotopotoga. Pe o le faia o le Suesuega Tautusi a le Faapotopotoga po o le Suesuega o Le Olomatamata, faia o lauga lautele, po o le auauna ai i se isi vala o le aʻoaʻo atu, e ao lava i toeaina ona matuā masani lelei i a latou mataupu ma ia nofo sauni e uaʻi atu i o latou “tomai e aʻoaʻo atu” a o latou avatu meaʻai aano faaleagaga i le faapotopotoga.—2 Timoteo 4:2, NW.

O Vai e Faamamāina ma Faafouina Ai

Na taʻu atu e Iesu i le fafine Samaria i le vaieli e faapea o le a ia avatu ia te ia se mea na te inuina o le a “avea i totonu ia te ia o le vaipuna, e puna i luga i le ola e faavavau.” (Ioane 4:13, 14; 17:3) O lenei vai e maua ai le ola e aofia ai mea uma ua saunia e le Atua mo le mauaina o le ola e ala i le Tamai Mamoe a le Atua, ma o nei sauniuniga o loo faamatalaina i le Tusi Paia. I le avea ai o i tatou o nisi o loo fia inu i lena “vai,” tatou te talia ai le valaaulia mai i le agaga ma le faatoanofotane a Keriso ina ia “ave fua . . . le vai o le ola.” (Faaaliga 22:17) O le inu i lenei vai e mafai ona uiga i le ola e faavavau.

E lē gata i lea, ua faatulaga mai e le Tusi Paia tulaga tau amio mamā ma faaleagaga mo Kerisiano moni. A o tatou faatatauina nei faatulagaga mai le Atua, ua faamamāina ai i tatou i le Afioga a Ieova, ua “taeele” ai mai faiga leaga uma e inosia e Ieova le Atua. (1 Korinito 6:9-11) Ona o lenei mafuaaga, ua taʻua ai le upu moni o loo i totonu o le Afioga faagaeeina, o le ‘vai e faataeleina ai.’ (Efeso 5:26) Afai tatou te lē faatagaina le upu moni a le Atua e faamamāina i tatou i le auala lenei, o le a ia lē taliaina la tatou tapuaiga.

E mātauina foi, o toeaina o ē e ‘vaevaetonuina le upu moni’ o loo faatusaina foi i le vai. Na fai mai Isaia o i latou “e pei o vaitafe i le nuu naumati.” (Isaia 32:1, 2) E faataunuuina e toeaina alolofa lenei faatusatusaga pe a latou asiasi atu i o latou uso i le avea o i latou o ni leoleo mamoe faaleagaga, faaaogā le Afioga e faafouina ai a le Atua e avatu ai faalaeiauga, faamafanafanaga, ma faamatalaga faaleagaga e faamalosia ma faamautū ai.—Faatusatusa i le Mataio 11:28, 29. *

E faatalitalia ma le naunautai e tagata o le faapotopotoga ia asiasiga mai toeaina. “Ou te iloa lava le faafouina ai i toeaina ma ou te matuā fiafia ia Ieova ona o lona faia o lenei sauniuniga,” o le faamatalaga lena a Bonnie. Na tusi mai ia Lynda, o ia o se tinā e leai se tane e faapea: “E ala i faalaeiauga mai le Tusi Paia, na fesoasoani mai ai toeaina ina ia ou taulimaina mea. Latou te faalogo ma faaalia le alofa mutimutivale.” Fai mai Michael: “Na latou fesoasoani mai ia ou lagonaina o aʻu o se vaega o se faalapotopotoga e manatu mamafa mai.” Fai mai le isi tuafafine: “O asiasiga a toeaina na fesoasoani mai ai ia te au ia manumalo mai i vaitaimi na ou matuā loto vaivai ai.” O se asiasiga e faagaee ai faaleagaga a se toeaina e pei o se vaiinu e mālū, e faafouina ai. E faamafanafanaina ē pei ni mamoe pe a fesoasoani ia i latou ia toeaina alolofa ia iloa pe faapefea ona faatatauina  mataupu silisili faale-Tusi Paia i o latou tulaga.—Roma 1:11, 12; Iakopo 5:14.

Faaaogā le Afioga a le Atua o se Faʻata

Pe a tausamiina e se tasi ia meaʻai aano, o le fuafuaga e lē tau ina ia olioli ai i le tofo. Nai lo lena, na te faatalitalia ia faamalūina ma mafai ai ona ia gaoioi. Afai o ia o se tamaitiiti, na te faatalitalia o le a fesoasoani meaʻai ia te ia e tupu aʻe ai e avea ma tagata matua. E faapena foi meaʻai faaleagaga. E mafai ona avea suesuega totino faale-Tusi Paia o se mea e olioli ai, peitai e lē na ona pau lena o le mafuaaga e suesue ai. E ao ona suia i tatou e meaʻai faaleagaga. E fesoasoani mai ia tatou mātauina ma fua mai fua o le agaga ma fesoasoani mai ia tatou oofu i le “tagata fou, o le ua faafouina i le iloa, e faatatau ia foliga i le na faia o ia.” (Kolose 3:10; Kalatia 5:22-24) E fesoasoani mai foi meaʻai faaleagaga ia tatou tutupu aʻe ai i le taʻumatuaina, e faaleleia ai i tatou ia mafai ona faatatauina mataupu silisili faale-Tusi Paia i le taulimaina o o tatou faafitauli ma i le fesoasoani atu i isi e taulima o latou faafitauli.

E faapefea ona tatou iloa ua iai ni aafiaga faapena o le Tusi Paia ia i tatou? Tatou te faaaogā le Tusi Paia e pei o se faʻata. Na fai mai Iakopo: “A ia fai outou ma e anaana i le upu, a e aua le na ona faalogologo i ai . . . Ai se tasi e faalogologo i le upu a e le anaana i ai, e tusa ia ma le tagata ua vaavaai i le faaata i ona lava mata na fanau ma ia; auā ua vaavaai o ia ia te ia, ona alu ese lea, ua galo loa le uiga o ona mata. A o lē matuā matamata i le tulafono o le saʻolotoga ua atoatoa ona lelei, ma ua tumau i ai o ia, e le se faalogologo ma le faagalogalo lena tagata, a o le anaana i le galuega, e manuia o ia i lona lava anaana.”—Iakopo 1:22-25.

Tatou te ‘matuā matamata’ i le Afioga a le Atua pe a tatou iloiloina ma le faaeteete ma faatusatusa lo tatou tulaga ma le tulaga tonu sa tatau ona tatou iai e tusa ai ma tapulaa a le Atua. O lo tatou faia faapea, o le a avea ai i tatou ma e “anaana i le upu a e . . . le na o le na ona faalogologo.” O le a iai ni aafiaga lelei o le Tusi Paia ia i tatou.

E Pei le Afioga a le Atua o se Pelu

O le manatu mulimuli, ua fesoasoani mai le aposetolo o Paulo ia tatou iloa pe faapefea ona faaaogā le Afioga a le Atua o se pelu. Ina ua lapataia i tatou faasaga “i alii sili, ma faipule, ma alii o le pouliuli o lenei lalolagi, atoa ma agaga leaga i mea o i le lagi,” na ia uunaia i tatou ia “ave . . . le pelu a le Agaga, o le afioga lea a le Atua.” (Efeso 6:12, 17) Ua avea le Afioga a le Atua ma auupega sili ona manaomia tatou te faaaogā e lepeti ai po o ā lava manatu e “faatū mai e tetee i le poto e uiga i le Atua.”—2 Korinito 10:3-5, NW.

E le fesiligia, “o loo ola le afioga a le Atua, o loo matuā galue foi.” (Eperu 4:12) E fetalai mai Ieova i tagata e ala mai i itulau o lana Afioga faagaeeina. Ia faaaogā lelei i le aʻoaʻoina o isi atoa ma le faaalialia o aʻoaʻoga sese faalotu. Ia faaavanoa atu oe i ai ia e faalaeiau, atiaʻe, faafouina, faamafanafana, uunaia, ma faamalosia ai faaleagaga isi. Ma, tau ina ia “faaauupegaina outou e [Ieova] i galuega lelei uma lava e faia ai lona finagalo,” ina ia outou faia ai e lē aunoa le mea e “mālie i lana silafaga.”—Eperu 13:21, NW.

[Faaopoopoga i lalo]

[Ata i le itulau 31]

E faalaeiau e toeaina isi, i le ‘vaevaetonuina o le upu moni’