Na Latou Maua le Filemu i se Lalolagi Fevesiai

O LE ata o loo i le faavaa o lenei mekasini o loo taʻu mai ai se vaaiga i se taua matautia mai Bosnia ma Herzegovina. Pe e mafai ona iai le filemu i se nofoaga faapena? O le mea e ofo ai, o le tali o le ioe. A o fetauai le au Katoliko Roma, le au Eastern Orthodox, ma nuu o le au Mosalemi i lena atunuu mo fanua, e toatele tagata ua naunau mo le filemu, ma o nisi ua latou mauaina.

O le aiga o Djorem sa nonofo i Sarajevo, o i latou o ni Molimau a Ieova. I totonugalemu o fevesiaiga uma na fai i lena aai, na fai ai ma masani a lea aiga le asiasi atu i o latou tuaoi e tufa i ai le tala lelei o le Malo o le Atua. (Mataio 24:14) Aisea? Ona sa iloa e le aiga o Djorem, o lea Malo e moni, ua uma ona faavaeina i le lagi, ma e na o le pau lava lea o le faamoemoe sili mo le filemu o tagata. Ua iai i Molimau a Ieova le mautinoa atoatoa i le mea na taʻua e le aposetolo o Paulo “o le tala lelei o le leleiga [“filemu,” NW].” (Efeso 2:17) E faafetai ai i tagata e pei o Bozo ma Hena Djorem, ua mauaina ai nei e le toatele le filemu i Bosnia ma Herzegovina.

Filemu Moni o le a Oo Mai

E tele nisi mea e uiga i le aiga o Djorem. Ae seʻi o tatou talanoa muamua i se isi ulugalii na la maua le mautinoa i le Malo o le Atua. O o la igoa o Artur ma Arina. Sa la nonofo muamua ma le la fanau tama laiti i se tasi o setete i le oganuu lea na avea muamua o Soviet Union. Ina ua fetauai la tagata o le atunuu, na tau ai Artur mo le isi itu. E lei leva ae fesili ifo o ia, ‘Pe aisea ua ou tau faasaga ai i nei tagata sa avea muamua ma oʻu tuaoi?’ Na ia tuua le atunuu ma taunuu ane ai ma lona aiga talavou i Esitonia, ina ua mavae le tele o faafitauli na oo ia i latou.

I sana asiasiga i St. Petersburg, na feiloai ai Artur ma Molimau a Ieova ma na faagaeeina ai o ia i mea na ia aʻoaʻoina e uiga i le Malo o le Atua. O le finagalo o Ieova e faapea e lē o toe mamao ona pule tasi mai lea o le Malo o le Atua i luga o le fanau a tagata. (Tanielu 2:44) Ona avea loa lea o le lalolagi ma nofoaga filemu, e lē toe iai ni fetauaiga i tagata lava o se atunuu po o fetauaiga faavaomalo. Na vavalo Isaia e faatatau i lena taimi e faapea: “Latou te le faia se mea leaga, latou te le faaumatia foi se mea i loʻu mauga paia uma; auā e tumu le lalolagi i le malamalama o Ieova, e pei ona ufitia o le iliti tai i le suāsami.”—Isaia 11:9.

O le mātauina o le ata na tusia e se tusiata o lea lalolagi filemu i le lumanai, na faaali atu ia te ia e se Molimau mai se lomiga e fesoasoani ai  i suesuega faale-Tusi Paia, na matauina ai e Artur, e tai foliga faapea le nofoaga na ia nofo ai muamua. E ui i lea, i le taimi nei, ua faaleagaina e le taua na fetauai ai tagata o le atunuu. I Esitonia la, o loo aʻoaʻo atili ai e Artur ma lona aiga le Malo o le Atua e ala i se suesuega faale-Tusi Paia o loo faia ma Molimau a Ieova.

Filemu i Totonugalemu o Fevesiaiga

Ua faapea mai le Salamo 37:37: “Ina mafaufau ia i le ua sao lana amio, ma vaavaai i le ua amiotonu; auā o le iuga o lea tagata o le manuia [“filemu,” NW] lava lea.” O le mea moni, o le filemu o le tagata e amio saʻo ma amiotonu i fofoga o le Atua, e lē seʻiloga o lona lumanai. O loo olioli ai o ia i le taimi nei lava. Ua mafai faapefea lena mea? Seʻi manatu la i le mea na tupu i le tamaloa e igoa ia Paulo.

E nofo Paulo i se nofoaga mamao ese o tagata sulufai i saute i sisifo o Aitiope, e ui lava ina e sau o ia mai se atunuu e tuaoi ma lea nofoaga. I lona atunuu, na feiloai ai o ia ma se tasi o Molimau a Ieova sa faigaluega i le kamupanī suauu, ma na tuu atu e lea tamaloa ia te ia se lomiga e fesoasoani i le suesueina o le Tusi Paia, le tusi O Le Upu Moni e Taʻitaʻi ai i Le Ola Faavavau. * Na lei toe fetaui lava Paulo i le Molimau lea, ae na ia suesueina ma le faaeteete le tusi. O fetauaiga i lona atunuu, na faapogaia ai ona oo o ia i se nofoaga o le au sulufai i Aitiope, ma o iina na ia talanoa atu ai i isi e uiga i mea na ia aʻoaʻoina. Na iu ina talia e se vaega toaitiiti o tagata ia mea o le upu moni. E faavae i mea ia na latou aʻoaʻoina, na latou talaʻi ai loa lava i isi i le nofoaga o tagata sulufai.

Na tusi atu Paulo i le nofoaga tutotonu o le Sosaiete o le Olo Matamata mo se fesoasoani. Na ofo le faifeau talaʻi na auina mai Addis Ababa i le maua mai, e 35 tagata o loo faatalitali atu mo ia, ua sauni e aʻoaʻoina atili nisi mea e uiga i le Malo o le Atua. Sa faia loa fuafuaga mo le avatua o le fesoasoani i se tulaga faifai pea.

E mafai faapefea ona fai atu o tagata e pei o Paulo o loo olioli i le filemu? E lē o faigofie le tulaga o loo ola ai, ae ua latou faatuatua i le Atua. Pe a aafia i fevesiaiga o lenei lalolagi, latou te faatatauina le fautuaga a le Tusi Paia e faapea: “Aua neʻi popole outou i se mea e tasi, a ia faailoa atu o outou manao i mea uma lava i le Atua, i le tatalo, ma le faatoga, atoa ma le faafetai.” O le iuga, ua ia i latou ai le loto malie lea e seāseā ona iai i aso nei. Ua faatatau ia i latou upu a le aposetolo o Paulo i le faapotopotoga i Filipi e faapea: “O le manuia [“filemu,” NW] foi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau ia Keriso Iesu.” O le mea moni, ua latou lagonaina se faiā vavalalata ma Ieova, “le Atua e ona le manuia [“filemu,” NW].”—Filipi 4:6, 7, 9.

Filemu o loo Iai Nei

O le Tupu faapaleina o le Malo o le Atua o Iesu Keriso, ua taʻua i le Tusi Paia o le “Alii o le filemu.” (Isaia 9:6) Na taʻua e perofeta anamua e uiga ia te ia e faapea: “Na te tautala foi i le leleiga [“filemu,” NW] i nuu ese; o lana pule e pau mai i le sami e oo atu i le sami, e pau mai i le vaitafe e oo i tuluiga o le lalolagi.” (Sakaria 9:10) O upu faagaeeina e pei o nei upu, na iai se aafiaga loloto i le olaga o se tamaloa e igoa ia José.

I se tasi taimi na falepuipui ai José. Sa avea o ia ma tagata taufaamataʻu ma sa puʻeina o ia a o faia ana sauniuniga e faapa se pomu i se nofoaga o loo iai leoleo. Na manatu o ia faapea e na o faiga sauā e mafai ona faamalosia ai le  malo e faaleleia tulaga o loo iai i lona atunuu. A o iai la o ia i le falepuipui, na amata ai ona suesue e Molimau a Ieova le Tusi Paia ma lona toʻalua.

Ina ua toe faasaolotoina i tua José, na ia suesueina foi le Tusi Paia, ma e lei umi ae amata faatatauina ia te ia upu o le Salamo 85:8 e faapea: “Ou te faalogologo atu i mea e fetalaia mai e Ieova le Atua; auā na te fetalai mai ia manuia [“filemu,” NW] lona nuu atoa ma ona tagata amio Atua.” Ae, ua faaiuina ai lena fuaiupu i se lapataiga e faapea: “Aua neʻi latou toe liliu atu i le valea [“faafiapoto,” NW].” O lea la, o le tagata na te saili atu i le filemu o Ieova o le a lē toe manatu e gaoioi fia tutoatasi pe tetee i Lona finagalo.

I aso nei, ua avea José ma lana avā ma faifeau Kerisiano. Ua la tataʻiina atu isi i le Malo o Ieova, o le vaifofo lea i faafitauli ia na taumafai muamua José e foia i pomu e faia lava e ia. Ua la fiafia e faatuatua i le Tusi Paia lea ua fai mai: “E foaiina mai e Ieova lava le manuia.” (Salamo 85:12) O le mea moni, na asiasi atu talu ai nei José i le nofoaga lea na ia fuafua e faatamaia. Aisea? Ina ia taʻu atu i aiga o iai iina le Malo o le Atua.

Tagata Faatupu Filemu

Ua faapea mai le Tusi Paia i le Salamo 37:10, 11: “E toe itiiti, ona leai lea o le tagata amio leaga; e te mafaufau foi i le mea sa i ai o ia, a e leai lava. A o e agamalu, e fai mo latou le nuu; e faafiafia foi i latou ia te i latou ona o le manuia e tele.” Maeu se faamoemoe inā manaia!

Ae mātau, o le filemu a Ieova e mo na o “e agamalu.” O i latou o sailia le filemu e ao ona aʻoaʻoina le avea ma tagata faatupu filemu. O le mea lea sa tupu ia Keith, e nofo i Niu Sila. E faamatalaina faapea Keith o se tagata e “malosi i lona tino ma ona uiga totino, e faamisa, ma o se tagata finau vale.” Sa auai i se keni ma na nonofo i se fale sa avea ma ʻolo ia i latou, e iai togalaau e puipuia e ni taifau feai se tolu e osofaia tagata e osofai atu i le nofoaga. Sa teteʻa ma lana avā, le tinā o lana fanau e toaono.

Ina ua feiloai Keith ma Molimau a Ieova, na iai loa se aafiaga loloto o le tala lelei ia te ia. E lei leva ae auai faatasi o ia ma lana fanau i sauniga ma Molimau. Na ʻoti lona lauao na gata i puimanava le uumi, ma amata talanoa atu i ana aumea muamua e uiga i le Malo o le Atua. O nisi o i latou ia, na amata suesueina foi le Tusi Paia.

E pei o le faitau miliona o ē loto faamaoni i le lalolagi aoao, na amataina ai e Keith ona faatatauina upu a le aposetolo o Peteru: “O lē fia manao i le ola, ma ia iloa aso lelei, . . . ia ʻalo ese i le leaga, a ia fai mea lelei; ia saili i le filemu ma tausisi i ai.” (1 Peteru 3:10, 11) Na lotomalie le avā a Keith e la te toe faaipoipo, ma ua aʻoaʻoina nei Keith e “saili i le filemu ma tausisi i ai.”

O le filemu a Ieova ua avea ma laveai mo le toatele, e aofia ai se tasi na taalo i taaloga afeleti i totonu o le nuu lea na taʻua muamua o Soviet Union. Na manumalo pea lenei tagata i faailoga o tauvaga a le Olemipika, ae na ia lē fiafia i mea na tutupu ma tuua ai e ia taaloga ae liliu atu i vailaau faasaina ma le ʻava malosi. Ina ua mavae le sefulu iva o tausaga ma le tele o mea na tutupu ia te ia e aofia ai le faasala i se nofoaga faasala i Siberia mo le tolu tausaga, se malaga i se vaa e sola atu ai i Kanata, ma le faalua ona tau oti ona o vailaau faasaina ua puleaina ai, na ia tatalo ai i le Atua mo se fesoasoani ina ia ona mauaina se fuafuaga moni i le olaga. Na fesoasoani ia te ia se suesuega faale-Tusi Paia ma Molimau a Ieova e iloa faa-Rusia, i le mauaina o le tali i ana fesili. I aso la nei, ua maua ai e lea tagata le filemu ma le Atua faapea ma ia lava, e pei o le faitau miliona foi o isi.

Le Faamoemoe o le Toetu

Ae seʻi o tatou toe foi atu loa ia Bozo ma Hena Djorem i Sarajevo. Na iai se tama teine e lima tausaga le matua a lenei ulugalii, e igoa ia Matalena. Ia Iulai na teʻa nei, na tuua ai e i latou ia e toatolu lo latou aiga ae toe ō atu foi e faia la latou galuega talaʻi, ma na feoti ai i latou uma i se fanafanua na pa ai iina. Ae faapefea le filemu lea na latou talaʻiina atu i isi? Pe o le fanafanua ea na latou maliliu ai ua faaalia mai ai e lē o se filemu moni lea?

E leai lava! I lenei faiga o mea, e tutupu ai mala. Ua feoti tagata i pomu ma fanafanua. O  isi ua maliliu i maʻi po o ni faalavelave. O le toatele ua maliliu ona ua matutua. O i latou o loo olioli i le filemu mai le Atua e lē o saoloto mai ai i na mea tutupu, ae o le tutupu o na mea e lē o tuua ai i latou e aunoa ma se faamoemoe.

Na folafola atu e Iesu i lana uo o Mareta e faapea: “O aʻu nei o le toe tu ma le ola; o lē faatuatua mai ia te au, e ui lava ina oti, a e ola lava ia.” (Ioane 11:25) Na talitonu le aiga o Djorem i lenei mea, e faapena foi Molimau a Ieova uma lava. Na faatuatua foi le aiga o Djorem afai ae feoti, e toe faatutuina mai i latou i se lalolagi o le a avea moni lava i lea taimi ma nofoaga filemu. ‘O le a sōloiesea [e Ieova le Atua] loimata uma mai o latou mata, ma o le a lē toe iai se oti po o se faanoanoa po o se aue, e lē toe iai foi se puapuaga. Ua mavae atu mea muamua.’—Faaaliga 21:4.

A o toeitiiti lava oo i lona maliu, na fetalai atu ai Iesu i ona soo e faapea: “O loʻu manuia [“filemu,” NW] ou te avatu ai ia te outou. . . . Aua le atuatuvale o outou loto.” (Ioane 14:27) E tatou te olioli faatasi ma le aiga o Djorem na iai lena filemu ma e mautinoa o le a latou matuā olioli ai i le toetu. E tatou te fiafia mo i latou uma o loo tapuai ia Ieova, le Atua o le filemu. O i latou na o loo iai le filemu o le mafaufau. O loo olioli i le filemu ma le Atua. O loo latou atiina aʻe le filemu ma isi. O loo ia i latou foi le mautinoa i se lumanai filemu. Ioe, ua latou maua le filemu, e ui lava ina latou soifua i se lalolagi fevesiai. O le mea moni lava, o i latou uma o loo tapuai i le Atua i le agaga ma le upu moni, o loo olioli i le filemu. Talosia foi ia e mauaina lena filemu.

[Faaopoopoga i lalo]

[Ata i le itulau 7]

Ua latou mauaina le filemu e ui ina ola i se lalolagi fevesiai